Read idoma ULÚKU 5 Bible Online

ULÚKU 5 - idoma bible

ULÚKU 5

¹Ɛ̄cī éyi Ujísɔ̄si háyi okónu ókpoó kú Ugenésāreti, ɛwa kú ācɛ le yɛ jila ɔ́ tá, bá ī kwɛga ga iyɔ̄bū nū, kéē pó olɛhɔ̄ kú Ɔwɔicō nōó yɔ̄ ī cɛ̄ lɛ uwá ā a.

²Ó má ɔ́kɔ ɛpa nēé pi wɛ̄ɛcɛ bá okónu okpoó ā, ɔ́kɔ ā táŋca ohígbū ka aóndú uwā bá gē na ɛ́yá kú uwā.

³Éyi kú aɔ́kɔ ā wɛ ákú Usáyímɔ̄ni. Ujísɔ̄si le bēhé tá ipú ɔ́kɔ ɛ̄nɛ̄ o wɛ ákú Usáyímɔ̄ni ā, anɔ́ɔ ó da ɔ́ kóō lɛ ɔ́kɔ ā tú ga ipú enyi ā lígíí. Ó má cīce ipú nū anɔ́ɔ ó gbɔɔ́ ō nwū ɛwa kú ācɛ ā ɛlɔ̄ɔwɔicō á.

⁴Eko nōó le ɛla ā nwū ācɛ ā kwɛyí ā, ó da Usáyímɔ̄ni kahíníī, “Lɛ ɔ́kɔ ā pɛ́ ga ɛga oliipú kú éŋkpɔ̄ ā, cɛ́ɛ́ awɔ mɛ́mla aɔ́mpa awɔ lɛ ɛ́yá kú aá tá ga ipú éŋkpɔ̄ kú aá kwú ɛbéenyi.”

⁵Usáyímɔ̄ni kahíníī, “Ɔkpani, alɔ tíne ɛbéenyi otú gbɔ́ɔ̄cī mā amáŋ alɔ í kē kwú ɔdā dúúmā ŋ́. Amáŋ abɔ̄ ā le ka ā, alɔ géē tá ɛ́yá ā gā enyi mɛ́ɛnɛ.

⁶É le ɛ́yá ā tá anɔ́ɔ é le ɛbéenyi alɛwa nɛ̄ɛ̄nɛ̄hi kwu nōo cɛ̄ lɛ ɛ́yá kú uwā gbɔɔ́ ō kpó híla.

⁷Anɔ́ɔ é lɛ abɔ̄ yá lɛ aɔ́mpa uwā nēe bá ipú ɔ́kɔ ɔhá ā kéē wā í tá uwā abɔ̄. É le pɛ́ wā í le ɛbéenyi ā wū tū ipú ɔ́kɔ ɛpɛplɛ́ɛpa omōōmu nōo cɛ̄ lɛ aɔ́kɔ ā gáā pīya tū enyi.

⁸Eko nɛ̄ Usáyímɔ̄ni lɛ ɔdā nōo yá ā má ā, ó má gbo kláajɛ iyɔ̄bu Ujísɔ̄si anɔ́ɔ ó kahíníī, “Nyɛ̄ɛ̄ ŋmá ɛgiyí um Óndú! Ohígbū ka n wɛ ɔ̄cɛ ó bīya íne!”

⁹Anú mɛ́mla ācɛ ɔhá nēe bá mla anú ā le kpó hídáagó ohígbū áluka kú ɛbéenyi nɛ̄hi nēé kwú ā.

¹⁰Aɔ́mpa nū, Ujɛ́mīsi mɛ́mla Ujɔ́ni, ayínɔ̄nyīlɔ kú Usébēdi le kpó hídáagó dúú. Ujísɔ̄si da Usáyímɔ̄ni kahíníī, “A yúúfi ŋ́, o ŋmá abālɔbányā, a géē yɔ̄ ī kwú ācɛ gé um ɛ́gɛ́nɛ̄ a gē kwú ɛbéenyi ā!”

