Read idoma ULÚKU 6 Bible Online

ULÚKU 6 - idoma bible

ULÚKU 6

¹Ɛ̄cī usábāti éyi, Ujísɔ̄si yɔ̄ ī yɛ bū ipú ɛhɔ̄ kú igwu ōhī. Ayíkpó kú nū gbɔɔ́ ō cē igwu ōhī le ikpō ā nyā ɔtābɔ̄ gbɔɔ́ ō lé.

²Ācɛ Ufárisīi ōhī da uwá ɔ̄kā kahíníī, “Ɔdiyá nɛ̄ aá bá ī yá ɔdā nɛ̄ íne kú alɔ í cɛ̄ ká alɔ yá ɛ̄cī usábāti ŋ́ mā ā?”

³Ujísɔ̄si tá uwā ōhī kahíníī, “Aá jé ŋmá ipú ɔkpíihɔ ɔdā nɛ̄ Udɛ́fīdi mɛ́mla ayíkpó kú nū yá eko nɛ̄ ɛmiyɛ ŋmó uwā ā ŋ́ nɛɛ?

⁴Ó le bēhé tá ipú inu kú Ɔwɔicō, kwú igbō nēé le gwɛ́ɛya le Ɔwɔicō ú, ó le lé, ó klla lɛ ōhī je lɛ ayíkpó kú nū kéē lé dúú. Nááná ó wɛ íne kú alɔ ō bīya kú ɔ̄cɛ ɔhá dóódu gwū ācogwɛ́ɛya ā tá kóō lé igbō ŋ́.

⁵Anɔ́ɔ Ujísɔ̄si da uwá kpɔ́ kahíníī, “Ɔyínɔnyīlɔ kú Ɔ̄cɛ wɛ Óndú kú usábāti á.”

⁶Ɛ̄cī usábāti ɔhá, Ujísɔ̄si le yɛ tá ɛgogbɔ̄ɔkɔ éyi gaá nwū ɛlɔ̄ɔwɔicō. Ɔnyīlɔ éyi yɔ̄ abɔ́ɔ nɛ̄ abɔ̄lɔ́ná kú nū le ŋmó tíiye.

⁷Aítíca kú íne ōhī mɛ́mla ācɛ Ufárisīi á ī dɔɔ̄kā ɔdā nēé í labɔ̄ bá ɔ̄ kéē kpɛ́lā ce Ujísɔ̄si ka ɔ́ɔ gē yá ɔdōōbɔ̄bí. Anɔ́ɔ é leyī tá ɔ̄ gɛɛ ɔ́dāŋ koó géē hɛ́ ɔ̄cɛ tá ɛ̄cī usábāti.

⁸Amáŋ Ujísɔ̄si lɛ ɔtū kú uwā jé anɔ́ɔ ó da ɔ̄cɛ ā kahíníī, “Cāŋjɛ ká ā wā í háyi iyɔ̄bū amānyā.” Ɔnyīlɔ ā cāŋjɛ wā í háyi abɔ́ɔ.

⁹Anɔ́ɔ Ujísɔ̄si da uwá kahíníī, “N da aá ɔ̄kā, “Ɔdí nɛ̄ íne kú alɔ ká ā? Ka ālɔ̄ yá ɔdā olɔhi ɛ̄cī usábāti kɛ̄ɛ ka ālɔ̄ ya ɔdōōbɔ̄bí? Ká ālɔ̄ nya oyēeyī kú ɔ̄cɛ tá kɛ̄ɛ ka ālɔ̄ nya oyēeyī tá ŋ́.

¹⁰Ó pīyeyī lɛ ācɛ ā má biílí, anɔ́ɔ ó da ɔnyīlɔ ā kahíníī, “Lɛ abɔ̄ kú uwɔ nāndaa.” Ó le yá lɛ ā, anɔ́ɔ abɔ̄ ā kwú ya lɔfú klla kwú yá mɛ́ɛ́lɛ́ á.

¹¹É kwú cɔ̄nū nɛ̄hi, anɔ́ɔ é gbɔɔ́ ō miya mla iyī uwā kahíníī, “Ɔdí nɛ̄ ālɔ̄ í yá lɛyíkwu Ujísɔ̄si āa?”

¹²Eko ɔ́ɔmā Ujísɔ̄si le tá ɛyí ɛfu gaá gbɔ̄ɔkɔ, anɔ́ɔ ó gbɔ̄ɔkɔ abɔ́ɔ lɛ Ɔwɔicō otú gbɔ́ɔ̄cī á.

¹³Eko nɛ̄ eyī le nyā ā, ó lɛ ayíkpó kú nū hīgwú, anɔ́ɔ ó lɛ ācɛ igwɛ́ɛpa fu ŋmá ipú uwā.

