Read idoma ULÚKU 2 Bible Online

ULÚKU 2 - idoma bible

ULÚKU 2

¹Eko ɔ́ɔmā, Usisa Ɔgɔ́stɔ̄si, ɔcɛ́ nɛ̄hi kú Uróm ā lɛ íne tá ɛjɛ̄ɛ̄jī ajɔ̄ɔ̄cɛ́ kú nū ka odúúdú ācɛ kéē nyɔ̄ gaá lɛ iyē kú wā tá táajɛ.

²É ka ɔlɛ́ kú aflɛ́yí nyā eko nɛ̄ Ukwirínīyɔ̄si wɛ igbómína kú Usiríya ā.

³Ɛjɛ̄ɛ̄jī ācɛ le pɛ́ nyɔ̄ gáā tá iyē uwā tāajɛ, ɔnyɔ̄ɔnyɛ ga igelī nɛ̄ŋ́cɛ́ kú nū.

⁴Ujósɛ̄fu le yɛ ŋmá igelī kú Unásārēti, ajɛ kú Ugálīli ā, le tá igelī nēé hī ka Ubɛ́tlɛhɛ̄m kú Ujudíya, ɛga nɛ̄ Udɛ́fīdi, ɔcɛ́ ā ŋmá ā.

⁵Anú mɛ́mla Umerí, ɔyípɔ̄nɔ̄nyā nōó cokónu ka anúɔ í lɛ ā, nyɔ̄ gaá tá iyē tāajɛ á. Umerí kē yīīpú.

⁶Eko nēé bá Ubɛ́tlɛhɛ̄m ā, eko nɛ̄ Umerí í ma ɔyí ā le yá.

⁷Ó le ɔyí ɔ̄cɛnyīlɔ kú aflɛ́yí kú nū ma. Ó lɛ ɔ́ gbō mla īlī ō le gbō ɔyípɛ̄, kwú ɔ̄ ú gwutá ipú ikpati ō lɛ ɔdōlé kú ɛbɛ́ tū ɔ̄, ohígbū ka ɛga í jɛ̄ uwā inūgbɔga ŋ́.

⁸Ācogbāálá bá ajɛ abɔ́ɔ, bá gē gbō aálá kú uwā ipácí otú.

⁹Anɔ́ɔ alelékwū-ōtɛ̄hɔ̄ kú Óndú ā le hɛ́bɛ̄cɛ ɔtāhɛ̄ uwā á, ofiyajɛ kú ɛgahi nɛ̄hi kú Óndú ā lɛ uwá yɛjīlatá bɛ̄ɛka ojuja ā. Ufí le uwá kwú nɛ̄ɛ̄nɛ̄hi.

¹⁰Amáŋ alelékwū-ōtɛ̄hɔ̄ ā da uwá kahíníī, “Aá híīī yúúfi ŋ́! N bī ɔ̄kā olɔhi wā gē lɛ aá, nōo géē yá kú odúúdu ācɛ kéē gwéeyē nɛ̄hi.

¹¹É lɛ ɔ̄cɛ nōo géē nya aá tá ā ma lɛ aá ícɛ nyā, ipú igelī nɛ̄ Udéfīdi ŋmá ā ɛɛ́! Anú ā wɛ Ohɔ́ɔnyɛtá, nōo wɛ Óndú ā á.

¹²Ɔdā nōo géē cābɔ̄ lɛ aá ka ɔdā nɛ̄ aálelékwū-ōtɛ̄hɔ̄ ka ā wɛ ɔkwɛyi ā wɛ ka, aá géē má ɔyí obene éyi nēé lɛ īlī ogbo ayí obene gbō ɔ̄ iyē gwutá ipú ikpati o lɛ ɔdōlé kú ɛbɛ́ tū ɔ̄.”

¹³Anɔ́ɔ ikpííkpó ɔ́ɔmā, alɛwa kú alelékwū-ōtɛ̄hɔ̄ le pɛ́ wɛ̄ɛcɛ gaá gbɔɔ́ ō gwíijē í cɛ̄tra Ɔwɔicō tɔ̄há á.

¹⁴É gwó kahíníī, “Ālɔ̄ cɛ̄tra Ɔwɔicō nōo yɔ̄ ɔkpáncō, ɛga olicō fíyɛ́ dúú ā. Ɛbɔ́ kóō yɔ̄ lɛ ācɛ nɛ̄ ɛlā uwā hī ɔ́ ɔtū ā.”

