Read idoma ULÚKU 12 Bible Online

ULÚKU 12 - idoma bible

ULÚKU 12

¹Eko nɛ̄ ācɛ ulúúlā le jīla, nēé bá ī le ikpó da iyī uwā ikpó báajɛ ā, ó da ayíkpó kú nū aflɛ́yí kahíníī, “Aá leyī kwɛcɛ ohígbū ɔdōnuīgbō kú ācɛ Ufarísīi. Ɛyí ɔdōnuigbō ɔ́ɔmā wɛ eyī ɛpa nēé lɛ ā.

²Ɛjɛ̄ɛ̄jī ɔdā dóódu nɛ̄ ācɛ yá tayínū kpɛ́mm ā, Ɔwɔicō géē je ɔ́ ca klɛ́ɛcɛ gēdēē.

³Ohígbū ɔ́ɔmā, ɔdā dúúmā nɛ̄ aá ka tayínū ā, é géē pó ɔ̄ ɛcɛ gēdēē. Ɔdā dúúmā nɛ̄ aá ka tū iyī aá ahɔ̄ ipú inu ā, é géē bī ɔ̄ tɔ́ɔna ŋmá ɛyí inu.

⁴“N̄ da aá, aóklóbīya um, aá híīī yúúfi ācɛ nēe lɛ ɔkpíyē ŋmó, amáŋ é lɛ ɔdā ɔhá nēé yá glá gɛ ŋ́ mā ŋ́.

⁵N géē ma ɔ̄cɛ nɛ̄ aá í yúúfi nū ā fú lɛ aá. Aá yúúfi Ɔwɔicō, nōo lɔfú lɛ ɔ̄cɛ ŋmó kwɛyí, lɛ íkwu ō je ɔ̄cɛ tá ipú ɔlíkɔtɔ ā. Aá cɛ̄ɛ̄lā kú um, anú wɛ ɔ̄cɛ nɛ̄ aá í yúúfi nū piíí á.”

⁶“Ó wɛ akpáŋdēde ɛhɔ̄ nēé gē je lá ɔkɔ́bɔ ɛpa ā ŋ́ nɛɛ? Náána Ɔwɔicō í mlanyī ō leyīkwu éyééye kú uwā ŋ́.

⁷Ɔwɔicō kōō jé áluka kú inyilɛyí nɛ̄ a lɛ ɛyí kú aá. Ohígbū ɔ́ɔmā aá yúúfi ŋ́, aá jē Ɔwɔicō eyī nɛ̄ɛnɛ̄hi fíyɛ́ akpáŋdēde alɛwa á.”

⁸“N da aá ka, ɔ̄cɛ dúúmā nōo le ka tɛ́ɛcɛ ipéyī ɛjɛ̄ɛ̄jī ācɛ ka anúɔ wɛ ɔyíkpó kú um. Ami, Ɔyínɔnyīlɔ kú Ɔ̄cɛ géē ka tɛ́ɛcɛ iyɔ̄bu aálelékwū-ōtɛhɔ kú Ɔwɔicō ka n jé ɔ̄cɛ ɔ́ɔmā.

⁹Amáŋ ɔ̄cɛ dúúmā nōo tá ka anúɔ í wɛ ɔ̄cɛ oyɛce um ŋ́ ipéyī ācɛ, n kē í tá ka ń jé ɔ̄cɛ ɔ́ɔmā ŋ́ iyɔ̄bū aálelékwū-ōtɛ̄hɔ̄ kú Ɔwɔicō.

¹⁰Ɔ̄cɛ dúúmā nōo lɛ ɛlā obɔ̄bí ka lɛyíkwu ami nōo wɛ Ɔyínɔ̄nyīlɔ kú Ɔ̄cɛ ā, é lɔfú je yá ɔ̄cɛ ɔ́ɔmā ɛhi glá. Amáŋ ɔ̄cɛ dúúmā nōo lɛ ɛlā obɔ̄bí ka lɛyíkwu Alelékwū Ihɔ, é gáā je yá ɔ̄cɛ ɔ́ɔmā ɛhi ŋ́.

¹¹Eko nēé lɛ aá bī wā iyɔ̄bū aígabɔ̄ kéē kɛpɔ̄ tū aá ipú aɛ́gogbɔ̄ɔkɔ ámāŋ ka iyɔ̄bū aɔ́cɛ́ ámāŋ ka aótrɛ̄yi, aá híīī lɛ ɛlá wu ɛ́gɛ́nɛ̄ aá géē kɔkɔ, ámāŋ kā ɔdā nɛ̄ aá géē ka ā ŋ́.

