Read idoma ULÚKU 7 Bible Online

ULÚKU 7 - idoma bible

ULÚKU 7

¹Eko nɛ̄ Ujísɔ̄si lɛ aɔ́dā nēe bá nyā ka lɛ ācɛ kwɛyí á, ó le yɛ tá Ukápānɔm.

²Otrɛ̄yí kú aícɔ́ɔja kú ācɛ Uróm lɛ ɔfiyɛ éyi nōo he ɔ́ ɔtū nɛ̄hi. Ɔfiyɛ ā yɔ̄ gē doōcē gáā kwú.

³Eko nɛ̄ otrɛ̄yí nyā le pó ka Ujísɔ̄si ɔ́ɔ ga Ukapánɔm ā, ó lɛ anyākwɔ́cɛ ōhī kú ācɛ Ujíyu tɛ̄hɔ̄ fu ɔ́ kéē da ɔ́ kóō gā gaá lɛ ɔfiyɛ kú ɔlɛ́ anúɔ hɛ́tá.

⁴É le tá ɛgiyí Ujísɔ̄si anɔ́ɔ é gbɔ̄ɔkɔ lɛ ɔ́ lɔfú lɔfú kahíníī, “A cíkā ō tá ɔ̄cɛ ā abɔ̄.

⁵Ācɛ ɔlɛ́ alɔ he ɔ́ ɔtū nɛ̄hi. Anú abɔ̄yīnū kóō le ɛgogbɔ̄ɔkɔ gwó lɛ alɔ dúú ɛ́ɛ́.”

⁶Anɔ́ɔ Ujísɔ̄si le yɛ mla uwá. Eko nōó le bá lɛ ɔlɛ́ ā, otrɛ̄yí ā le oklobīya nū tɛ̄hɔ̄ kóō da Ujísɔ̄si kahíníī, “Ɔkpani, a híīī junwalu lɛ iyī uwɔ ŋ́. Ń wɛ ɔ̄cɛ ɔkwɛ̄yi jɛ̄ nɛ̄ a cíkā ō wā ɔlɛ́ um ŋ́,

⁷ɛ́ɛ́ nɛ̄ n kōō má iyí um ka n wɛ ɛdɔ ɔ̄cɛ nōo cíkā ō wā ɛgiyí uwɔ abɔ̄yī um ŋ́. Lɛ ɛlā ka ŋmá amānyā ōfōōfūnū, ōcē kú ɔfíyɛ kú ɔlɛ́ um géē mɛ.

⁸Ami ā dúú, yɔ̄ ɛháajɛ aótrɛ̄yí nēe lɛ íkwu fíyɛ́ um, ami ā kē lɛ aícɔ́ɔja bá ɛháajɛ um. N da ícɔ́ɔja éyi ka ‘Nyɔ̄’, ó kē le yɛ. N da ícɔ́ɔja ɔhá kóō wā, ó kē gā a. N lɛ ɔ́da je lɛ ɔfiyɛ kú um kóō lɛ odée yá, ó kē lɛ ɔ́ yá.”

⁹Ujísɔ̄si le hídáagó eko nōó lɛ ɛlā nyā pó ā. Ó le eyī pīya tá ɛwa kú ācɛ nēe tá ɔ̄ ɔkwu ā, anɔ́ɔ ó da uwá kahíníī, “N da aá ka ń má ɛdɔ ɔ̄cɛ o lɔtūce Ɔwɔicō ɛdɔ ɛ̄nyā ɛ́ɛ́ ŋ́, n kōō má ɔ̄cɛ dúú ipú ācɛ kú Ísrɛ̄lu ŋ́.

¹⁰Ācotɛ̄hɔ̄ ā kwúcē le tá ɔlɛ́ otrɛ̄yí kú aícɔ́ɔja ā, anɔ́ɔ é má ka ōcē kú ɔfiyɛ ā mɛ ɛɛ́.

