Read idoma ULÚKU 24 Bible Online

ULÚKU 24 - idoma bible

ULÚKU 24

¹Oflɔ́cí blibli kú ɛ̄cī Aláadi, ācɛnyā ā le pɛ́ tá unóji ā. É bī anɔ̄ mɛ́mla ɔdā okpócu nēé tɛtɛ tútū ā.

²É le má ka ɔ̄cɛ éyi kwú ɛcɔ̄ nēé míya kwū okónu únóji gbɔbū ā ú míya ŋmá anú.

³Anɔ́ɔ é le tá ipú nū á. Amáŋ é má okwū kú Óndú Ujísɔ̄si ŋ́.

⁴É háyi abɔ́ɔ jigbaa ohígbū ɔdā nēé má ā. Anɔ́ɔ igbeékpónú é le ācɛ ɛpa nēe le úwé nɛ̄hɛ́ o ceyī ŋmaáŋmaá wiiyē má hayi pī uwā.

⁵Ufi le anyā ā kwú nɛ̄ɛ̄nɛ̄hi, anɔ́ɔ é lɛ eyī kpó kwajɛ á. Ācɛ ā da uwá kahíníī, “Ɔdíyá nɛ̄ aá ī dɔɔ̄kā ɔ̄cɛ nōo yēeyī ɛgiyí ācɛ nēe gekwú āa?

⁶Ó yɔ̄ amānyā gɛ ŋ́. Ɔwɔicō kwú ɔ̄ ú héyī ŋmá ɔlékwū ɛɛ́. Aá blakwu ɛlā nōó ka lɛ aá eko nōó yɔ̄ Ugálīli ā.

⁷Ó kahíníī, É géē je Ɔyínɔ̄nyīlɔ kú Ɔ̄cɛ tū ācobīyaíne kú Ɔwɔicō abɔ̄, é géē je ɔ́ nyɔ́kpá, cɛ́ɛ́ ɛ̄cī ɔ́mɛtá é géē je ɔ́ héyī ŋmá ɔlékwū.’”

⁸Anɔ́ɔ ācɛnyā ā le blakwu ɛlā nōó ka ā á.

⁹É pīyɛyí ŋmá unóji ā, anɔ́ɔ é le ɛjɛ̄ɛ̄jī ɔdā nōo yá ā da ayíkpó igwóléyi ā mɛ́mla ācɛ ohile ā.

¹⁰Anyā ā wɛ Umerí Umágādalíni, Ujowána, mɛ́mla Umerí, ɛ́nɛ́ kú Ujémīsi. Uwá mɛ́mla anyā ɔhá le aɔ́dā nēe yá nyā kpó ka lɛ ayíkpó ā.

¹¹Amáŋ ayíkpó ā gbɛlá ka ɔdā nɛ̄ ācɛnyā ā ka ā wɛ ɛlā iciíci. Anɔ́ɔ é cɛ̄ɛ̄lā kú uwā ā ŋ́ má.

¹²Amáŋ Upíta cāŋjɛ anɔ́ɔ ó le inya kwu ga únóji ā á. Ó túkpɛɛ́ anɔ́ɔ ó má ɔdā ɔhá dúúmā gwū igbogbo kú ahilíki ā ŋ́ má. Anɔ́ɔ ó kwúcē le tá ɔlɛ́ le hídáagó kú ɔdā nōo yá ā?

¹³Ɛ̄cī ɔ́ɔmā piíí ā ācɛ ɛpa nōo ī yɛce Ujísɔ̄si bá yɔ̄ ī ga eyīpɔ́lɛ́ nēé hī ka Emáyɔ̄si ā. Ó lɛbɛ̄ɛka ukilómīta igwóléyi ŋmá Ujerúsālɛm.

¹⁴É kē bá yɔ̄ ī kɛlā lɛ iyī uwā lɛyíkwu odúúdú aɔ́dā nōo yá ā.

¹⁵Abɔ̄ é bá yɔ̄ ī kɔ̄kā, yɔ̄ ī tá ɛlā kwu ā, Ujísɔ̄si abɔ̄yīnū wā ŋmá igbīhi gaá gbɔɔ́ ō tíkpó mla uwá.