¹²Ohígbū ka Alelékwū Ihɔ géē nwū aá eko ɔ́ɔmā ɔdā nɛ̄ aá í ka ā.”

¹³Ɔ̄cɛ éyi ŋmá ipú ɛwa ā da Ujísɔ̄si kahíníī, “Utíca, da ɔyínɛ́ um nɔ̄nyīlɔ kóō lɛ úgwū kú ádā alɔ kɔ̄ mla um.

¹⁴Ujísɔ̄si ta ɔ̄ ohi kahíníī, “Ɔnyīlɔ, ɔ̄cɛ dúúmā í lɛ um yá ɔ̄cɛ ohɛ́pɔ̄ mla ɔ̄cɛ o kɔ̄ úgwū lɛ aá ɛplɛ́ɛpa ŋ́.”

¹⁵Ó klla da odúúdú uwā kahíníī, Aá leyī kwɛcɛ cɛ́ɛ́ kú aá gbō iyī aá ŋmá ɛdɔ kú únwū ɔdā ō yá dóódu. Ohígbū kéē gē miya oyēēyī ɔkwɛ̄yi kú ɔ̄cɛ ŋmá agbénú nōó lɛ ā ŋ́, ɛ́gɛ́ dúú nōó lɛ agbénú lɛ nááná”

¹⁶Anɔ́ɔ Ujísɔ̄si lɛ ita nyā kwu lɛ uwá á. “Ɔ̄cɛ nɛ̄hi éyi yɔ̄ nōo lɛ ajɛ nōo yá ɔdɛ̄hɔ̄ olɔhi nɛ̄ɛ̄nɛ̄hi.

¹⁷Anɔ́ɔ ó gbɔɔ́ ō gbɛlá ipú ɔtū kú nū kahíníī, “Ń lɛ ɛga ó kpó odúúdú ɔdɛ̄hɔ̄ kú um tū ŋ́. Ɔdí nɛ̄ n géē yá āa?

¹⁸Anɔ́ɔ ó da iyī nū kahíníī, “Ɔdā nɛ̄ n géē yá ā yɔ̄ á. N géē ca aɔ́bā kú um tāajɛ cɛ́ɛ́ n lɛ aɛ́nɛ̄hi fíyɛ́ uwā kpó gwó. Abɔ́ɔ ā nɛ̄ n géē kpó ikpɔ̄dɛ̄hɔ̄ mɛ́mla aɔ́dā ɔhá kú um tū á.

¹⁹Anɔ́ɔ n géē da iyī um ka n wɛ ɔ̄cɛ nɛ̄ ɛyí nū lɔhi nɛ̄hi! N le aɔ́dā olɔhi nɛ̄ n cɛgbá iháyí alɛwa ā lɛ ɛɛ́. N géē yá oyēēyī ɛmɛɛma, n géē lé í gwá cɛ́ɛ́ kú ɔtū kóō he um.

²⁰Amáŋ Ɔwɔicō da ɔ́ kahíníī, “A wɛ olíla! Otú mā, n géē mīyɛ oyēēyī kú uwɔ ŋmá ɛgiyí uwɔ. Ó lɛ ā, aɔ́dā nɛ̄ a kpó bá lɛ iyī uwɔ ā géē je pīya ákú ɔ̄nyɛ nɛ̄?”

²¹Ɛlā nyā nɛ̄ Ujísɔ̄si le ŋmó ɛlā kú nū ɛyí á, “Ɛ́gɛ́nyā nōó wɛ lɛ ācɛ nēe gē kpó agbénú bá lɛ iyī uwā, amáŋ é kē lɛ agbénú ɛgiyí Ɔwɔicō ŋ́ má á.”

²²Anɔ́ɔ Ujísɔ̄si da ayíkpó kú nū kahíníī, “Ɔ́ɔmā yá nɛ̄ n da aá ka aá híīī lɛ ɛlá wu ɔdā nɛ̄ aá í lé kú aá yēeyī ā ŋ́, ámāŋ ka īlī nɛ̄ aá géē le wiiyē a ŋ́.

²³Ohígbū ka oyēeyī cɛgbá nɛ̄ɛ̄nɛ̄hi fíyɛ́ ɔdōlé á. Ɔkpíyē kē cɛgbá nɛ̄ɛ̄nɛ̄hi fíyɛ́ īlī á.