¹¹Eko nēé lɛ aɔ́kɔ kú uwā kpó pi wɛ̄ɛcɛ kwɛyí ā, é habɔ̄ ɔdā dóódu tā gbɔɔ́ ō tá Ujísɔ̄si ɔkwu.

¹²Ɛ̄cī éyi Ujísɔ̄si le tá igelī éyi nɛ̄ ɔ̄cɛ éyi nɛ̄ iyē kú nū wɛ agwáágwú ā. Eko nōó le Ujísɔ̄si má ā, ó má gbo kláajɛ le eyī pīya kláajɛ, anɔ́ɔ ó le ɔkɔ gbā lɛ ɔ́ kahíníī, “Óndú, ɔ́dāŋ ka a cɛ̄, a lɔfú hɛ́ um tá ŋmá agwu kú um nyā glá.”

¹³Ujísɔ̄si le abɔ̄ nāndaa kwu ɔ́ iyē, anɔ́ɔ ó kahíníī, “N cɛ̄, le yá yēŋēē mɛ́ɛnɛ.” Ɔkwɔɔkwu ɔ́ɔmā agwú ā nyɛ̄ɛ̄ ŋmá ɔnyīlɔ ā iyē.

¹⁴Ujísɔ̄si le ɔ́da je lɛ ɔ́ kahíníī, “A híīī da ɔ̄cɛ dúú ɔdā dúúmā lɛyíkwu ɔ́ ŋ́, amáŋ nyɔ̄ ɛgiyí ɔ̄cogwɛ́ɛya ā gaá lɛ iyī uwɔ mafú lɛ ɔ́ kóō lɛ uwɔ jila. Cɛ́ɛ́ a nyɔ̄ gaá lɛ ɛya nɛ̄ íne kú Umósīsi ka ā gwó kóō wɛ ijáalí lɛ ɛjɛ̄ɛ̄jī ācɛ ka a le hɛ́tá ɛɛ́ mā gwó.”

¹⁵Amáŋ ɔ̄kā lɛyíkwu ɔdā nōó yɔ̄ í yá ā yɔ̄ gē nyīla nwuné fíyɛ́, anɔ́ɔ ɛwa kú ācɛ gē pɛ̄ wā ɛgiyí nú cɛ́ɛ́ kéē pó ɛlɔ̄ɔwɔicō ŋmá ɛgiyí nū, kóō kē hɛ́ uwā tá ŋmá ōcē dúú.

¹⁶Amáŋ eko ōhī ó gē ga ígbíli, ɛga nōo le fíyóó gaá gbɔ̄ɔkɔ lɛ Ɔwɔicō.

¹⁷Ɛ̄cī éyi abɔ̄ Ujísɔ̄si yɔ̄ ī nwū ācɛ ɛlɔ̄ɔwɔicō ā, ācɛ Ufarisisi ōhī mɛ́mla aítíca kú íne nēe pɛ́ ŋmá ɛjɛ̄ɛ̄jī aípɔ́lɛ́ kú Ugálīli mɛ́mla Ujudíya mɛ́mla Ujerúsālɛm cīce abɔ́ɔ dúú. Ɔwɔicō le ɔfú je lɛ Ujísɔ̄si eko ɔ́ɔmā kóō hɛ ācɛ nōo ī doōcē tá.

¹⁸Ācɛ éyi le pɛ́ wā abɔ́ɔ lɛ̄ ɔ̄cɛ éyi oŋmíiyē tá ákplata wā. É cēyītīkwū kéē lɛ ɔ́ bī ga ipú ínu ɛga nɛ̄ Ujísɔ̄si yɔ̄ ā, cɛ́ɛ́ é kwú ɔ̄ ú bī wā iyɔ̄bū Ujísɔ̄si.

