Read idoma ULÚKU 4 Bible Online

ULÚKU 4 - idoma bible

ULÚKU 4

¹Ujísɔ̄si pīyɛyí ŋmá ísu kú Ujɔ́dan ɛga nēé yá ɔ̄ Ubatísim ā. Alelékwū Ihɔ le mu ɔ́ iyē nɛ̄hi. Anɔ́ɔ Alelékwū Ihɔ ā le ɔ́ bī ga ipú ígbíli á.

²Ebilíi yá ɔ̄ ojámá ɛ̄cī ofɛpa abɔ́ɔ. Ipú aɛ́cī nōó yɔ̄ abɔ́ɔ ā, ó lé ɔdā dúúmā ŋ́, ɛmiyɛ kē gbɔɔ́ ō ŋmó ɔ̄ eko nɛ̄ aɛ́cī ɔ́ɔmā le gla ā.

³Ebilíi da ɔ́ kahíníī, “Ɔ́dāŋ ka awɔ wɛ ɔyínɔ̄nyīlɔ kú Ɔwɔicō á, da ɛcɔ̄ nyā kóō le pīya igbō.”

⁴Amáŋ Ujísɔ̄si da ɔ́ kahíníī, “É lɛ ɔ́ tá tū ɔkpíihɔ ā kahíníī, ‘Ó wɛ igbō ōfūnū nɛ̄ ɔ̄cɛ í lé kóō yēeyī ā ŋ́.”

⁵Anɔ́ɔ ebilíi ā lɛ ɔ́ bī gicō, lɛ odúúdú ajɔ̄ɔ̄cɛ́ kú ɛcɛ nyā mafú lɛ ɔ́ ipú eyī ō cēbeé á.

⁶Ebilíi da ɔ́ kahíníī, “N géē kpó odúúdú ɔfú mɛ́mla ɛgahi nyā gā awɔ. É le odúúdú uwā kpó ga um, n kē lɔfú je lɛ ɔ̄cɛ dúú nōo he um ɔtū.

⁷Ɔ́dāŋ ka a cɛ̄ lɛ ɛ̄gbā gbā um, n géē kpó odúúdú aɔ́dā nēe bá nyā ga awɔ”

⁸Ujísɔ̄si tá ohí kahíníī, “É lɛ ɔ́ tá tū ɔkpíihɔ ā kahíníī, “Gbā Óndú ā, nōo wɛ Ɔwɔicō kú uwɔ ɛ̄gbā, anú ōfōōfūnū nɛ̄ a kē í cɛ̄ ɔ̄ ɛhɔ̄ á!”

⁹Anɔ́ɔ ebilíi le ɔ́ bī ga Ujerúsālɛm gaá kwú ɔ̄ ú ce ágēnégēne kú Agblīihɔ-nɛ̄hi ā, anɔ́ɔ ó da ɔ́ kahíníī, “Ɔ́dāŋ ka awɔ wɛ ɔyínɔ̄nyīlɔ kú Ɔwɔicō á, lɛ ómbli tá ŋmá amānyā gajɛ.

¹⁰Ohígbū kéē lɛ ɔ́ tá tū ɔkpíihɔ ā kahíníī, ‘Ɔwɔicō í da aálelékwū-ōtɛ̄hɔ̄ kú nū kéē leyīkwu uwɔ.’

¹¹É klla tá kahíníī, ‘É géē bī uwɔ ipú abɔ̄ kú uwā, cɛ́ɛ́ kú ɔdā dúú kóō híīī yá uwɔ ŋ́, ɛ́ nɛ̄ a kōō le ikpó gbo ɛcɔ̄, í fu ikpó ɛyí ŋ́.’”

¹²Amáŋ Ujísɔ̄si tóohi kahíníī, “É lɛ ɔ́ tá tū ɔkpíihɔ ā kahíníī, ‘Ā híīī yá Óndú ā, nōo wɛ Ɔwɔicō kú uwɔ ā ojámá ŋ́.’”

¹³Eko nɛ̄ ebilíi lɛ Ujísɔ̄si jámá ɔwɛ dóódu ā, anɔ́ɔ ó nyɛ̄ɛ̄ hɛ̄ ɔ̄ tá gbéeko ɔhá á.

¹⁴Ujísɔ̄si pīyɛyí wā Ugálīli, ó kē le ɔfú kú Alelékwū kú Ɔwɔicō ā. Ofu kú nū le nyīla le tá ɛga dóódu kú ajɛ abɔ́ɔ.

¹⁵Ó nwū ācɛ ɛlā ipú aɛ́gogbɔ̄ɔkɔ kú uwā, ācɛ kē bá ī cɛ̄tra anú.

¹⁶Ujísɔ̄si le yɛ tá Unásārēti, ɛga nēé bī ɔ̄ jɛ̄ ā, anɔ́ɔ ó le yɛ tá ɛgogbɔ̄ɔkɔ ɛ̄cī usábati, ɛ́gɛ́nɛ̄ ucē kú nū lɛ ā. Ó cāŋjɛ kóō jé ɔkpíihɔ tɛ́ɛcɛ.