²⁴Aá leyī yɛ aɔ́tágláma ɛ́ɛ́. É gē nyī īkpɔ̄dɛ̄hɔ̄ ŋ́, é kē ī ce ikpɔ̄dɛ̄hɔ̄ ŋ́. É kōō lɛ aɔ́bā nēe gē kpó īkpɔ̄dɛ̄hɔ̄ kú uwā tū ŋ́. Amáŋ Ɔwɔicō kē í je ɔdōlé lɛ uwá. Aá cɛgbá nɛ̄ɛ̄nɛ̄hi fíyɛ́ aígbáanɔ á.

²⁵Ɔ̄cɛ dúú nōo gē lɛ ɔtū plicō ohígbū oyēeyī kú nū, ɔ́ɔmā í gáā yá kóō jɛ licō lígii fíyɛ́ ɛ́gɛ́nɛ̄ ó lɛ ā glá ŋ́.

²⁶Ɔ́dāŋ ka ɔtū ō plicō kú uwɔ í yá ɔdā nɛ̄ŋ́cɛ́ ɛ́gɔ́ɔmā glá ŋ́, ɔdí wɛ ile kú o yɔ̄ gē lɛ ɔtū plicō lɛyíkwu aɔ́dā nɛ̄hi āa?

²⁷Aá leyī yɛ ɛ́gɛ́nɛ̄ aódodó kú ipácí gē jɛ̄ lɛ ā. É gē yúklɔ́ ī tá īlī lɛ iyī uwā ŋ́. Amáŋ n da aá koó kōō Usólōmɔn nōo lɛ agbénú nɛ̄hi ā, í lɛ īlī nōo lɔhi bɛ̄ɛka īlī nɛ̄ aódodó nēe bá nyā gē le wiiyē ā ŋ́.

²⁸Ɔwɔicō wɛ ɔ̄cɛ nōo gē lɛ īlī wu ácí kú ipácí iyē á. Ácí nēe yēeyī icɛ nɛ̄ óócí nēé le uwá kpó ŋmó, lɛ uwá kpó tū ɔlá ā. Aá gbɛlá ka Ɔwɔicō géē lɛ īlī wu aá iyē fíyɛ́ ŋ́ nɛɛ? Ɔtū nɛ̄ aá le ce Ɔwɔicō ā í nwuné ŋ́.

²⁹Ohígbū ɔ́ɔmā, aá yá ɔtū kpoókpoó gē lɛ ɔtū tá ɔdā nɛ̄ aá géē lé ámāŋ ka ɔdā nɛ̄ aá géē gwá ŋ́.

³⁰Ohígbū ka aɔ́dā ɔ́ɔmā nɛ̄ ācɛ kú aéwo kú ipú ɛcɛ nyā gē lɛ ɔtū tú uwá ī tíne á. Ádā aá kē jé ka aɔ́dā nēe bá nyā ce aá ɛgbá.

³¹Ikɔkɔ ɔ́ɔmā, aá yɔ̄ ī yá kú Ɔwɔicō kóō ce ɔcɛ́, cɛ́ɛ́ aɔ́dā mbá ā le pīya ákú dúú.

³²“Aá yúúfi ŋ́, aígwu nɛ̄ŋ́cɛ́ kú ɔlɛ́ um, ó géē he Ɔwɔicō ɔtū kóō je ɛga lɛ aá kú aá cɔɔcɛ́ mla anú ajɔ̄ɔ̄cɛ́ kú nū.

³³Aá kwú ɛjɛ̄ɛ̄jī ɔdā nɛ̄ aá lɛ ā í kpó lá kú aá kwú ije nū í kpó lɛ aógbɛhá. Ɛ̄nyā í wɛ agbénú nɛ̄ aá tútu báajɛ lɛ iyī aá ajɔ̄ɔ̄cɛ́ kú Ɔwɔicō á. Agbénú kú aá géē bá céé lɛ aá ajɔ̄ɔ̄cɛ́ ohígbū ka uwī dúú í gáā ga ɛgiyí nū glá, ɛ́ɛ́ nū ɛha gē tū ɔ̄ ŋ́.

³⁴Ohígbū ka ɔtū kú ɔ̄cɛ géē yɔ̄ ɛga nɛ̄ agbénú kú nū yɔ̄ ā.

³⁵“Aá lɛ̄ ɛ́nyɔ́ kú aá gbō, ká aá le tútū eko dóódu kú úklɔ́. Agege kú aá kóō yɔ̄ i cɛ̄ eko dóódu.

