Read idoma ULÚKU 13 Bible Online

ULÚKU 13 - idoma bible

ULÚKU 13

¹Eko ɔ́ɔmā ācɛ éyi bá abɔ́ɔ nēe da Ujísɔ̄si lɛyíkwu ācɛ Ugálīli ōhī nɛ̄ Upáyílēti je ɔ́da kéē kpó ŋmó eko nēé bá ī gwɛ́ɛya lɛ Ɔwɔicō ā.

²Ujísɔ̄si tá uwā ōhī kahíníī, “Aá gbɛlá ka ācɛ Ugálīli nēe yá uwā odée ɔ́ɔmā mafú ka uwá wɛ ācɛ nēe bīya íne fíyɛ́ odúúdú ācɛ Ugálīli ohile á nɛɛ?

³N̄ da aá koó lɛ ā ŋ́. Ɔ́dāŋ ka aá pīyabɔ̄ ŋ́, aá géē je yíífi ɔwɛ ékpónú nēé je yíífi ā dúú.

⁴Aá gbɛlá kwu ācɛ igwáahātá kú Usílōwam nēe pɛ́ kwú eko nɛ̄ inɔ̄ɔda ogbāajɛ nɛ̄hi ā wúla klá uwá ā? Aá gbɛlá ka ɔ́ɔmā mafú ka uwá wɛ ācɛ nēe bīya íne fíyɛ́ odúúdú ācɛ ɔhá kú Ujerúsālɛm á nɛɛ?

⁵Ehée, ó lɛ ā ŋ́! N̄ da aá ka ɔ́dāŋ ka aá pīyabɔ̄ ŋmá íne nɛ̄ aá yɔ̄ ī bīya ā ŋ́, aá géē je yíifi ɔwɛ nēé je yíifi ā dúú.

⁶Anɔ́ɔ Ujísɔ̄si lɛ ita nyā kwu lɛ uwá á. Ó kahíníī, “Ó lɛ ɔ̄cɛ éyi yɔ̄ nōo lɛ ɔcí ufígi ipú ɛhɔ̄ īkpɔ̄cí kú nū. Ó nyɔ̄ ɔkwu ɔcí ā gaá dɔɔ̄kā ikpō ufígi, amáŋ ó má odóódu ŋ́.

⁷Anɔ́ɔ ó da ɔ̄coyúklɔ́ ɛhɔ̄ ā kahíníī, “Mɔ́ɔ̄ ɛ́ɛ́, iháyí ɔ́mɛta yɔ̄ mɛ́ɛ̄ á nɛ̄ n gē wā amānyā gē dɔɔ̄kā ikpo ufígi, ŋmá ɔcí ufígi nyā ā. Ń kē má ikpó dúúmā ŋ́. Lɛ ɔ́ hɛ́ ŋmá ajɛ! Ɔdí yá nōó yɔ̄ ī mīyɛ ajɛ kú ɔcí ɔhá tābɔ̄ ā?

⁸Amáŋ ɔ̄coyúklɔ́ ɛhɔ̄ ā tá ɔ̄ ohi kahíníī, “Habɔ̄ tá cíí, ɔkpani, iháyí ékpónú ōfōōfūnū. N géē bu ɔgɔ̄ tá ɔkwu nū cɛ́ɛ́ n lɛ ajɛ ɛyétutulu kpó tū ɔ̄ ɔkwu biílí.

⁹Cɛ́ɛ́ ɔ́dāŋ nɛ̄ ɔcí ā lɛ īkpō gwá iháyí ɔhá, ó lɔhi fíyɛ́. Ɔ́dāŋ nōó kē gwá īkpō ŋ́, ó lɛ ā, a cɛ̄ lɛ uwá lɛ ɔ́ hɛ́ tónū.”

¹⁰Ɛ̄cī usábāti éyi, Ujísɔ̄si yɔ̄ ī nwū ɛlɔ̄ɔwɔicō ipú ɛgogbɔ̄ɔkɔ éyi.

¹¹Ó lɛ ɔnyā éyi nɛ̄ alelékwū obɔ̄bí lā ipú iye kú nū, nōó cɛ̄ lɛ ɔ́ doōcē iháyí igwáahātá. Ó le hā táajɛ í hayi kpaakpa fúlufúlu glá ŋ́.

¹²Eko nɛ̄ Ujísɔ̄si lɛ ɔ́ má ā, ó lɛ ɔ́ hīgwú da ɔ́ kahíníī, “Ɔnyā, é lɛ uwɔ hɛ́tá ŋmá ōcē kú uwɔ ɛɛ́!”