¹⁶É le ɔ́ má, amáŋ é jé ɔ̄ éjúuma ŋ́.

¹⁷Anɔ́ɔ Ujísɔ̄si da uwá kahíníī, “Ɔdí nɛ̄ aá yɔ̄ ī kɛlā lɛ iyī aá lɛyíkwu ɔ́ abɔ̄ aá bá ī yɛ ā?” Ɔtū le bīya lɛ uwá abɔ̄ é māháyi cíí ā.

¹⁸Anɔ́ɔ ɔ̄cɛ éyi kú uwā nēé hī Ukliyópasi ā, le ɔ̄kā da ɔ́ kahíníī, “Awɔ ofōōfuwɔ wɛ ugbɔ̄ga nōo wā Ujerúsālɛm nōó jé aɔ́dā nēe húmáyī yá abɔ́ɔ ipú ɛ̄cī nēe bá nyá ŋ́ má ā ā?”

¹⁹Ó dɔɔ̄kā kahíníī, “Ɔdínyá nɛ?” É da ɔ́ kahíníī, “Ɔdā nēé yá Ujísɔ̄si kú Unásārēti ā. Ɔ̄cɛ ɔ́ɔmā wɛ ɔ̄comɛ́ɛbɛ nɛ̄hi, aɔ́dā nɛ̄hi nōó yá mɛ́mla ɛlā nōó ka ā mafú ka Ɔwɔicō cɛ̄ɛ̄lā nū. Ɛjɛ̄ɛ̄jī ācɛ kē cɛ̄ɛ̄lā nū dúú.

²⁰Aótrɛ̄yí kú ācogwɛ́ɛya mɛ́mla aɔ́wá kú aótrɛ̄yí ɔhá ā kwú ɔ̄ ú tū igbómína kú Uróm abɔ̄ kóō lɛ ɔ́ ŋmó. Anɔ́ɔ é kwú ɔ̄ ú nyɔ́kpá á.

²¹Alɔ leyīce gbɔbū ka anú wɛ ɔ̄cɛ nōo wā gáā hɛ́ ācɛ Ísrɛ̄lu tá á nɛɛ n! Amáŋ ícɛ wɛ ɛ̄cī ɔmɛtá ŋmífi nɛ̄ ɔdā ā yá yɔ̄ mɛ́ɛ̄ á.

²²Ācɛnyā ōhī kú ígwu kú alɔ wā í lɛ alɔ ɔtū wuklíicō ofúlɔ̄cī mā. É le tá unóji kú nū,

²³amáŋ é má okwū kú nū ŋ́. É kwúcē wā ī da alɔ ka aá le aálelékwū-ōtɛ̄hɔ̄ ɛpa má nēe da aá koó le héyī ɛɛ́.

²⁴Ācɛ ōhī kú alɔ le yɛ tá únóji ā anɔ́ɔ ó lɛ ɛ́gɛ́nɛ̄ ācɛnyā ā ka lɛ ā yíílí, amáŋ é má okwū kú nū ŋ́.”

²⁵Anɔ́ɔ Ujísɔ̄si da uwá kahíníī, “Aá líla íbí, ɔdíyá nōó lɔnɔ tū aá kóō cɛ̄ odúúdú ɛlā nɛ̄ ācomɛ́ɛbɛ ā ka ā?

²⁶Ācomɛ́ɛbɛ ā í ka ɔ́ tɛ́ɛcɛ péee ka Ohɔ́nyɛtá ā í má ówē nēe bá nyā kpɛ́mm cɛ́ɛ́ kóō ga ipú ojīlīmā kú ɔcɛ́ kú nū.

²⁷Anɔ́ɔ Ujísɔ̄si le ɛjɛ̄ɛ̄jī ɔdā nēé tá tāajɛ lɛyíkwu ɔ́ kpɛ́mm ipú ɛjɛ̄ɛ̄jī ɔkpíihɔ ā kpó ka lɛ uwá, gbɔɔ́ ŋmá ɔkpá kú Umósīsi mɛ́mla aɔ́dā nɛ̄ ɛjɛ̄ɛ̄jī ācomɛ́ɛbɛ ā tá tāajɛ ā.