³⁶Ká aá lɛbɛ̄ɛka ācocɛ̄hɔ̄ nēe bá yɔ̄ ī gbēyī ɔkpani uwā kóō wā ɔlɛ́ ŋmá ɔnū ucɛ kú ɔnyāōlɛ ā. Ɔ́dāŋ kéē le tútū lɛ ahɔ̄ coge, é géē lɔfú nwūla ɔwɛ lɛ ɔ́ eko nōó lɛ abɔ̄ gbɔ̄ɔwɛ bōōbū ā.

³⁷Ákú ācocɛ̄hɔ̄ ɔ́ɔmā géē lɔhi ɔ́dāŋ nɛ̄ ɔkpani uwā gaá má uwā béeyī klla le tútū eko nōó pīyɛyí ā! N da aá koó géē lɛ iyī nū tútū, cɛ̄ lɛ uwá má cīce kéē lé ɔdōlé, ó kē ī wā í je ɔdōlé lɛ uwá abɔ̄yī nū.

³⁸Ákú uwā lɔhi ɔ́dāŋ nōó wā í lɛ uwá má le tútū, ó kōō wɛ ahāpōtú ámāŋ ka ofúlɔ̄cī nōó wā á!

³⁹Aá le je kpócíí ka ɔ́dāŋ nɛ̄ ádɔ̄lɛ́ ā lɛ eko nɛ̄ uwī í wā ā jé nɛɛ, ó gáā cɛ̄ lɛ uwī ca ɔwɛ ga ɔlɛ́ nū ŋ́.

⁴⁰Aá abɔ̄yī aá, dúú, í tútū ohígbū ka Ɔyínɔ̄nyilɔ kú Ɔ̄cɛ í wā eko nɛ̄ aá í leyīce ŋ́ mā”

⁴¹Upíta kahíníī, “Óndú, a yɔ̄ ī kwu ita nyā lɛ alɔ ofōōfū alɔ nɛɛ, kɛ̄ɛ ka a kwu ɔ́ lɛ ɛjɛ̄ɛ̄jī ācɛ?”

⁴²Óndú ā da ɔ́ kahíníī, “Ɛdɔ ɔ̄cɛ nyá wɛ ɔ̄cocɛ̄hɔ̄ nɛ̄ ɔ̄cɛ lɔtuce ɔ́ glá nōo klla jééyī ā? Ó wɛ ɔ̄cɛ nɛ̄ ɔkpani nū, eko nōó gáā nyɛ̄ɛ̄ ŋmá ɔlɛ́ ga iyāwu, kwu ɔlɛ́ ú tá ɔ̄ abɔ̄. Ó le da ɔ́ kóō bēē je ɔdōlé lɛ ācocɛ̄hɔ̄ ohile eko.

⁴³Ó í lɔhi lɛ ɔ̄cocɛ̄hɔ̄ ɔ́ɔmā ɔ́dāŋ nɛ̄ ɔkpani nū wā í má abɔ̄ ó yɔ̄ ī yá ɔdā nōó da ɔ́ kóō yá eko nōó pīyɛyí wā ɔlɛ́ ā!

⁴⁴N da aá ɔkwɔ̄ɔ̄kwɛ̄yi ka ɔkpani ā géē je odúúdú agbénú kú nū tū ɔ̄cocɛ̄hɔ̄ ɔ́ɔmā abɔ̄.

⁴⁵Amáŋ ɔ̄cocɛ̄hɔ̄ ɔ́ɔmā lɔfú da iyī nū ka ɔkpani anúɔ í gáā kwúcē wā fíya ŋ́. Anɔ́ɔ ó gbɔɔ́ ō ŋmá ācocɛ̄hɔ̄ nɔ̄nyīlɔ mɛ́mla ācocɛ̄hɔ̄ nɔ̄nyā ohile ijē á. Ó lé ɔdōlé, gwá ejé, ejé kē kwú ɔ̄.

⁴⁶Ɛ̄cī éyi, ɔkpani nū ā géē wā eko nɛ̄ ɔ̄cocɛ̄hɔ̄ ā ī leyī táajɛ nū ŋ́ mla eko nōó jé ŋ́ mā. Cɛ́ɛ́ ó géē yá ɔ̄cocɛ̄hɔ̄ ɔ́ɔmā italā. Ó géē hɛ́ ɔ̄ kpɛɛ́kpɛɛ́, cɛ́ɛ́ ó cɛ̄ lɛ ɔdā nōo yá ācɛ nēe lɛ ikpɛ̄yí olɔfú ā le yá ɔ̄.

