Read idoma ULÚKU 22 Bible Online

ULÚKU 22 - idoma bible

ULÚKU 22

¹Ɛ̄cī ucɛ kú igbō nōó ī nū ŋ́, nēé gē hī ka ucɛ kú onyatá ā le bá ajaajɛ.

²Aótrɛ̄yí kú ācogwɛ́ɛya mɛ́mla aútíca kú íne bá yɔ̄ ī cēyītīkwū kéē lɛ ɔwɛ nēé géē lɛ Ujísɔ̄si ŋmó wɛɛlɛ ā jé, amáŋ é gē yúúfi ācɛ ā nɛ̄ɛ̄nɛ̄hi.

³Anɔ́ɔ ebilíi le tá ipú ɔtū kú Ujúdasi nēé hi ka Iskáriyɔ̄ti, nōo wɛ éyi kú ayíkpó ā á.

⁴Anɔ́ɔ Ujúdasi nyɛ̄ɛ̄ le yɛ tá ɛgiyí aótrɛ̄yí kú ācogwɛ́ɛya mɛ́mla ákú aídengéli kú Agblīihɔ-nɛ̄hi ā lɛyíkwu ɔwɛ nōó géē yíbīyājɛ tū Ujísɔ̄si cɛ́ɛ́ kóō kwú ɔ̄ ú tū uwā abɔ̄ á.

⁵Ɛlā nōó ka ā le he uwá ɔtū anɔ́ɔ é cɛ̄ ka aá géē gbā ije lɛ ɔ́ á.

⁶Ujúdasi cɛ̄ ɛlā nēé ka ā, anɔ́ɔ ó gbɔɔ́ ō dɔɔ̄kā ɛga olɔhi nōó géē yíbīyājɛ tū Ujísɔ̄si lɛ uwá wɛɛlɛ nɛ̄ ācɛ í gáā jɔ́ɔkwu nū ŋ́ mā á.

⁷Eyī kú ɛ̄cī ucɛ kú igbō nōó gē nū ŋ́ mā le nyā, ó kē wɛ eko nēe gē ŋmó ɔyí álá ā.

⁸Ujísɔ̄si le Upíta mɛ́mla Ujɔ́ni tɛ̄hɔ̄ nyɔ̄ í da uwá kahíníī, “Aá nyɔ̄ gaá lɛ ɔdōlé kú ucɛ kú onyatá ā tútū lɛ alɔ kú alɔ lé.”

⁹É da ɔ́ ɔ̄kā kahíníī, “Iní nɛ̄ a dɔɔ̄kā kú alɔ tá ɔ̄ tū ā?”

¹⁰Ó tá uwā ohi kahíníī, “Abɔ̄ aá yɔ̄ ī bēhé ga ipú igelī ā, ɔ̄cɛnyīlɔ éyi nōo bī ɔjá kú éŋkpɔ̄ géē jīla aá ɔwɛ. Aá tá ɔ̄ ɔkwu ga ipú inu nōó í bēhé nyɔ̄ ā.

¹¹Cɛ́ɛ́ ká aá da óndú ɔlɛ́ ā kahíníī, ‘Utíca ā ka, ‘Iní nɛ̄ inu aúgbɔga nɛ̄ ami mɛ́mla ayíkpó kú um géē lé ucɛ kú onyatá ā yɔ̄ ā?’

¹²Ó kē í ma inīīcō ogbādā éyi nēé le ɔ́ tútū ā fú lɛ aá. Aá lɛ ɔdōlé ā tútū abɔ́ɔ.”

¹³É le yɛ tá ipú igelī ā gaá lɛ ɔdā dóódu má ɛ́gɛ́nɛ̄ ó da uwá ā kpɛ́mm. Anɔ́ɔ é le ɔdōlé kú ɛ̄cī ucɛ kú onyatá ā tútū abɔ́ɔ á.

¹⁴Eko nɛ̄ eko nēé gáā lé ɔdōlé ā le yá ā, Ujísɔ̄si mɛ́mla ayíkpó ā gaá cīce kéē lé ɔdōlé.