²⁸Abɔ̄ é le bá lɛ eyīpɔ́lɛ́ ɛga nēé bá yɔ̄ ī nyɔ̄ ā, Ujísɔ̄si le yá bɛ̄ɛka ɔdā nōó yɔ̄ ī yɛ gɔbū kpɔ́ ā.

²⁹Amáŋ é lɛ ɔ́ kwú yāajɛ yɔ̄ ī gbɔ̄ɔkɔ lɛ ɔ́ kahíníī, “Yɔ̄ mla alɔ, ohígbū ka ɔ̄nɛ̄ le gbo ɛɛ́, otú kē gbɔɔ́ ō bī ɛɛ́” Anɔ́ɔ ó le tá ipú inu kóō yɔ̄ mla uwá á.

³⁰Ó má cīce kóō lé ɔdōlé mla uwá. Ó kwú igbō ú, anɔ́ɔ ó le ahínyá tá Ɔwɔicō. Ó le ɔ́ ce, anɔ́ɔ ó kwú lɛ uwá á.

³¹Anɔ́ɔ igbeékpónú á nēé lɛ ɔ́ jéjúuma, anɔ́ɔ ó gebí tāajɛ ŋmá ipú uwā á.

³²É da iyī uwā kahíníī, “Ɔtū he alɔ nɛ̄hi eko nōó yɔ̄ ī kɛlā lɛ alɔ ɔwɛ klla yɔ̄ ī ka ɛyí kú ɛlɔ̄ɔwɔicō lɛ alɔ ā.”

³³Uwá cāŋ́jɛ bōōbū, anɔ́ɔ é kwúcē le yɛ tá Ujerúsālɛm á. Abɔ́ɔ ā, é má ayíkpó igwóléyi mɛ́mla ācɛ nēe bá mla uwā le jīla tɔ̄há,

³⁴bá yɔ̄ ī ka kahíníī, “Óndú ā le héyī ɔkwɔ̄ɔ̄kwɛ̄yí. Ó lɛ iyīnū mafú lɛ Usáyímɔ̄ni ɛɛ́!”

³⁵Anɔ́ɔ ācɛ ɛpa ā le ɔdā nōo yá ɔwɛ ā kpó ka lɛ uwá á. Ɛ́gɛ́nɛ̄ é jé ɔ̄ éjúuma klɔ́dɔ́ɔ́ eko nōo le igbo cē ɛpa ā.

³⁶Eko nēé bá yɔ̄ ī kɛlā nyā ā, anɔ́ɔ igbeékpónú Ujísɔ̄si abɔ̄yī nū gaá háyi ipú uwā. Anɔ́ɔ ó da uwá kahíníī, “Ɛbɔ́ kóō yɔ̄ lɛ aá.”

³⁷É hɛ́gilígilí, ufi le uwā kwú nɛ̄hi. É yɔ̄ ī gbɛlá ka inambo nɛ̄ aá yɔ̄ ī má á.

³⁸Amáŋ ó da uwá kahíníī, “Ɔdíyá nɛ̄ aá hɛ́gilígilí ā? Ɔdíyá nɛ̄ aá cɛ̄ lɛ ɔtū kú aá í bɛ́ɛpa lɛyíkwu ɔ̄cɛ nɛ̄ n wɛ ā?

³⁹Aá má abɔ̄ mɛ́mla ikpó kú um, kú aá jé koó wɛ ami abɔ̄yī um nɛ. Aá lɛ abɔ̄ kwu um kú aá má ɔ̄. Aá géē jé ka n lɛ ɛ́nɛ́bɛ́ ɔkpíyē mɛ́mla ikpokwú cɛ́ɛ́ aá géē cɛ̄ ka ami nɛ. Ń wɛ inambo ŋ́. Ohígbū ka inambo í gē lɛ ɛ́nɛ́bɛ́ ɔkpíyē mɛ́mla ikpokwú ŋ́.

