Read idoma ULÚKU 23 Bible Online

ULÚKU 23 - idoma bible

ULÚKU 23

¹Ɛjɛ̄ɛ̄jī igwú ā nyāŋjɛ anɔ́ɔ é le Ujísɔ̄si bī ga iyɔ̄bū Upáyílēti á.

²Abɔ́ɔ ā, é gbɔɔ́ ō kpɛlā ce ɔ́ bōōbū bá gē ka kahíníī, “Alɔ kwú ɔ̄cɛ ā abɔ̄ yɔ̄ gē yá kú ācɛ ɔlɛ́ alɔ kéē cīlɛ̄fú, yɔ̄ ī da uwá kéē híīī dɔlɛ́ lɛ ɔcɛ́nɛ̄hi, Usísa ŋ́. Ó klla ka ka anúɔ wɛ Ohɔ́nyɛtá, nōo wɛ ɔcɛ́ kú alɔ ā á.

³Upáyílēti da ɔ́ ɔ̄kā kahíníī, “Awɔ wɛ ɔcɛ́ kú ācɛ Ujíyu á nɛɛ?” Ujísɔ̄si tá ɔ̄ ohi kahíníī, “Awɔ ka ka ami á n.”

⁴Anɔ́ɔ Upáyílēti da aótrɛ̄yí kú ācogwɛ́ɛya ā mɛ́mla ójīla ā kahíníī, “Ń má ɔdōōbɔ̄bí dúúmā ō bī le ŋmó ɔ̄cɛ ā ɛpɔ̄bí ŋ́.”

⁵Amáŋ ācɛ ā labɔ̄ nū kwɔtū lɔfú fíyɛ́ yɔ̄ ī ka kahíníī, “Ɔdā nōó yɔ̄ ī nwū ācɛ ā gē yá kú ɔtū kú uwā kóō wu kllicō kéē cīlɛ̄fú ɛjɛ̄ɛ̄jī Ujudíya. Ó gbɔɔ́ ŋmá Ujudíya anɔ́ɔ abālɔbányā ó kē gā amānyā ɛɛ́.

⁶Eko nɛ̄ Upáyílēti le ɛ̄nyā pó ā, ó dɔɔ̄kā kahíníī, “Ɔ̄cɛ ā wɛ ɔ̄cɛ Ugálīli nɛɛ?”

⁷Eko nōó le jé ka Ujísɔ̄si ɔ́ɔ wɛ ɔ̄cɛ ajɛ nɛ̄ Uhérɔ̄du ī gbō ā, ó lɛ ɔ́ tū gé lɛ Uhérɔ̄du, nōo yɔ̄ Ujerúsālɛm eko ɔ́ɔmā ā.

⁸Eko nɛ̄ Uhérɔ̄du le Ujísɔ̄si má ā, ɔtū le he ɔ́ nɛ̄hi ohígbū koó húmáyī tíne kóō lɛ ɔ́ má eyī gbojī ɛɛ́. Ó yɔ̄ ī leyice kóō má Ujísɔ̄si cɛ́ɛ́ kóō lɛ ɔdā ō hídáagó ōhī yá ipéyī nū.

⁹Uhérɔ̄du da Ujísɔ̄si ɔ̄kā alɛwa, amáŋ Ujísɔ̄si í cíla odóódu ŋ́.

¹⁰Aótrɛ̄yí kú ācogwɛ́ɛya ā mɛ́mla aútíca kú íne bá abɔ́ɔ kpɔ́ gē kpɛ́lā ce Ujísɔ̄si lɔfú lɔfú.

¹¹Uhérɔ̄du mɛ́mla aícɔ́ɔja kú nū yá Ujísɔ̄si okónu klla yá ɔ̄ ɛbɛ́ dúú. Anɔ́ɔ Uhérɔ̄du cɛ̄ lɛ aícɔ́ɔja kú nū lɛ awulú olɔhi kpó klá ɔ́ iyē, anɔ́ɔ é kwú ɔ́ ú kwúcē gé lɛ Upáyílēti á.

¹²Uhérɔ̄du mɛ́mla Upáyílēti nēe tɛtɛ wɛ olɛlā ā kwú pīya aóklóbīya ícíícɛ ɔ́ɔmā.