⁴⁷Ɔ̄cocɛ̄hɔ̄ nōo jé ɔdā nɛ̄ ɔkpani nū tíne kóō yá, amáŋ nōó tū iyī nū tū ō yá ɔdā ɔ́ɔmā ŋ́ mā, é géē gɔ́ ɔ̄ itali nɛ̄ɛ̄nɛ̄hi igbalɛwa.

⁴⁸Amáŋ ɔ̄cocɛ̄hɔ̄ nōó jé ɔdā nɛ̄ ɔkpani nū tíne kóō yá ŋ́ mā, nááná nōó lɛ odée yá nēé cíkā ō gɔ́ itali ohígbū nū, italā kú nū géē wɛ ka é gáā gɔ́ ɔ̄ nwuné ŋ́. Ɔwɔicō gē leyīce ɔdā nɛ̄hi ŋmá ɛgiyí ɔ̄cɛ nōó lɛ ɔdā nɛ̄hi kpó lɛ ɔ́.

⁴⁹N wā gaá tū ɛcɛ ā ɔlá, eyī yá um ka ɔlá kóō kōō gbɔɔ́ ō yi mɛ́ɛ̄!

⁵⁰É gáā je um wu ipú ōwē nɛ̄hi ɛ́gɛ́nɛ̄ é gē lɛ ɔ̄cɛ wu éŋkpɔ̄ kú ubatísim ā. Ó wɛ iyó o gbɛnú nɛ̄hi gā um jāā gbéeko nōó le yá ŋmáajɛ.

⁵¹Aá gbɛlá ka n bī ɛbɔ́ wā ipú ɛcɛ nyā nɛɛ? Ehée, ń bī ɛbɔ́ wā ŋ́, amáŋ n wā í yá kú ācɛ kéē le kɔ̄ hɛ̄ iyī uwā tá.

⁵²Oŋmá abālɔbányā ipɔ́ɔnū nɛ̄ ācɛ ɛhɔ̄ bá anú géē je kɔ̄, nɛ̄ ācɛ ɛtá kú uwā í bī abɔ̄ éyi, nɛ̄ ācɛ ɛpa kē í bá abɔ̄ ɔhá.

⁵³Aádā mɛ́mla ayí uwā nɔ̄nyīlɔ í bɛ́yíkwú iyī uwā. Aɛ́nɛ́ mɛ́mla ayí uwā nɔ̄nyā kē í bɛyíkwu iyī uwā. Aɛ́nɛ́ ɔbá mɛ́mla anyā ayí uwā géē bɛyíkwu iyī uwā.

⁵⁴Anɔ́ɔ Ujísɔ̄si da ācɛ ā dúú kahíníī, “Eko nɛ̄ aá lɛ ojuja má yɔ̄ ī wā ŋmá ɛnɔ̄ɔ̄nɛ̄,obōōbū aá í ka ka ɔwɔ gáā yā ɛɛ́. Ó kē ī yā ɔkwɛ̄yi.

⁵⁵Eko nɛ̄ owu gbɔɔ́ ō tá ŋmá ɛháajɛ, aá ka iyē gáā kwɔ́lá ɛɛ́. Iyē kē ī kwɔ́lá ɔkwɛ̄yi.

⁵⁶Aá nēe wɛ ācɛ oleyīɛpa ā! Aá lɔfú le ɛcɛ má le ɔkpáncō má anɔ́ɔ aá gē ka ɔdā nōo gáā yá ā tɛ́ɛcɛ á. Ɔdíyá nɛ̄ aá jɛ́ɛyí kú ɔdá nōo yɔ̄ í yá eko nyā ŋ́ mā.

⁵⁷“Ɔdíyá nɛ̄ aá í jé ɔdā nɛ̄ aá cíkā ō yá ā ŋ́ mā ā?

⁵⁸Ɔ́dāŋ ka ɔ̄cɛ éyi lɛ ɔkpá tá ga uwɔ ɔnɛ́pɔ̄, cēyītīkwū kú awɔ mɛ́mla anú ká aá lɛ iyī aá kagwó gbɔbū ká ā ga únɛ́pɔ̄. Ɔ́dāŋ ka á kagwó mɛ́mla anú gbɔbū ŋ́, ó géē pī uwɔ ga iyɔ̄bū ɔcóohɛ́pɔ̄ nōo géē je uwɔ tū idáhandā abɔ̄. É kē í je uwɔ tā agbá.

⁵⁹N da uwɔ ka a géē klá abɔ́ɔ jāā gbéeko nɛ̄ a lɛ ɔkɔ́bɔ ámōōmɛ kú olóofī ā cíla.”