¹⁵Eko nɛ̄ aálelékwū-ōtɛ̄hɔ̄ ā nyɛ̄ɛ̄ ŋmá ɛgiyí uwā kwúcē le pɛ́ tá ɔkpáncō ā, ācogbāálá ā da iyī uwā kahíníī, “Ālɔ̄ le yɛ tá Ubɛ́tlɛhɛm abālɔbányā gaá lɛ ɔdā nōo yá nɛ̄ Óndú ā yá kú ālɔ̄ le jé nyā má.”

¹⁶Anɔ́ɔ é páápá le yɛ á. Eko nēé lɛ Ujósɛ̄fu mɛ́mla Umerí pīyɛ̄ ā, é má bā ɔyí ā gwutá ipú ikpati ō lɛ ɔdōlé kú ɛbɛ́ tū ɔ̄.

¹⁷Eko nɛ̄ ācogbāálá ā lɛ ɔ́ má ā, é lɛ ɛjɛ̄ɛ̄jī ɔdā nɛ̄ aálelékwū-ōtɛ̄hɔ̄ ka lɛyíkwu ɔyípɛ̄ ā kpó ka lɛ uwá.

¹⁸Odúúdú ācɛ nēe pó ɛlā nɛ̄ ācogbāálá ā kā ā le kpó hídáagó.

¹⁹Umerí blakwu odúúdu aɔ́dā nēe bá nyā kpó lɛ ɔ́ kpó tū ɔtū kú nū gē gbafíyóó kwu uwá.

²⁰Ācogbāálá ā kwúcē ī tá ipácí ɛgiyí aálá kú uwā, bá gē gwíijē ī kɛlā ī cɛ̄tra Ɔwɔicō ohígbū ɔdā nēé pó mɛ́mla ɛ̄nɛ̄ é má ā, ó lɛ ɛ́gɛ́nɛ̄ alelékwū-ōtɛ̄hɔ̄ da uwá kpɛ́mm ā.

²¹Eko nɛ̄ ɛ̄cī ɔ́mahātá kú ɔyí ā le yá ā, nēé lɛ̄ ɔyípɛnɛ̄ńcɛ́ ā apī hɛ́ ā, é kwú ɔ̄ ú hī Ujísɔ̄si, iyē nɛ̄ alelékwū-ōtɛ̄hɔ̄ je kéē le ce ɔyí ā gbɔbū kéē yīīpú nū ā.

²²Eko nɛ̄ ɛ̄cī nɛ̄ Ujósɛ̄fu mɛ́mla Umerí cíkā ō gwu iyē ā le yá ā, ɛ́gɛ́nɛ̄ é tá ɔ̄ ipú íne kú Umósīsi ā, anɔ́ɔ é kwú Ujísɔ̄si ú ga Ujerúsālɛm gaá kwu ɔ̄ ú lɛ Óndú ā.

²³Ɛ́gɛ́nɛ̄ ɛlɔ̄ɔwɔicō ka lɛ ā “Odúúdú ɔyínɔ̄nyīlɔ aflɛ́yí dóódu mɛ́mla ɔyí ɛbɔ́lɛ́ aflɛ́yí dóódu nōo wɛ ɔbá, é géē hɛ́ ɔ̄ lɛ Óndú ā.”

²⁴É le pɛ́ nyɔ̄ gaá je okóohō ɛpa ámāŋ ka ɔklɛbɛ́tɛ ɛpa gwɛ́ɛya ɛ́gɛ́nɛ̄ nēé ka ipú íne kú Óndú ā.

²⁵Eko ɔ́ɔmā ɔ̄cɛ éyi yɔ̄ nɛ̄ iyē nū lé ka Usímīyɔn. Ó lā Ujerúsālɛm. Ó wɛ ɔ̄cɛ nōo gē yá ɔdā okpaakpa, klla ī le ojīlīmā ce Ɔwɔicō. Ó kē yɔ̄ ī gbēyī kú Ɔwɔicō kóō wā í lɛ ācɛ Ísrɛ̄lu nyatá. Alelékwū kú Ɔwɔicō ā yɔ̄ mla anú.

