Read idoma ULÚKU 3 Bible Online

ULÚKU 3 - idoma bible

ULÚKU 3

¹Iháyí ɔ́migwɛ́ɛhɔ̄ nɛ̄ Utibɛ́riyɔ̄si wɛ ɔcɛ́nɛ̄hi ā, Upɔ́ntíyɔ́si Upáyílēti wɛ igbómína kú Ujudíya ā, Uhérɔ̄du wɛ ɔcɛ́ kú Ugálīli, ɔyínɛ́ Uhɛ́rɔ̄du nɔ̄nyīlɔ, Ufílīpu kē wɛ ɔcɛ́ kú ajɛ kú Ituréya mɛ́mla Utrakónītisi, Ulisánīyasi kē wɛ ɔcɛ́ kú Abilíni ā.

²Ánnāsi mɛ́mla Ukayéfāsi kē wɛ aótrɛ̄yí kú ācogwɛ́ɛya. Eko ɔ́ɔmā nɛ̄ olɛhɔ̄ ŋmá ɛgiyí Ɔwɔicō wā gé lɛ Ujɔ́ni ɔyínɔ̄nyīlɔ kú Usɛkaríya ipú ígbíli.

³Anɔ́ɔ Ujɔ́ni le yɛ bū ɛjɛ̄ɛ̄jī ajɛ nēe yɛ jila ísu kú Ujɔ́dan tá ā, yɔ̄ í tɔ́ɔna lɛ ācɛ kahíníī, “Aá le pīyabɔ̄ ŋmá ɔdōōbɔ̄bí nɛ̄ aá ī yá ā, ka n lɛ ubatisim yá aá, cɛ́ɛ́ Ɔwɔicō kwú íne nɛ̄ áa bīya ā ú yá aá ɛhi.”

⁴Ɛ́gɛ́nɛ̄ é tá ɔ̄ tū ipú ɔkpá kú Ayisáya ɔ̄comɛ́ɛbɛ ā kahíníī, “Ɔ̄cɛ éyi yɔ̄ ī dɛ̄gba ipú ígbíli ka, ‘Aá lɛ ɔwɛ ā gllayá lɛ Óndú ā, aá lɛ ɔwɛ ikpó nā kpaakpa lɛ ɔ́ kóō yɛ!

⁵É géē kpó ajɛ tū ɔpɛ́ dóódu, kóō le mu ɔ́, é géē cīla ɛfu nɛ̄ŋcɛ́ mɛ́mla ɛfu nɛ̄hi tū piíí. É géē nā ɔwɛ okwúgɔ̄kwugɔ̄ kpaakpa piíí é kē géē cīla ɔwɛ okplókōkplokō tū kóō le yá mɛ́ɛ́lɛ́ piíí.

⁶Ɛ̄jɛ̄ɛ̄jī ācɛ géē má ɛ́gɛ́nɛ̄ Ɔwɔicō géē nya uwá tá lɛ ā ā.”

⁷Ācɛ alɛwa le pɛ́ ta ɛgiyí Ujɔ́ni kóō lɛ ubatisim yá uwá. Ó da uwá kahíníī, “Aá nēe bɔ̄bíipú bɛ̄ɛka ɛgwā! Ɔ̄nyɛ̄ pi aá ahɔ̄ ka aá kóō kwu ŋmá italā nɛ̄ Ɔwɔicō gáā yá ācɛ obɔ̄biipú ā?

⁸Aá yá ucē olɔhi nōo géē mafú lɛ ācɛ ɔhá ka aá le pīyabɔ̄ ŋmá íne nɛ̄ aá ī bīya ā. Aá híīī yɔ̄ ī ka lɛ iyī aá ka Ébrahām wɛ ádáádā aá ŋ́. N da aá ka Ɔwɔicō lɔfú lɛ aɛ́cɔ̄ nēe bá nyā pīya ayááyí lɛ Ébrahām glá.

⁹Ɔwɔicō kwu āgā ú ce ɛgba kú ɔcí kóō hɛ́ ɔ̄ wāajɛ ɛɛ́. Ó géē hɛ́ ɔcí dúúmā nōó gwá ikpo olɔhi ŋ́ ma cɛ́ɛ́ ó kwú ɔ̄ kpótū ipú ɔlá.”

¹⁰Ācɛ ā le ɔ̄kā da kahíníī, “Ɔdí nɛ̄ alɔ í yá ó yá ɛ́ɛ́ kú Ɔwɔicō kóō híīī yá alɔ italā ŋ́ mā?”

¹¹Ó tá uwā ōhī kahíníī, “Ɔ̄cɛ dúúmā nōo lɛ úwé ɛpa kóō kwú éyi í kpó lɛ ɔ̄cɛ nōó lɛ ŋ́ mā. Ɔ̄cɛ dúú nōo lɛ ɔdolé kóō kɔ̄ ɔ̄ mla ɔ̄cɛ nōó lɛ ŋ́ mā.”

