Read idoma ULÚKU 18 Bible Online

ULÚKU 18 - idoma bible

ULÚKU 18

¹Anɔ́ɔ Ujísɔ̄si le ita éyi kwu lɛ ayíkpó kú nū kóō nwū uwā kéē cíkā ō gbɔ̄ɔkɔ lɛ Ɔwɔicō ojigógó, kéē híīī gbagbafú ŋ́.

²Ó kahíníī, “Ɔ̄cohɛ́pɔ̄ éyi yɔ̄ igelī éyi. Ó jé Ɔwɔicō ŋ́ ɛ́ɛ́ nōó kē ī lɛ ojīlīmā ce ɔ̄cɛ dúúmā ŋ́.

³Ó lɛ ɔnyōkwū éyi nōo lā ipú igelī ékpó ɔ́ɔmā. Ó gē wā ɔlɛ́ ɔ̄cohɛ́pɔ̄ ā gē gbɔ̄ɔkɔ lɛ ɔ́ kóō lɛ ɛpɔ̄ hɛ́ lɛ anúɔ mɛ́mla ɔ̄cɛ nōo yɔ̄ í yá anúɔ ŋmó ā.

⁴Gbóógbó ā ɔ̄cohɛ́pɔ̄ í yá ɔdā dúú lɛyíkwu ɛpɔ̄ ā ŋ́. Amáŋ igbīhāajɛ ā, ó da iyī nū kahíníī, ‘N yúúfi Ɔwɔicō ŋ́, ɛ́ɛ́ nɛ̄ n kōō í le ojīlīmā ce ɔ̄cɛ ŋ́.

⁵Amáŋ ɔnyōkwū nyā í cɛ̄ gā um lɛ enyi gwá lɛ uklló ce ɛtɛ́ ŋ́, ohígbū ɔ́ɔmā ā, ń géē lɛ ɛpɔ̄ kú nū hɛ́ lɛ ɔ́. Ɔ́dāŋ ka ń yá lɛ ā ŋ́, ó géē yɔ̄ ī wā jāā gbéeko nɛ̄ eyī le cé um!’”

⁶Anɔ́ɔ Óndú ā kahíníī, “Aá pó ɔdā nɛ̄ ɔ̄cohɛ́pɔ̄ obɔ̄bíipú nyā ka ā ā.

⁷Ó lɛ ā, Ɔwɔicō í gáā hɛ́pɔ̄hi lɛ ācɛ nēe wɛ ákú nū nēe gē jikwū otú mɛ́mla ɛnɔ tū ɔ̄ kóō tá uwā abɔ̄ ā ŋ́ nɛɛ? Ó géē kpéko bónū kóō tá uwā abɔ̄ nɛɛ?

⁸N̄ da aá ka, ó géē hɛ́pɔ̄hi lɛ uwá fíyaa fíyaa. Amáŋ Ɔyínɔ̄nyilɔ kú Ɔ̄cɛ ā géē má ācɛ nēe lɔtūce Ɔwɔicō kpɔ́ eko nōó kwúcē wā aa?”

⁹Ujísɔ̄si klla kwu ita nyā lɛ ācɛ nēe je iyī uwā ka aá wɛ ācɛ o yá ɔlɔhi, nēé kē je ācɛ ɔhá odée ŋ́ mā.

¹⁰Ó kahíníī, “Ɛ̄cī éyi, ó lɛ ācɛ ɛpa nēe pɛ́ ga ipú Agblīihɔ-nɛ̄hi ā nyɔ̄ gaá gbɔ̄ɔkɔ lɛ Ɔwɔicō. Ɔ̄cɛ éyi wɛ Ufárisīi, ɔ̄cɛ ɔhá ā wɛ odɔlɛ́.

