Read idoma ULÚKU 16 Bible Online

ULÚKU 16 - idoma bible

ULÚKU 16

¹Eko ɔhá Ujísɔ̄si da ayíkpó kú nū kahíníī, ‘Olagbénú éyi yɔ̄, nōo lɛ ɔ̄cocɛ̄hɔ̄ éyi nōo gē leyīkwu agbénú kú nū lɛ ɔ́. É lɛ ɔ̄cɛ ā kpɛ́pɔ̄ lɛ ɔ́ ka ɔ́ɔ ī ŋmó ije kú ɔkpani nū bónū.

²Anɔ́ɔ ɔkpani nū ā lɛ ɔ́ hīgwú, anɔ́ɔ ó da ɔ́ ɔ̄kā kahíníī, ‘Ɔdā nēé yɔ̄ ī ka lɛyíkwu uwɔ ā wɛ ɔkwɛyi nɛɛ? Á gáā leyīkwu agbénú kú um gɛ ŋ́. Lɛ ɔwɛ nɛ̄ a ŋmó agbénú kú um ā kpó ka ga um dúúdú.’

³Anɔ́ɔ ɔ̄cotɛ̄hɔ̄ ā ka ipú ɔtū kú nū kahíníī, ‘Ɔkpani um gáā nū ŋmá úklɔ́ ɛɛ́. Ɔdí nɛ̄ n géē yá ā? Ń kē lɔfú hɛ́hɔ̄ glá ŋ́. O nyɔ̄ gaá gbɔɔ́ ō ba ɔdā ā í tū um uwēyī.

⁴Abālɔbányā, n jé ɔdā nɛ̄ n géē yá ā, cɛ́ɛ́ ká eko nēé lɛ um nū ŋmá úklɔ́ ɛɛ́ ká ācɛ kéē mīyɛ um wā ɔlɛ́ uwā.

⁵Anɔ́ɔ ó lɛ éyééye kú ācɛ nēe bī ɔkpani nū ulé ā hīgwú wā ɛgiyí nū. Ó le ɔ̄kā da ɔ̄cɛ aflɛ́yí ā kahíníī, ‘Ɔdí nɛ̄ a bī ɔkpani um ā?’

⁶Ó tóohi da ɔ́ kahíníī, ‘Ɔgālā anɔ̄ ofɛhɔ̄.’ Ɔ̄cocɛ̄hɔ̄ ā da ɔ́ kahíníī, ‘Cīce fíyaa, cɛ́ɛ́ ā le ofɛpa cigwó tá tāajɛ.’

⁷Anɔ́ɔ ó klla lɛ ɔ̄kā da ɔ̄cɛ ɔhá kahíníī, ‘Awɔ ā ɔdí nɛ̄ a bī ɔ̄ ā?’ Anɔ́ɔ ɔ̄cɛ ā da ɔ́ kahíníī, ‘Ɛkpa igwu ofɛhɔ̄!’ Anɔ́ɔ ó da ɔ́ kahíníī, ‘Kwú ɔkpá kú uwɔ ú ká ā lɛ ɛkpa ofɛnɛ tá tāajɛ.’

⁸Ɔkpani kú ɔ̄cocɛ̄hɔ̄ nōo jé ula nɛ̄hi nyā cɛ̄tra anú ohígbū ula kú nū. Ó kē wɛ ɔkwɛ̄yi ka ayí kú ɛcɛ nyā jé ula ō yá mɛ́mla ɔdā kú ɛcɛ nyā fíyɛ́ ayí kú ɔlá ofíyajɛ á.”

⁹Anɔ́ɔ Ujísɔ̄si klla kahíníī, “N da aá ka, aá bī agbénú kú íne o bīya kú ɛcɛ nyā le yá ɔdā o tīile lɛ ācɛ ɔhá cɛ́ɛ́ kú aá le aɔ́ya lɛ. Cɛ́ɛ́ eko nɛ̄ agbénú kú aá í tīile dúúmā gɛ ŋ́, é géē mīya aá wā ɔlɛ́ nōo ī yɔ̄ piyóó ā.

¹⁰Ɔ̄cɛ dúúmā nēé lɔtūce ɔ́ ɛgiyí ɔdā olígíi glá ā, é géē lɔtūce ɔ́ ɛgiyí ɔdā nɛ̄hi glá. Ɔ̄cɛ nēé lɔtūce ɔ́ ɛgiyí ɔdā olígíi glá ŋ́ mā, é gáā lɔtūce ɔ́ ɛgiyí ɔdā nɛ̄hi glá ŋ́.