¹⁵Ujísɔ̄si da uwá kahíníī, “N húmáyī ī tíne ká ami mɛ́mla aá kú ālɔ̄ lé ɔdōlé kú ɛ̄cī kú ucɛ kú onyatá nyā gbojī ɛɛ́, gbɔbū ɛ́ɛ́ kéē géē ŋmó um!

¹⁶Ka n̄ lɛ ɛnyā da aá. Ń gáā lé ɔdōlé kú ucɛ ká onyatá nyā igbɔhá gɛ ŋ́ jāā gbéeko nɛ̄ Ɔwɔicō wā í cɔcɛ́ dúúdú, nɛ̄ ɔdā nɛ̄ ɔdōlé kú ucɛ kú onyatá nyā kwɛyí nū ā le yá jīla.

¹⁷Anɔ́ɔ ó kwú íkókwū nɛ̄ ejé o mōōmu nū ú, lɛ ahínyá tá Ɔwɔicō ohígbū nū, anɔ́ɔ ó kahíníī, “Aá mīyɛ íkókwū nyā kú aá lɛ ɔ́ kɔ̄ mla iyī aá.

¹⁸N da aá ka igbīhi ɛ̄nyā, ń gáā gwá ejé īkpō ufáyin nyā gɛ ŋ́ jāā gbéeko nɛ̄ Ɔwɔicō wā í cɔcɛ́ dúúdú.”

¹⁹Anɔ́ɔ ó kwú igbō ā ú, ó lɛ ahínyá tá Ɔwɔicō, lɛ ɔ́ kpó cē nyɛŋɛnyɛŋɛ, anɔ́ɔ ó kwú lɛ uwá, yɔ̄ ī ka kahíníī, “Ɛ̄nyā wɛ ɔkpíyē kú um nēé je gwɛ́ɛya lɛ Ɔwɔicō kwɛyí aá ā á. Aá yá ɛ̄nyā ká aá bī le blakwu um.”

²⁰Eko nēé le ɔdōlé ɔ́nɔ̄ɔ̄nɛ̄ lé kwɛyí ā, ó kwú ikókwū kú ejé ā ú, yɔ̄ ī ka kahíníī, “Ikókwū nyā wɛ okónu ɛ̄yīpɛ̄ nɛ̄ Ɔwɔicō ce mla ācɛ ɔlɛ́ nū nēé bī ōyī kú um nōo géē cēbónū ohígbū aá.

²¹“Aá mɔ́ɔ̄, ɔ̄cɛ nōo gáā yíbīyājɛ tū um ā cīce amānyā pī um yɔ̄ ī lé ɔdōlé!

²²Ami nōo wɛ Ɔyínɔ̄nyīlɔ kú Ɔ̄cɛ ā géē kwú ɛ́gɛ́nɛ̄ Ɔwɔicō miya ɔ́ lɛ ā, amáŋ ó géē bɔ̄bí lɛ ɔ̄cɛ nōo géē yíbīyājɛ tū um ā!”

²³Anɔ́ɔ ayíkpó ā gbɔɔ́ ō da īyī uwā ɔ̄kā kéē jé ɔ̄nyɛ kú ipú uwā nōo gáā yá ɔdā nyā ā.

²⁴Ayíkpó ā gbɔɔ́ ō táafu mla iyī uwā lɛyíkwu ɔ̄nyɛ kú ipú uwā nɛ̄ ācɛ cíkā o ka ká anú ɔ́ɔ cɛgbá fíyɛ́ dúú ā.

²⁵Ujísɔ̄si da uwá kahíníī, “Aɔ́cɛ́ kú aílɔ́wá bī íkwu gē le gbō ācɛ ɔlɛ́ uwā, nááná é gē dɔɔ̄kā kéē hī uwā ka aóklóbīya kú ācɛ ā.