²⁶Alelékwū Ihɔ lɛ okónu ce lɛ ɔ́ koó géē yēeyī kóō lɛ ohɔ́ɔnyɛtá nɛ̄ Ɔwɔicō cokónu ka anúɔ géē tɛ̄hɔ wā ā má.

²⁷Alelékwū lɛ ɔ́ bī ga ipú Agblīihɔ-nɛ̄hi ā ɛ̄cī ɔ́ɔmā. Anɔ́ɔ eko nɛ̄ Umerí mɛ́mla Ujósɛ̄fu lɛ Ujísɔ̄si nōo wɛ ɔyí obene ā, bī wā ipú Agblīihɔ-nɛ̄hi kéē gaá lɛ uculo nɛ̄ íne ka kéē yá ā yá,

²⁸Usímīyɔn mīyɛ ɔyí obene ā bɔ́tū anɔ́ɔ ó lɛ ahínyá tá Ɔwɔicō á, kahíníī,

²⁹“Óndú um, abālɔbányā, okónu nɛ̄ a ce ā, a le ɔ́ yá ɛɛ́, mabɔ̄ ɔ̄cocɛ̄hɔ̄ kú uwɔ tā kóō gekwú ɛbɔ́ mɛ́ɛ́nɛ.

³⁰N bī ikpēyī kú abɔ̄yī um lɛ ɔ̄cɛ nōo géē nya ācɛ ɔlɛ́ uwɔ tá ā má ɛɛ́.

³¹Ohígbū ka ami abɔ̄yī um lɛ ohɔ́ɔnyɛtá nɛ̄ a je lɛ odúúdu ācɛ ā má ɛɛ́.

³²Ó géē bī ɔlá ofíyajɛ, nōo géē nya aílɔ́wá tá ā gé lɛ uwá. Ó kē géē bī ojīlīma gé lɛ ācɛ ɔlɛ́ uwɔ, Ísrɛ̄lu.”

³³Ádā kú ɔyí ā mɛ́mla ɛ́nɛ́ nū le kpó hídáagó ohígbū ɔdā nɛ̄ Usímīyɔn ka lɛyíkwu ɔyí uwā ā.

³⁴Usímīyɔn da Ɔwɔicō kóō lɛ ɔhā hɛ́ ce uwá, anɔ́ɔ ó da Umerí, ɛ́nɛ́ Ujísɔ̄si kahíníī, “Ɔwɔicō lɛ ɔyí nyā fu kóō yá kú ācɛ alɛwa kéē gwōnū, ó klla kē í yá kú ācɛ kéē jegicō ajɛ kú Ísrɛ̄lu. Ó géē lɛbɛ̄ɛka ɔdocābɔ̄ nōo géē pī ācɛ ahɔ̄ ā. Ācɛ alɛwa géē tá ɛlā kú nū.

³⁵cɛ́ɛ́ ó géē kɛlā nēé gbo tayínū ā tɛ́ɛcɛ péee. Ɔtūnōbí nɛ̄hi géē yá uwɔ lɛbɛ̄ɛka ɔkpacańgelí nōo gē gwu ɔ̄cɛ ā.”

³⁶Ɔ̄cɛnyā ōhilókplícī nɛ̄hi, ɔ̄comɛ́ɛbɛ kú Ɔwɔicō éyi yɔ̄ nɛ̄ iyē nū le ka Ána, ɔyínɔ̄nyā kú Ufánūwɛlu nōo ŋmá ipɔ́ɔma kú Ássa.

³⁷Ɔbá nū gekwú iháyí ɔ́mahāapa nēé lɛ iyī uwā ā. Ó lɛ iháyí ofɛnɛ cɛnɛ yá ɛɛ́ nōó húmáyī wɛ ɔnyowkú yɔ̄ mɛ́ɛ̄ á. Ó gē nyɛ̄ɛ̄ ŋmá Agblīihɔ-nɛ̄hi ā ŋ́. Kwu otú mɛ́mla ɔlɛ́ɛnɔ, ó gē gwōkónu ī gbɔ̄ɔkɔ klla ī gbō Ɔwɔicō ɛ̄gbā.

³⁸Eko ɔ́ɔmā piíí ā, ó gā ipú Agblīihɔ-nɛ̄hi gaá lɛ ahínyá tá Ɔwɔicō. Ó klla le ɛlā ka ohígbū ɔyí obene ā lɛ odúúdu ācɛ nēe bá yɔ̄ ī gbēyī Ɔwɔicō kóō lɛ ācɛ kú Ujerúsālɛm nyatá ā.

