Read idoma OBLATŪKÍNE 1 Bible Online

OBLATŪKÍNE 1 - idoma bible

OBLATŪKÍNE 1

¹Ɛ̄cī aflɛ́yí kú ɔyā igwóléyi kú iháyí ɔ́mofɛpa nɛ̄ ācɛ Ísrɛ̄lu bɛ̄cɛ ŋmá Íjīpiti ā, Umósīsi le ɔdā dóódu nɛ̄ Óndú ā da ɔ́ kóō da ācɛ Ísrɛ̄lu kpó da uwá. Ó ka aɛ́lā nyā lɛ ācɛ kú Ísrɛ̄lu, eko nēé bá ipú ígbíli, ɛnɔ̄ɔ̄cī kú Ísu kú Ujɔ́dan ā. É bá ɔpɛ́ kú Arába kwu Usúfu ajaajɛ, ɔtāhɛ̄ kú igelī nɛ̄ŋcɛ́ kú Upáran mɛ́mla aígelī nɛ̄ŋcɛ́ kú Utófɛ̄lu, Ulában, Uhásɛ̄rɔtu mɛ́mla Udisáhābu.

²(O ŋmá ɛfu kú Usáyínayi ga Ukɛdíss-Ubanéya, bū ɔwɛ kú Ɛ́dɔm ā, wɛ iyāwu kú ɛ̄cī igwóléyi.)

³Ɔdā nyā yá igbīhi eko nɛ̄ Óndú ā cɛ̄ lɛ Umósīsi le Usíhɔn, ɔcɛ́ kú ācɛ Ámɔ̄ri, nōo lā igelī nɛ̄ŋcɛ́ kú Uhɛ́sbɔn ā, mɛ́mla Ógu, ɔcɛ́ kú ācɛ Ubássan nōo lā

⁴aígelī nɛ̄ŋcɛ́ kú Ástārɔtu mɛ́mla Édrēyi ā kpó yálé ā.

⁵Eko nɛ̄ ācɛ ā bá ɛnɔ̄ɔ̄cī kú Ujɔ́dan, ajɛ kú Umówābu ā, nɛ̄ Umósīsi gbɔɔ́ ō ka íne ā tɛ́ɛcɛ lɛ uwá á.

⁶Ó ka eko nɛ̄ aá bá ɛyí ɛfu kú Uhɔ́rɛ̄bu ā, Óndú ā, nōo wɛ Ɔwɔicō ā ɔ́ɔ ka lɛ aá ka, aá ɔ́ɔ le lā gbojī ɛyí ɛfu ā ɛɛ́.

⁷“Ó ka alɔ̄ le cālɛ́, cɛ́ɛ́ kú ālɔ̄ gɔbū mla iyāwu kú alɔ, ga ɛyí ɛfu kú Ámɔ̄ri mɛ́mla odúúdú aípɔ́lɛ́ ɔhá nēe lā kwu uwá ā. Ajɛ nōo ga ɔpɛ́ kú Ujɔ́dan, ga ɛyí ɛfu mɛ́mla ajɛ nōó lɛ ɛfú ŋ́ mā, gā ɛháajɛ, jāā ga okónu ísu kú Umeditarénīya. Ó ka ālɔ̄ yɛ ga ajɛ kú Ukénan, ka ālɔ̄ klla gla aɛ́fu kú Ulɛ́bānɔn jāā ga Ísu nɛ̄hī kú Uyúfrētīisi ā.

⁸Óndú ā ka alɔ̄ má ɔ̄, ka anúɔ kwú ajɛ ā ú lɛ alɔ ɛɛ́. Ó ka ālɔ̄ bēhé ga ipú nū gāá mīyɛ ajɛ nɛ̄ anúɔ, Óndú ā, nōo wɛ Ɔwɔicō ā ɔ́ɔ cokónu nū lɛ ádáádā alɔ, Ébrahām, Áyísīki mɛ́mla Ujékɔ̄pu ā. Ó ka anúɔ géē je ajɛ ā lɛ aá mɛ́mla odúúdú ayááyí kú aá.”