⁴⁰Abɔ̄ nōó le ɛlā nyā ka ā, ó le abɔ̄ kú nū mɛ́mla ikpó kú nū mafú lɛ uwá?

⁴¹Ɔtū le he ayíkpó ā nɛ̄hi, é klla le hídáagó nɛ̄ɛ̄nɛ̄hi nōó cɛ̄ lɛ uwá cɛ̄ koó wɛ anú ɔkwɛyí ŋ́. Anɔ́ɔ ó da uwá ɔ̄kā kahíníī, “Aá lɛ ɔdā dúúmā amānyā nɛ̄ ɔ̄cɛ í lé déē?

⁴²É kwú ɛbéenyi ōnwū ú lɛ ɔ́,

⁴³ó mīyɛ anɔ́ɔ ó kwú ɔ́ ú lé iyɔ̄bu uwā á.

⁴⁴Anɔ́ɔ ó da uwá kahíníī, “Aɔ́dā piíí nyā nɛ̄ n kɛlā lɛ aá lɛyíkwu uwā eko nɛ̄ n yɔ̄ mla aá kpɔ́ ɛ́ɛ́ mā. Ɛjɛ̄ɛ̄jī ɔdā nēé tá tāajɛ lɛyíkwu um ipú ɔkpá íne kú Umósīsi mɛ́mla ipú ɔkpá kú ācomɛ́ɛbɛ mɛ́mla ipú ɔkpá kú Aíjē olɔhi ā géē yá jīla piíí.”

⁴⁵Anɔ́ɔ ó le ɔfú je lɛ uwá kéē jɛ́yí ɔkpíihɔ ā á.

⁴⁶Anɔ́ɔ ó da uwá kahíníī, “Ɛ̄nyā wɛ ɔdā nēé tá tāajɛ á. É géē je Ohɔ́nyɛtá ā ŋmó cɛ́ɛ́ ó kē ī héyī ŋmá ɔlékwū ɛ̄cī ɔ́mɛta piíí.

⁴⁷É klla tá ɔ̄ ipú ɔkpíihɔ keé géē tɔ́ɔna kú olɛhɔ̄ nyā tɛ́ɛcɛ ka ācɛ kéē le pīyabɔ̄ ŋmá íne nēe ī bīya ā, cɛ́ɛ́ Ɔwɔicō í je yá uwā ɛhi. É géē tɔ́ɔna kú olɛhɔ̄ nyā aflɛ́yí ipú Ujerúsālɛm cɛ́ɛ́ é í tɔ́ɔna lɛ ɛjɛ̄ɛ̄jī ācɛ nēe bá ɛga dóódu ā.

⁴⁸Aá wɛ ijáalí kú odúúdú aɔ́dā nēe bá nyā á.

⁴⁹Ami abɔ̄yī um géē tū ɔdā nɛ̄ Ádā um cokónu lɛ aá gé lɛ aá. Amáŋ aá géē gbēyī ipú igelī kú Ujerúsālɛm amānyā jāā gbéeko nēé gáā lɛ ɔfú nōo ŋmá ɔkpáncō ā tū aá iyē.”

⁵⁰Anɔ́ɔ Ujísɔ̄si le uwá kpó tɔ̄ɔkwu ŋmá igelī ā jāā ga Ubɛ́tāni á. Abɔ́ɔ ā, ó je abɔ̄ kú nū gicō le ɔhā hɛ́ ce uwá.

⁵¹Abɔ̄ ó yɔ̄ ī hɔ́hā ce uwá ā, ó nyɛ̄ɛ̄ ŋmá ɛgiyí uwā, anɔ́ɔ é kwú ɔ̄ ú gicō ga ipú ɔkpáncō á.

⁵²É le ɛ̄gbā gbā ɔ̄ anɔ́ɔ é kwúcē ga Ujerúsālɛm á. Éeyē le mu uwá ipú nɛ̄hi.

⁵³É le odúúdú eko kú uwā táajɛ ipú Agblīihɔ-nɛ̄hi ā yɔ̄ gē cɛ̄tra Ɔwɔicō.