¹³Upáyílēti lɛ aótrɛ̄yí kú ācogwɛ́ɛya, aótrɛ̄yí ā mɛ́mla ācɛ ā hīgwú tɔ̄hā,

¹⁴anɔ́ɔ ó da uwá kahíníī, “Aá bī ɔ̄cɛ ā gē um anɔ́ɔ aá ka kóō yɔ̄ ī wu ɔtū kú ācɛ klíico kéē cīlɛ̄fú. Abālɔbányā, n le ɔ̄kā da ɔ̄ ipéyī aá amānyā. Ń kē má ɔdōōbɔ̄bí dúú ō bī le ŋmó ɔ̄ ɛpɔ̄bí ipú ɔdā nɛ̄ aá kpó ce ɔ́ ā ŋ́.

¹⁵Uhérɔ̄du í kē ŋmó ɔ̄ ɛpɔ̄bí ŋ́ dúú, ohígbū ka anú je ɔ́ kwúcē gé lɛ alɔ á. Ó lɛ ɔdā dúú nɛ̄ ɔ̄cɛ ā yá nēe cíkā ō ŋmó ɔ̄ ŋ́.

¹⁶Ohígbū ɔ́ɔmā n géē cɛ̄ lɛ aícɔ́ɔja lɛ ɔ́ gɔ́ cɛ́ɛ́ n habɔ̄ ɔ̄ tá kóō nyɔ̄.”

¹⁷Eko kú ɛ̄cī ucɛ kú onyatá dóódu, Upáyílēti gē hɛ́ alagbá éyi tá lɛ uwá piíí.

¹⁸Amáŋ ɛjɛ̄ɛ̄jī ɛwa ā dɛ̄gba tɛ́ɛcɛ kahíníī, “Lɛ Ujísɔ̄si ŋmó, ká ā lɛ Ubárābasi hɛ́tá lɛ alɔ!”

¹⁹(Ubárābasi wɛ ɔ̄cɛ nēé tagbá ohígbū abɔ̄ nōó lɛ ipú ɔ̄cɛ nēé ŋmó ɛplá eko nɛ̄ ācɛ cīlɛ̄fú ipú igelī ā.)

²⁰Upáyílēti tine kóō le Ujísɔ̄si hɛ́tá, anɔ́ɔ ó klla le ɛlā ka lɛ ācɛ ā kpɔ́ á.

²¹Amáŋ é dɛ̄gba kpɔ́ kahíníī, “Lɛ ɔ́ nyɔ́kpá! Lɛ ɔ́ nyɔ́kpá!”

²²Upáyílēti klla le da uwá igbo ɔmɛtá kpɔ́ kahíníī, “Amáŋ ɔdōōbɔbí nyá nōó yá ā? Ń má ɔdā dúú nōó yá nōo cíkā kéē ŋmó ɔ̄ ní. N cɛ̄ lɛ uwá lɛ ɔ́ gɔ̄ cɛ́ɛ́ n lɛ ɔ́ hɛ́tá kóō nyɔ̄.”

²³Amáŋ é bá yɔ̄ gē dɛ̄gba gbōmgbōm kéē lɛ Ujísɔ̄si nyɔ́kpá, anɔ́ɔ igbīhāajɛ ā ɛgba nēe dɛ̄ ā cɛ̄ lɛ uwá le yálé.

²⁴Anɔ́ɔ Upáyílēti le ɛpɔ̄bí nēé tíne ā ŋmó Ujísɔ̄si á.

²⁵Ó lɛ ɔ̄cɛ nēé tíne ā hɛ́tá lɛ uwá, ɔ̄cɛ nēe tāgbá ohígbū abɔ̄ nōó lɛ ipú ɔ̄cɛ nēé ŋmó eko nēé bá yɔ̄ ī cīlɛ̄fú ā. Anɔ́ɔ ó kwú Ujísɔ̄si ú tū uwā abɔ̄ kéē yá ɔdā nōo he uwá ɔtū mla anú á.

²⁶Aícɔ́ɔja kú Uróm le Ujísɔ̄si bī ŋmá agblɔ̄cɛ́ kú Upáyílēti, anɔ́ɔ abɔ̄ é bá yɔ̄ ī nyɔ̄ ā, é jīla ɔnyīlɔ kú Usayírini nōo ŋmá ɛhɔ̄ yɔ̄ ī ga igelī ā ɔwɛ. É le ɔ́ kwú abɔ̄fú, kwú ɔcɔ́nyɔ́kpá ú ce ɔ́ ɔkɔ kóō bī ɔ̄ tá Ujísɔ̄si ɔkwu.

²⁷Ɛwa nɛ̄hi kú ācɛ kwúcē ɔ́. Ācɛnyā nēe bá yɔ̄ ī tɛ̄gíkwū nɛ̄hi ohígbū nū ā wɛ dúú.

