Read idoma ULÚKU 20 Bible Online

ULÚKU 20 - idoma bible

ULÚKU 20

¹Ɛ̄cī éyi eko nɛ̄ Ujísɔ̄si yɔ̄ ī nwū ācɛ ɛlā Ɔwɔicō klla kē yɔ̄ ī tɔ́ɔna kú ɔ̄kōolɔhi ā, aótrɛyí kú ācogwɛ́ɛya mɛ́mla aútíca kú íne mɛ́mla anyākwɔ́cɛ ā le pɛ́ wā.

²Anɔ́ɔ é da ɔ́ kahíníī, “Le da alɔ, ɔfú nyá nɛ̄ a lɛ ká ā yá aɔ́dā nēe bá ā? Ɔ̄nyɛ je ɔfú ā gā awɔ ā?”

³Ujísɔ̄si tá uwā ohi kahíníī, “N le ɔ̄kā éyi da aá. Aá da um,

⁴ɔfú nɛ̄ Ujɔ́ni bī le yá ācɛ ubatísim ā ŋmá ɛgiyí Ɔwɔicō kɛ̄ɛ ka ɛgiyí alɛɛcɛ?”

⁵É gbɔɔ́ ō miya ɔ́ mla iyī uwā kahíníī, “Ɔdí nɛ̄ alɔ í ka ā? Ɔ́dāŋ ka alɔ ka koó ŋmá ɛgiyí Ɔwɔicō, ó géē da alɔ ka ‘Ɔdíyá nɛ̄ aá kē cɛ̄ɛ̄lā kú Ujɔ́ni ŋ́.’

⁶Amáŋ ɔ́dāŋ nɛ̄ alɔ ká ka ɔfú o bī yá Ubatísim kú Ujɔ́ni ŋmá abɔ̄ alɛɛcɛ, ācɛ ā géē tá ɛcɔ̄ klá alɔ ohígbū ka ɛjɛ̄ɛ̄jī uwā cɛ̄ ka Ujɔ́ni ɔ́ɔ wɛ ɔ̄comɛ́ɛbɛ.”

⁷Anɔ́ɔ é tóohi kahíníī, “Alɔ í jé ɛga nōó ŋmá ā ŋ́.”

⁸Anɔ́ɔ Ujísɔ̄si kē da uwá kahíníī, “Ń kē gáā da aá ɛga nɛ̄ n bī íkwu ō le yá aɔ́dā nēe bá nyā ŋmá ā ŋ́.”

⁹Anɔ́ɔ Ujísɔ̄si le ita nyā kwu lɛ ācɛ ā á. Ó kahíníī, “Ɔ̄cɛ éyi yɔ̄ nōo le ɛhɔ̄ ufáyin hí. Ó kwú ɔ̄ ú tá olufa lɛ ācɛ, anɔ́ɔ ó le tá iyāwu ɛga oligbó á.

¹⁰Eko nɛ̄ eko o tū īkpō ufáyin ā bá ā gā ā, ó le ɔ̄cocɛ̄hɔ̄ kú nū éyi tɛ̄hɔ̄ fu aólufa ā kóō mīyɛ ukpɛ̄ īkpō kú ufáyin kú nū ŋmá ɛgiyí uwā gé lɛ ɔ́. Amáŋ aólufa ā le ɔ̄cocɛ̄hɔ̄ ā ŋmíije, le ɔ́ tū abɔ̄ áncā gé lɛ ɔ́.

¹¹Anɔ́ɔ ó klla lɛ ɔ̄cocɛ̄hɔ̄ ɔhá tɛ̄hɔ̄. Amáŋ aólufa ā lɛ ɔ́ ŋmíijē dúú, le ɔdūwēyī yá ɔ̄, lɛ ɔ́ nū nyɔ̄ abɔ̄ áncā.

¹²Anɔ́ɔ ó klla le ɔ̄cocɛ̄hɔ̄ ɔ́mɛtá tɛ̄hɔ̄ nyɔ̄ kpɔ́ á. Aólufa ā le ɔ́ yá ágbe dúú, é klla le ɔ́ tɛ̄cɔ̄ tɛ́ɛcɛ ŋmá ipú ɛhɔ̄ ā.