¹²Ācɛ odije ɔlɛ́ ōhī le pɛ́ wā ɛgiyí nū kóō lɛ uwá yá ubatísim, anɔ́ɔ é da ɔ́ kahíníī, “Utíca, ɔdí nɛ̄ alɔ í yá gɛ?”

¹³Anɔ́ɔ ó da uwá kahíníī, “Aá híīī mīyɛ ɔdā dúú ŋmá ɛgiyí ācɛ fíyɛ́ ɛ̄nɛ̄ íne ka ā ŋ́.”

¹⁴Aícɔ́ɔja ōhī da ɔ́ ɔka kahíníī, “Alɔ ā bɛ́ɛ? Ɔdí nɛ̄ alɔ í yá ā?” Ó da uwá kahíníī, “Aá mīyɛ ije ŋmá abɔ̄ ācɛ dúú abɔ̄fú ŋ́ ámāŋ cīije bá ɔ̄cɛ dúú ŋ́. Ije ulɔ́yá nɛ̄ aá í mīyɛ ā kóō jɛ̄ aá.”

¹⁵Odúúdú ācɛ nēe bá abɔ́ɔ ā gbɔɔ́ ō leyīce, klla gbɔɔ́ ō gbɛlá ka, Ówukpōō anú wɛ ɔhɔ́nyɛtá ā gɛɛ?

¹⁶Anɔ́ɔ Ujɔ́ni da odúúdú uwā kahíníī, “N gē bī éŋkpɔ̄ le yá aá ubatísim, amáŋ ɔ̄cɛ éyi gē wā nōo fíyɛ́ um kɔ́ɔ́. N kōō yá olɔhi jɛ̄ nɛ̄ n kē ī wī ɔ́ŋgbá kú áblákpá kú nū ŋ́. Ó géē bī Alelékwū Ihɔ mɛ́mla ɔlá le yá aá ubatísim.

¹⁷Ó bī ówɔ́dā kú nū abɔ̄, kóō lɛ tá odúúdú ikpɔ̄da owu, cɛ́ɛ́ ó lɛ ikpɔ̄da ā túbá tū ipú ɔbā. Amáŋ ó géē kpó igbómgbō tū ipú ɔlá nōó gē nyí ŋ́ mā ā.”

¹⁸Ujɔ́ni bī ɔwɛ ɛyɛ́ɛyɛ́yí le tɔ́ɔna kú ɔ̄kōolɔhi lɛ ācɛ ā, ó klla kɛlā lɛ uwá kéē le ɔwɛ kú uwā pīyabɔ̄ ga ɔwɛ olɔhi.

¹⁹Amáŋ Ujɔ́ni le da Uhérɔ̄du, nōo wɛ igbómína ā péee ka ucē nɛ̄ ɔ́ɔ yá ā í lɔhi ŋ́, ohígbū ka Uhérɔ̄du le Uherodíyāsi, ɔnyā kú ɔyínɛ́ nū yíla ŋmá ɔlɛ́, anɔ́ɔ ó lɛ ɔ́ lɛ á. Ó klla yá ɔdōōbɔ̄bí alɛwa dúú.

²⁰Uhérɔ̄du klla le ɔdōōbɔ̄bí fíyɛ́ aódōōbɔ̄bí ɔhá nōo yá ā yá, ŋmá lɛ ō je Ujɔ́ni tá agbá.

²¹Ujɔ́ni le ubatísim yá odúúdú ācɛ ā, anɔ́ɔ ó kē le Ubatísim yá Ujísɔ̄si dúú ā. Anɔ́ɔ abɔ̄ nɛ̄ Ujísɔ̄si yɔ̄ í gbɔ̄ɔkɔ lɛ Ɔwɔicō ā, ɔkpáncō le nwūla,

²²anɔ́ɔ Alelékwū Ihɔ wā lɛbɛ̄ɛka okóoho ā wā ī ce ɔ́. Anɔ́ɔ é pó ɔkɛ̄lā nōo ŋmá ɔkpáncō yɔ̄ ī ka kahíníī, “Awɔ wɛ ɔyínɔ̄nyīlɔ kú um nōo he um ɔtū á, ɛlā uwɔ he um ɔtū nɛ̄hi.”

²³Eko nɛ̄ Ujísɔ̄si gbɔɔ́ ō yúklɔ́ kú nū ā, ó lɛbɛ̄ɛka iháyí ofucigwó ā. Ācɛ gbɛlá ka Ujísɔ̄si ɔ́ɔ wɛ ɔyínɔ̄nyīlɔ kú Ujósɛ̄fu nɛ. Ujósɛ̄fu wɛ ɔyínɔ̄nyīlɔ kú Uhɛ́li,

²⁴Uhɛ́li wɛ ɔyínɔ̄nyīlɔ kú Umɛ́tāti, ɔyínɔ̄nyīlɔ kú Ulífāyi, ɔyínɔ̄nyīlɔ kú Umélki, ɔyínɔ̄nyīlɔ kú Ujánāyi, ɔyínɔ̄nyīlɔ kú Ujósɛ̄fu,