¹¹Eko nɛ̄ ɔdā nyā le yá yɛɛ ā, Ujísɔ̄si mɛ́mla ayíkpó mɛ́mla ɛwa nɛ̄hi kú ācɛ le yɛ tá igelī nēé hi Unéyin ā.

¹²Abɔ̄ ó le bá lɛ okompinu kú igelī ā, ɛwa kú ācɛ kwúcē okwu éyi yɔ̄ ī wɛ̄ɛcɛ ŋmá ipú igelī ā. Ɔnyīlɔ nōo kwú ā wɛ ɔyí ékpónú kú ɔnyōkwū éyi. Ɛwa nɛ̄hi kú ācɛ igelī ā tá ɔ̄nyā ā ɔkwu.

¹³Eko nɛ̄ Óndú ā lɛ ɔ́ má ā, ó le kwú ɔ̄ iyē nɛ̄hi lɛ ɔnyōkwū ā, anɔ́ɔ ó da ɔ́ kahíníī, “Á híīī jikwū ŋ́.”

¹⁴Anɔ́ɔ ó gā gaá lɛ abɔ̄ kwu ákplata ā, anɔ́ɔ ācɛ nēe lɛ ɔ́ cɛyí ā māháyi cíí. Anɔ́ɔ Ujísɔ̄si kahíníī, “Ɔyípōklóbīya, n ka cāŋjɛ.”

¹⁵Anɔ́ɔ ɔyípōklóbīya ā má cīce icō gbɔɔ́ ō kɛlā á anɔ́ɔ Ujísɔ̄si lɛ ɔ bītá ga ɛgiyí ɛ́nɛ́ nū á.

¹⁶Ufi lɛ ɛjɛ̄ɛ̄jī uwā kwú, anɔ́ɔ é tá Ɔwɔicō ahínyá á. É kahíníī, “Ɔ̄comɛ́ɛbɛ nɛ̄hi éyi le bɛ̄cɛ ɔtāhɛ̄ alɔ ɛɛ́! Ɔwɔicō gā kóō nya alɔ, nōo wɛ ācɛ ɔlɛ́ nū ā tá ɛɛ́”

¹⁷Ɔ̄kā kú ɔdā nɛ̄ Ujísɔ̄si yá nyā le yɛ tá ajɛ kú Ujudíya mɛ́mla aɔ́lɛ́ ɔhá nēe yɛ abɔ́ɔ jīla tá ā.

¹⁸Eko nɛ̄ ayíkpó kú Ujɔ́ni lɛ aɔ́dā nēe yá kpɛ́mm ā kpó ka lɛ ɔ́ ā, ó lɛ ayíkpó kú nū ɛpa hīgwú,

¹⁹anɔ́ɔ ó lɛ uwá tɛ̄hɔ̄ fu Óndú kéē da ɔ́ ɔka kahíníī, “Awɔ wɛ ɔ̄cɛ nɛ̄ Ujɔ́ni ka ka a gē wā á nɛɛ kɛ̄ɛ kā ālɔ̄ leyītáajɛ ɔ̄cɛ ɔhá.”

²⁰Eko nēé gā ɛgiyí Ujísɔ̄si ā, é kahíníī, “Ujɔ́ni oyúbatísim tū alɔ ɛhɔ̄ ká alɔ da uwɔ ɔka ɔ́dāŋ ka awɔ wɛ ɔ̄cɛ nōó ka a gē wā á nɛɛ, kɛ̄ɛ̄ ka alɔ leyītáajɛ ɔ̄cɛ ɔhá?”

²¹Ɛpléeko ɔ́ɔmā Ujísɔ̄si le ācɛ alɛwa hɛ́tá ŋmá ɛdɔ ōcē ɛyɛ́ɛyɛ́yí kú uwā, ó nū aálelékwū obɔ̄bí ŋmá iyē kú ācɛ, ó klla lɛ ācɛ nɛ̄ ikpēyī kú uwā pu ā eyī kpó nwūla.

