Read idoma ULÚKU 14 Bible Online

ULÚKU 14 - idoma bible

ULÚKU 14

¹Ɛ̄cī Usábāti éyi ɔ̄cɛ ojīlīmā nɛ̄hi kú Ufárisīi éyi lɛ Ujísɔ̄si hīgwú kóō wā í le ɔdōlé lé ɔlɛ́ anúɔ. Ācɛ nēe bá abɔ́ɔ ā yɔ̄ ī gbō Ujísɔ̄si gɛɛ kéē má ɔdā nōó géē yá ā.

²Ɔ̄cɛnyīlɔ éyi nɛ̄ ikpo mɛ́mla abɔ̄ kú nū le kpó mi yɔ̄ abɔ́ɔ dúú.

³Anɔ́ɔ Ujísɔ̄si le ɛlā ka lɛ aútíca kú íne ā mɛ́mla ācɛ Ufárisīi ā kahíníī, “Īné kú alɔ jɛga lɛ ɔ̄cɛ kóō hɛ́ ɔ̄cɛ ɔhá tá ŋmá ōcē ɛ̄cī usábāti, kɛ̄ɛ koó je ŋ́?

⁴Amáŋ é tá ɔ̄ ohi dúúmā ŋ́. Ujísɔ̄si kwú abɔ̄ ú ce ɔ̄cɛnyīlɔ ā, anɔ́ɔ ó lɛ ɔ̄ hɛ́tá ŋmá ōcē ā, anɔ́ɔ ó da ɔ́ kóō nyɔ̄ á.

⁵Anɔ́ɔ ó da uwá kahíníī, “Ɔ̄cɛ í jé ŋ́ nɛ̄ ɔ̄cɛ éyi ká aá lɛ ɔyínɔ̄nyīlɔ ámāŋ ka ɔbá ɛna nōo le míya tá ipú obugā, ɔdí nɛ̄ aá í yá ā? Aá géē gwōtū ipú obugā nyɔ̄ í lɛ ɔ́ pi wɛ̄ɛcɛ nááná nōó wɛ ɛ̄cī usábāti ā.

⁶Ācɛ ā í má ohi tá ɔ̄ lɛyíkwu ɛlā nyā ŋ́.

⁷Ujísɔ̄si le ɛ́gɛ́nɛ̄ aúgbɔga nēé hīgwú ā bī gē kwu ɛga ocīce olɔhi fíyɛ́ ā lɛ iyī uwā ā má, anɔ́ɔ ó le ita nyā kwu lɛ uwá á.

⁸Ó kahíníī, “Eko nɛ̄ ɔ̄cɛ éyi lɛ aá hīgwú kú aá wā gaá lé ucɛ kú ɔnyāolɛ, aá híīī nyɔ̄ gaa cīce ɛga olɔhi fíyɛ́ dúú ā ŋ́. É lɔfú lɛ ɔ̄cɛ éyi nōo cɛgbá fíyɛ́ ɔ̄ hīgwú dúú.

⁹Cɛ́ɛ́ ɔ̄cɛ nōo hī aá ɛpɛplɛ́ɛpa igwú ā, lɔfú wā í tá uwɔ, í ka ga awɔ kahíníī, ‘Lɛ ɛga je lɛ ɔ̄cɛ ā kóō má cīce amānyā.’ Uwēyī géē kwú uwɔ cɛ́ɛ́ ā nyɔ̄ gaá cīce ɛga nōo tū wāajɛ fíyɛ́ dúú ā.

¹⁰Ikɔkɔ ɔ́ɔmā, eko nēé le uwɔ hīgwú, nyɔ̄ gaá cīce ɛga nōo tū wāajɛ fíyɛ́ dúú ā, cɛ́ɛ́ kú ɔ̄cɛ nōo hī aá igwú ā kóō wā ɛgiyí aá gaá da uwɔ kahíníī, ‘Wā icō amānyā, oklóbīya um, ga ɛga o lɔhi fíyɛ́ nyā.’ Ɛ̄nyā géē bī ojīlīmā gē lɛ aá ipéyī ācɛ ohile nēé hīgwú dúú ā.

¹¹Ohígbū ka ɔ̄cɛ dúúmā nōo lɛ iyī nū je gicō nɛ̄hi, Ɔwɔicō géē tá ɔ̄ wāajɛ. Ɛjɛ̄ɛ̄jī ācɛ dóódu nēe tá iyī uwā wāajɛ ā, Ɔwɔicō géē lɛ uwá pīya ācɛ ocɛgba nɛ̄hi.”

