Read idoma ULÚKU 15 Bible Online

ULÚKU 15 - idoma bible

ULÚKU 15

¹Ɛ̄cī éyi lé ka ɛ̄cī éyi eko nɛ̄ aódɔlɛ́ alɛwa mɛ́mla ācobīyíne ā wā kéē pó ɛlā kú Ujísɔ̄si ā,

²Ācɛ Ufárisīi mɛ́mla aútíca kú íne gbɔɔ́ ō ka iŋini kahíníī, “Ɔ̄cɛ ā géē mīyɛ ācobīyíne bɔ́tū, klla kōō ī lé ɔdōlé mɛ́mla uwá dúú!”

³Anɔ́ɔ Ujísɔ̄si le ita nyā kwu lɛ uwá á.

⁴Ó kahíníī, “Ɔ̄cɛ í jé ŋ́ nɛ̄ ɔ̄cɛ éyi ká aá lɛ aálá ofɛhɔ̄, anɔ́ɔ éyi kú uwā le lé gebí á. Ɔdí nɛ̄ ɔ̄cɛ ɔ́ɔmā í yá ā? Ó í habɔ̄ aálá ofɛnɛ cigwáahāanɛ ohile ā bá ipácí, cɛ́ɛ́ ó géē nyɔ̄ gaá gbɔɔ́ ō dɔɔ̄kā ékpó nōo bí ā jāā gbéeko nōó lɛ ɔ́ pīyɛ̄.

⁵Eko nōó lɛ ɔ́ pīyɛ ā, ó kwú ɔ̄ ú klá ɔkɔ,

⁶cɛ́ɛ́ ó kwú ú bī wā í tá ipú aɔ́mpānū ā. Cɛ́ɛ́ ó le tá ɔlɛ́ gaá lɛ aóklóbīya nū mɛ́mla aóladógbe kú nū hīgwú tɔ̄há. Cɛ́ɛ́ ó da uwá kahíníī, “Ɔtū he um nɛ̄hi, n le álá kú um nōo bī ā pīyɛ̄. Aá gwéeyē mla um!

⁷Ɔwɛ ékpó ɔ́ɔmā, n̄ da aá ka é géē gwéeyē nɛ̄hi ɔkpáncō ohígbū ɔ̄cobīyíne ékpó nōo le pīyabɔ̄ fíyɛ́ ācɛ olɔhi ofɛnɛ cigwáahāanɛ nēé cɛgbá ō pīyabɔ̄ gɛ ŋ́ mā ā.

⁸Amáŋ ɔ̄cɛ í jé ŋ́ ɔnyā éyi nōo lɛ īkpīije nɛ̄hɛ́ igwó, anɔ́ɔ ékpónú gebí ɔdí nōó í yá ā? Ó í hɛ́ ɔlá kwu agege, lɛ inu ɔlɛ́ nū gwu wɛ̄ɛcɛ. Ó í dɔɔ̄kā nū lɔɔlɔhi ɛga dóódu jāā gbéeko nōó lɛ ɔ́ pīyɛ̄.

⁹Eko nōó le ɔ́ pīyɛ̄ ā, ó le áncɛ́nyā nū mɛ́mla aóladógbe kú nū kpó hīgwú tɔ̄hā, cɛ́ɛ́ ó da uwá kahíníī, “Ɔtū he um ícɛ nɛ̄hi ohígbū ka īkpīije kú um nōo bī ā, n le ɔ́ pīyɛ̄ ɛɛ́. Aá gwéeyē mla um!”

¹⁰Ɔwe ékpónú ɔ́ɔmā, n da aá, ka aálelékwū-ōtɛ̄hɔ̄ kú Ɔwɔicō gē gwéeyē ohígbū ɔ̄cobīyíne ékpó nōo le pīyabɔ̄.”

¹¹Ujísɔ̄si klla kɛlā gɔbū kahíníī, “Ó le ɔnyīlɔ éyi yɔ̄ nōo lɛ ayínɔ̄nyīlɔ ɛpa.