¹⁷Anɔ́ɔ é kwú ɔkpá kú Ayisáya ú lɛ ɔ́ á. Ó lɛ ɔkpá ā nāndaa anɔ́ɔ ó lɛ ɛga nēé tá kahíníī,

¹⁸“Alelékwū kú Óndú ā yɔ̄ iyē kú um, ohígbū ka Óndú ā lɛ um fu ká n̄ bī ɔ̄kōolɔhi gé lɛ ācogbɛhá. Ó lɛ um tɛ̄hɔ̄ ká n̄ da ācɛ nēe bá agbá ā kéē lɛ uwa hɛ̄tá ɛɛ́. Ká n̄ da ācopeyī kéē lɔfú mɛ́ɛbɛ mɛ́ɛ́nɛ. Ká n̄ lɛ ācɛ nēé gē yá uwā ōwē ā hɛ́tá.

¹⁹Cɛ́ɛ́ ká n̄ ka tɛ́ɛcɛ ka eko nɛ̄ Óndú ā dɔɔ̄kā ō nya ācɛ ɔlɛ́ nū tá ā gā ɛɛ́.

²⁰Ujísɔ̄si lɛ ɔkpá ā hā, kwú ɔ̄ ú kwúcē lɛ ɔ̄cɛ nōo ī yúklɔ́ abɔ́ɔ ā, anɔ́ɔ ó má cīce á. Odúúdú ācɛ nēe bá ipú ɛgogbɔ̄ɔkɔ ā le eyī kpó gbā kwu ɔ́.

²¹Anɔ́ɔ ó da uwá kahíníī, “Ɛlā nēé ka ipú ɔkpíihɔ nyā le yá jīla ipéyī aá ícɛ nyā, ɛ́gɛ́nɛ̄ á pó abɔ̄ nɛ̄ n jé ɔ̄ tɛ́ɛcɛ nyā ɛɛ́.”

²²Odúúdú uwā nēe bá abɔ́ɔ ka olɔhi kú nū, ɛlā olɔhi nōó jé ɔ̄ ka ā le hɛ́ uwā idáagó. Anɔ́ɔ é bá ī da iyī uwā ɔ̄kā kahíníī, “Ó wɛ anú wɛ ɔyí Ujósɛ̄fu ā ŋ́ nɛɛ?”

²³Ujísɔ̄si da uwá kahíníī, “N jé ka aá géē kwu ita nyā ga um, ‘Obócí lɛ iyī uwɔ hɛ́tá ɛ́’. Aá klla í da um kahíníī, ‘Lɛ ɔdā nɛ̄ alɔ pó ka a yá Ukápānɔm ā yá ajɛ ɔlɛ́ uwɔ amānyā dúú.’

²⁴Amáŋ, n̄ lɛ ɛlā ɔkwɛ̄yi nyā da aá, keé gē mīyɛ ɔcomɛ́ɛbɛ dóódu ajɛ ɔlɛ́ nū ŋ́.

²⁵Amáŋ ká ɛlā ɔkwɛyi ā, n̄ da aá, ka anyōkwū alɛwa bá Isrɛ̄lu eko kú Ɛláyíja, nɛ̄ ɔwɔ í yá ŋ́ iháyí ɛtá ce ɔyā ɛhīlī ā, nɛ̄ ɔkpɛtā nɛ̄hi ŋmó ajɛ kú Ísrɛ̄lu ā.

²⁶Ɔwɔicō í da Ɛláyíja kóō nyɔ̄ í gbɔga ɔlɛ́ ɔnyōkwū ɔhá dúúmā gwū ɔnyōkwū kú Usárefāti, ipú ajɛ kú Usídɔn ā tá ŋ́.

²⁷Aólagwú alɛwa bá ajɛ kú Ísrɛ̄lu eko kú Ɛláyíssa, ɔ̄comɛ́ɛbɛ ā. Nááná Ɛláyíssa í hɛ́ odúúmā kú uwā tá ŋ́, ń táafú ŋ́ Unéman ōfōōfūnū.

²⁸Eko nɛ̄ ācɛ nēe bá ɛgogbɔ̄ɔkɔ ā lɛ ɛnyā pó ā, é le cɔ̄nū nɛ̄hi.

²⁹Anɔ́ɔ é cāŋjɛ lɛ Ujísɔ̄si kwu tɛ́ɛcɛ ŋmá ipú igelī kú ɔlɛ́ uwā á. É lɛ ɔ́ bī ga á ogenegene kú ɛyí ɛfu nēé gwó igelī kú ɔlɛ́ uwā ce ā, cɛ́ɛ́ kéē le ɔ́ pīyɔcíkōtō gaajɛ.

³⁰Amáŋ ó le bū ipú ɛwa nyɛ̄ɛ̄ le tá ɛga ɔhá.

³¹Anɔ́ɔ Ujísɔ̄si le tá Ukápānɔm, igelī nɛ̄ŋ́cɛ́ éyi kú Ugálīli gaá le ɛlɔ̄ɔwɔicō nwū ācɛ ā ɛ̄cī usábāti.

