Read idoma ULÚKU 19 Bible Online

ULÚKU 19 - idoma bible

ULÚKU 19

¹Ujísɔ̄si le bēhé tá ipú Ujérīko anɔ́ɔ ó kē yɔ̄ ī yɛ bū ipú nū á.

²Ó lɛ otrɛ̄yí kú ācɛ odɔ̄lɛ́ éyi nōo yɔ̄ nɛ̄ iyē nū lé ka Usakíyɔ̄si. Ó kē lɛ agbénú.

³Ó yɔ̄ ī cēyītīkwū kóō lɛ ɔ̄cɛ nɛ̄ Ujísɔ̄si wɛ ā má, amáŋ ó mɛ́ɛbɛ bū acá kú ɛwa nēe yɛ jīla Ujísɔ̄si tá ā glá ŋ́ ohígbū ka ó wɛ ima.

⁴Ohígbū ɔ́ɔmā ó le inya kwu ga iyɔbū ɛwa ā gaá le icō ɔcí Usíkāmɔ tū, cɛ́ɛ́ kóō lɛ Ujísɔ̄si nōo gáā wā í yɛ ɔwɛ ɔ́ɔmā ā má.

⁵Eko nɛ̄ Ujísɔ̄si gā útū ɔcí ā, ó je eyī má icō, anɔ́ɔ da Usakíyɔ̄si kahíníī, “Hīlatá fíyaa fíyaa Usakíyɔ̄si, ohígbū ka n géē gbɔga ɔlɛ́ uwɔ ícɛ piíí.”

⁶Usakíyɔ̄si le hīlatá fíyaa fíyaa wāajɛ ŋmá icō ɔcí ā, anɔ́ɔ ó le Ujísɔ̄si bī ga ɔlɛ́ nū. Ó kē mīyɛ ɔ́ mla éeyē nɛ̄ɛ̄nɛ̄hi.

⁷Odúúdú ācɛ nēe má ɔ̄ ā gbɔɔ́ ō ko kahíníī, “Ɔ̄cɛ ā le yɛ ga ɔlɛ́ ɔ̄cobīyíne gáā gbɔga!”

⁸Usakíyɔ̄si nyāŋjɛ anɔ́ɔ ó da Óndú ā kahíníī, “Po mɛ́ɛ̄ n, ɔkpani! N géē je āyā éyi kú okɔ̄ ɛga ɛpa kú agbénú kú um lɛ ācogbɛhá. Ɔ́dāŋ ka n le ɔcɛ dúúmā pīyatū mīya anú odée nɛɛ, n géē gbā ɔ̄ lɛ ɔ́ ɔ́klá ɛnɛ.”

⁹Ujísɔ̄si da ɔ́ kahíníī, “Ícɛ nyā Ɔwɔicō le ipɔ́ɔnū nyā nyatá ɛɛ́, ohígbū ka ɔnyīlɔ nyā, wɛ ɔyɔ́ɔ́yí kú Ébrahām dúú.

¹⁰Ami, Ɔyínɔ̄nyīlɔ kú ɔ̄cɛ, wā gaá tíne, cɛ́ɛ́ ká n̄ lɛ ācɛ nēe bí ā nyatá.”

¹¹Ācɛ ā le ahɔ̄ jē lɛ ɔdā nɛ̄ Ujísɔ̄si ka ā. Ó le bá lɛ Ujerúsālɛm eko ɔ́ɔmā ɛɛ́. Ācɛ ā bá ī leyī táajɛ kú ajɔ̄ɔ̄cɛ́ kú Ɔwɔicō ɔ́ɔ gáā wɛ̄ɛcɛ bóobū. Ohígbū ɔ́ɔmā ó yɔ̄ ī kɛlā lɛ uwá anɔ́ɔ ó le ita nyā kwu lɛ uwá á.