⁹Anɔ́ɔ Umósīsi da ācɛ ā ka, eko ɔ́ɔmā, anúɔ tɛtɛ da uwá ka, anúɔ ōfōōfū anúɔ í bī uwā glá ŋ́.

¹⁰Ka Óndú ā, nōo wɛ Ɔwɔicō kú uwā cɛ̄ lɛ uwá le nyīla kwú lɛwa nɛ̄hi bɛ̄ɛka aínyílɔ́wɔ kú ɔkpáncō ā ɛɛ́.

¹¹Ó gbɔ̄ɔkɔ ka Óndú ā, nōo wɛ Ɔwɔicō kú ádáádā uwā ā ɔ́ɔ nyīla uwá nwuné nwuné fíyɛ́ ɛ́gɛ́nɛ̄ ɛ́ɛ wɛ ā, ɛga úlúúlā ɔhá. Ká ɔ́ɔ hɔ́ɔhā ce uwá, ɛ́gɛ́nɛ̄ ɔ́ɔ cokónu lɛ uwá ka anúɔ ī yá ā.

¹²Ó klla ka ɔwɛ nyá nɛ̄ anúɔ ōfōōfū anúɔ géē bī unwalu kú īkpɛ́lā ō trá kú uwā glá āa?

¹³Anɔ́ɔ ó da uwá kéē lɛ ācɛ ojéeyī, nɛ̄ ɛ́ɛ klla jé ɔdā, nɛ̄ ɛ́ɛ wɛ anyākwɔ́cɛ fu ŋmá ipú uwā ɛ́gɛ́nɛ̄ ipɔ́ɔma kú uwā lɛ ā. Cɛ́ɛ́ kú anúɔ kwú uwā ú pīya aótrɛ̄yí kú uwā.

¹⁴Anɔ́ɔ ɛ́ɛ tá anúɔ ohi eko ɔ́ɔmā ka ɔ́ɔ lɔhi lɛ ā, ka aá géē yá lɛ ā á.

¹⁵Anɔ́ɔ anúɔ le aótrɛ̄yí nɛ̄ ɛ́ɛ wɛ anyakwɔ́cɛ nēe wɛ ācɛ ojéeyī nɛ̄hi ā kpó fu ŋmá aípɔ́ɔma kú uwā. Anúɔ kwú uwā ú pīya aótrɛ̄yí kú uwā. Cɛ́ɛ́ kéē leyīkwu uwā ipú ígwíígwu kú uwā, úlúúlā, aóhī ígwu kú ofɛhɔ̄, ōhī ofɛpa ce igwó, ōhī wɛ igwó. Ó ka anúɔ klla le aígabɔ̄ ɔhá kpó fu ŋmá ipɔ́ɔma kú uwā.

¹⁶Ó ka anúɔ tū aótrɛ̄yí ā ukɔ́ kéē jāhɔ̄ lɛ īkpɛ́lā, nōo géē bɛ̄cɛ ɔtāhɛ̄ kú ācɛ ɔlɛ́ uwā ā. Ó ka anúɔ klla da uwá kéē hɛ́pɔ̄ dóódu kpaakpa. Ó kōō wɛ ɛpɔ̄ kú ɔyínɛ́ uwā mɛ́mla aúgbɔga kú ɔlɛ́ uwā.

¹⁷Ó ka anúɔ klla tū uwā ukɔ́ kpɔ́ kéē híī cɛ̄ɛla kú ɔ̄cɛ éyi fíyɛ́ ɔ̄cɛ ɔhá ipú ɛpɔ̄ nēé géē hɛ́ ā ŋ́. Kéē jāhɔ̄ lɛ ɛpɔ̄ nɛ̄ŋcɛ́ mɛ́mla ɛpɔ̄ nɛ̄hī jōōnjīlɛ̄. Ó ka anúɔ da uwá kéē híī yúúfi eyī kú ɔ̄cɛ dúúmā eko nēé ī hɛ́pɔ̄ ŋ́, ohígbū ka ɛpɔ̄ ō hɛ́ wɛ ákú Ɔwɔicō nɛ. Ɛpɔ̄ dóódu nɛ̄ ɔ́ɔ le lɔnɔ nɛ̄ɛ̄nɛhi, kéē lɛ ɛpɔ̄ ɔ́ɔmā bī gé lɛ anúɔ, cɛ́ɛ́ ka anúɔ jāhɔ̄ tá ɛpɔ̄ ā.