²⁸Ujísɔ̄si leyī pīya má uwā anɔ́ɔ ó kahíníī, “Ācɛnyā kú Ujerúsālɛm! Aá híīī jikwū ohígbū ŋ́, amáŋ aá jikwū ohígbū iyī aá mɛ́mla ayípɛ̄ ɔlɛ́ aá.

²⁹Ohígbū ka, eko yɔ̄ ī wā nɛ̄ ācɛ géē ka kahíníī, ‘Ācɛnyā nēé ma ayí jéjéē ɛ́ɛ ŋ́, ɔgɔ̄ma nōó bī ɔyí jéjéē ɛ́ɛ́ ŋ́ mɛ́mla amɛ̄ nɛ̄ ɔyí í gwá jéjéē ɛ́ɛ́ ŋ́ ma gwéeyē!’

³⁰Eko ɔ́ɔmā géē wɛ eko nɛ̄ ācɛ géē ka ka eyī yá aá kú ɛfu kóō le wúla klá aá! Ká ɛfu kóō lɛ aá kpó tayínū ipú nū!’

³¹Ohígbū ka ɔ́dāŋ kéē yá aɔ́dā ɛ́gɛ́nyā eko nɛ̄ ɔcí wɛ ɛ̄mɛ̄ɛ̄mɛ̄ kpɔ́ ɛ́ɛ́ mā, é géē yá ɔdā nōo bɔ̄bí fíyɛ́ ɛ̄nyā eko nɛ̄ ɔcí le ŋmókókó.”

³²Aícɔ́ɔja ā klla le ācɛ ɔhá nēe yá ɔdōōbɔ̄bí bītá gɛɛcɛ kéē géē lɛ uwá kpó ŋmó mla Ujísɔ̄si.

³³Eko nēé gā ɛga nēé hi ka “Ákōklō ɛyí” ā, aícɔ́ɔja kú Uróm le Ujísɔ̄si mɛ́mla aúwī ɛpa ā nyɔ́kpá abɔ́ɔ. Uwī éyi yɔ̄ abɔ̄lɔ́ná kú nū, ɔhá kē yɔ̄ abɔ̄lúfīyē kú nū.

³⁴Ujísɔ̄si kahíníī, “Ádā um, kwú yá ācɛ nēe bá nyā ɛhi. É jé ɔdā nēé bá yɔ̄ ī yá ā ŋ́.”

³⁵Ācɛ háyi bá gē cokē, amáŋ aótrɛ̄yí ā bá gē yá ɔ́ okónu kahíníī, “Ó nya ācɛ ɔhá tá, kóō lɛ iyī nū nyatá ɔ́dāŋ ka anú wɛ Ohɔ́nyɛtá nɛ̄ Ɔwɔicō fu á!”

³⁶Aícɔ́ɔja ā kōō yá ɔ̄ okónu dúú. É le tá ɛgiyí nū le ejé omákáká bī gé lɛ ɔ́,

³⁷anɔ́ɔ é da ɔ́ kahíníī, “Le iyī uwɔ nyatá ɔ́dāŋ ka awɔ wɛ ɔcɛ́ kú ācɛ Ujíyu á,”

³⁸É lɛ ɔkpá tá bá ɔcɔ́nyɔ́kpá kú nū kahíníī, “Ɛ̄nyā wɛ ɔcɛ́ kú ācɛ Ujíyu á.”

³⁹Éyi kú ācɛ o yá ɔdōōbɔ̄bí nēé nyɔ́kpá mla anú ā cá ɔ̄ ɛcá kahíníī, “Ó wɛ awɔ wɛ Ohɔ́nyɛtá ā ŋ́ nɛɛ? Lɛ iyī uwɔ mla alɔ nyatá!”

⁴⁰Ɔ̄cɛ ɔmpa ā, le ɛgba dɛ̄ tū ɔ̄ kahíníī, “Á yúúfi Ɔwɔicō ŋ́ nɛɛ? É ŋmó uwɔ ɛdɔ ɛpɔ̄bí ékpó mla anú.

⁴¹Ákú alɔ ā le kpaakpa, ohígbū ka ɔdā nōo cíkā lɛ ɔdā nɛ̄ alɔ yá ā nɛ̄ alɔ yɔ̄ ī mīyɛ yɔ̄ á. Amáŋ anú ā í yá ɔdōōbɔ̄bí dúúmā ŋ́.”