¹²Ɛnɛ̄ŋcɛ́ ā da ɔ́ kahíníī, ‘Ádā um, lɛ ukpɛ̄ kú um kú agbénú kú uwɔ je ga um abālɔbányā ā.’ Anɔ́ɔ ɔnyīlɔ ā le agbénú kú nū kɔ̄ lɛ ayí nū nɔ̄nyīlɔ ɛplɛ́ɛpa ā.

¹³Ó gbo ɛ̄cī alɛwa ŋ́, ɔyí nɛŋcɛ́ ā kwú ukpɛ̄ kú agbénú kú nū ú kpó lá, anɔ́ɔ ó kwú ije ā ú nyɛ̄ɛ̄ ŋmá ɔlɛ́ á. Ó le tá ɔlɛ́ ɛga oligbó nɛ̄hi, ɛga nōó kwú ije ā í ŋmó bónū oŋmá lɛ o lā oyēeyī oŋmó ije bónū icííci.

¹⁴Ó le ɛjɛ̄ɛ̄jī ɔdā nōó lɛ ā ŋmó bónū. Anɔ́ɔ ɔkpɛtā nɛ̄hi gbɔɔ́ ō ŋmó ajɛ ɔ́ɔmā á. Ó kē lɛ ɔdā dúúmā nōó í lé gɛ ŋ́.

¹⁵Anɔ́ɔ ó nyɔ̄ í kwú iyī nū í tá olufa lɛ ɔ̄cɛ ajɛ kú abɔ́ɔ éyi á. Ɔ̄cɛ ā kwú ɔ̄ ú tū ga ɛhɔ̄ ɔlɛ́ nū kóō gē je ɔdōlé lɛ aókóome.

¹⁶Eyī yɔ̄ kóō lɛ ɔdōlé kú aókóome ā lé nū ipú, amáŋ ó kōō má ɔ̄cɛ dóódu je ɔdā dúúmā lɛ ɔ́ lé ŋ́.

¹⁷Eko nɛ̄ eyī gbo ɔ́ gɔɔ ā, ó kahíníī, “Odúúdú ācocɛ̄hɔ̄ olufa kú ɔlɛ́ ádā um gē lé ɔdōlé gē nū ipú klla gē tá. Anɔ́ɔ n yɔ̄ amānyā nɛ̄ ɔkpɛtā gáā je ŋmó yɔ̄ɔ̄!

¹⁸N géē nyāŋjɛ kú n̄ ga ɛgiyí ádā um, kú um gaá da ɔ́ kahíníī, “Adá um, n le íne kú Ɔwɔicō mɛ́mla ákú uwɔ bīya ɛɛ́.

¹⁹Ń cíkā nēé gē hī um ka ɔyínɔ̄nyīlɔ kú awɔ gɛ ŋ́. Kwú um bɛ̄ɛka éyi kú ācɛ nēe gē yúklɔ́ ga awɔ ā.

²⁰Anɔ́ɔ ó nyāŋjɛ gbɔɔ́ ō kwúcē gā ɔlɛ́ ádā nū. Ó yɔ̄ ɛga oligbó ŋmá ɔlɛ́ ɛ́ɛ́ nɛ̄ ádā nū má ɔ̄ á. Ó le tū ɔ̄ eyīnyinyi, anɔ́ɔ ó le inya kwu nyɔ̄ gaá lɛ ɔ́ kwú bá ɔtū lɔɔlɔhi á.

²¹Ɔyí ā da ɔ́ kahíníī, ‘N le íne kú Ɔwɔicō mɛ́mla ákú uwɔ bīya. Ń cíkā kéē hī um ka ɔyí uwɔ gɛ ŋ́.’