²⁶Amáŋ ó wɛ ɛ́gɔ́ɔmā nōó gáā wɛ ɔtāhɛ̄ aá ā ŋ́. Ikɔkɔ ɔ́ɔmā ɔ̄cɛ nōo géē cɛgbá fíyɛ́ dúú ipú aá kóō le pīya bɛ̄ɛka ɔyípɛ̄ nɛ̄ŋcɛ́ fíyɛ́ dúú ā. Ɔ̄cɛ nōo géē wɛ otrɛ̄yī kú aá kóō kwú pīya bɛ̄ɛka ɔ̄cocɛ̄hɔ̄ kú aá ā.

²⁷Ɔ̄nyɛ cɛgbá fíyɛ́ ā? Ɔ̄cɛ nōo cīce kóō lé ɔdōlé ā kɛ̄ɛ ka ɔ̄cɛ nōo í cɛ̄ ɔ̄ ɛhɔ̄ ā? Ɔ̄cɛ nōo cīce kéē cē ɔ̄ ɛhɔ̄ ā nɛ̄. Amáŋ ami ā lɛbɛ̄ɛka ɔ̄cocɛ̄hɔ̄ ipú aá ā.

²⁸“Aá wɛ ācɛ nēe bá mla um gaajɛ eko kú unwalu kú um á.

²⁹Ɛ́gɛ́nɛ̄ Ádā um je íkwu gā um kú um gbō ācɛ ā, ɛ́gɔ́ɔmā nɛ̄ n je íkwu lɛ aá dúú á.

³⁰Aá géē lé klla í gwá tɔ̄hā mla um ajɔ̄ɔ̄cɛ́ kú um, aá klla géē ce akpa kú ɔcɛ́ ká aá gbō ipɔ́ɔma igwɛ́ɛpa kú Ísrɛ̄lu ā.”

³¹Ujísɔ̄si kahíníī, “Usáyímɔ̄n! Usáyímɔ̄n! Jāhɔ̄! Ebilíi le ɛga mīyɛ kóō lɛ ɛjɛ̄ɛ̄jī aá jámá, kóō lɛ ɔdā olɔhi fō gɛcɛ ŋma obɔ̄bí, ɛ́gɛ́nɛ̄ ɔglɛ́ɛjí gē tá igbómgbō kú igwu owu ŋmá īkpō nū ā.

³²Amáŋ n lɛ ɔkɔ gbā lɛ Ɔwɔicō ohígbū awɔ nōo wɛ Usáyímɔ̄n ā ɛ́ɛ́ kóō cɛ̄ lɛ ɔtū nɛ̄ a le ce ɔ́ ā kóō tɔ́ɔlá ŋ́. Ohígbū ɔ́ɔmā, eko nɛ̄ a kwúcē igbīhi wā í tá um kpɔ́, tá ayíkpó aɔ́mpa awɔ abɔ̄ kéē lɔtūce Ɔwɔicō.”

³³Upíta tá ɔ̄ ohi kahíníī, “Óndú, n le tútū ká n̄ ga agbá mla awɔ, ká n̄ kē kwú mla awɔ!”

³⁴Ujísɔ̄si tá ɔ̄ ohi kahíníī, “Upíta, n da uwɔ ka ɔbúgwū í gáā togwú ícɛ nyā dɛ̄ɛ̄ ɛ́ɛ́ nɛ̄ a géē híhó igbɛ ɛtá ka anúɔ í jé um jéjéē ɛ́ɛ́ ŋ́ mā ŋ́.”

³⁵Anɔ́ɔ Ujísɔ̄si da ayíkpó kú nū ā ɔ̄kā kahíníī, “Aá gbɛlá kwu eko nɛ̄ n tū aá ɛhɔ̄ gɛcɛ ā. N le ukɔ́ tū aá ka aá kóō híīī bī alítā, ɛkpa ámāŋ ka áblákpá ŋ́. Ɔdā dóódu ŋá aá ā?” É kahíníī, “Ɔdā dúúmā í ŋá alɔ ŋ́.”

