Read idoma ULÚKU 21 Bible Online

ULÚKU 21 - idoma bible

ULÚKU 21

¹Ujísɔ̄si yɔ̄ ipú Agblīihɔ-nɛ̄hi anɔ́ɔ ó yɔ̄ ī leyī táajɛ ɛhi nɛ̄ ācɛ olagbénú yɔ̄ ī le tá ipú ikpati ɛhi ā.

²Anɔ́ɔ ó klla kē má abɔ̄ ɔnyōkwū ogbɛhá éyi wā ī kpó andelī ɛpa tū ipú ikpati ɛhi ā.

³Anɔ́ɔ ó kahíníī, “N da aá ka ɛhi nɛ̄ ɔnyōkwū ogbɛhá nyā je ā nwuné fíyɛ́ ákú odúúdú ācɛ ɔhá ā á.

⁴Ohígbū ka ācɛ ohile ā je āyā oligíí ŋmá ipú agbénú nēé lɛ hile ā. Amáŋ anú ā, ɛ́gɛ́nɛ̄ ogbɛhá lɛ nááná ā odúúdú ɔdā nōó ī bī le lá ɔdōlé ā nōó je ŋmáajɛ á.

⁵Ācɛ ōhī kú ayíkpó ā bá yɔ̄ ī kɛlā lɛyíkwu Agblīihɔ-nɛ̄hi ā, ɛ́gɛ́nɛ̄ nēé gwó ɔ̄ mla aɛ́cɔ̄ nēe lɔhi ō má eyī ā, mɛ́mla ɛ́gɛ́nɛ̄ ɔdā nēé bī wā í le yá Ɔwɔicō ɛhi ā lɔhi lɛ ā ā. Amáŋ Ujísɔ̄si da uwá kahíníī,

⁶“Odúúdú aɔ́dā nɛ̄ aá má mbá ā, eko géē wā nēé gáā mabɔ̄ ɛcɔ̄ ékpónú tá cɛyí ɔhá nēé gáā ca ɔ́ tāajɛ ŋ́ nɛɛ ŋ́.”

⁷É da ɔ̄kā kahíníī, “Utíca, eko nyá nɛ̄ ɛnyā í yá ā? Ɔdí géē yá nōo í mafú ka eko kú ɔdā nɛ̄ a ka kóō í yá ā gā ɛɛ́ mā?

⁸Ujísɔ̄si tóohi kahíníī, “Áa leyī kwɛcɛ, aá cɛ̄ lɛ ɔ̄cɛ dúú plla aá ŋ́. Ācɛ alɛwa géē bī iyē kú um wā, géē yɔ̄ ī ka kahíníī, ‘Ami ā wɛ Ohɔ́nyɛtá á!’ mɛ́mla ‘Eko ā kē gā abālɔbányā ɛɛ́!’ Aá híīī yɛce uwá ŋ́.

⁹Eko nɛ̄ aá le ɔ̄kā kú ɛfú mɛ́mla eko kú ɔkpɔkpllɔ, aá híīī yúúfi ŋ́. Aɔ́dā nēe bá abɔ́ɔ ā géē yá aflɛ́yí piíí, amáŋ ɔ́ɔmā í cābɔ̄ ka eko ā má kwajaajɛ ɛɛ́ ŋ́.”

¹⁰Ó klla kahíníī, “Éwo éyi mɛ́mla Éwo ɔhá géē kpɛ́fú tá iyī uwā. Ajɔ̄ɔ̄cɛ́ éyi géē kpɛ́fú tú ajɔ̄ɔ̄cɛ́ ɔhá.

¹¹Ajɛ géē jíliyē nɛ̄ɛ̄nɛ̄hi ɛga alɛwa, ɔkpɛtā géē ŋmó ācɛ, ōcē obɔ̄bí géē tū ɛga alɛwa, aɔ́dā ōtūufi nɛ̄hi mɛ́mla ɔdidáago géē wā ŋmá ɔkpáncō.