²⁵ɔyínɔ̄nyīlɔ kú Umɛtɛtíyas, ɔyínɔ̄nyīlɔ kú Émɔ̄si, ɔyínɔ̄nyīlɔ kú Unáhum, ɔyínɔ̄nyīlɔ kú Ésli, ɔyínɔ̄nyīlɔ kú Unagáyi,

²⁶ɔyínɔ̄nyīlɔ kú Umáati, ɔyínɔ̄nyīlɔ kú Umɛtɛtíyasi, ɔyínɔ̄nyīlɔ kú Usɛmɛyin, ɔyínɔ̄nyīlɔ kú Ujósēki, ɔyínɔ̄nyīlɔ kú Ujóda,

²⁷ɔyínɔ̄nyīlɔ kú Ujoyánan, ɔyínɔ̄nyīlɔ kú Urésa, ɔyínɔ̄nyīlɔ kú Usɛrúbābɛlu, ɔyínɔ̄nyīlɔ kú Ussēyatíyɛlu, ɔyínɔ̄nyīlɔ kú Unéri,

²⁸ɔyínɔ̄nyīlɔ kú Umélki, ɔyínɔ̄nyīlɔ kú Addi, ɔyínɔ̄nyīlɔ kú Ukósam, ɔyínɔ̄nyīlɔ kú Ɛlmádam, ɔyínɔ̄nyīlɔ kú Éri,

²⁹ɔyínɔ̄nyīlɔ kú Ujósuwa, ɔyínɔ̄nyīlɔ kú Ɛlíyēsa, ɔyínɔ̄nyīlɔ kú Ujorím, ɔyínɔ̄nyīlɔ kú Umáthāti, ɔyínɔ̄nyīlɔ kú Ulífāyi,

³⁰ɔyínɔ̄nyīlɔ kú Usímón, ɔyínɔ̄nyīlɔ kú Ujudási, ɔyínɔ̄nyīlɔ kú Ujósɛ̄fu, ɔyínɔ̄nyīlɔ kú Ujónam, ɔyínɔ̄nyīlɔ kú Ulayákim,

³¹ɔyínɔ̄nyīlɔ kú Umeléya, ɔyínɔ̄nyīlɔ kú Uménna, ɔyínɔ̄nyīlɔ kú Umɛtáta, ɔyínɔ̄nyīlɔ kú Unátan, ɔyínɔ̄nyīlɔ kú Udéfīdi,

³²ɔyínɔ̄nyīlɔ kú Ujési, ɔyínɔ̄nyīlɔ kú Óbɛ́di, ɔyínɔ̄nyīlɔ kú Ubówāsi, ɔyínɔ̄nyīlɔ kú Usálmɔ̄n, ɔyínɔ̄nyīlɔ kú Unáhssɔn,

³³ɔyínɔ̄nyīlɔ kú Ammínādābu, ɔyínɔ̄nyīlɔ kú Admín, ɔyínɔ̄nyīlɔ kú Áni, ɔyínɔ̄nyīlɔ kú Uhɛ́sron, ɔyínɔ̄nyīlɔ kú Upéresi, ɔyínɔ̄nyīlɔ kú Ujúda,

³⁴ɔyínɔ̄nyīlɔ kú Ujékɔ̄pu, ɔyínɔ̄nyīlɔ kú Áyísīki, ɔyínɔ̄nyīlɔ kú Ébrahām, ɔyínɔ̄nyīlɔ kú Utéra, ɔyínɔ̄nyīlɔ kú Unáhɔ,

³⁵ɔyínɔ̄nyīlɔ kú Usérūgu, ɔyínɔ̄nyīlɔ kú Uréyu, ɔyínɔ̄nyīlɔ kú Upélegi, ɔyínɔ̄nyīlɔ kú Éba, ɔyínɔ̄nyīlɔ kú Ussɛlá,

³⁶ɔyínɔ̄nyīlɔ kú Ukayínān, ɔyínɔ̄nyīlɔ kú Áfāsadi, ɔyínɔ̄nyīlɔ kú Ussɛ́m, ɔyínɔ̄nyīlɔ kú Unówa, ɔyínɔ̄nyīlɔ kú Ulámēki,

³⁷ɔyínɔ̄nyīlɔ kú Umetúsēla, ɔyínɔ̄nyīlɔ kú Ɛ́nɔ̄ki, ɔyínɔ̄nyīlɔ kú Ujárɛ̄di, ɔyínɔ̄nyīlɔ kú Umahalalíili, ɔyínɔ̄nyīlɔ kú Ukayínan,

³⁸ɔyínɔ̄nyīlɔ kú Énɔ̄si, ɔyínɔ̄nyīlɔ kú Usɛ́ti, ɔyínɔ̄nyīlɔ kú Ádām, nōo wɛ ɔyínɔ̄nyīlɔ kú Ɔwɔicō ā.