¹¹Ɔ̄cɛ Ufárisīi ā háyi ofūnū le ɔkɔ gbā lɛ Ɔwɔicō kahíníī, ‘Ɔwɔicō, n tá uwɔ ahínyá ohígbū ka ń wɛ ɔ̄cuújí ŋ́, ń wɛ ɔ̄cɛ obɔ̄bí ŋ́, ámāŋ ka ɔ̄cɛ o cikpɔ́nyā ɔhá, lɛbɛ̄ɛka ɛjɛ̄ɛ̄jī ācɛ ohile ā ŋ́. N tá uwɔ ahínyá ohígbū ka ń lɛbɛ̄ɛka odɔlɛ́ nōo háyi ánūmā ā ŋ́.

¹²N gē gwōkónu ɛ̄cī ɛpa ipú aláadi éyi. N gē je éyi ŋmá ipú igwó kú ɔdā dóódu nɛ̄ n lɛ ā gā awɔ.’

¹³Amáŋ odɔlɛ́ ā le hɛ́gɛcɛ ŋmá ɛgiyí ācɛ ɔhá, ó kōō jeyī gicō kóō má ɔkpáncō glá ŋ́. Amáŋ ó le abɔ̄ gɔ́ ɔtū kú nū kóō mafú ɔtūnōbí, anɔ́ɔ ó kahíníī, ‘Ɔwɔicō, ményinyi um, n wɛ ɔ̄cobīyíne!’”

¹⁴Ujísɔ̄si kahíníī, “N da aá, ɔ̄cɛ odɔlɛ́ ā yá ɔdā nɛ̄ Ɔwɔicō ka kóō le kpaakpa á, ó wɛ ɔ̄cɛ Ufárisīi ā nóó. Ohígbū ka ɔ̄cɛ dúúmā nōo lɛ iyī nū je gicō, é géē tá ɔ̄ wāajɛ. Ācɛ nēe kē tá iyī uwā wāajɛ ā, é géē jé uwā gicō.”

¹⁵Ācɛ ōhī le ayípɛ̄ ɔlɛ́ uwā kpó gé lɛ Ujísɔ̄si kóō lɛ abɔ̄ kpó ce uwá ɛyí cɛ́ɛ́ kóō lɛ ɔhā hɛ́ ce uwá. Amáŋ ayíkpó ā le ɛgba dɛ̄ tū uwā.

¹⁶Amáŋ Ujísɔ̄si le ayípɛ̄ ā hīgwú wā ɛgiyí nū anɔ́ɔ ó kahíníī, “Aá jɛga lɛ ayípɛ̄ kéē wā ɛgiyí um. Aá híīī ci uwá o wā ɛgiyí um ŋ́, ohígbū ka ācɛ nēe lɛbɛ̄ɛka ayípɛ̄ nēe bá nyā lɛ ajɔ̄ɔ̄cɛ́ kú Ɔwɔicō á.

¹⁷Aá blakwu ɛ̄nyā! Ɔ̄cɛ dúúmā nōó cɛ̄ kú Ɔwɔicō kóō lé ɔcɛ́ oyēeyī kú nū bɛ̄ɛka ayípɛ̄ ā ŋ́, í gáā wɛ ɔ̄cɛ kú ajɔ̄ɔ̄cɛ́ kú Ɔwɔicō glá ŋ́.

¹⁸Otrɛ̄yí kú ācɛ Ujíyu éyi da Ujísɔ̄si ɔ̄kā kahíníī, “Ɛ́nɛ́nɛ̄ utíca, ɔdí piíí nɛ̄ n géē yá piíí ɛ́ɛ́ ká n̄ lɛ oyēeyī opiyóó ā?

¹⁹Ujísɔ̄si da ɔ́ ɔ̄kā kahíníī, “Ɔdíyá nɛ̄ a hī um ka ɛ́nɛ́nɛ̄ ɔ̄cɛ ā? Ɔ̄cɛ ɔhá dúú í lɔhi ŋ́. Ɔwɔicō ōfōōfūnū lɔhi á.