²²Ó le ohi tá ācotɛ̄hɔ̄ kú Ujɔ́ni ā kahíníī, “Kwúcē nyɔ̄ í da Ujɔ́ni ɔdā nɛ̄ aá má mɛ́mla ɛ̄nɛ̄ aá pó ā. Ācɛ opeyī gē mɛ́ɛbɛ, ācɛ ocikpó gē yāwu, é lɛ aólagwú ā hɛ́tá, aódahɔ̄ gbɔɔ́ ō páhɔ̄, é lɛ ācɛ nēe gekwú ā héyī ŋmá ɔlékwū, é klla ke lɛ ɔna kú ɔ̄kōolɔhi tá lɛ ācogbɛhá.

²³Ákú ācɛ nēe lɔtūce um kpɔ́ ā lɔhi nɛ̄hi.”

²⁴Eko nɛ̄ ācotɛ̄hɔ̄ kú Ujɔ́ni le pɛ́ nyɛ̄ɛ̄ ā, Ujísɔ̄si gbɔɔ́ ō kɛlā lɛ ɛwa kú ācɛ ā lɛyíkwu Ujɔ́ni. Ó kahíníī, “Eko nɛ̄ aá ga ipú ígbíli ɛgiyí Ujɔ́ni ā, ɔdí nɛ̄ aá leyice ka aá géē má ā? Ēpū ácí nōó lɔfú iye ŋ́ nɛ̄ owu gē pú ga ɛga dóódu ā nɛɛ?

²⁵Ɔdí nɛ̄ aá ga ɛcɛ nyɔ̄ í má ā? Ɔ̄cɛ nōo lɛ īlī ohéyīfuú wiiyē nɛɛ? Ācɛ nēé gē yíifa ɛ́gɔ́ɔmā nōo gwō ipú abahi ā gē lā ipú agblɔ̄cɛ́!

²⁶Aá da um ɛ́ɛ́, ɔdí nɛ̄ aá ga ɛcɛ nyɔ̄ gáā má āa? Ɔ̄comɛ́ɛbɛ nɛɛ? Īī ɔkwɔ̄ɔ̄kwɛ̄yi nɛ̄, ɔ̄cɛ nɛ̄ aá má ā nwuné fíyɛ́ ɔ̄comɛ́ɛbɛ kɔ́ɔ́.

²⁷Ohígbū ka Ujɔ́ni wɛ ɔ̄cɛ nēé kɛlā lɛyíkwu ɔ́ ipú ɔkpíihɔ á. É tá kahíníī, ‘N géē tū ɔ̄cotɛ̄hɔ̄ kú um kóō nyɔ̄ gbɔbū ga awɔ kóō lɛ ɔwɛ tútū gbēyī uwɔ.’

²⁸Ujísɔ̄si klla ka tū ɔ̄ kahíníī, “N da aá ka Ujɔ́ni cɛgbá fíyɛ́ ɔ̄cɛnyīlɔ dúúmā nōo wā ipú ɛcɛ nya ɛ́ɛ́ má. Amáŋ ɔ̄cɛ nōo nyɛ́ fíyɛ́ dúú kú ipú ajɔ̄ɔ̄cɛ́ kú Ɔwɔicō ā nwuné fíyɛ́ Ujɔ́ni á.”

²⁹Odúúdú ācɛ ɔlamu ā mɛ́mla aódɔlɛ́ cɛ̄ lɛ Ujɔ́ni le ubatísim yá uwā anɔ́ɔ o bū ipú ɔwɛ nyā é lɛyítáajɛ lɛ ɔdā nɛ̄ Ɔwɔicō tíne ā.

³⁰Amáŋ ācɛ Ufárisīi mɛ́mla aútíca kú íne ā í cɛ̄ kú Ujɔ́ni kóō yá uwā ubatísim ŋ́, anɔ́ɔ ipú ɔwɛ nyā é tá kóō yá ɔdā nɛ̄ Ɔwɔicō tíne ā.