³⁶Ujísɔ̄si da uwá kahíníī, “Amáŋ abālɔbányā ɔ̄cɛ dúúmā nōo lɛ alítā ámāŋ ka ɛkpa kóō kwú ɔ̄ piíí. Ɔ̄cɛ dúúmā nōó lɛ okpacaŋgelī ŋ́ kóō kwu úwé kú nū ú kpó lá kóō lɛ éyi lá piíí.

³⁷É tá ipú ɔkpíihɔ ā lɛyíkwu um kahíníī, ‘Ɔdā nēé yá ācobīyíne ā nēé yá ɔ̄ dúú á.’ Ó kē yɔ̄ ī yá lɛ ā ɛɛ́. Ɛjɛ̄ɛ̄jī ɔdā nēé tá ipú ɔkpíihɔ lɛyíkwu um ā géē yájīla piíí.”

³⁸Ayíkpó ā da ɔ́ kahíníī, “Mɔ́ɔ̄! Ɔkpacaŋgelī ɛpa bá yɔ̄ á, Óndú!” Ó tū uwā ohi ka ɔ́ɔmā jɛ̄ ɛɛ́.

³⁹Ujísɔ̄si mɛ́mla ayíkpó kú nū nyɛ̄ɛ̄ ŋmá igelī ā le tá ɛyí ɛfu kú ɔcí olīifu ɛ́gɛ́nɛ̄ ó tɛtɛ gē yá ā.

⁴⁰Eko nōó le tá ajɛ abɔ́ɔ ā, ó da uwá kahíníī, “Aá gbɔ̄ɔkɔ lɛ Ɔwɔicō kóō cɛ̄ kéē yá ojámá ŋ́.”

⁴¹Anɔ́ɔ ó le tū gɛcɛ ŋmá ɛgiyí uwā ɔdā o lɛbɛ̄ɛka ikpó ofɛhɔ̄ ā, anɔ́ɔ ó kwú okwúukwu í kwajɛ le ɔkɔ gbā lɛ Ɔwɔicō á.

⁴²Ó kahíníī, “Ádā, ɔ́dāŋ koó wɛ ɔdā nɛ̄ ā cɛ̄, kwú ikókwū kú ōwē nyā ú ŋmá ɛgiyí um. Amáŋ a híīī yá ɔdā nɛ̄ n dɔɔ̄kā ā ŋ́, amáŋ ɔdā nɛ̄ awɔ dɔɔ̄kā á kóō le yá.”

⁴³Alelékwū-ōtɛ̄hɔ̄ éyi gā ɛgiyí nū ŋmá ɔkpáncō, anɔ́ɔ ó lɛ ɔfú tū ɔ̄ iyē á.

⁴⁴Ó gbɔ̄ɔkɔ lɛ Ɔwɔicō lɔfúlɔfú nɛ̄hi, anɔ́ɔ ó yɔ̄ ipú ɔkpɔkplɔ nɛ̄hi nōo cɛ̄ lɛ ahɛ nōó yɔ̄ ī bū ā yɔ̄ ī hɛ́ wāajɛ bɛ̄ɛka ágbōyī ā.

⁴⁵Ó nyāŋjɛ ŋmá ɛga nōó yɔ̄ ī gbɔ̄ɔkɔ lɛ Ɔwɔicō ā, anɔ́ɔ ó kwúcē le tá ɛgiyí ayíkpó ā, anɔ́ɔ ó má uwá bá gē gbiyɔ̄lā. Ɔtūnobí cɛ̄ lɛ uwá le gbagbafú.

⁴⁶Ó da uwá kahíníī, “Ɔdíya nɛ̄ aá yɔ̄ ī gbiyɔ̄lā ā? Aá cāŋjɛ kú aá gbɔ̄ɔkɔ lɛ Ɔwɔicō cɛ́ɛ́ kóō cɛ̄ lɛ uwá já aá má ŋ́.”