¹⁹Amáŋ é má ɛga dúú nēé géē bū yɛ ga ipú inu ā glá ŋ́ ohígbū ɛwa ā. Anɔ́ɔ é kwú ɔ̄ ú gicō inu ā, le ɔdā ō fíyɛ́ inu ā kpó ŋmá ɛga éyi, lɛ ɔ̄gɔ̄ hɛ́ tū ɔ̄, anɔ́ɔ é kwú ɔnyīlɔ ā ú mla ákplata kú nū ú bū ɔ̄gɔ̄ ā wāajɛ iyɔ̄bū Ujísɔ̄si á.

²⁰Eko nōó le ɛ́gɛ́nɛ̄ é lɔtūce Ɔwɔicō lɛ ā má ā, ó da ɔnyīlɔ ā ka, “N kwú íne nɛ̄ a bīya ā í yá uwɔ ɛhi ɛɛ́.”

²¹Aítíca kú íne ā mɛ́mla ācɛ Ufárisīsi gbɔɔ́ ō táafú mla iyī uwā kahíníī, “Ɔ̄nyɛ yɔ̄ í ka ɛbí yɔ̄ āa? Ɔ̄nyɛ lɔfú jé íne nɛ̄ ācɛ bīya ā yá uwā ɛhi glá āa? Ɔwɔicō ōfōōfūnū je íne nɛ̄ ɔ̄cɛ bīya ā yá ɔ̄ ɛhi glá á?”

²²Ujísɔ̄si le ɔdā nēé gbɛlá ipú ɔtū kú uwā ā jé anɔ́ɔ ó da uwá kahíníī, “Ɔdíyá nɛ̄ aá í gbɛlá aɔ́dā ɛ́gɛ́nyā āa?

²³Ɛ̄nyá tɔ́ɔtɛ́ ō ka fíyɛ́ ā, ‘N kwú íne nɛ̄ a bīya ā í yá uwɔ ɛhi’, kɛ̄ɛ ka, ‘Cāŋjɛ ká a yāwu?’

²⁴N géē mafú lɛ aá, ka ami, Ɔyínɔ̄nyīlɔ kú Ɔ̄cɛ lɛ íkwu kóō je íne nɛ̄ ācɛ bīya ā yá uwā ɛhi ipú ɛcɛ nyā glá. Anɔ́ɔ ó da ɔ̄cɛ nɛ̄ iyē kú nū ŋmó ā kahíníī, “N da uwɔ ka cāŋjɛ, kwú ákplata kú uwɔ̄ ú, cɛ́ɛ́ ká ā ga ɔlɛ́!”

²⁵Ikpííkpó ɔ́ɔmā ɔnyīlɔ ā cāŋjɛ ipéyī odúúdú uwā, kwú ákplata nōó húmáyī gwutá anú ā ú, anɔ́ɔ ó le yɛ tá ɔlɛ́ yɔ̄ ī tá Ɔwɔicō ahínyá á.

²⁶Odúúdú uwā le kpó hídáagó! Ufi lɛ uwá kwú, anɔ́ɔ é tá Ɔwɔicō ahínyá, yɔ̄ ī ka kahíníī, “Ɔdā ō yéyījii nɛ̄ alɔ má ícɛ yɔ̄ dúú á á!”

²⁷Igbīhāajɛ, Ujísɔ̄si nyɛ̄ɛ̄ ŋmá igelī ā, anɔ́ɔ ó le ɔ̄cɛ o dɔlɛ́ éyi nēé hī ka Ulífāyi má cīce ipú áklɔ̄kpɛ ɛga nōó ī yúklɔ́ kú nū ā. Ujísɔ̄si da ɔ́ kahíníī, “Yɛce um.”

²⁸Ulífāyi cāŋjɛ, mabɔ̄ ɔdā dóódu kú nū tá, anɔ́ɔ ó nyɛ̄ɛ̄ tá ɔ̄ ɔkwu á.