³¹Ujísɔ̄si yɔ̄ í kɛlā gɔbū kpɔ́. Ó kahíníī, “Abālɔbányā ɔdí nɛ̄ n géē lɛ ācɛ kú eko nyā gbla anú ā? Ɔdí nēé gbla ā?

³²É lɛbɛ̄ɛka ayípɛ̄ nɛŋ́cɛ́ nēe jīla bá ɔɔ́pu ā. Ígwu éyi lɛ ɔkɔcɛyí da ígwu ɔhá ā kahíníī, ‘Alɔ tá ɛ́mula kú ijē olɔnyɛ tū aá, aá kē jīje ŋ́! Alɔ gwííjē ɛyíkwū lɛ aá, nááná aá kē jikwū ŋ́!’

³³Ujɔ́ni oyúbatísim ga, yɔ̄ ī tɔ́ɔna kú olɛhɔ kú nū. Ó gwōkónu, ó kē gwá ejé ŋ́. Aá kóō lɛ alelékwū obɔ̄bí!

³⁴Ɔyínɔnyilɔ kú Ɔ̄cɛ gā, ó lé, ó klla gwá, anɔ́ɔ aá kahíníī, ‘Aá má ɔ̄cɛ ā ɛ́ɛ́! Ó wɛ ɔ̄cɛ o lé ɔdōlé nɛ̄hi, mɛ́mla ɔ̄cɛ o gwá ejé fíyɛ́ abɔ̄. Ó wɛ óklóbīya aódɔlɛ́ mɛ́mla ācobīyíne!

³⁵Amáŋ íjééyī kú Ɔwɔicō i mafú koó wɛ ɔkwɛ̄yi, oŋmá oyēeyī kú odúúdú ācɛ nēe mīyɛ ɔ́ ā.”

³⁶Ɔ̄cɛ Ufárisīi éyi le Ujísɔ̄si hīgwú kóō wā í lɛ ɔdōlé lé mla anú. Anɔ́ɔ Ujísɔ̄si le yɛ tá ɔlɛ́ nū gáā cīce kóō lé ɔdōlé á.

³⁷Ɔnyā akwuna éyi nōo lā ipú igelī ɔ́ɔmā le pó ka Ujísɔ̄si ɔ́ɔ yɔ̄ í lé ɔdōlé ɔlɛ́ ɔ̄cɛ Ufárisīi éyi. Anɔ́ɔ ó kwú ɔjá kú ɔmɛ nɛ̄ anɔ̄ ihiméle yɔ̄ ipú ā ú wā.

³⁸Ó gaá háyi igbīhi Ujísɔ̄si, ɛgiyí ikpó kú nū, ó gbɔɔ́ ō jikwū yɔ̄ ī pɛ́ agīīje kú nū klá Ujísɔ̄si ikpó. Ó bī īnyīlɛ̄yí kú nū le agīje ā nya ŋmá ɔ́ ikpó, ó le okónu kwu ɔ́ ikpó anɔ́ɔ ó le anɔ̄ ihiméle ā cē klá anú ikpó á.

³⁹Eko nɛ̄ ɔ̄cɛ Ufárisīi nōo hī ɔ̄ igwú ā le ɔdā nyā má ā, ó gbɛlá ipú ɔtū kú nū kahíníī, “Ɔ́dāŋ ka ɔ̄cɛ ā wɛ ɔ̄comɛ́ɛbɛ ɔkwɔ̄ɔ̄kwɛ̄yi nɛɛ, ó géē yɛ í lɛ ɛdɔ ɔ̄cɛ nɛ̄ ɔnyā nōo yɔ̄ ī kpabɔ̄ tū ɔ̄ iyē nyā jé, nōó géē yɛ í le jé koó wɛ akwuna!”