¹²Gbɔbū ɛ́ɛ́ ká aɔ́dā nēe bá ā kéē yá, é géē kpó aá kwú géē kɛpɔ̄ tū aá aɛ́gogbɔ̄ɔkɔ ā, géē kpó aá tāgbā. É géē bī aá wā iyɔbū aɔ́cɛ́ mɛ́mla aígbómína ohígbū olɛhɔ̄ kú um nɛ̄ aá cɛ̄ ā.

¹³Ɛ̄nyā géē wɛ ɛga nɛ̄ aá géē bī le tɔ́ɔna kú ɔ̄koolɔhi ā á.

¹⁴Aá le ɔtū kú aá yéékpó ká aá híīī lɛla wū ɔwɛ nɛ̄ aá géē kɔkɔ kú iyī aá ā ŋ́.

¹⁵Ohígbū ka n géē nwū aá ɛlā kú íjééyī nɛ̄ odúúmā kú aólɛlā kú aá í kōō gáā táafú ámāŋ má ɔkɔ ka mla aá ŋ́.

¹⁶Aádā aá, aɛ́nɛ́ aá, ayínɛ́ aá nɔ̄nyīlɔ mɛ́mla aɔ́máapú aá mɛ́mla aóklóbīya aá géē yíbīyāajɛ tū aá. É géē ŋmó ācɛ ōhī kú aá.

¹⁷Ɛjɛ̄ɛ̄jī ācɛ géē wɔ́tū aá ohígbū um.

¹⁸Amáŋ ó kōō inyīlɛ̄yí kú aá ékpó í gaá bí ŋ́.

¹⁹Aá lɔtūlé, yɔ̄ ī lɔtūce Ɔwɔicō kpɔ́, cɛ́ɛ́ aá lɛ oyēeyí opiyóó lɛ.

²⁰Eko nɛ̄ aá lɛ aícɔ́ɔja má le íbɔm cē tū Ujerúsālɛm, cɛ́ɛ́ aá géē jé kéē géē je ɔ́ catāajɛ eko kpiíí.

²¹Eko ɔ́ɔmā ācɛ nēe bá Ujudíya ā kéē le kwu nyɔ̄ ɛyí ɛfu. Ācɛ nēe bá ipú igelī ā kéē le pɛ́ nyɛ̄ɛ̄. Ācɛ nēe bá ipú ɛhɔ̄ ā kéē híīī ga ipú igelī ā ŋ́.

²²Ohígbū ka ɛ̄cī nēe bá abɔ́ɔ géē wɛ ɛ̄cī nēé géē yá ācɛ italā. Ó yá ɛ́ɛ́ kú ɔdā nēé tá tāajɛ ipú ɔkpíihɔ ā kóō le cɛ̄.

²³Ó géē bɔ̄bí nɛ̄ɛ̄nɛ̄hi lɛ anyā nēe yīīpú mɛ́mla aɛ́nɛ́ nēe bī ayípɛ̄ nɛ̄ŋcɛ́ abɔ̄ eko ɔ́ɔmā ā! Ɔtū géē bīya nɛ̄ɛ̄nɛ̄hi lɛ ācɛ kú ajɛ ā. Ɔwɔicō géē cɔ̄nū nɛ̄hi tá ācɛ nyā.

²⁴É géē bī ɔkpaŋ́gelī le ŋmó ōhī, é géē kpó ācɛ ɔhá aálagbá ga ajɛ kú aéwɔhá ɛyɛ́ɛyɛ́yí. Aílɔ́wá ā kē géē leyīkwu Ujerúsālɛm jāā gbéeko nɛ̄ eko kú uwā mɛ.”

²⁵Aɔ́dā o yéyījii géē yá ɔkpáncō, ɔdōcābɔ̄ í yɔ̄ ipú ɛnɔ, ɔyā, mɛ́mla aínyílɔ́wɔ. Ufi kú ekwukwu mɛ́mla uya nɛ̄hi kú úgbagwú kú ísu géē cɛ̄ lɛ ɔtū wogodo lɛ ācɛ kú aéwo kú ipú odúúdú ɛcɛ.