¹⁸Ó ka anúɔ klla tū uwā ukɔ́ kú aɔ́dā ohile dóódu nɛ̄ ɛ́ɛ géē yá ā.

¹⁹Ó ka aá gbɔɔ́ ŋmá ɛyí ɛfu kú Uhɔ́rɛ̄bu ā gaá bū ipú ígbíli obɔ̄bí nɛ̄hi, nɛ̄ uwá ɛ́ɛ móōwē ɔwɛ ā, ga ɛyí ɛfu kú Ámɔ̄ri. Ó klla ka aá gā Ukɛ̄díss Ubánéya ɛ́gɛ́nɛ̄ Óndú ā ɔ́ɔ je ɔ́da lɛ ā.

²⁰Ó ka anúɔ da uwá kéē gā ajɛ kú ɛfu kú Ámɔ̄ri, nɛ̄ Óndú ā, Ɔwɔicō ɔ́ɔ je lɛ aá ā ɛɛ́.

²¹Ó ka anúɔ da uwá kéē má ɔ̄, Óndú ā, nōo wɛ Ɔwɔicō kú uwā ā kwú ajɛ ā ú lɛ uwá ɛɛ́. Kéē nyɔ̄ ipú nū, cɛ́ɛ́ kéē gáā lā anú, ɛ́gɛ́nɛ̄ Óndú ā, nōo wɛ Ɔwɔicō kú ádáádā uwā ɔ́ɔ ka lɛ uwá ā. Ó da uwá kéē híī yúúfi ɛ́ɛ́ nɛ̄ ɔtū kú uwā gē gbenyi ŋ́.

²²Ó ka odúúdú uwā ɔ́ɔ le pɛ́ wā ɛgiyí anúɔ gaá da anúɔ ka aá ɔ́ɔ lɛ ācɛ tɛ̄hɔ̄ nyɔ̄ gbɔbū lɛ uwá, cɛ́ɛ́ kéē lɛ ajɛ ā jila tayínū lɛ aá, cɛ́ɛ́ kéē lɛ ohi bī gé lɛ aá, ɔwɛ nɛ̄ o lɔhi fíyɛ́ dúú nɛ̄ aá géē ga ipú aígelī nɛ̄hi nɛ̄ aá géē nyɔ̄ aflɛ́yí ā.

²³Ó ka anúɔ le má ka ɛlā nēé ka ā lɔhi, anɔ́ɔ anúɔ le ācɛ igwɛ́ɛpa fu ŋmá ipɔ́ɔma éyééye kú uwā.

²⁴É le yɛ tá ajɛ kú ɛyí ɛfu ā jāā ga ɔpɛ́ kú Ésskɔ̄lu ā gáā le ajɛ ā jila.

²⁵É le īkpɔ̄cí kú ajɛ ā hɛ́, le bī abɔ̄ gé lɛ aá. Anɔ́ɔ é da aá ka ajɛ nɛ̄ Óndú ā, nōo wɛ Ɔwɔicō kú aá je lɛ aá ā lɔhi nɛ̄hi á.

²⁶Ó ka abɔ̄ é tá ɛlā kú Óndú ā, nōo wɛ Ɔwɔicō kú uwā ā, anɔ́ɔ é bēhé ga ipú ajɛ ā ŋ́ má.

²⁷Ó klla da uwá keé bá ī ka iŋīnī ka abɔ̄ Óndú ā ɔ́ɔ tū aá eyījii ā yá nɛ̄ ɔ́ɔ kpó aá wɛ̄ɛcɛ ŋmá Íjīpiti, cɛ́ɛ́ kóō kwú aá ú kpó tū ipú abɔ̄ kú ācɛ Ámɔ̄ri ā, kéē lɛ aá kpó ŋmó á.