⁴⁷Ujísɔ̄si bī ɛlā okónu yɔ̄ ī ka lɛ ayíkpó kú nū ɛ́ɛ́ nɛ̄ ɛwa kú ācɛ pɛ́ wā á. Ujúdasi nōo wɛ éyi kú ayíkpó igwɛ́ɛpa ā kpó uwā tɔ̄ɔkwu wā á. Ó le tá ɛgiyí Ujísɔ̄si kóō lɛ ɔtū má ɔ̄ ɔtū.

⁴⁸Amáŋ Ujísɔ̄si kahíníī, “Ujúdasi, a le ɔtū má um ɔtū o yá ɛ́ɛ́ kú ā kwú ami, Ɔyínɔ̄nyīlɔ kú Ɔ̄cɛ ú tū aólɛlā kú um abɔ̄ nɛɛ?”

⁴⁹Eko nɛ̄ ayíkpó nēe bá abɔ́ɔ ā le ɔdā nōo gáā yá ā má ā, é dɔɔ̄kā kahíníī, “Óndú, alɔ gbɔɔ́ ō lɛ ɔkpacaŋgelī gɔ̄ ācɛ mɛ́ɛnɛ ɛɛ?”

⁵⁰Anɔ́ɔ éyi kú uwā lɛ ɔkpacaŋ́gelī gɔ̄ ɔfiyɛ kú otrɛ̄yí kú ācogwɛ́ɛya ā lɛ ɔ́ ahɔ̄ abɔ̄lɔ́ná hɛ́ táajɛ á.

⁵¹Amáŋ Ujísɔ̄si kahíníī, “Ɛ̄nyā ka ō jɛ̄!” Ó le abɔ̄ kwu ɔnyīlɔ ā ahɔ̄ anɔ́ɔ ó le yá mɛ́ɛlɛ á.

⁵²Anɔ́ɔ Ujísɔ̄si da aótrɛ̄yí kú ācogwɛ́ɛya mɛ́mla aótrɛ̄yí kú aídengéli kú Agblīihɔ-nɛ̄hi mɛ́mla anyākwɔ́cɛ nēe wā abɔ́ɔ kéē kwú ɔ̄ ā kahíníī, “Aá bī ɔkpacaŋgelī mɛ́mla ogló wā gaá kwú um bɔ̄ɔdā nɛ̄ n wɛ ɔ̄cɛ ohéjulúgwu ā nɛɛ?

⁵³N yɔ̄ mla aá ipú Agblīihɔ-nɛ̄hi ā ɛ̄cī dóódu, aá kē kwú um ŋ́. Amáŋ eko nyā wɛ eko kú aá, eko nɛ̄ ebilíi, ɔ̄cogbaajɛ kú ajodobū cɔcɛ́ ā.”

⁵⁴É le Ujísɔ̄si kwú anɔ́ɔ é le ɔ́ bī ga ɔlɛ́ kú otrɛ̄yí kú ācogwɛ́ɛya ā á. Upíta le hɛ́ce igbīīgbīhi yɔ̄ gē yɛce uwá.

⁵⁵Upíta le bēhé tá ipú ódúdɔ̄lɛ́ kú otrɛ̄yí kú ācogwɛ́ɛya ā. Ɔ̄cɛ éyi le ɔlá gwó odúdɔ̄lɛ́ ā, anɔ́ɔ Upíta nyɔ̄ gaá cīce mɛ́mla uwá á.

⁵⁶Eko nɛ̄ éyi kú ayípɔ̄ncɛnyā ocɛ̄hɔ̄ ā le ɔ́ má cīce ɛgiyí ɔlá ā, ó leyīkwu ɔ́ glīglī anɔ́ɔ ó kahíníī, “Ɔnyīlɔ nyā yɔ̄ mla Ujísɔ̄si dúú!”

⁵⁷Amáŋ Upíta le híhó, anɔ́ɔ ó da ɔ́ kahíníī, “Ɔnyā, ń kōō jé ɔ̄ ŋ́!”