¹³Ó kwú abɔ̄ ú ce ɔ́, anɔ́ɔ ɔkwɔɔkwu ɔ́ɔmā, ó má háyi icō kpaakpa anɔ́ɔ ó gbɔɔ́ ō cɛ̄tra Ɔwɔicō á.

¹⁴Ɔ̄cɛ nōo ī leyīkwu ɛgogbɔ̄ɔkɔ ā le cɔ̄nū ka Ujísɔ̄si lɛ ɔ̄cɛ hɛ́tá ɛ̄cī usábāti, anɔ́ɔ ó kɛlā tɛ́ɛcɛ lɛ ācɛ ā kahíníī, “Ó lɛ ɛ̄cī ɛhīlī nɛ̄ aá cíkā o yúklɔ́. Ohígbū ɔ́ɔmā, aá wā ipú ɛ̄cī nēe bá abɔ́ɔ ā kéē hɛ́ aá tá, amáŋ ó híīī wɛ ɛ̄cī usábāti ŋ́.”

¹⁵Óndú ā tá ɔ̄ ohi kahíníī, “Awɔ ɔ̄cɛ oleyīɛpa! Ɔnyɔɔnyɛ kú aá gē wī ɔbá ɛna ámāŋ ka ijakī kú nū ŋmá ɔcí gē bī ɔ̄ gaá gwá éŋkpɔ̄ ɛ̄cī usábāti.

¹⁶Ó cɛgbá kéē lɛ ɔnyínɔ̄nyā kú Ébrahām nɛ̄ alelékwū obɔ̄bí gbō báajɛ iháyí igwáahātá ā hɛ́tá ɛ̄cī usábāti ŋ́ nɛɛ?”

¹⁷Ohi nōó tá nyā cɛ̄ lɛ uwēyī lɛ ācɛ nēe bɛyíkwu ɔ̄ ā kwú. Anɔ́ɔ ācɛ nēe bá abɔ́ɔ ā gwéeyē ohígbū ɔdā ō hídáagó nɛ̄ Ujísɔ̄si yá ā á.

¹⁸Ujísɔ̄si le ɔ̄kā da kahíníī, “Ɔdí nɛ̄ ɔ̄cɛ géē lɛ ajɔ̄ɔ̄cɛ́ kú Ɔwɔicō gbla anú ā?

¹⁹Ó lɛbɛ̄ɛka ɔdā nɛ̄ ɔ̄cɛ kwú īkpō kú Umɔ́sāadi í nyɔ̄ í nyi ɛhɔ̄ ɔlɛ́ nū. Ɔdā nēé nyi ā le jɛ̄ kwú pīya ɔcí nɛ̄hi, anɔ́ɔ aígbáanɔ wā ī lɛ ɔlɛ́ uwā gwó ce abɔ̄ nū á.”

²⁰Ujísɔ̄si lɛ ɔ̄kā da kpɔ́ kahíníī, “Ɔdí nɛ̄ n géē lɛ ajɔ̄ɔ̄cɛ́ kú Ɔwɔicō gbla anú ā.

²¹Ó lɛbɛ̄ɛka ɔ̄cɛnyā nōo kwú ɔdonūigbō ú lɛ ɔ́ wīya tɔ̄hā mla ámú kú igbo ɛtá jāā gbéeko nɛ̄ ɛjɛ̄ɛ̄jī ámú kú igbo ā kwú nū dúúdú.”

²²Abɔ̄ Ujísɔ̄si yɔ̄ ī gɔbū ī nyɔ̄ ga Ujerúsālɛm ā, ó yɛ bū aípɔ́lɛ́ mɛ́mla aígelī alɛwa yɔ̄ gē nwū ācɛ ā ɛlā Ɔwɔicō.

²³Anɔ́ɔ ɔ̄cɛ éyi le ɔ̄kā da ɔ́ kahíníī, “Ɔkpani ācɛ nōo gáā ga ajɔ̄ɔ̄cɛ́ kú Ɔwɔicō í gáā lɛwa ŋ́ nɛɛ?” Ujísɔ̄si lɛ ohi tá uwā kahíníī.

²⁴“Aá píyɛga kú aá le yɛ bū ɔwɛ opíbá ā. Ohígbū ka ācɛ alɛwa géē nya cidaa kéē le bū ɔ̄, amáŋ é gaá bū ɔ̄ glá ŋ́.