¹²Anɔ́ɔ ó da ɔ̄cɛ nōo hī ɔ̄ igwú ā kahíníī, “Eko dúúmā nɛ̄ a lɛ ucɛ yá klɛ́ɛcɛ, ɔlɛ́ɛnɔ ámāŋ ka ɔnɔ̄ɔ̄nɛ̄, a híīī hī aóklóbīya ámāŋ ka ayínɛ́ uwɔ nɔ̄nyīlɔ ámāŋ ka aɔ́máapú uwɔ ámāŋ ka aóladógbe kú uwɔ nēe lɛ agbénú ā igwú ŋ́. Ohígbū kéē géē hi uwɔ igwú wā ɔnū ucɛ dúú, cɛ́ɛ́ ó ī wɛ óluma nɛ̄ a tū uwā ā nēé cíla awɔ á.

¹³Eko nɛ̄ aá lɛ ucɛ yá klɛ́ɛcɛ, lɛ ācogbɛhá, ācodɔgwu ajɛ, aócīkpó mɛ́mla aópeyī hīgwú.

¹⁴Cɛ́ɛ́ eko nɛ̄ Ɔwɔicō géē je ācɛ nēe lɛyítáajɛ lɛ ɔ́ ā héyī ŋmá olekwu, ó géē hɔ́hā ce uwɔ ohígbū ka aá lɛ óluma tū ācɛ nēé má ɔdā dúúmā le cíla óluma nɛ̄ aá tū uwā ā ŋ́ mā ā.

¹⁵Eko nɛ̄ ɔ̄cɛ éyi ipú ācɛ nɛ̄ cīce bá ī lé ɔdōlé tɔhá mla anú ā lɛ ɛlā nyā pó ā, ó da Ujísɔ̄si kahíníī, “Ákú ācɛ nēe géē cīce í lé ucɛ ajɔ̄ɔ̄cɛ́ kú Ɔwɔicō ā lɔhi!”

¹⁶Ujísɔ̄si da ɔ́ kahíníī, “Ó lɛ ɔ̄cɛ éyi yɔ̄ eko éyi nōo yɔ̄ í yá ucɛ klɛ́ɛcɛ. Anɔ́ɔ ó lɛ ācɛ alɛwa hīgwú wā ɔnū ucɛ ā á.

¹⁷Eko nɛ̄ eko kú ucɛ ā le yá ā, ó lɛ ācocɛ̄hɔ̄ kú nū tɛ̄hɔ̄ fu aúgbɔga ā kahíníī, ‘Aá wā, é lɛ ɔdā dóódu tútū ɛɛ́!’

¹⁸Amáŋ ācɛ ā gbɔɔ́ ō dɔɔ̄kā ɔdā ō labɔ̄ bá ɔ̄. Ɔ̄cɛ aflɛ́yí ā da ɔ̄cocɛ̄hɔ̄ ā kahíníī, ‘N lɛ ajɛ lá, ó kē cɛgbá ká n̄ nyɔ̄ í lɛ ɔ́ má. Kócōō lɛ ɛga je gā um.

¹⁹Ɔ̄cɛ ɔhá kahíníī, ‘N lɛ ɔbá ɛna o le hɛ́hɔ̄ igwó lá, n kē yɔ̄ ī nyɔ̄ ká n̄ jé uwā má ɔ́dāŋ kéē í yúklɔ́. Kócōō lɛ ɛga je gā um.

²⁰Ɔ̄cɛ ɔhá kahíníī, ‘N lɛ ɔnyā lɛ ɛ̄yīpɛ̄pɛ̄, ohígbū ɔ́ɔmā, ń wā glá ŋ́.’

²¹Ɔ̄cocɛhɔ̄ ā le ɛjɛ̄ɛ̄jī ɔdā nēe bá nyā kpó ka lɛ ɔkpani nū kpɛ́mm. Ɔkpani ā le cɔ̄nū nɛ̄hi anɔ́ɔ ó da ɔ̄cocɛ̄hɔ̄ ā kahíníī, ‘Páápá, nyɔ̄ ga uláyi mɛ́mla ɔwɛ ɛkwūbá kú ipú igelī ā, cɛ́ɛ́ ká ā lɛ aógbɛhá, ācodɔgwu ajɛ mɛ́mla aópeyī mɛ́mla ācocīkpó kpó wā.

²²Eko kpií ɔ̄cocɛ̄hɔ̄ ā kahíníī, ‘Ɔkpani n lɛ ɔ́da kú uwɔ ā yá jila ɛɛ́ n. Amáŋ ɛga yɔ̄ lɛ ācɛ alɛwa kpɔ́ ɛ́ɛ́ n.’

²³Anɔ́ɔ ɔkpani ā da ɔ̄cotɛ̄hɔ̄ ā kahíníī, “Nyɔ̄ ga ɔwɛ eyīpɔ́lɛ́ mɛ́mla ɔgwu ā ká ā lɛ ācɛ kpó pī wā, cɛ́ɛ́ kú ɔlɛ́ um kóō le mu.