¹³Anɔ́ɔ Óndú ɛhɔ̄ ufáyin ā kahíníī, ‘Ɔdí nɛ̄ n géē yá mɛ́ɛ̄ āa? N géē tū ɔyí ékpó kú um nyɔ̄. É géē lɛ ojīlīmā ce ɔ́ piíí!’

¹⁴Amáŋ eko nɛ̄ aólufa ā le ɔ́ má ā, é da iyī uwā kahíníī, ‘Ɛ̄nyā wɛ ɔyí kú ádā ɛhɔ̄ ā á. Ālɔ̄ lɛ ɔ́ ŋmó, cɛ́ɛ́ úgwū kú ádā ā le pīya ákú alɔ!’

¹⁵Anɔ́ɔ é lɛ ɔ́ pi tɛ́ɛcɛ ŋmá ɛhɔ̄ ā, anɔ́ɔ é lɛ ɔ́ ŋmó á.” Ujísɔ̄si da uwa ɔ̄kā kahíníī, “Ɔdí nɛ̄ Óndú ɛhɔ̄ ufáyin ā géē yá aólufa ā?

¹⁶N géē da aá, “Ó géē wā í lɛ aólufa ā kpó ŋmó, cɛ́ɛ́ ó kwú ɛhɔ̄ ufáyin ā ú lɛ ācɛ ɔhá.” Eko nɛ̄ ācɛ ā le ɛ̄nyā pó ā, é kahíníī, “Ɔwɔicō kóō ŋmɔ́wɛ nū!”

¹⁷Ujísɔ̄si leyī pīya kwu uwá kpaakpa anɔ́ɔ ó da uwá ɔ̄kā kahíníī, Ɔdí kē wɛ ɛyí ɔdā nēé tá ipú ɔkpíihɔ nyā mɛ́ɛ̄ ā? ‘Ɛcɔ̄ nɛ̄ ācogwíinu tá tónū koó lɔhi ŋ́ mā, le pīya ɛcɔ̄ nōo cɛgbá nɛ̄hi fíyɛ́ dúú.’

¹⁸Ɔ̄cɛ dóódu nōo má gwōnū klá ɛyí ɛcɔ̄ ā géē ca nyɛŋɛnyɛŋɛ. Amáŋ ɔ́dāŋ ka ɛcɔ̄ ā le míya ce ɔ̄cɛ dúúmā, ó géē gbā ɔ̄cɛ ɔ́ɔmā tāajɛ munumunu.”

¹⁹Aútíca kú íne ā mɛ́mla aótrɛ̄yí kú ācogwɛ́ɛya ā tíne kéē le ɔ́ kwú ɔkwɔɔkwu, ohígbū kéē le jé ka aá nōó tá ācīije nyā lɛ aá á. Amáŋ ufi ācɛ ā gē yá uwā.

²⁰Anɔ́ɔ é gbɔɔ́ ō gbō ɔ̄ gɛɛ kéē lɛ ɛga má fu ɔ́ á. É le ije gbā lɛ ācɛ ōhī kéē bī ula ga ɛgiyí Ujísɔ̄si gaá da ɔ́ ɔ̄kā. Amáŋ ɔdā nēé bī ɔtū ā wɛ kéē lɛ Ujísɔ̄si kwú abɔ̄ ó yɔ̄ ī kɛlā éyi cɛ́ɛ́ kú aótrɛ̄yí kú ācɛ Ujíyu ā kéē lɛ abɔ̄ bá ɔ̄ lɛ ɔ́ kwú gé lɛ igbómína nōo lɔfú klla le íkwu kú Uróm ā.