¹²Ó kahíníī, “Ó lɛ ɔ̄cɛ nɛ̄hi éyi nōo yɔ̄ ī nyɔ̄ ɔlɛ́ oligbó kéē je ɔcɛ́ lɛ ɔ́ cɛ́ɛ́ kóō kwúcē wā ɔlɛ́.

¹³Ó le ācocɛ̄hɔ̄ kú nū igwó ā hīgwú anɔ́ɔ le ikpīije kú ugóolu kpó kɔ̄ lɛ éyééye kú uwā, anɔ́ɔ ó da uwá kahíníī, ‘Aá bī ɛ̄nyā le tɔ́hí gbéeko nɛ̄ n pīyɛyí.’

¹⁴Amáŋ ɔ̄cɛ ā í he ācɛ kú ajɛ ɔlɛ́ nū ɔtū ŋ́, anɔ́ɔ é le olɛhɔ̄ tū ce ɔ́ ɔkwu kahíníī, ‘Alɔ í dɔɔ̄kā kú ɔ̄cɛ nōo yɔ̄ nyā kóō wɛ ɔcɛ́ kú alɔ ŋ́.’

¹⁵É kwú ɔ̄cɛ ā ú pīya ɔcɛ́ anɔ́ɔ ó pīyɛyí gā ɔlɛ́ á. Ɔkwɔɔkwu ɔ́ɔmā ó le ɛhɔ̄ tū kéē lɛ ācocɛ̄hɔ̄ igwó ā hīgwú gé lɛ ɔ́ cɛ́ɛ́ kóō lɛ itene nēé lɛ ŋmá ɔ́hí kú uwā ā jé.

¹⁶Ákú aflɛ́yí ā wā gaá ka kahíníī, ‘Ɔkpani, n le ikpīije ugóolu igwó ɔhá lɛ itene būla ɛ̄nɛ̄ a je ga um ā.’

¹⁷Ɔcɛ́ ā da ɔ́ kahíníī, ‘Ahínyá, a wɛ ɔ̄cocɛ̄hɔ̄ olɔhi! Abɔ̄ a le yá lɔhi ipú ɔdā nɛ̄ŋ́cɛ́ nyā ā, n géē kpó aígelī igwó gā uwɔ ká ā leyīkwu uwá.’

¹⁸Ɔ̄cocɛ̄hɔ̄ ɔ́mpa ā wā gaá ka kahíníī, ‘Ɔkpani, n le ikpīije ugóolu ɛhɔ̄ ɔhá itene būla ɛ̄nɛ̄ a je ga um ā.’

¹⁹Ɔcɛ́ ā da ɔ́ kahíníī, ‘Ahínyá, a géē leyīkwu aígelī ɛhɔ̄.’

²⁰Ɔ̄cocɛ̄hɔ̄ ɔhá gā gaá da ɔ́ kahíníī, ‘Ɔkpani, ikpīije ugóolu éyi kú uwɔ ā yɔ á. N le ɔ́ gbō tayínū ipú adíko nɛŋcɛ́ éyi.

²¹N gē yúúfi uwɔ ohígbū ka a wɛ ɔ̄cɛ o lɔnɔ nɛ̄hi. A gē je ɔdā nōó wɛ ákú uwɔ ŋ́, a kē ī cē ɔdā nɛ̄ á nyi ŋ́.’

²²Ɔcɛ́ ā da ɔ́ kahíníī, ‘Ɛlā nɛ̄ a ka ŋmá okónu kú uwɔ piíí ā nɛ̄ n gáā le kɛpɔ̄ tū uwɔ á. A jé ka n wɛ ɔ̄cɛ olɔnɔ. N gē je ɔdā nōó wɛ ákú um ŋ́, n kē ī cē ɔdā nɛ̄ ń nyi ŋ́.

²³Ɔdíyā nɛ̄ á kē kwú ije kú um ú tá ɛga nēé ī kpó ije tū ā ŋ́ mā ā? Cɛ́ɛ́ ń géē yɛ í le itene lɛ ce ɔ́ ɛyí eko nɛ̄ n pīyɛyí.’