²⁶Ufi géē yá kú ɔtū kú ācɛ alɛwa kóō gbenyi abɔ̄ é yɔ̄ ī má ɔdā nōo gáā yá ɛcɛ ā, ohígbū keé géē jíli odúúdú ɔfú kú ipú ɔkpancō iyē.

²⁷Cɛ́ɛ́ ācɛ géē má Ɔyínɔ̄nyīlɔ kú Ɔ̄cɛ yɔ̄ ī wā ipú ojuja mla ɔfú nɛ̄hi mɛ́mla ɛgahi.

²⁸Eko nɛ̄ aɔ́dā nēe bá nyā gbɔɔ́ ō yá, aá māháyicō kpaakpa cɛ́ɛ́ kú aá je eyī gicō ohígbū ka Ɔwɔicō géē wā í nya aá tá ānāānā.

²⁹Anɔ́ɔ Ujísɔ̄si le ɛlā gbla ɛlā lɛ uwá kahíníī, “Aá gbɛlá kwu ɔcí ufígi mɛ́mla odúúdú aɔ́cí ohile.

³⁰Eko nɛ̄ aá má ēpū kú uwā gbɔɔ́ ō lu, aá jé ka ɔnɔ ɔ́ɔ le bá ɛɛ́.

³¹Ɔwɛ ékpó ɔ́ɔmā, eko nɛ̄ aá le aɔ́dā nēe bá nyā má yɔ̄ ī yá, aá géē jé ka eko nɛ̄ Ɔwɔicō í wā gaá gbō ācɛ ɔlɛ́ nū ā le bá ɛɛ́.

³²Aá le jé kpɔ́cíí ka ācɛ nēe yēeyī abālɔbányā í gáā pɛ́ kwú gbɔbū ɛ́ɛ́ kú aɔ́dā nēe bá nyā kéē yá ŋ́.

³³Ɔkpáncō mɛ́mla ɛcɛ géē bítāajɛ, amáŋ ɛlā nɛ̄ n ka ā í wɛ ɔkwɛ̄yi piyóó.

³⁴“Aá leyī kwɛcɛ kú aá híīī je eko kú aá táajɛ lɛ o yɔ̄ ī lé ucɛ mɛ́mla o yɔ̄ ī gwá ejé mɛ́mla o yɔ̄ ī gbɛlá kwu unwalu kú oyeeyi ŋ́. Ó lɛ ā ŋ́ ɛ̄cī ā géē wā eko nɛ̄ aá leyīce ŋ́,

³⁵bɛ̄ɛka ukpa nōo ī kwú ɛbɛ́ ā. Ohígbū ka ɛ̄cī ā géē wā í ce odúúdú ācɛ ɛga dóódu kú ɛcɛ.

³⁶Aá leyī kwɛcɛ gɛɛ, cɛ́ɛ́ ká aá gbɔ̄ɔkɔ ojigógó ka aá géē má ɛ́nyɔ́ nōo géē bī aá bū ipú aɔ́dā nōo géē yá mɛ́mla ɛ́nyɔ́ nɛ̄ aá géē bī háyi iyɔ̄bū Ɔyínɔ̄nyīlɔ kú Ɔ̄cɛ ā.”

³⁷Ujísɔ̄si yɔ̄ gē nwū ācɛ ɛlā Ɔwɔicō ipú Agblīihɔ-nɛ̄hi ā ɛ̄cī dóódu, amáŋ ɔ̄nɔ̄ɔ̄nɛ̄ dóódu ó gē nyɛ̄ɛ̄ ga ɛyí ɛfu kú ɔcí olīifu gē klá abɔ́ɔ gbɔ́ɔ̄cī.

³⁸Ɔ̄cɔ̄ɔcī blibli ɛ̄cī dóódu ācɛ gē pɛ́ gā ipú Agblīihɔ-nɛ̄hi kéē pó ɛlā kú nū.