¹¹Ohígbū ɔ́ɔmā, ɔ́dāŋ kéē lɔtūce aá ɛgiyí ije nōo wɛ agbénú kú ɛcɛ nyā glá ŋ́, ɔ̄nyɛ géē lɛ agbénú ɔkwɛyí ā tū aá abɔ̄ ā?

¹²Ɔ́dāŋ kéē lɔtūce aá ɛgiyí ɔdā kú ɔ̄cɛ ɔhá glá ŋ́, ɔ̄nyɛ kē í je ɔdā nōo wɛ ákú aá tū aá abɔ̄ āa?

¹³Ó lɛ ɔ̄cocɛ̄hɔ̄ dúúmā nōo cɛ̄ aɔ́kpani ɛpa ɛhɔ̄ glá ŋ́. Ó géē yíhɔtū tá éyi fíyɛ́ ɔhá. Ó kē í lɛyítáajɛ lɛ éyi cɛ́ɛ́ ó kē leyī gwō ɔhá bónū. Aá gáā lɔfú cɛ̄ Ɔwɔicō mɛ́mla ije ɛhɔ̄ glá ŋ́.”

¹⁴Eko nɛ̄ ācɛ Ufárisīi le odúúdu ɛlā nyā pó kpɛ́mm ā, é yá Ujísɔ̄si okónu ohígbū keé ī yúnwū ije nɛ̄hi.

¹⁵Ujísɔ̄si da uwá kahíníī, “Aá wɛ ācɛ nēe gē yá kú ācɛ kéē má aá bɛ̄ɛka ɔdā nɛ̄ aá wɛ ācɛ olɔhi ā Amáŋ Ɔwɔicō jé ɔdā nɛ̄ aá wɛ ɔkwɔ̄ɔ̄kwɛ̄yi ā á. Ohígbū ka aɔ́dā nɛ̄ ācɛ je kéē wɛ ɔdā otīile nɛ̄hi ā, í wɛ ɔdā dúú ipéyī Ɔwɔicō ŋ́.

¹⁶Ɔdā nēe tá tāajɛ ipú ɔkpá íne mɛ́mla ɔkpá kú ācomɛ́ɛbɛ ā bī ācɛ jé ɔwɛ jāā gaá kwu eko kú Ujɔ́ni oyúbatísim ā. Óŋmá eko ɔ́ɔmā, é húmáyī tɔ́ɔna kú ɔ̄kōolɔhi lɛyíkwu ajɔ̄ɔ̄cɛ́ kú Ɔwɔicō, odúúdú ācɛ bá gē kwɛga nɛ̄hi kéē bēhé ga ajɔ̄ɔ̄cɛ́ kú Ɔwɔicō abɔ̄fú.

¹⁷Amáŋ ó tɔ́ɔtɛ lɛ ɔkpáncō mɛ́mla ɛcɛ kéē bī tāajɛ fíyɛ́ o je ɔdā nōo wɛ ɛnɛ̄ŋcɛ́ fíyɛ́ dúú kú íne ā ŋmónyí.

¹⁸“Ɔ̄cɛ dúúmā nōo tá ɔnyā nū nyɔ̄ gaá lɛ ɔnyā ɔhá lɛ, le ajā gbo. Ɔ̄cɛ dúúmā nōo le ɔnyā nēé tá lɛ kē le ajā gbo dúú.

¹⁹“Ó lɛ ɔ̄cɛ olagbénú éyi yɔ̄ nōo ī lɛ otóŋ́gwō ahilíki kú otumbíyē wiiyē. Ó klla gē lé ɔdōlé kú abahi ɛ̄cī dóódu.

²⁰Ogbɛhá éyi kē yɔ̄ dúú, nɛ̄ iyē kú nū lé ka Ulásārɔ̄si nɛ̄ ɔkpíyē kú nū kē wɛ ámata ámata. É gē je ɔ́ wā í tá okómpīinu kú ɔlɛ́ ɔ̄cɛ olagbénú nyā ɛ̄cī dóódu.

²¹Ó leyīce ka anúɔ í má iwili kú ɔdōlé nōo í wāajɛ ŋmá itéblu kú ɔlɛ́ olagbénú ā. Aéwo kōō ī wā ī pla ámata kú nū nyɛ̄.