²⁴Anɔ́ɔ ó da ācɛ nēe háyi abɔ́ɔ ā kahíníī, ‘Aá mīyɛ ikpīije ugóolu éyi ā ŋmá abɔ̄ nū cɛ́ɛ́ ká aá kwú lɛ ɔ̄cɛ nōo lɛ ikpīije ugóolu igwó ā.’

²⁵Amáŋ é kahíníī, ‘Ɔkpani, ɔ̄cocɛ̄hɔ̄ ɔ́ɔmā lɛ ikpīije ugóolu igwó ɛɛ́!’

²⁶Ɔcɛ́ ā tóohi kahíníī, ‘N da aá ka, ɛjɛ̄ɛ̄jī ācɛ nēe lɛ odée ā, é kōō í je lɛ uwá fíyɛ́. Amáŋ ɔ̄cɛ nōó lɛ ɔdā dúúmā ŋ́ mā, ó kōō wɛ oligíí nōó lɛ ā, é géē mīyɛ ɔ́ ŋmá abɔ̄ nū.

²⁷Amáŋ aólɛlā kú um nēé dɔɔ̄kā ká n̄ wɛ ɔcɛ́ kú uwā ŋ́ mā, á lɛ uwá bī wā amānyā abālɔbányā ká aá lɛ uwá kpó ŋmó iyɔ̄bū um.’”

²⁸Eko nɛ̄ Ujísɔ̄si lɛ ɛlā nyā ka kwɛyí ā ó le hɛ́ tá iyɔ̄bū ācɛ ā lɛyíkwu Ujerúsālɛm

²⁹Abɔ̄ ó le bá lɛ Ubɛ́tifégi mɛ́mla Ubɛ́tani, ɛgiyí ɛfú kú ɔcí kú ólīifu ā, ó le ayíkpó ɛpa kú nū tɛ̄hɔ̄ nyɔ̄ iyɔ̄bū.

³⁰Ó da uwá kahíníī, “Aá nyɔ̄ ipɔ́lɛ́ nōo yɔ̄ iyɔ̄bū aá abɔ́ɔ ā. Abɔ̄ aá le bēhé ā, aá géē má ɔyí ijakī nɛ̄ ɔ̄cɛ dúúmā í ce jéjéē ɛ́ɛ́ ŋ́ mā wū ajɛ. Aá lɛ ɔ́ wī cɛ́ɛ́ aá lɛ ɔ́ bī wā amānyā.

³¹Ɔ́dāŋ ka ɔ̄cɛ dúúmā lɛ ɔ̄kā da aá ka ɔdíyá nɛ̄ aá ī wī ɔ̄ ā, aá da ɔ́ kahíníī, ‘Ó ce Óndú ā ɛgbá.’

³²Anɔ́ɔ é le pɛ́ i yɛ gaá le ɔyí ijakī ā mā ɛ́gɛ́nɛ̄ nōó da uwá lɛ ā yíílí.

³³Abɔ̄ é bá yɔ̄ wī ɔ̄ ā, aóndú nū da uwá ɔ̄kā kahíníī, “Ɔdíyá nɛ̄ aá yɔ̄ ī wī ɔ̄ ā?”

³⁴É tá ohi kahíníī, “Ó ce Óndú ā ɛgbá.”

³⁵Anɔ́ɔ é le ɔyí ijakī ā bī gé lɛ Ujísɔ̄si á. Anɔ́ɔ é le úwé kú uwā plla ce ɛyí ɔyí ijakī, anɔ́ɔ é kwú Ujísɔ̄si í ce ɛyí nū á.

³⁶Abɔ̄ ó ce ɔ̄ yɔ̄ ī nyɔ̄ ā, ācɛ le úwé kú uwā plla bá iyɔ̄bū ɔwɛ lɛ ɔ́.