²¹Ācɛ ā dɔɔ̄kā kahíníī, “Utíca, alɔ jé ka ɔdā nɛ̄ a gē ka mɛ́mla ɛ̄nɛ̄ a gē nwū ā wɛ ɔkwɛ̄yi. Alɔ jé ka á gē má eyīgoo kú ɔ̄cɛ dúú ŋ́, amáŋ a gē nwū ɛlā ɔkwɛyí lɛyíkwu ɔdā nɛ̄ Ɔwɔicō miya táajɛ lɛ ācɛ ā.

²²Da alɔ ɛ́ɛ́, ɔ̄cɛ gē bīyíne kú alɔ ɔ́dāŋ koó lɛ ijē ɔlɛ́ gbā lɛ Usísa, ɔcɛ́nɛ̄hi kú Uróm ā, kɛ̄ɛ koó cíkā ŋ́.”

²³Amáŋ Ujísɔ̄si le jé ka ula nēé yɔ̄ ī yá á, anɔ́ɔ ó da uwá kahíníī,

²⁴“Aá le ikpīije éyi mafú gā um.” Anɔ́ɔ ó klla kahíníī, “Ifotó mɛ́mla iyē kú ɔ̄nyɛ bá ɔ̄ yɔ̄ ā?” Anɔ́ɔ é da ɔ́ kahíníī, “Ákú Usísa.”

²⁵Anɔ́ɔ Ujísɔ̄si kahíníī, “Ó lɛ ā, aá je ɔdā nōo wɛ ákú Usísa lɛ Usísa, amáŋ aá je aɔ́dā nōo wɛ ákú Ɔwɔicō lɛ Ɔwɔicō.”

²⁶Anɔ́ɔ é má ɔdā dúúmā ō lɛ abɔ̄ bá ɔ̄ kéē lɛ Ujísɔ̄si kwú iyɔ̄bū ācɛ ā gɛ ŋ́ má. Ohi nōó tá ā le hɛ́ uwā idáagó, anɔ́ɔ okónu í hɛ uwā gɛ ŋ́ má.

²⁷Anɔ́ɔ Ācɛ Usádusīi ōhī, nēe ka ka ācɛ í gáā héyī ŋmá ɔlékwū gɛ ŋ́ mā, le tá ɛgiyí Ujísɔ̄si gaá da ɔ́ kahíníī,

²⁸“Utíca, Umósīsi tá íne nyā lɛ alɔ ka ɔ́dāŋ ka ɔ̄cɛnyīlɔ éyi gekwú hɛ̄ ɔnyā nū tá, nōó ma ɔyí ŋ́, ka ɔyínɛ́ nū nɔ̄nyīlɔ ɔ́ɔ cíkā ō kwú ɔnyā ā ú ɔnyōkwū. Ó yá ɛ̄nyā cɛ́ɛ́ é géē lɛ ayí nēé géē je uwá ka ayí kú okwūmā ā.’

²⁹Eko éyi ayínɛ́ nɔ̄nyīlɔ ahāapa bá. Ákú aflɛ́yí ā le ɔnyā lɛ, ó gekwú í ma ayí ŋ́.

³⁰Anɔ́ɔ ɔ́mpa ā kwú ɔnyā nū ú ɔnyōkwū. Ó kē gekwú í ma ɔyí dúúmā ŋ́.

³¹Anɔ́ɔ ɔ́mɛtá ā kē kwú ɔnyā ā ɔnyōkwū dúú. Ɔdā ékpónú ā yá ɛjɛ̄ɛ̄jī ayínɛ́ ahāhílahāapa ā á. É le pɛ́ gekwú dúúdú í ma ayí dúúmā ŋ́.

³²Igbīhāajɛ ɔ̄cɛnyā ā gekwú.

³³Abɔ̄ ɛjɛ̄ɛ̄jī ayínɛ́ ahāapa le ɔ́ lɛ ɔnyā kpɛ́mm ā, ɔnyā kú ɔ̄nyɛ nōó géē wɛ eko nɛ̄ ācɛ nēe kwú ā le kpó héyī ā?