²²Ó yɔ̄ yɛɛ ā, ogbɛhá ā gekwú, anɔ́ɔ aálelékwū-ōtɛ̄hɔ̄ kwú odo kú nū ú ga ajɔ̄ɔ̄cɛ́ kóō gáā yɔ̄ mla Ébrahām á. Olagbénú ā gekwú, é kē lɛ ɔ́ nyi.

²³Anɔ́ɔ ipú ɔlíkɔtɔ ā, ó yɔ̄ ī jé ɔnɔ kú iyē nɛ̄hi. Anɔ́ɔ ó je eyī gicō le Ébrahām mɛ́mla Ulásārɔ̄si má bá ɛga oligbó á.

²⁴Olagbénú ā dɛ̄gba kahíníī, “Ádā um, Ébrahām, n yɔ̄ ipú ɛ́kɛma nɛ̄ɛ̄nɛ̄hi ipú ɔlíkɔtɔ amānyā ā! Ohígbū ɔ́ɔmā ményinyi um cɛ́ɛ́ ká ā da Ulásārɔ̄si kóō lɛ ɔyíkabɔ̄ kú nū wu ipú éŋkpɔ̄ wā í le tū um ɔkɔ kóō lɛ um ígblɛ́nyī bɔ́.

²⁵Amáŋ Ébrahām tá ɔ̄ ohi kahíníī, ‘Ɔyí um, bla ka a mīyɛ ɔdā olɔhi kú uwɔ eko nɛ̄ a yēeyī ā, ɛ́gɔ́ɔmā nɛ̄ Ulásarɔ̄si kē mīyɛ aódōbɔ̄bí á. Amáŋ abālɔbányā, é kē ī tū ɔ̄ ɔtūlé amānyā, awɔ ā ke yɔ̄ ipú ɛ́kɛma mɛ́ɛ̄ á.

²⁶Ó wɛ ɛ̄nyā ofūnū ŋ́, amáŋ ɔ̄gɔ̄ o lipú nɛ̄hi tá ɔtāhɛ̄ kú alɔ mɛ́mla awɔ, cɛ́ɛ́ ācɛ nēe tíne ō yɛ ŋmá ɛgiyí alɔ wā ɛgiyí aá, í gáā wā glá ŋ́. Ɛ́ɛ́ nɛ̄ ɔ̄cɛ dúú í kē gáā yɛ ŋmá ɛgiyí aá wā ɛgiyí alɔ glá ŋ́ má.’

²⁷Ɔ̄cɛ olagbénú ā kahíníī, ‘Ó lɛ ā, n gē gbɔ̄ɔkɔ ga awɔ ádā um, Ébrahām ká ā lɛ Ulásārɔ̄si tɛ̄hɔ̄ ga ɔlɛ́ ádā um.

²⁸Ohígbū ka n lɛ ayínɛ́ nɔ̄nyīlɔ ɛhɔ̄. N tíne kóō nyɔ̄ í lɛ uwá ahɔ̄ pi cɛ́ɛ́ ká ɛ́gɛ́ dúúmā nōó lɛ, kéē híīī wā ɛga kú ɛ́kɛma nyā ŋ́.’

²⁹Ébrahām tá ɔ̄ ohi kahíníī, Ayínɛ́ uwɔ nɔ̄nyīlɔ lɔfú jé ɔdā nɛ̄ Umósisi mɛ́mla ācomɛ́ɛbɛ tá ā. Uwá kéē lɔtū tá ɔ̄.”

³⁰Ɔ̄cɛ olagbénú ā tóohi kahíníī, ‘Ehée, ádā um, Ébrahām, ɔ́ɔmā í jɛ̄ ŋ́! Amáŋ ɔ́dāŋ ka ɔ̄cɛ éyi lɔfú le héyī ŋmá ɔlékwū ga ɛgiyí uwā glá, é géē mabɔ̄ íne o bīya tá.’

³¹Amáŋ Ébrahām da ɔ́ kahíníī, ‘Ɔ́dāŋ kéē lɛ ɛlá wū ɛlā kú Umósīsi mɛ́mla ācomɛ́ɛbɛ ā glá ŋ́, é kōō gáā cɛ̄ ɔ́dāŋ ka ɔ̄cɛ éyi le héyī ŋmá ɔlékwū ŋ́.’”