¹⁴Ó fu Usáyímɔ̄ni (nōó he ɔ̄ iyē ka Upíta ā) mɛ́mla ɔyínɛ nū nɔ̄nyīlɔ Ándru. Ó fu Ujémīsi mɛ́mla Ujɔ́ni, Ufílipu mɛ́mla Ubatolómiyu,

¹⁵Umátiyu mɛ́mla Utɔ́mɔ̄si, Ujémīsi, ɔyínɔ̄nyīlɔ kú Álfīyɔsi, mɛ́mla Usáyímɔ̄n nōó hī ka ɔ̄cɛ ojímélí ā,

¹⁶Ujúdasi, ɔyínɔ̄nyīlɔ kú Ujémīsi, mɛ́mla Ujúdasi Isikáriyɔ̄tu, nōo je pīya ɔ̄cɛ nōo yíbīyājɛ tū Ujísɔ̄si ā.

¹⁷Eko nɛ̄ Ujísɔ̄si mɛ́mla ayíkpó kú nū le hīlatá ŋmá ɛyí ɛfu ga ajɛ ā, ó má mahayi ɛga ogblāgādā éyi mɛ́mla ɛwa nɛ̄hi kú ayíkpó kú nū. Ɛwa nɛ̄hi kú ācɛ nēé ŋmá ɛjɛ̄ɛ̄jī Ujudíya, mɛ́mla aɛ́nɛ̄ e ŋmá Ujerúsālɛm mɛ́mla ācɛ ɛ̄nɛ̄ e ŋmá igelī kú okónu ísu kú Utáya mɛ́mla Usídɔn ā bá abɔ́ɔ.

¹⁸É wā kéē pó ɛlɔ̄ɔwɔicō ŋmá ɛgiyí nū cɛ́ɛ́ kóō klla hɛ́ uwā tá ŋmá ōcē.

¹⁹Odúúdú ācɛ ā tíne kéē lɛ abɔ̄ kwu ɔ́, ohígbū ka ɔfú yɔ̄ í bɛ̄cɛ ŋmá ɔ́ iyē yɔ̄ í hɛ́ odúúdú uwā tá.

²⁰Ujísɔ̄si jéeyī gicō má ayíkpó kú nū anɔ́ɔ ó kahíníī, “Aá nēe wɛ ācogbɛhá ā, ákú aá lɔhi. Ohígbū ka ajɔ̄ɔ̄cɛ́ kú Ɔwɔicō wɛ ákú aá!

²¹“Aá nēé má lé nwuné abālɔbányā ŋ́ mā, ákú aá lɔhi. Ɔwɔicō í kpó odúúdú ɔdā nɛ̄ aá cɛgbá ā lɛ aá! “Aá nēe gē jikwū abālɔbányā ā, ákú aá lɔhi. Aá géē yɛhɛ!

²²“Eko nɛ̄ ācɛ ī wɔ́tū aá, klla í tá ɛlā kú aá, gē cá aá ɛcá, gē ŋmó aá okónu ka aá wɛ ācɛ oyá ɔdōōbɔ̄bí, ohígbū ka aá gē tá ami, Ɔyínɔ̄nyīlɔ kú Ɔ̄cɛ ɔkwu ā, ákú aá lɔhi.

²³Ɔtū kóō he aá cɛ́ɛ́ ká aá jīije kú éeyē eko nēé lɛ aɔ́dā nēé bá abɔ́ɔ ā yá aá, ohígbū ka Ɔwɔicō lɛ ulé nɛ̄hi tū ɔkpáncō gbēyī aá. Aá bla ka aádáádā uwā yá aɔ́dā ékpó ɔ́ɔmā tá ācomɛ́ɛbɛ ā dúú.

²⁴“Amáŋ aá nēe lɛ agbénú abālɔbányā dúú ā, aá le jí ɛɛ́. aá mīyɛ ɔdā olɔhi kú aá kwɛyí ɛɛ́.

²⁵“Aá nēe nū ipú abālɔbányā ā, aá le jí ɛɛ́. Ɛmiyɛ géē ŋmó aá. Aá nēe ī yɛhɛ abālɔbányā ā, aá le jí ɛɛ́. Aá géē ya ɔtūnobí klla í jikwū!

²⁶“Eko nɛ̄ odúúdú ācɛ í ka ɔdā ōlɔhi lɛyíkwu aá, ayíkā aá le jí ɛɛ́. Ohígbū ka ɛ́gɔ́ɔmā nɛ̄ aádáádā uwā ka ɛdɔ ɛlā ɔ́ɔmā lɛyíkwu ācomɛ́ɛbɛ ɛ̄kɛ̄mgbɛ̄ ā dúú á.

²⁷“Amáŋ ń da aá, nēe ī pó ɛlā kú um ā ka aá yíhɔtū tá aólɛlā kú aá. Aá yá ɔdā olɔhi lɛ ācɛ nēe ī wɔ́tū aá.

