Read idoma OBLATŪKÍNE 10 Bible Online

OBLATŪKÍNE 10 - idoma bible

OBLATŪKÍNE 10

¹Umósīsi ka Óndú ā ɔ́ɔ da anúɔ ka anúɔ lɛ usiléeti kú ɛcɔ̄ ɛpa ɔhá gbā bɛ̄ɛka ákú aflɛ́yí ā, mɛ́mla ikpati kú ɔcí nōó géē lɛ usiléeti ā tá ipú nū. Cɛ́ɛ́ kóō wā icō ɛfu ɛga anúɔ.

²Óndú ā ka anúɔ géē tá ɔdā nɛ̄ anúɔ tá tū usiléeti kú aflɛ́yí piíí nɛ̄ ɔ́ je ca tū ɔ̄. Cɛ́ɛ́ ɔ́ɔ kwú ɔ̄ tá ipú ikpati ā.

³Umósīsi ka anúɔ le ikpatí gbā ŋmá ɔcí nēé hī ka akésiya ā, anɔ́ɔ anúɔ kwú usiléeti kú ɛcɔ̄ ɛpa nɛ̄ anúɔ gbā bɛ̄ɛka ákú aflɛ́yí ā, í kpó tū ipú nū, anɔ́ɔ anúɔ le yɛ tá icō ɛfu ā á.

⁴Ó ka Óndú ā, ɔ́ɔ le aɔdā nɛ̄ ɔ́ɔ tá tū ipú usiléeti kú aflɛ́yí piíí ā tá ipú aɛ́nɛ̄ e bá abɔ́ɔ ā dúú. Ó ka Óndú ā ɔ́ɔ le aíne igwó nɛ̄ ɔ́ɔ ka lɛ uwá eko nɛ̄ ɔ́ɔ kɛlā lɛ uwá ŋmá ipú ɔlá ā, ɛ̄cī nɛ̄ aá jíla anú eyī ɛyí ɛfu ā tá tū ɔ̄. Ó ka Óndú ā ɔ́ɔ kwú usiléeti ā ú kpó lɛ anúɔ.

⁵Anɔ́ɔ ó ka anúɔ lɛyí pīya wā ajɛ ŋmá ɛyí ɛfu ā. Anɔ́ɔ anúɔ kwú aúsiléeti ā ú kpó tū ipú ikpatí, nɛ̄ anúɔ gba ā. Ó ka ɛ́ɛ húmáyī bá ipú nū jāā kwu eko ɔ́kā ā.

⁶(Ó ka ācɛ Ísrɛ̄lu ɛ́ɛ gbɔɔ́ ŋmá ɛgiyí obugā kú ācɛ kú Ujaákan, anɔ́ɔ ɛ́ɛ le tá Umɔséra á. Ó ka Árɔ̄ni ɔ́ɔ gekwú abɔ́ɔ, anɔ́ɔ é le ɔ́ nyi á. Ɛlísaa ɔyí nū kwú pīya ɔ̄cogwɛ́ɛya kwɛyí nū

⁷Ó ka ɛ́ɛ ŋmá abɔ́ɔ le tá Ugudugɔ́da, klla ŋmá abɔ́ɔ le tá Ujɔtubáta, ajɛ nōo lɛ áyɔ́kpá alɛwa ā.

⁸Ó klla da uwá ka oŋmá eko ɔ́ɔmā, Óndú ā ɔ́ɔ le ayí kú Ulífāyi fu, cɛ́ɛ́ kéē leyīkwu ikpati kú ɛka kú Óndú ā, cɛ́ɛ́ kéē klla cɛ̄ ɔ̄ ɛ̄hɔ̄ kú úklɔ́ ācogwɛ́ɛya, kéē klla bī iyē kú Óndú ā le hɔ́hā ce ācɛ

⁹Ó ka ɔdā nōo yá ɛ́ɛ́ nɛ̄ ayí kú Ulífāyi í lɛ ɔdā úgwū dúúmā ipú ayínɛ́ uwā ohile ā ŋ́ mā yɔ̄ abɔ́ɔ á. Ó ka úgwū kú uwā ɔ́ɔ wɛ, ɛya nɛ̄ ɛ́ɛ gē gwō lɛ Óndú ā, ɛ́gɛ́nɛ̄ Óndú ā ɔ́ɔ ce okónu lɛ ā.)

¹⁰Umósīsi ka anúɔ klá ɛyí ɛfu ɔ́ɔmā ɛ̄cī ofɛpa, ɛ́gɛ́nɛ̄ anúɔ tɛtɛ klá eko kú ákú aflɛ́yí ā. Ó da uwá ka Óndú ā ɔ́ɔ le ahɔ̄ jē lɛ anúɔ igbɔhá kpɔ́, anɔ́ɔ ó kpó uwā yíífi gɛ ŋ́ má

¹¹Ó ka Óndú ā ɔ́ɔ da anúɔ ka anúɔ gaá lɛ uwá kpó trɛ̄yí, cɛ́ɛ́ kéē nyɔ̄ í mīyɛ ajɛ nɛ̄ ɔ́ɔ cokónu ō je lɛ ádáádā uwā ā.