⁵⁸O yɔ̄ yɛɛ ā, ɔnyīlɔ éyi le Upíta má anɔ́ɔ ó kahíníī, “A wɛ éyi kú ācɛ ō yɛce Ujísɔ̄si dúú!” Amáŋ Upíta tóohi kahíníī, “N wɛ ŋ́!”

⁵⁹Anɔ́ɔ eko le yɛ bɛ̄ɛka áwa éyi ā, ɔ̄cɛ ɔhá klla ka lɔfú lɔfú kahíníī, “Ɔkwɛ̄yi nɛ, ɔ̄cɛ ā yɔ̄ mla Ujísɔ̄si dúú gbóó, ohígbū koó ke wɛ ɔ̄cɛ kú Ugálīli dúú.”

⁶⁰Amáŋ Upíta tóohi kahíníī, “Ɔnyīlɔ, ń jé ɔdā nɛ̄ a yɔ̄ ī kɛlā lɛyíkwu ɔ́ ā ŋ́!” Anɔ́ɔ ikpííkpó ɔ́ɔmā, abɔ̄ ó bī ɛlā okónu yɔ̄ ī ka ā, ɔbúgwū le ogwú tū.

⁶¹Eko ɔ́ɔmā Óndú ā leyī pīya anɔ́ɔ ó kwú eyī hɛ́kwu Upíta á. Anɔ́ɔ Upíta le blakwu ɔdā nɛ̄ Óndú ā ka lɛ ɔ̄ kahíníī, “Gbɔbū ɛ́ɛ́ kú ɔbúgwu kóō tōgwú otúmā, a géē híhó ka anúɔ í jé um igbɛ ɛtá.”

⁶²Upíta le tá ɛcɛ gaá jikwū lɔfúlɔfú.

⁶³Ācɛ nēe yɔ̄ ī leyīkwu Ujísɔ̄si ā yá ɔ̄ okónu, é klla ŋmó ɔ̄ ijē.

⁶⁴É lɛ ɔ́ eyī gbō anɔ́ɔ é da ɔ́ ɔ̄kā kahíníī, “Hɛ́ce káá! Ɔ̄nyɛ fīyɛ̄ uwɔ odée ā?”

⁶⁵É klla cá ɔ̄ ɛdɔ kú ɛcá dóódu.

⁶⁶Eko nɛ̄ eyī le nyā ā odúúdu anyākwɔ́cɛ, aótrɛ̄yí kú ācogwɛ́ɛya mɛ́mla aútíca kú íne ā le jīla tɔ̄hā, anɔ́ɔ é le Ujísɔ̄si bī wā iyɔ̄bū uwā á.

⁶⁷É da ɔ́ kahíníī, “Da alɔ, awɔ wɛ Ohɔ́nyɛtá á nɛɛ?” Ó tá uwā ohi kahíníī, “Ɔ́dāŋ ka n le ka lɛ aá, aá gáā cɛ̄ɛ̄lā kú um ŋ́.

⁶⁸Ɔ́dāŋ ka n kē lɛ ɔ̄kā da aá, aá kē gáā cīla ŋ́.

⁶⁹Amáŋ oŋmá eko kpiíí ŋmá abālɔbányā gɔbū ā, é géē je ami, Ɔyínɔ̄nyīlɔ kú Ɔ̄cɛ cīce abɔ̄lɔ́ná kú Ɔwɔicō nōo lɔfú fíyɛ́ dúú ā.”

⁷⁰Anɔ́ɔ ɛjɛ̄ɛ̄jī uwā kahíníī, “Ayíbɛ awɔ ā wɛ Ɔyínɔ̄nyīlɔ kú Ɔwɔicō á nɛɛ?” Ó tá uwā ohi kahíníī, “Aá ka ka ami á n.”

⁷¹Anɔ́ɔ é kahíníī, “Alɔ abɔ̄yī alɔ kē le ɔdā nōo ka ā pó ɛ́ɛ́! Alɔ í cɛgbá ijáalí dúúmā gɛ ŋ́.”