²⁹Anɔ́ɔ Ulífāyi lɛ ucɛ nɛ̄hi yá ɔlɛ́ nū lɛ Ujísɔ̄si á. Ācodɔlɛ́ alɛwa nɛ̄hi mɛ́mla ācɛ ɔhá wɛ ipú aúgbɔga ā dúú.

³⁰Ācɛ Ufárisīsi ōhī mɛ́mla aítíca kú íne ōhī nēe wɛ ipú ɔwá kú uwā ā ka iŋiní lɛ ayíkpó kú Ujísɔ̄si kahíníī, “Ɔdíyá nɛ̄ aá ī lé klla í gwá mɛ́mla ācodɔlɛ́ mɛ́mla ācobīyíne āa?”

³¹Anɔ́ɔ Ujísɔ̄si tóohi da uwá kahíníī, “Ācɛ nēe lɔfú iyē ā í cɛgbá obící ŋ́, amáŋ ācɛ nōo ī doōcē ā cɛgbá obocí á.

³²Úklɔ́ kú um í wɛ o hī ācɛ okpaakpa igwú kéē pīyabɔ̄ ŋ́, amáŋ n wā gáā hī ācobīyíne ā igwú kéē pīyabɔ̄.”

³³Ācɛ ōhī da Ujísɔ̄si kahíníī, “Ayíkpó kú Ujɔ́ni oyábatísim gē gwōkónu klla gē gbɔ̄ɔkɔ ojigógó. Ɛ́gɔ́ɔmā nɛ̄ ayíkpó kú ācɛ Ufarisīsi gē yá dúú á, amáŋ ayíkpó kú uwɔ gē lé, ī gwá eko dóódu.

³⁴Ujísɔ̄si tóohi kahíníī, “Á gáā yá ká aúgbɔga nēe bá ɛga nēé gē lɔnyā kéē gwōkónu glá ŋ́ ɔdā nōo yá ɛɛ́ nɛ̄ ɔ̄cɛ o lɔnyā ā yɔ̄ pi uwā ā.

³⁵Amáŋ ɛ̄cī éyi géē wā nēé géē je ɔ̄cɛ o lɔnyā ā ŋmá ɛgiyí uwā, cɛ́ɛ́ é géē gwōkónu eko ɔ́ɔmā.”

³⁶Ujísɔ̄si lɛ ita nyā kwu lɛ uwá, “Ɔ̄cɛ dúúmā í gē fā īlī ŋmá úwé ɛ̄yīpɛ̄ gē je ɔ́ gɔ́ bá úwé nɛ̄ncɛ̄ ŋ́. Ɔ́dāŋ nōó le yá lɛ ā, ó géē híla úwé ɛ̄yīpɛ̄ ā,īlī ɛ̄yīpɛ̄ í kē gáā kwu úwé nɛ̄ncɛ̄ ā ŋ́.

³⁷Ɔ̄cɛ dúúmā í gē lɛ ejé ɛ̄yīpɛ̄ tū ɔjá ɔkpɛ́bɛ́ nɛ̄ncɛ̄ ŋ́. Ɔ́dāŋ ka ɔ̄cɛ dúú i yá lɛ ā, ejé ɛ̄yīpɛ̄ géē je ɔjá ɔkpɛ́bɛ́ nɛ̄ncɛ̄ ā hégbe cɛ́ɛ́ ejé ā kwú pɛ́ bónū, ɔjá ɔkpɛ́bɛ́ nɛ̄ncɛ̄ ā kē í je yíífi.

³⁸Ikɔkɔ ɔ́ɔmā, é gē lɛ ejé ɛ̄yīpɛ̄ tū ipú ɔjá ɔkpɛ́bɛ́ ɛ̄yīpɛ̄ piíí!

³⁹Ɔ̄cɛ dúúmā í gē dɔɔ̄kā ejé ɛ̄yīpɛ̄ eko nōó lɛ ejé nɛ̄ncɛ̄ gwá gbɔbū ŋ́. Ó í ka kahíníī, “Ɛnɛ̄ncɛ̄ ā lɔhi fíyɛ́ á.”