²⁸Aá da Ɔwɔicō kóō hɔ́hā ce ācɛ nēe gē tokónu lɛ aá ā. Aá kē gbɔ̄ɔkɔ lɛ Ɔwɔicō ohígbū ācɛ nēe gē yá aá ōwē ā.

²⁹Ɔ́dāŋ ka ɔ̄cɛ dúú lɛ abɔ̄ fíyɛ́ uwɔ ahɔ̄ éyi, lɛ ɛga je lɛ ɔ́ kóō lɛ abɔ̄ fīyɛ̄ abɔ̄ ɔhá ā dúú. Ɔ́dāŋ ka ɔ̄cɛ dúú lɛ awulú kú uwɔ kpó, lɛ ɛga je lɛ ɔ́ kóō lɛ úwé kú uwɔ kpó dúú.

³⁰Je lɛ ɛjɛ̄ɛ̄jī ācɛ nēe bá odée ŋmá ɛgiyí uwɔ ā. Eko nɛ̄ ɔ̄cɛ éyi kwú ɔdā kú uwɔ í kpó, ā híīī mīyɛ ɔ́ ŋmá abɔ̄ nū gɛ ŋ́.

³¹Yá ɔdā lɛ ācɛ ɛ́gɛ́nɛ̄ a dɔɔ̄kā kéē yá ga awɔ ā.

³²“Ɔ́dāŋ ka ācɛ nɛ̄ aá he uwá ɔtū ā ōfōōfūnū he aá ɔtū á, ɔdā ɛyɛ́ɛ́yí nyá nɛ̄ aá yá nēé ī hɔ́hā ce aá ohígbū nū ā. Ācobīyíne ā nááná kōō ī yíhɔtū tá ācɛ nēe ī yíhɔtū tá uwā ā dúú!

³³Ɔ́dāŋ ka aá yá ɔdā olɔhi lɛ ācɛ nēe yá ɔdā olɔhi lɛ aá ōfōōfūnū, ɔdí nɛ̄ aá yá ɛ́ɛ́ nɛ̄ Ɔwɔicō ī hɔ́hā ce aá ohígbū nū ā? Ācobīyíne ā nááná kōō ī yá lɛ ā dúú!

³⁴Ɔ́dāŋ ka aá lɛ odée kplá ācɛ nɛ̄ aá leyice kéē lɔfú je odée ā kwúcē lɛ aá glá ā, ɔdiyá nɛ̄ Ɔwɔicō cíkā ō hɔ́hā ce aá ā? Ācobīyíne nááná gē lɛ ije kplá ācobīyíne gē leyīce kéē í gbā ɛjɛ̄ɛ̄jī ije ā lɛ uwá!

³⁵Amáŋ aá yíhɔtū tá aólɛlā kú aá, aá yá ɔdā olɔhi lɛ uwá. Aá lɛ ije kplá ācɛ, aá leyice kéē gbā ije ā cīgbīhi lɛ aá ŋ́. Ɔwɔicō géē gbā ulé nɛ̄hi lɛ aá. Aá kē géē je pīya ayínɔ̄nyīlɔ kú Ɔwɔicō nōo lɔfú fíyɛ́ dúú ā. Ó gē yá ɔdā olɔhi lɛ ācɛ nēé kōo gē tá ahínyá ŋ́ mā mɛ́mla ācobɔ̄bíipú dúú.

³⁶Aá ményinyi ācɛ ɔhá, ɛ́gɛ́nɛ̄ Ɔwɔicō, Ádā alɔ gē ményinyi ɛjɛ̄ɛ̄jī ācɛ ā.

³⁷“Aá híīī kɛpɔ̄ tū ācɛ ɔhá ŋ́, cɛ́ɛ́ kú Ɔwɔicō kóō híīī kɛpɔ̄ tū aá ŋ́. Aá híīī ŋmó ācɛ ɔhá okónu ŋ́, cɛ́ɛ́ kú Ɔwɔicō kóō híīī ŋmó aá okónu ŋ́. Aá je ɔdā nɛ̄ ācɛ yá ā yá uwā ɛhi, cɛ́ɛ́ Ɔwɔicō géē je ɛ̄nɛ̄ aá yá ā yá aá ɛhi.

³⁸Aá yá ācɛ ɔhá ɛhi, cɛ́ɛ́ Ɔwɔicō kē ī yá aá ɛhi. Ɔkwɔɔkwɛyi, aá géē mīyɛ ɔdā nēé le miya omōōmu nēé lɛ abɔ̄ da ɔ́ báajɛ, lɛ ɔ́ gwotū, klla ī ce klɛ́ɛcɛ ā. Okoolo nɛ̄ aá ī miya ɔdā lɛ ɔ̄cɛ ɔhá ā, okoolo ékpó ɔ́ɔmā nēé géē bī le miya ɔdā lɛ aá dúú á.”