³²Odúúdú uwā le kpó hídáagó ɔwɛ nōó bī íkwu le nwū ɛlɔ̄ɔwɔicō ā.

³³Ɔnyīlɔ éyi yɔ̄ ipú ɛgogbɔ̄ɔkɔ ā nōo lɛ alelékwū obɔ̄bí. Ó dɛ̄gba tɛ́ɛcɛ gbōmgbōm kahíníī,

³⁴“Ujísɔ̄si, ɔ̄cɛ Unásārēti, habɔ̄ alɔ tá cíí, ɔdí nɛ̄ a tíne ō yá alɔ ā gɛ? A wā amānyā gaá kpó alɔ yíífi nɛɛ? N jé ɔ̄cɛ nɛ̄ a wɛ ā. Awɔ wɛ Ɔ̄cɛ ōtīihɔ kú Ɔwɔicō á.

³⁵Ujísɔ̄si lɛ ɛgba dɛ̄ tū alelékwū ā kahíníī, “Yɔ̄ cíí, ká ā le bɛ̄cɛ ŋmá ipú iyē kú ɔnyīlɔ ā!” Alelékwū obɔ̄bí ā lɛ ɔnyīlɔ ā tá fīyajɛ iyɔ̄bū uwā, anɔ́ɔ ó le bɛ̄cɛ ŋmá ipú nū á, amáŋ ó klla yá ɔ̄ ɔdā dúúmā gɛ ŋ́.

³⁶Ācɛ ā le kpó hídáagó, anɔ́ɔ é gbɔɔ́ ō da iyí uwā kahíníī, “Ɛlā okónu kú nū lɔfú klla lɛ íkwu nɛ̄hi. Ɔ́nyīlɔ nyā bī ikwu mɛ́mla ɔfú í le dɛ̄gba tū aálelékwū obɔ̄bí, é kē ī bɛ̄cɛ!”

³⁷Anɔ́ɔ ɔ̄kā kú ɔdā nōó yá nyā le tá ɛga dóódu kú ajɛ ā ā.

³⁸Ujísɔ̄si nyɛ̄ɛ̄ ŋmá ɛgogbɔ̄ɔkɔ ā anɔ́ɔ ó le tá ɔlɛ́ Usáyímɔ̄n á. Áganá yɔ̄ ī yá ɛ́nɛ́ ɔnyā Usáyímɔ̄n, anɔ́ɔ é le ɔkɔ gbā lɛ ɔ́ kóō lɛ ɔ́ hɛ́tá.

³⁹Ó gaá háyi pī agōdō kú nū, anɔ́ɔ ó lɛ ɛgba dɛ̄ tū áganá ā, anɔ́ɔ áganá ā habɔ̄ ɔ̄ tá á. Ó cāŋjɛ ikpíikpo ɔ́ɔmā anɔ́ɔ ó gbɔɔ́ ō kpó ɔdōlé lɛ uwá lé á.

⁴⁰Eko nɛ̄ ɛnɔ gbɔɔ́ ō gaajɛ ā, ācɛ nēe lɛ ācɛ nēe lɛ ɛdɔ ōcē ɛyɛ́ɛyɛ́yí ā, le uwá kpó wā ɛgiyí Ujísɔ̄si. Anɔ́ɔ ó lɛ abɔ̄ ce ɛjɛ̄ɛ̄jī uwā, lɛ uwá kpó hɛ́tá á.

⁴¹Aálelékwū obɔ̄bí bɛ̄cɛ ŋmá iyē kú ācɛ alɛwa dúú. É bá gē dɛ̄gba kahíníī, “Awɔ wɛ Ɔyínɔ̄nyīlɔ kú Ɔwɔicō á!” Ujísɔ̄si lɛ ɔ́da je kéē híīī kɛlā ŋ́, ohígbū kéē le jé ka anú wɛ Ohɔ́nyɛtá ā á.

⁴²Ɔcɔ̄ɔ̄cī blibli ó nyɛ̄ɛ̄ ŋmá igelī ā anɔ́ɔ ó le yɛ tá ipú ígbíli á. Ācɛ alɛwa gbɔɔ́ ō tíne nū, eko nēé lɛ ɔ́ má ā, é le ɔkɔ gbā lɛ ɔ́ kóō híīī nyɛ̄ɛ̄ ŋmá ɛgiyí uwā ŋ́.

⁴³Amáŋ ó da uwá kahíníī, “N géē nyɔ̄ gaá tɔ́ɔna kú ɔ̄kōolɔhi ohígbū ajɔ̄ɔ̄cɛ́ kú Ɔwɔicō ipú aígelī ɔhá dúú, ohígbū ɔ́ɔmā nɛ̄ Ɔwɔicō tū um ɛhɔ̄ wā á.”

⁴⁴Anɔ́ɔ ó le yɛ gaá tɔ́ɔna kú ɔ̄kōolɔhi ā ipú aɛ́gogbɔ̄ɔkɔ nēe bá ɛga ɛyɛ́ɛyɛ́yí kú ajɛ ā á.