⁴²Anɔ́ɔ ó da Ujísɔ̄si kahíníī, “Gbɛlá kwú um, Ujísɔ̄si, eko nɛ̄ a géē wā í cɔcɛ́ ā!”

⁴³Ujísɔ̄si da ɔ́ kahíníī, “N cokónu ga awɔ ka ícɛ nyā a géē yɔ̄ ɔkpáncō mla um.”

⁴⁴Ó wɛ ɛpla oje igwɛ́ɛpa kú ɔlɛ́ɛnɔ ɛ́ɛ́ nɛ̄ ɛnɔ í fíyajɛ gɛ ŋ́ má. Anɔ́ɔ ajɛ kwú dobū kpímm klá odúúdú ɛga dóódu jāā gbó oje ɛtá kú ɔlɛ́ɛnɔ.

⁴⁵Anɔ́ɔ īlī nōo hɛ́ Agblīihɔ-nɛ̄hi ā igbó ā kwu híla ŋmá icō wāajɛ á.

⁴⁶Ujísɔ̄si je ɔkɔ gicō lɛ ɛgba dɛ̄, “Ádā um, n kwú odo kú um tá uwɔ abɔ̄!” Ó le ɛ̄nyā ka anɔ́ɔ ó gekwú á.

⁴⁷Otrɛ̄yí kú aícɔ́ɔja kú Uróm ā le ɔdā nōo yá ā mā, anɔ́ɔ ó cɛ̄tra Ɔwɔicō kahíníī, “Ɔkwɛ̄yi nɛ, ɔ̄cɛ ā wɛ ɔ̄cɛ okpaakpa.”

⁴⁸Eko nɛ̄ ācɛ nēe jīla bá gē cokē ā le ɔdā nōo yá ā má ā, é kwúcē ga ɔlɛ́ yɔ̄ gē tɛgíkwū.

⁴⁹Ɛjɛ̄ɛ̄jī ācɛ nēe jé Ujísɔ̄si lɔɔlɔhi ā, mɛ́mla ācɛnyā nēe kwúcē ɔ̄ ŋmá Ugálīli ā, háyi ɛcɛɛcɛ kéē má ɔdā nōo yɔ̄ ī yá ā.

⁵⁰Ó lɛ ɔ̄cɛ éyi nēé í hī Ujósɛ̄fu, ó ŋmá Arimatéya, igelī éyi kú Ujudíya. Ó wɛ ɔ̄cɛ olɔhi nēé gē lɛ ojīlīmā ce ɔ́ nɛ̄hi. Ó yɔ̄ ī gbēyī eko nɛ̄ Ɔwɔicō í wā ī lé ɔcɛ́ ipú ɛcɛ nyā ā.

⁵¹Náána nōó wɛ éyi kú ígwu kú aótrɛ̄yí kú ācɛ ā, ó cɛ̄ tɔ̄há mla ɔdā nēé ŋmótu klla lɛ ɔ́ yá gaajɛ ā ŋ́.

⁵²Ó le tá iyɔ̄bu Upáyílēti gaá ba ɔ́ kóō kwú okwū kú Ujísɔ̄si ú lɛ anúɔ.

⁵³Ó kwú okwū kú Ujísɔ̄si ú wāajɛ ŋmá ɛyí ɔcɔ́nyɔ́kpá, lɛ ɔ́ gbo mla igbogbo kú ahilíki, anɔ́ɔ ó kwú ɔ̄ ú nyɔ̄ í gwutá ipú unóji nēé bū tá ipú ápátɛ́cɔ̄ o lɔfú nɛ̄hi nēé lɛ okwū dúú tá ipú nū jéjéē ɛ́ɛ́ ŋ́ mā.

⁵⁴Ó wɛ ɛ̄cī kú otutū, ɛ̄cī Usábāti ā kē gáā gbɔɔ́ ɛɛ́.

⁵⁵Ācɛnyā nēe kwúcē Ujísɔ̄si ŋmá Ugálīli ā le yɛ mla Ujósɛ̄fu gaá le únóji ā má mla ɛ́gɛ́nɛ̄ é je okwū kú Ujísɔ̄si gwutá anú lɛ ā ā.

⁵⁶Anɔ́ɔ é kwúcē ga ɔlɛ́ nyɔ̄ gaá le anɔ̄ mɛ́mla ɔdā okpócu o nya okwū ā iyē tútū á. Ɛ̄cī usábāti ā, é mlɛ́nyɔ̄ ɛ́gɛ́nɛ̄ íne ā ka lɛ ā.