²⁴N da aá kahíníī, ‘Ó lɛ ɔ̄cɛ dúúmā kú ipú ācɛ nēe hīgwú aflɛ́yí ā nōo í le okónu bá ɔdōlé kú um ŋ́.”

²⁵Ɛwa nɛ̄hi kú ācɛ bá yɔ̄ ī yɛce Ujísɔ̄si ɛ̄cī éyi, anɔ́ɔ ó pīyeyī igbīhi da uwá kahíníī,

²⁶“Ɔ̄cɛ dúúmā nōo wā ɛgiyí um í gáā wɛ ɔyíkpó kú um glá ŋ́, ń táafú ŋ́ n he ɔ́ ɔtū fíyɛ́ ádā nū mɛ́mla ɛ́nɛ́ nū, mɛ́mla ɔnyā nū mɛ́mla ayí nū mɛ́mla ayínɛ́ nū nɔ̄nyīlɔ mɛ́mla anú abɔ̄yī nū dúú.

²⁷Ɔ̄cɛ dúúmā nōó je ɔcóōnyɔ́kpá kú nū ce ɔkɔ kóō yɛce um ŋ́, í gáā wɛ ɔyíkpó kú um glá ŋ́.

²⁸Ɔ́dāŋ ka ɔ̄cɛ dúúmā gáā gwó inu, ó gē má cīce cɛ́ɛ́ ó gē lɛ ɔdā nōó gáā ŋmó tū ɔ̄ ā jé gbɔbū, ó yá ɛ́ɛ́ kóō le jé ɔ́dāŋ ka ije nōó lɛ ā gwó inu ā glá.

²⁹Ɔ́dāŋ ka ó yá lɛ ā ŋ́, ekōhī ŋ́ ó géē lɔfú lɛ ikpínu ā táajɛ anɔ́ɔ ó le má ka anúɔ í gwó inu ā kwɛyí glá gɛ ŋ́ má. Ɔ́dāŋ ka ɛnyā í yá lɛ ā, ɛjɛ̄ɛ̄jī ācɛ nēe má ɔdā nōó yá ā géē yá ɔ̄cɛ ɔ́ɔmā okónu.

³⁰‘Ācɛ géē ka kahíníī, ‘Ɔnyīlɔ nyā gbɔɔ́ ō gwó inu, amáŋ ó gwó ɔ̄ gaajɛ glá gɛ ŋ́.’

³¹Ɔ́dāŋ ka ɔcɛ́ éyi bī aícɔ́ɔja úlā ofucɛhɔ̄ nyɔ̄ gáā kpɛ́fú tá ɔcɛ́ ɔhá nōo bī aícɔ́ɔja úlā ofɛpa cigwó, ɔ́cɛ ɔ́ɔmā cīce aflɛ́yí cɛ́ɛ́ ó lɛ ɔ́ miya kóō le jé ɔ́dāŋ ka aícɔ́ɔja kú nū lɛwa jɛ̄ ō leyī méyī mla aícɔ́ɔja kú ɔlɛ́ ɔhá ā glá.

³²Ɔ́dāŋ kóō le má ka anúɔ í lɔfú jɛ̄ ŋ́, ó géē tɛ̄hɔ̄ fu ɔcɛ́ ā eko nōó yɔ̄ ɛgaligbó ɛ́ɛ́ ma cɛ́ɛ́ kóō da ɔ́ ɔ̄kā, ɔdā nēe í yá cɛ́ɛ́ kéē kpɛ́fú tū iyī uwā ŋ́ mā.”

³³Ujísɔ̄si le ɛlā kú nū ŋmɛ́yí yɔ̄ ī ka kahíníī, “Ɔ̄cɛ dúúmā ká aá í gáā wɛ ɔyíkpó kú um glá ŋ́, ń taafu ŋ́ ó habɔ̄ odúúdú ɔdā nōó lɛ ā tá.

³⁴Ɔmā lɔhi amáŋ ɔ́dāŋ nɛ̄ ɔmā í lɔnyɛ ɔmā gɛ ŋ́, ó lɛ ɔwɛ dúúmā nɛ̄ ɔ̄cɛ lɔfú yá ɔ̄ kóō lɔnyɛ ɔmā ɔhá ɛ́ɛ́ gɛ ŋ́.

³⁵Ó lɔhi nɛ̄ ɔ̄cɛ ī pīya tū ipú ajɛ ɛhɔ̄ ŋ́ mā ā, ɛ́ɛ́ nōó kē tīile ō cē klá ɛyétutulu ŋ́. Ācɛ í cē ɔ̄ bónū icííci. Aá jāhɔ̄, ɔ́dāŋ ka aá lɛ ahɔ̄ ō bī pó ɛlā.