⁴⁰Abɔ̄ Ujísɔ̄si le ɔtū kú ɔ̄cɛ ā, nōo lé ka Usáyímɔ̄n jé ā, ó da ɔ́ kahíníī, “Usáyímɔ̄n, n lɛ odée gáā da uwɔ.” Anɔ́ɔ Usáyímɔ̄n kahíníī, “Īī utíca, da um mɛ́ɛnɛ.”

⁴¹Ujísɔ̄si kahíníī, “Ó lɛ ācɛ ɛpa nēe bī ɔ̄cɛ o kplá ācɛ ije éyi ulé. Ɔ̄cɛ éyi bī ɔ̄ īkpīije nɛ̄hɛ́ ulá cofɛhɔ̄, anɔ́ɔ ɔhá ā bī ɔ̄ ofɛpacigwó.

⁴²Odóódu kú uwā í má ije gbā lɛ ɔ́ ŋ́, anɔ́ɔ ó da uwá ɛplɛ́ɛpa ka ije ā kóō yá uwā ɛhi mɛ́ɛnɛ. Ɛ̄nyá kú ipú ācɛ ɛpa nēe bá mbáa géē yíhɔtū tá ɔ̄cɛ nōo je ije yá uwā ɛhi nyā fíyɛ́ ā?”

⁴³Usáyímɔ̄n tá ɔ̄ ohi kahíníī, “N gbɛlá koó géē wɛ ɔ̄cɛ nōó je ijē nɛ̄hi yá ɔ̄ ɛhi ā.” Ujísɔ̄si kahíníī, “A le ɔ̄kā ā cīla lɔhi.”

⁴⁴Anɔ́ɔ ó leyī pīya tá ɔ̄cɛnyā ā anɔ́ɔ ó da Usáyímɔ̄n kahíníī, “Á má ɔdā nɛ̄ ɔ̄cɛnyā nyā hímáyī yá ú? N wā ɔlɛ́ uwɔ, á je éŋkpɔ̄ ō na ikpó gā um ŋ́, amáŋ ɔ̄cɛnyā nyā bī agīje kú nū le um ikpó na, ó klla bī inyīlɛyí kú nū lɛ ɔ́ nyā.

⁴⁵Á yá um omáaba wā ɔlɛ́ uwɔ le ɔtū má um ɔtū ŋ́, amáŋ ŋmífī nɛ̄ n wā ɔlɛ́ uwɔ ā ɔ̄cɛnyā nyá í mā ō lɛ okónu kwu um ikpó tá ŋ́.

⁴⁶Á kē je anɔ̄ olīifu gā um le nya ɛyí ŋ́, amáŋ ɔ̄cɛnyā nyā lɛ anɔ̄ ihiméle nyā um ikpó.

⁴⁷N da uwɔ ka, ihɔtū nɛ̄hi nɛ̄ ɔnyā ā mafú ā, cābɔ̄ kéē kwú íne alɛwa nōó bīya ā í yá ɔ̄ ɛhi ɛɛ́. Amáŋ ɔ̄cɛ nēé je olígíí yá ɔ̄ ɛhi ā gē ma ihɔtū olígíí fu.

⁴⁸Anɔ́ɔ Ujísɔ̄si da ɔ̄cɛnyā ā kahíníī, “N kwú íne nɛ̄ a bīya ā í yá uwɔ ɛhi ɛɛ́.”

⁴⁹Ācɛ ohile nēe bá gē lé ɔdōlé ā gbɔɔ́ ō da iyī uwā kahíníī, “Ɔ̄nyɛ nɛ̄ ɔ̄cɛ ā wɛ ā, nōo kōō ī je íne nɛ̄ ācɛ bīya ā yá uwā ɛhi glá ā?”

⁵⁰Amáŋ Ujísɔ̄si da ɔ̄cɛnyā ā kahíníī, “É lɛ uwɔ nyatá ɛɛ́ ohígbū ka a lɔtūce Ɔwɔicō. Nyɔ̄ mla ɛbɔ́ mɛ́ɛnɛ.”