³⁴Ujísɔ̄si tá uwā ohi kahíníī, “Ācɛnyīlɔ mɛ́mla ācɛnyā kú ipú ɛcɛ nyā gē lɛ iyī uwā,

³⁵Amáŋ ācɛnyīlɔ mɛ́mla ācɛnyā nēe yá olɔhi jɛ̄ ɔ̄ kéē héyī ŋmá ɔlékwū kéē yēeyī eko nōo ī wā ā í gáā lɛ ɔnyā ámāŋ lɛ ɔbá ŋ́.

³⁶É géē lɛbɛ̄ɛka aálelékwū-ōtɛ̄hɔ̄ ā, é kē gáā kwú ŋ́. Uwá wɛ ayí kú Ɔwɔicō ohígbū kéē le héyī ŋmá ɔlékwū ɛɛ́.

³⁷Umósīsi mafú kéē gē je ācɛ nēe pɛ́ kwú ā héyī ŋmá ɔlékwū. Ɛga nēé tá tū ipú ɔkpíihɔ lɛyíkwu ɔlá nōo cɛyí ácí amáŋ nōó kē yi ácí ā ŋ́ mā, ó kɛlā lɛyíkwu Óndú ā kahíníī, “Ɔwɔicō kú Ébrahām, Ɔwɔicō kú Áyísīki, mɛ́mla Ɔwɔicō kú Ujékɔ̄pu.’

³⁸Ó wɛ Ɔwɔicō kú ācɛ nēe yēeyī, ó wɛ ákú ācɛ nēe gekwú ā ŋ́, ohígbū ka ɛjɛ̄ɛ̄jī uwā yēeyī tū ɔ̄ɔ̄.”

³⁹Aútíca kú íne ōhī ā da ɔ́ kahíníī, “A kɛlā lɔhi íbí utíca!”

⁴⁰Anɔ́ɔ é bɔ́tū da ɔ́ ɔ̄kā dúú gɛ ŋ́ má.

⁴¹Ujísɔ̄si da uwā ɔ̄kā kahíníī, Ɔwɛ nyá nēé ka ka ɔhɔ́nyɛtá ā géē ŋmá ipɔ́ɔma kú Udéfīdi ā?

⁴²Ohígbū ka Udéfīdi abɔ̄yī nū ka ipú ɔkpá kú Aíje ā kahíníī, “Óndú ā ka lɛ Óndú um kahíníī, ‘Cīce abɔ̄lɔ́ná kú um amānyā.

⁴³jāā gbéeko nɛ̄ n lɛ aólɛlā kú uwɔ yálé klla le uwēyī je lɛ uwá ipéyī uwɔ!’

⁴⁴“Udéfīdi hī Ohɔ́nyɛtá ā ka Óndú. Ó lɛ ā, ɛ́gɛ́nyā nɛ̄ Ohɔ́nyɛtá ā ŋmá ipɔ́ɔma kú Udéfīdi kpɔ́ ā?”

⁴⁵Abɔ̄ odúúdú ācɛ bá yɔ̄ ī pó ɛlā kú nū ā, ó da ayíkpó kú nū kahíníī,

⁴⁶“Áá leyī kwɛcɛ ohígbū aútíca kú íne ā, nɛ̄ awulú ōkwajɛ áncā ō wiiyē kéē yɛ ipú olihi biílí he uwá ɔtū ā. Ó wɛ ɔdā ō he uwá ɔtū nɛ̄hi kú ācɛ kéē túkpɛɛ́ ɛ́ɛ́ kéē hókónu tū uwā. Ācɛ nōo cīce ɔcí iyɔ̄bū ipú aɛ́gogbɔ̄ɔkɔ mɛ́mla ɛga ojīlīmā eko kú ucɛ gē he uwá ɔtū á.

⁴⁷É gē pīya anyōkwū tū gē mīyɛ ɔlɛ́ uwā tɔ̄ɔkwu cɛ́ɛ́ o yá ɛ́ɛ́ kú ācɛ kéē jé ɛdɔ ācɛ nēé wɛ ŋ́ mā, é gē gbɔ̄ɔkɔ olīkpō ajɛ nɛ̄hi. Ɔwɔicō géē yá uwā italā nɛ̄ɛ̄nɛ̄hi.”