²⁸Ó ka ɛ́ɛ dɔɔ̄ka ka ɔdíyá nɛ̄ aá cíkā ō ga abɔ́ɔ āa? Ayínɛ́ aá nēe ga abɔ́ɔ ā, le aá ɔtū gbenyi ka ācɛ nēe bá abɔ́ɔ ā ɛ́ɛ lɔfú fíyɛ́ aá á. Ka ɛ́ɛ wɛ aɔ́báagwu klla jɛ̄ nɛ̄hī fíyɛ́ aá. É ka ɛ́ɛ wɛ ayí kú Ánāki (nōo wɛ ɔbáagwu ā). Ɔdɔ nɛ̄ uwá hɛ́ jīla ɔlɛ́ uwá tá ā, ɔ́ɔ jɛ̄ lɛyíkwu ɔkpáncō.

²⁹Anɔ́ɔ ó ka anúɔ da uwá kéē híī yúúfi uwā ŋ́.

³⁰Óndú ā, nōo wɛ Ɔwɔicō kú uwā ɔ́ɔ géē gbɔbū lɛ uwá. Anú abɔ̄yī nū ɔ́ɔ géē nuunu lɛ uwá á. Ɛ́gɛ́nɛ̄ ɛ́ɛ má ɔ̄ abɔ̄ ó nuunu lɛ uwá, Íjīpiti

³¹mɛ́mla ipú ígbíli ā. Ó da uwá ka ɛ́ɛ má ɔ̄ ɛ́gɛ́nɛ̄ ó bī uwá ɛbɔ́ jāā wā ɛga nēé bá ā. Ó ka ɔ́ɔ lɛbɛ̄ɛka ɛ́gɛ́nɛ̄ ádā gē je ɔyí nū ce ɔkɔ ā.

³²Amáŋ ó ka ipú ɛlā nɛ̄ anúɔ ka lɛ uwā ā nááná, é kpɔ́tūce Óndú ā, nōo wɛ Ɔwɔicō kú uwā ŋ́ kpɔ́

³³Ó klla da uwá ka abɔ̄ Ɔwɔicō ɔ́ɔ yɔ̄ ī gē hɛ́ce iyɔ̄bū alɔ kóō tíne ɛga nɛ alɔ géē yɛ nyɔ̄ mɛ́mla ɛga nɛ̄ alɔ géē cē áklɔ́kpɛ́ kú alɔ ce cɛ́ɛ́ ká ālɔ̄ mlɛ́nyɔ́, ā ó ka ɔ́ɔ gē gbɔ̄bū lɛ alɔ bɛ̄ɛka alɔ́ ofíyajɛ nɛ̄hi ā otú mɛ́mla bɛ̄ɛka ojuja nɛ̄hi ā ɔlɛ́ɛnɔ.

³⁴Ó ka Óndú ā ɔ́ɔ le iŋini nēé ka ā pó. Anɔ́ɔ ɔ́ɔ kwú cɔ̄nū, le ɔkpá gbo

³⁵ka ɔ̄cɛ ékpónú kú aɛ́gɔ́ obɔ̄bí ɔ́ɔma ɔ́ gáā má ajɛ nɛ̄ anúɔ cokónu lɛ aádáádā uwā eko eyī ā ɛ́ɛ gɛ ŋ́.

³⁶Ó ka Óndú ā ɔ́ɔ ka Ukálɛ̄bu, ɔyí kú Ujɛ́fūnɛ ōfōōfūnū ɔ́ɔ gáā ga ipú ajɛ nɛ̄ ɔ́ɔ má eyī ā mɛ́ɛ̄ á. Ó ka anúɔ géē je ajɛ nɛ̄ ikpó kú nū ɔ́ɔ da ɔ́ ā lɛ anú mɛ́mla ayááyí nū, ohígbū ka ɔ́ɔ yɛce Óndú ā mla ɔtū ékpónú.

³⁷Ó ka Óndú ā ɔ́ɔ le cɔ̄nū mla anúɔ, nōo wɛ Umósīsi ā ohígbū uwā dúú. Ó ka Óndú ā ɔ́ɔ da anúɔ ka anúɔ ɔ́ gáā ga ipú ajɛ ā ŋ́ dúú.