¹²Umósīsi da uwá nēe wɛ ācɛ Ísrɛ̄lu ā, kéē jāhɔ̄, cɛ́ɛ́ kéē pó ɔdā nɛ̄ Óndú ā tíne ŋmá ɛgiyí uwā ā. Ó da uwá ka ɛ́ɛ gbā Óndú ā ɛ̄gbā kéē klla yá odúúdú aɔ́dā nōó da uwá ā. Ó ka ɛ́ɛ yíhɔtū tá ɔ̄, cɛ́ɛ́ kéē klla cɛ̄ ɔ̄ ɛhɔ̄ ŋmá ipú ɔtū kú uwā.

¹³Ó da uwá kéē lɛyítáajɛ lɛ odúúdú aíne kú Óndú ā, nɛ̄ anúɔ, nōo wɛ Umósīsi ā ɔ́ɔ yɔ̄ gē je lɛ uwá ɛ̄cī ɔ́ɔmā, cɛ́ɛ́ kóō le lɔhi lɛ uwá.

¹⁴Ó da uwá ka ɔkpáncō nōo licō fíyɛ́ dúú ā wɛ ákú Óndú ā. Ó ka ɛcɛ mɛ́mla ɛjɛ̄ɛ̄jī aɔ́dā dóódu nēe bá ipú nū ā kē wɛ ákú Óndú ā kpɛ́mm.

¹⁵Ó klla da uwá ka amáŋ, ihɔtū nɛ̄ Óndú ā ɔ́ɔ lɛ lɛ ádáádā uwā ā, ɔ́ɔ lɔfú nɛ̄hi, nɛ̄ ɔ́ɔ yá kóō lɛ uwá fu, ikɔkɔ ācɛ ɔhá dúúmā ipú ɛcɛ ā. Ó da uwá ka uwá ɛ́ɛ kē wɛ ācɛ kú ɔlɛ́ nū nɛ̄ ɔ́ɔ fu ā á.

¹⁶Umósīsi klla da uwá ka oŋmá eko ɔ́ɔmā gɔbū ā, kéē lɛyítáajɛ lɛ Óndú ā, nōo wɛ Ɔwɔicō kú uwā ā. Kéē híī yá ikpɛ̄yí olɔfú gɛ ŋ́.

¹⁷Ó ka ohígbū ka Óndú ā, nōo wɛ Ɔwɔicō kú uwā ā, ɔ́ɔ wɛ Ɔwɔicō kú aɔ́wɔ dóódu á. Ó ka anú ɔ́ɔ kē wɛ Óndú kú aɔ́dā ō lɔfú dóódu á. Ó ka Óndú ɔ́ɔ lɔfú nɛ̄hi, ka ācɛ ɔ́ɔ cíkā ō yúúfi nū. Ó klla ka ɔ́ gē má eyīgoo ɛ́ɛ́ nɛ̄ ɔ́ gē mīyɛ omíci ŋmá ɛgiyí ɔ̄cɛ ŋ́.

¹⁸Ó ka ɔ́ɔ kē ī má ka ɛ́ɛ yá ucē okpaakpa tá ayókwū mɛ́mla anyōkwū. Ó ka ɔ́ɔ gē yíhɔtū tá ācɛ kú aéwɔhá nēe lā ajɛ kú uwá ā, klla ī jē ɔdōlé mɛ́mla īlī lɛ uwá.

¹⁹Ó da uwá ka ohígbū ɔ́ɔmā ā, ɛ́ɛ yíhɔtū tá aúgbɔga. Ohígbū ka uwá abɔ̄yī uwā tɛtɛ wɛ aúgbɔga ipú ajɛ kú Íjīpiti eko éyi dúú.

²⁰Umósīsi klla da uwá kéē lɛyítáajɛ lɛ Óndú ā, nōo wɛ Ɔwɔicō kú uwā ā, kéē gbā anú ōfōōfūnū ɛ̄gbā. Ó da uwá kéē cɛ̄ɛ̄lā kú nū, cɛ́ɛ́ kéē bī iyē kú nū ōfōōfūnū le cokónu.

²¹Ó da uwá kéē cɛ̄tra Óndú ā. Ka anú ɔ́ɔ wɛ Ɔwɔicō kú uwā á. Ó klla da uwá ka ɛ́ɛ bī eyī kú uwā má ɔdā nɛ̄hi mɛ́mla ɔdā ōhídáagó nōó yá lɛ uwá ā.

²²Ó da uwá ka eko nɛ̄ ádáádā uwā ɛ́ɛ ga Íjīpiti ā, ɛ́ɛ wɛ ācɛ ofɛtá ce igwó ōfōōfūnū, amáŋ, eko ɔ́ɔmā ā, Óndú ā ɔ́ɔ cɛ̄ lɛ uwá lɛ ma nyīla bɛ̄ɛka aínyílɔ́wɔ kú ɔkpáncō ā.