³⁷Eko nēé le bá lɛ Ujerúsālɛm ā, ɛgiyí owulatu kú ɛfú kú ɔcí olífu ā, ɛwa nɛ̄hi kú ācɛ nēe gē yɛce ɔ́ ā gbɔɔ́ ō tá Ɔwɔicō ahínyá, bá gē gwéeyē í jɔkɔ gicō ge cɛ̄tra iyē nū ohígbū úklɔ́ nɛ̄hi ohídáagó nēé má ā.

³⁸É kahíníī, “Ɔwɔicō kóō hɔ́hā ce ɔcɛ́ nōo Óndú ā tɛ̄hɔ̄ wā ā! Ɛbɔ́ kóō yɔ̄ ɔkpáncō, ofu kóō yɔ̄ lɛ Ɔwɔicō.”

³⁹Anɔ́ɔ ācɛ Ufárisīi ōhī nēe bá ipú ɛwa ā da ɔ́ kahíníī, “Utíca, lɛ ɛgba dɛ̄ tū ayíkpó kú uwɔ kéē bá cíí.”

⁴⁰Ujísɔ̄si tá uwā ohi kahíníī, “N da ka ɔ́dāŋ ka ācɛ nēe bá nyā kwú okónu ú klá, aɛ́cɔ̄ abɔ̄yī uwā géē tɔ́ɔga.”

⁴¹Eko nōó le túbla Ujerúsālɛm ajaajɛ lɛ ɔ́ má eyī ā, ó le ikwū je ohígbū nū

⁴²yɔ̄ ī ka kahíníī, “Eyī yá um ka ā lɛ ɔdā nɛ̄ a í yá ó yá ɛ́ɛ́ ká ā lɛ ɛbɔ́ lɛ ā jé ícɛ. Amáŋ á kē má ɔ̄ abālɔbányā glá ŋ́!

⁴³Eko géē wā nɛ̄ aólɛlā kú uwɔ géē cīíbɔm tū uwɔ biílí géē kpɛ́fú tá uwɔ ŋmá áklō dóódu. É géē je awɔ mɛ́mla ācɛ nēe bá ipú igá ā yíífi.

⁴⁴É gáā mabɔ̄ ɛcɔ̄ dúúmā tá ce ɛyí ɔhá ipú uwɔ ŋ́. Odúúdú aɔ́dā nēe bá nyā í yá uwɔ ohígbū ka á jé eko nɛ̄ Ɔwɔicō wā kóō nyā uwɔ tá ā ŋ́.”

⁴⁵Anɔ́ɔ Ujísɔ̄si le bēhé tá ipú Agblīihɔ-nɛ̄hi ā, anɔ́ɔ ó gbɔɔ́ ō nū ācotɔ́hí ā bɛ̄cɛ á.

⁴⁶Ó yɔ̄ ī ka lɛ uwá kahíníī, “É tá ɔ̄ ipú ɔkpíihɔ ā kahíníī, ‘É géē hī Agblīihɔ-nɛ̄hi kú um ā ka inu ɛga nɛ̄ ācɛ géē gbɔ̄ɔkɔ gā um.’ Amáŋ aá kwú ɔ́ ú pīya inu o tayínū kú aúwī!”

⁴⁷Ɛ̄cī dóódu Ujísɔ̄si gē nwū ācɛ ɛlā Ɔwɔicō ipú Agblīihɔ-nɛ̄hi ā. Aótrɛ̄yí kú ācogwɛ́ɛya, aútíca kú íne mɛ́mla aótrɛ̄yí kú ācɛ ā dɔɔ̄kā kéē lɛ ɔ́ ŋmó.

⁴⁸Amáŋ é má ɔwɛ ō le ŋmó ɔ̄ ŋ́, ohígbū ka odúúdú ācɛ ā gē jāhɔ̄ gē pó ɛjɛ̄ɛ̄jī ɛlā nōo ī ka ā tá ɔkɛklɛ kú nū.