³⁸Ó da uwá ka Óndú ā ɔ́ɔ da anúɔ ka Ujóssuwa, ɔyí kú Unɔ́n nōo ī cɛ̄ anúɔ nōo wɛ Umósīsi ā ɛhɔ̄ ā, gáā kpó ācɛ Ísrɛ̄lu trɛ̄yí ga ipú ajɛ ā á. Ka anúɔ le ɔfú tū ɔ̄ īyē, ohígbū ka anú géē yá ɛ́ɛ́ nɛ̄ ācɛ Ísrɛ̄lu gaá lā ajɛ ā á.

³⁹Ó ka Óndú ā ɔ́ɔ ka anúɔ, nōo wɛ Óndú ā, ɔ́ɔ da aá ka ayí aá, nēe wɛ ayípɛ̄ obene eko ɔ́ɔmā ā, nēé jé ɔdōbɔ̄bí mɛ́mla olɔhi ɛ́ɛ́ ŋ́ mā gáā ga ipú ajɛ ā á. Ó ka ɔ́ɔ ka ayí uwā nɛ̄ ɛ́ɛ ka aólɛlā kú aá ɔ́ɔ géē mīyɛ uwá abɔ̄fú ɔwɛ ā, anúɔ géē je ajɛ ā lɛ uwá. É kē í lā anú.

⁴⁰Amáŋ, uwá abɔ̄yī uwā ā, kéē le pīyeyī, cɛ́ɛ́ kéē kwúcē igbīhi ga ipú ígbíli nɛ̄ ɔ́ɔ yɔ̄ ɔwɛ nōo yɛ ga ísu igwɛ̄bɛ́ ā.

⁴¹Ó ka ka ɛ́ɛ tá anúɔ ohi ka aá ɔ́ɔ le íne kú Ɔwɔicō bīya ɛɛ́. Aá géē nyɔ̄ gāá kpɛ́fú ā ɛ́gɛ́nɛ̄ Óndú ā, nōo wɛ Ɔwɔicō kú aá je ɔ́da lɛ aá lɛ ā. Anɔ́ɔ ɔnyɔɔnyɛ kú uwā le gbō kú ɛfú á. Ó ka ɛ́ɛ gbɛlá ka ɔ́ɔ tɔ́ɔtɛ́ kú ɔ̄cɛ kóō nyɔ̄ í kpɛ́fú nɛ.

⁴²Anɔ́ɔ Óndú ā, ɔ́ɔ da anúɔ ka anúɔ ka lɛ uwá ka ɛ́ɛ híī nyɔ̄ ɔgbɛ́fú ŋ́. Ohígbū ka anúɔ í yɔ̄ mɛ́mla uwá ŋ́. Ohígbū nɛ̄ aólɛlā kú uwā ɔ́ɔ géē yá uwá lé.

⁴³Ó ka anúɔ le ɛlā nɛ̄ Óndú ā ɔ́ɔ ka ā da uwá, amáŋ é jāhɔ̄ ŋ́. É klla le ikpɛ̄yí olɔfú yá tú Ɔwɔicō, anɔ́ɔ ipú ɔbɔ́ɔcɛ kú uwā, ɛ́ɛ le yɛ tá ipú ajɛ kú ɛfu ā á.

⁴⁴Ó ka ācɛ kú Ámɔ̄ri nēe lā ɛyí ɛfu abɔ́ɔ ā, wā í nuunu tá uwā, bɛ̄ɛka ɔ́wá kú ɛnwú nēe ī nū ācɛ inya nɛ̄ ī kwúcē ŋ́ mā. Ó kéē nū aá nēe wɛ ācɛ Ísrɛ̄lu ā, inya jāā ga Uhɔ́ma, le aá nōo wɛ ācɛ Ísrɛ̄lu ā yálé, ɛyí ɛfu kú ajɛ kú ācɛ Ɛ́dɔm.

⁴⁵Úmósīsi ka aá le ikwū je klá Óndú ā kóō tá aá abɔ̄. Amáŋ ɔ́ɔ tá kóō jāhɔ̄ lɛ ikwū nēé je, ɔ́ɔ kōō tá aá ohi ŋ́.

⁴⁶Anɔ́ɔ aá bá Ukádiss abɔ́ɔ ɛ̄cī alɛwa á.