²⁰A jé ɔ́da nɛ̄ íne kú Umósīsi dɔɔ̄kā ká ā yá ā. Ā híīī cikpó ɔnyā ɔhá ŋ́. Ā híīī ŋmó ɔ̄cɛ ŋ́. Ā híīī je odée kú ɔ̄cɛ uwī ŋ́. Ā híīī cījáalí ɛ̄kɛ̄mgbɛ̄ tū ācɛ ŋ́. Lɛ ojīlīmā ce ádā uwɔ mɛ́mla ɛ́nɛ́ uwɔ.”

²¹Ɔnyīlɔ ā tóohi kahíníī, “O ŋmífi nɛ̄ n wɛ ɔyípɛ̄ ā nɛ̄ n lɛ odúúdú aíne nēe bá nyā tū ŋmá á.”

²²Eko nɛ̄ Ujísɔ̄si le ɛ̄nyā pó ā, ó da ɔ́ kahíníī, “Ó lɛ odée éyi nōo hile nɛ̄ a cíkā ō yá kpɔ́. nyɔ̄ gaá kwú ɛjɛ̄ɛ̄jī ɔdā nɛ̄ a lɛ ā ú kpó je lá, cɛ́ɛ́ kú ā kwú ije nū í kpó kɔ̄ lɛ ācogbɛhá. Ɔ́dāŋ ka a lɛ ɛ̄nyā yá, a géē lɛ agbénú ajɔ̄ɔ̄cɛ́ kú Ɔwɔicō. Cɛ́ɛ́ a kwúcē wā í le pīya ɔyíkpó kú um.”

²³Amáŋ eko nɛ̄ ɔ̄cɛ ā le ɛlā nyā pó ā, ɔtú kwu bīya lɛ ɔ́, ohígbū koó lɛ agbénú nwuné nwuné.

²⁴Ujísɔ̄si le má ka ɔtū le bīya lɛ ɔ́, anɔ́ɔ kahíníī, “Ó lɔnɔ nɛ̄hi kú ācɛ olagbénú kéē je pīya ācɛ kú ajɔ̄ɔ̄cɛ́ kú Ɔwɔicō!

²⁵Ó tɔ́ɔtɛ lɛ inyankwūlūmi kóō yɛ bū ipú ɔgɔ̄ inyilá fíyɛ́ ɔ̄cɛ olagbénú kóō wɛ ɔ̄cɛ kú ajɔ̄ɔ̄cɛ́ kú Ɔwɔicō.”

²⁶Ācɛ nēe pó ɛlā kú nū ā dɔɔ̄kā kahíníī, “Ó lɛ ā ā, ɔ̄nyɛ nēé kē í nyatá mɛ́ɛ̄ ā?”

²⁷Ujísɔ̄si tóohi kahíníī, “Ɔwɔicō lɔfú ō yá ɔdā nɛ̄ ɔlɛɛcɛ í yá glá ŋ́ mā.”

²⁸Anɔ́ɔ Upíta kahíníī, “Mɔ́ɔ̄! Alɔ nyɛ̄ɛ̄ hɛ̄ ɔlɛ́ alɔ tá bá ī yɛce uwɔ.”

²⁹Ujísɔ̄si da uwá kahíníī, “Īī, n yá ká aá jé ka ɔ̄cɛ dúú nōo habɔ̄ ɔlɛ́ nū tá, ámāŋ ka ɔnyā nū ámāŋ ka ayínɛ́ nū nɔ̄nyīlɔ ámāŋ ka ádā mɛ́mla ɛ́nɛ́ ámāŋ ka ayí nū tá ohígbū ō je pīya ɔ̄cɛ kú ajɔ̄ɔ̄cɛ́ kú Ɔwɔicō,

³⁰géē mīyɛ ulé nū igbalɛwa ipú oyēeyī nyā. Ó kē í mīyɛ oyēeyī opiyóó ŋmá ɛgiyí Ɔwɔicō ipú ɛcɛ ɔhá nōo ī wā ā.”