²²Amáŋ ádā nū da ācocɛ̄hɔ̄ kú nū kahíníī, “Aá pápá lɛ awulú nōo lɔhi fíyɛ́ kpɛ́mm ā kpó wā í wu ɔ́ iyē. Aá kwú eliká ú wu ɔ́ abɔ̄, aá kwú áblákpá ú wu ɔ́ ikpó.

²³Cɛ́ɛ́ aá nyɔ̄ í kwú ɛna ojɔ̄kwū ú kú aá lɛ ɔ́ ŋmó. Cɛ́ɛ́ kú alɔ gwéeyē kú alɔ lé ucɛ!

²⁴Ohígbū ka ɔyí um nyā gekwú, ó kē kwú héyī abālɔbányā ɛɛ́. Ó gebí, é kē lɛ ɔ́ pīyɛ̄ ɛɛ́! Anɔ́ɔ é gbɔɔ́ ō gwéeyē gbɔɔ́ ō lé ucɛ á.

²⁵“Ɔyí ádā nɔ̄nyīlɔ ɔnyākwɔ́cɛ ā yɔ̄ ɛhɔ̄ kpɔ́. Abɔ̄ ó yɔ̄ ī wā ɔlɛ́ ā, eko nōó le bá lɛ ɔlɛ́ ā, ó pó bā ācɛ bá ī gwíijē klla bá í jīije.

²⁶Anɔ́ɔ ó lɛ éyi kú ācocɛ̄hɔ̄ kú ádā nū ā hīgwú le ɔ̄kā da ɔ́ kahíníī, ‘Ɔdí yɔ̄ í yá ā mɛ́ɛ̄.’

²⁷Ɔ̄cotɛ̄hɔ̄ ā da ɔ́ kahíníī, ‘Ɔyínɛ́ uwɔ nɔ̄nyīlɔ ā kwúcē wā ɔlɛ́ ɛɛ́. Ádā uwɔ kē lɛ ɛna ojɔ̄kwū ā ŋmó ɛɛ́, ohígbū ka ɔyí nū nɔ̄nyīlɔ kwúcē wā ɔlɛ́ ɛbɔ́.’

²⁸Ɔyínɛ́ nū ɔnyākwɔ́cɛ́ ā le cɔ̄nū nɛ̄hi ka anúɔ í gáā bēhé wā ɔlɛ́ ŋ́. Anɔ́ɔ ádā nū le bɛ̄cɛ gaá le ɔkɔ gbā lɛ ɔ́ kóō le bēhé wā ɔlɛ́ á.

²⁹Amáŋ ó tá ádā nū ohi kahíníī, ‘Mɔ́ɔ̄, n húmáyī yúklɔ́ gā uwɔ bɛ̄ɛka ɔfiyɛ ā iháyí alɛwa. Ń kē yíkpɛ̄yí olɔfú tū uwɔ jéjéē ɛ́ɛ́ ŋ́. Á kē je ɔyí ɛwū ékpó gā um kú ami mɛ́mla aóklóbīya um ka alɔ báajɛ gwéeyē lé ucɛ jéjéē ɛ́ɛ́ ŋ́.

³⁰Amáŋ ɔyí uwɔ nyā nōo kwú ɛjɛ̄ɛ̄jī ije kú uwɔ í ŋmó tū aákwuna ā, eko nōó kwúcē ga ɔlɛ́ ā, ā lɛ ɛna ojɔ̄kwū ŋmó lɛ ɔ́.

³¹Ádā nū tá ɔ̄ ohi kahíníī, “Ɔyí um, a yɔ̄ mla um eko dóódu, ɔdā dóódu nōo wɛ ákú um ā kē wɛ ákú uwɔ.

³²Amáŋ ó cíkā kú ālɔ̄ gwéeyē, kú ɔtū kóō wɛ ɛnɛ̄hɛ́ lɛ alɔ ohígbū ka ɔyínɛ́ uwɔ nyā gekwú, abālɔbányā ó kē kwú héyī. Ó gebí, é kē lɛ ɔ́ pīyɛ̄.”