³⁹Ujísɔ̄si klla le ita nyā kwu lɛ uwá. Opeyī éyi í bī opeyí ɔhá jé ɔwɛ glá ŋ́. ɔ́dāŋ nēé le yá lɛ ā, uwá ɛpɛplɛ́ɛpa í míya tū ipú ɔ̄gɔ̄.

⁴⁰Ɔyípɛ̄ unɔ́kpá í gē nwuné fíyɛ́ utíca kú nū ŋ́, amáŋ ɔyípɛ unɔ́kpá dóódu nōo le odúúdú ɔdā nēe nwū ɔ̄ ā jé lɔɔlɔhi géē lɛbɛ̄ɛka utíca kú nū ā.

⁴¹Ɔdíyá nɛ̄ a í má īkpɔ̄ɔjɛ nōo tá ɔyínɛ́ uwɔ ikpēyī ā nɛ̄ á kē lɛlá wu ígbɔ́ɔcí nōo tá awɔ abɔ̄yī uwɔ ikpēyī ŋ́ mā?

⁴²Á cíkā ō da ɔyínɛ́ uwɔ kóō wā ká anúɔ kwu ikpɔ̄ɔjɛ ú ŋmá ɔ̄ ikpēyī, nɛ̄ ígbɔ́ɔcí tá uwɔ īkpeyī ā ŋ́. Awɔ oleyīɛpa, kwú ígbɔ́ɔcí nōo tá uwɔ īkpēyī ā ú wɛ̄ɛcɛ gbɔbū cɛ́ɛ́ ká ā lɛ ɛbɛ má péee ɛ́ɛ́ nɛ̄ a lɔfú je ikpɔ̄ɔjɛ ŋmá ipú ikpēyī kú ɔyínɛ́ uwɔ glá á.

⁴³Ɔcí olɔhi í gē gwá ikpō obɔ̄bí ŋ́, ɛ́ɛ́ nɛ̄ ɔcí obɔ̄bí gē gwá ikpō olɔhi glá ŋ́.

⁴⁴É gē jé ɛ́nɛ́ ɔcí dóódu ŋmá lɛ ikpó nōo gē gwá ā. É gē wū ikpō ɔkpɔ́ɔma ŋmá okwɔnyɛbɔ́tū ŋ́, ɛ́ɛ́ nēé kē ī wū alemú ŋmá okwífú ŋ́.

⁴⁵Ɔ̄cɛ olɔhi gē gbɛlá ɔdōlɔhi ipú ɔtū kú nū anɔ́ɔ ohígbū ɔ́ɔmā ɛlā olɔhi nōó gē ka á. Ɔ̄cɛ obɔ̄bí gē gbɛlá ɔdōōbɔ̄bí ipú ɔtū kú nū, anɔ́ɔ ohígbū ɔ́ɔmā ɛlā obɔ̄bí nōó gē ka á. Ɔdā nōo yɔ̄ odo kú ɔ̄cɛ ā nɛ̄ okónu gē ka wɛ̄ɛcɛ á.

⁴⁶“Ɔdíyá nɛ̄ aá ī hī um ka, ‘Óndú, Óndú’, náána nɛ̄ áa kē ī yá ɔdā nɛ̄ n da aá ā ŋ́ mā ā?

⁴⁷Ɔ̄cɛ dúúmā nōo gā ɛgiyí um gē jāhɔ̄ ī pó ɛlā ā nōó klla ī bī ɔ̄ le yúklɔ́, n géē ma ɛdɔ ɔ̄cɛ nōó gbla ā fú lɛ aá.

⁴⁸ó lɛbɛ̄ɛka ɔ̄cɛ nɛ̄ eko nōó yɔ̄ ī gwó inu kú nū ā, lɛ ɔ̄gɔ̄ ikpíinu ā bū lipú gaá fu ɛcɔ̄ anɔ́ɔ ó kwú ikpíinu kú nū ú táajɛ ɛyí ɛcɔ̄ á. Īsu cēenyi kla inu ɔ́ɔmā, amáŋ ó jila ɔ́ iyē glá ŋ́.

⁴⁹Amáŋ ɔ̄cɛ dúú nōo lɛ ɛlā kú um pó nōó bī ɔ̄ le yúklɔ́ ŋ́, lɛbɛ̄ɛka ɔ̄cɛ nōo gáā gwó inu nōó bū ɔ̄gɔ ikpíinu ó táajɛ ŋ́ mā. Eko nɛ̄ ɔkpá le cēenyi klá inu ɔ́ɔmā, ó kwú ca bōōbū, anɔ́ɔ ó le catáajɛ dúúdú á!”