³¹Ujísɔ̄si le ayíkpó igwɛ́ɛpa ā hīgwú ga ɛkwūbá anɔ́ɔ ó da uwá kahíníī, “Aá mɔ́ɔ̄, alɔ yɔ̄ ī tū ɛfu í nyɔ̄ Ujerúsālɛm. Abɔ́ɔ nɛ̄ ɛjɛ̄ɛ̄jī ɔdā nɛ̄ ācomɛ́ɛbɛ tá tāajɛ lɛyíkwu ami, Ɔyínɔ̄nyīlɔ kú Ɔ̄cɛ ā géē yá jīla á.

³²É géē je ɔ́ tū ācɛ Uróm abɔ̄, nēe géē yá ɔ̄ okónu, klla í tá ahɛ klá anú.

³³É géē gɔ́ itali, é kē í ŋmó ɔ̄. Amáŋ Ɔwɔicō géē je ɔ́ héyī ŋmá ɔlékwū ɛ̄cī ɔ́mɛtá nēé ŋmó ɔ̄ ā.”

³⁴Amáŋ ayíkpó ā í jɛ́yí aɔ́dā dúú nēe bá ā ŋ́. É kē cɛ̄ lɛ uwá jɛ́yí kú aɔ́dā nēe bá nyā ŋ́. É kē jé ɔdā nɛ̄ Ujísɔ̄si yɔ̄ ī kɛlā lɛyíkwu ɔ̄ ā ŋ́.

³⁵Abɔ̄ Ujísɔ̄si le bá lɛ Ujérīko ā, ó lɛ opeyī éyi nōo cīce okónu ɔwɛ yɔ̄ ī ba ɔdā.

³⁶Eko nōó le úcɛ́ kú ɛwa nēe bá ī yɛ ɔwɛ ā pó ā, ó le ɔ̄kā da ācɛ nēe kwu ɔ́ ajaajɛ ā kahíníī, “Ɔdí yɔ̄ ī yá ā?”

³⁷Uwá da ɔ́ kahíníī, “Ujísɔ̄si, ɔ̄cɛ kú Unásārēti ā wā gaá yɔ̄ ī yɛ á.”

³⁸Anɔ́ɔ ó gbɔɔ́ ō dɛ̄gba tɛ́ɛcɛ kahíníī, “Ujísɔ̄si! Ɔyínɔ̄nyilɔ kú Udéfiidi! ményinyi um!”

³⁹Ācɛ nēe gbɔbū kú ɛwa ā le ɛgba dɛ̄ tū ɔ̄ kóō yɔ̄ cíí. Amáŋ ó kōō dɛ̄gba tɛ́ɛcɛɛcɛ fíyɛ́ ka, “Ɔyínɔ̄nyīlɔ kú Udéfiidi! Ményinyi um!”

⁴⁰Ujísɔ̄si māhayi, anɔ́ɔ ó le ɔ́da je kahíníī, “Aá lɛ opeyī ā bī gé um.” Eko nōó gā ajaajɛ ā, Ujísɔ̄si da ɔ́ ɔ̄kā kahíníī,

⁴¹“Ɔdí nɛ̄ a tíne ká n̄ yá gā awɔ ā?” Ó tóohi kahíníī, “Ɔkpani, n dɔɔ̄kā ó mɛ́ɛbɛ.”

⁴²Anɔ́ɔ Ujísɔ̄si da ɔ́ kahíníī, “Mɛ́ɛbɛ mɛ́ɛ́nɛ! Ɔtū nɛ̄ a le ce Ɔwɔicō ā le uwɔ hɛ́tá ɛɛ́.”

⁴³Anɔ́ɔ igbeékpónú ó gbɔɔ́ ō mɛ́ɛbɛ á, anɔ́ɔ ó gaá tá Ujísɔ̄si ɔkwu gē tá Ɔwɔicō ahínyá á. Eko nɛ̄ ɛwa ā le ɔ́ má ā, odúúdú uwā tá Ɔwɔicō ahínyá dúú.