²⁵Eko nɛ̄ óndú ɔlɛ́ ā nyāŋjɛ lɛ ɔdūngwɔ̄wɛ ā gwū, cɛ́ɛ́ aá háyi okómpīinu iyɛ̄cɛ gbɔɔ́ ō lɛ abɔ̄ gbo ɔwɛ gē ka kahíníī, ‘Lɛ ɔwɛ nwūla lɛ alɔ, ɔkpani! Ó géē tá aá ohi kahíníī, ‘N jé aá ŋ́.’

²⁶Cɛ́ɛ́ aá géē tá ɔ ohi kahíníī, “Alɔ lé ɔdōlé klla gwá mla awɔ. A nwū ɛlɔ̄ɔwɔicō ipú igelī kú ɔlɛ́ alɔ!’

²⁷Amáŋ ó klla géē ka igbɔhá kahíníī, ‘N jé aá ŋ́. Aá nyɛ̄ɛ̄ ŋmá ɛgiyí um, ācobɔ̄bíipú!’

²⁸Aá géē tɛgíkwū í hīla aīnu eko nɛ̄ aá í má Ébrahām mɛ́mla Ayísīki mɛ́mla Ujékɔ̄pu mɛ́mla odúúdú ācomɛ́ɛbɛ ā bá ipú ajɔ̄ɔ̄cɛ́ kú Ɔwɔicō, amáŋ é kē lɛ aá nū tɛ́ɛcɛ!

²⁹Ācɛ géē wā ŋmá ɛnɔ̄ɔ̄cī mɛ́mla ɛnɔ̄ɔ̄nɛ̄, ŋmá ɛhícō mɛ́mla ɛháajɛ, é géē cīce í lé ucɛ ipú ajɔ̄ɔ̄cɛ́ kú Ɔwɔicō.

³⁰Cɛ́ɛ́ ācɛ nēe tá igbīhi abālɔbányā ā géē je pīya ācɛ aflɛ́yí. Ācɛ nēe wɛ aflɛ́yí abālɔbányā géē je pīya ācɛ o tá igbīhi.

³¹Eko ɔ́ɔmā piíí ā ācɛ Ufárisīi ōhī le pɛ́ wā í da Ujísɔ̄si kahíníī, “Nyɛ̄ɛ̄ ŋmá amānyā ká ā nyɔ̄ ga ɛga ɔhá, ohígbū ka ɔcɛ́ Uhérɔ̄du tíne ō lɛ uwɔ ŋmó.”

³²Ujísɔ̄si tá uwā ohi kahíníī, “Aá nyɔ̄ gaá da ɛpā ɔ́ɔmā kahíníī, “N yɔ̄ ī nū aálelékwū obɔ̄bí tɛ́ɛcɛ, n klla yɔ̄ ī hɛ́ ācɛ tá ŋmá ōcē ícɛ mɛ́mla ócí. Cɛ́ɛ́ ɛcí ɔ́mɛtá ā, n géē yúklɔ́ kú um kwɛyí.

³³Nááná n géē nyɛ̄ɛ̄ ícɛ, óócí mɛ́mla ɛ̄cī ɔhá. Ó le kpaakpa kéē lɛ ɔ̄comɛ́ɛbɛ ŋmó ɛga ɔhá gwu Ujerúsālɛm tá ŋ́.

³⁴Woó Ujerúsālɛm! Ujerúsālɛm! Ācɛ kú uwɔ lɛ ācomɛ́ɛbɛ kpó ŋmó, klla bī ɛcɔ̄ lɛ ācɛ nēé tɛ̄hɔ̄ fu uwā ā kpó ŋmó. Igbɛmlá nɛ̄ n tíne kú n lɛ odúúdú ācɛ ɔlɛ́ uwɔ túbá ɛ́gɛ́nɛ̄ ɛ́nɛ́ ugwū gē kpó ayípɛ̄ ɔlɛ́ nū tū ɛháajɛ acá kú nū ā. Amáŋ é jɛga ga um ŋ́!

³⁵É géē pɛ́ kwu ŋmá Agblīihɔ-nɛ̄hi kú uwɔ. Aá le jé kpɔ́cíí ka aá gáā má um gɛ ŋ́ jāā gbéeko nɛ̄ aá géē ka kahíníī, “Ɔwɔicō kóō hɔ́hā ce ɔ̄cɛ nōo Ɔwɔicō tɛ̄hɔ̄ fu alɔ ā!”