³⁹Eko nɛ̄ Ujósɛ̄fu mɛ́mla Umerí lɛ odúúdú ɔdā nɛ̄ íne kú Óndú ā dɔɔ̄kā kéē yá ā yá kwɛyí ā, é kwúcē le tá ɔlɛ́ uwá Unásārēti kú Ugálīli.

⁴⁰Ɔyí obene ā le jɛ̄, kwú pīya ijímkpa ɔkpíyē. Ó jéeyī nɛ̄hi, Ɔwɔicō klla yɔ̄ gē hɔ́hā ce ɔ́.

⁴¹Iháyí dóódu ádā mɛ́mla ɛ́nɛ́ kú Ujísɔ̄si gē ga Ujerúsālɛm ɔnū ucɛ kú onyatá.

⁴²Eko nɛ̄ Ujísɔ̄si wɛ iháyí igwɛ́ɛpa ā, é le pɛ́ tá ɔnū ucɛ ā ɛ́gɛ́nɛ̄ é tɛtɛ gē yá ā.

⁴³Eko nɛ̄ ucɛ ā mɛ ā, Ujósɛ̄fu mɛ́mla Umerí gbɔɔ́ ō ga ɔlɛ́, amáŋ Ujísɔ̄si, nōo wɛ ɔyípɛ̄ eko ɔ́ɔmā, le hɛ́tá igbīhi ipú Ujerúsālɛm. Ádā mla ɛ́nɛ́ nū í jé ka ɔyípɛ̄nɛ̄ncɛ́ ā le hɛ́tá igbīhi ŋ́.

⁴⁴É gbɛlá koó yɔ̄ mla igwú kú ayípɛ̄nɛ̄ncɛ́ kú Unásārēti ohile ā nɛ̄ n, anɔ́ɔ é yāwu ɛ̄cī odumkúlu ā, anɔ́ɔ e gbɔɔ́ ō tíne nū ipú aɔ́máapú nū mɛ́mla ācɛ nēe jé uwā ā.

⁴⁵É pīyɛ̄ ɔ̄ ŋ́, anɔ́ɔ é le cīgbīhi ga Ujerúsālɛm yɔ̄ ī tíne nū.

⁴⁶Ɛ̄cī ɔ́mɛtá ā, é lɛ ɔ́ pīyɛ̄ ipú Agblīihɔ-nɛ̄hi ā, abɔ̄ o cīce mɛ́mla aítíca kú ācɛ Ujíyu, yɔ̄ gē jāhɔ lɛ uwa klla yɔ̄ ī da uwá ɔ̄kā.

⁴⁷Odúúdú ācɛ nēe pó ɛ́gɛ́nɛ̄ ó bī ohílīpú yɔ̄ í le dɔɔ̄kā klla yɔ̄ ī cīla ɔ̄kā ā le kpó hídáagó.

⁴⁸“Eko nɛ̄ ádā nū mɛ́mla ɛ́nɛ́ nū lɛ ɔ́ má ā, é le kpó hídáagó nɛ̄hi, anɔ́ɔ ɛ́nɛ́ nū da ɔ́ kahíníī, ɔyí ɔdíyá nɛ̄ a yá alɔ lɛ āa? Ádā awɔ mla um le jaŋ́dō húmáyī tíne awɔ.”

⁴⁹Ó tá uwā ohi kahíníī, “Ɔdíyá nɛ̄ aá cíkā ō tíne um āa? Aá jé ka n cíkā o yúklɔ́ ipú inu ɔlɛ́ Ádā um ŋ́ nɛɛ?

⁵⁰Amáŋ é jɛ́yí kú ɛlā nōo ka nyā ŋ́.

⁵¹Anɔ́ɔ Ujísɔ̄si kwúcē le tá Unásārēti mla uwá á. Ó lɛyítáajɛ lɛ uwá. Ɛ́nɛ́ nū le ɛjɛ̄ɛ̄jī aɔ́dā nēe bá ā kpó tū ipú ɔtū kú nū.

⁵²Ujísɔ̄si le jɛ le pīya ijímkpa. Ó jéeyi nɛ̄hi, ó klla téeyī olɔhi kú Ɔwɔicō mɛ́mla ákú alɛɛcɛ.