Read idoma OBLATŪKÍNE 11 Bible Online

OBLATŪKÍNE 11 - idoma bible

OBLATŪKÍNE 11

¹Umósīsi yɔ̄ ī kɛlā gɔbū kpɔ́ kéē yíhɔtū tá Óndú ā, nōo wɛ Ɔwɔicō kú uwā eko dóódu, cɛ́ɛ́ kéē lɛ odúúdú aíne kú nū tū.

²Ó da uwá kéē blakwu ukɔ́ nɛ̄ Óndú ā ɔ́ɔ tū uwā eko ɔ́ɔmā ā. Ó koó wɛ ayípɛ̄ ɔlɛ́ uwā nēé tūkɔ́ ā ŋ́, ka uwá abɔ̄yī uwā nɛ̄. Ó klla da uwá kéē má ɛ́gɛ́nɛ̄ ó ma ɔfú nɛ̄hi kú nū fú ā.

³Ó da uwá ka ɛ́ɛ klla má úklɔ́ ōhídáagó kú nū. Ka ɛ́ɛ má ɔdā nɛ̄ ɔ́ɔ yá ɔcɛ́ kú Íjīpiti, mɛ́mla odúúdú ajɛ kú nū ā.

⁴Ó ka ɛ́ɛ má ɛ́gɛ́nɛ̄ Óndú ā kpó aícɔ́ɔja kú Íjīpiti, mɛ́mla aɔ́nya ɛfú, mɛ́mla aúgbɔ́ɔnya o kpɛ́fú kú uwā yíífi ipú ísu igwɛ̄bɛ́ ā, eko nɛ̄ ɛ́ɛ bá ī nā uwā inya ā.

⁵Ó klla da uwá ka ɛ́ɛ jé ɔdā nɛ̄ Óndú ā ɔ́ɔ yá lɛ uwá ipú ígbíli gbɔbū nɛ̄ ɛ́ɛ wā ɛga nɛ̄ ɛ́ɛ bá eko ɔ́ɔmā ā.

⁶Umósīsi klla da uwá kéē blakwu ɔdā nɛ̄ Óndú ā ɔ́ɔ yá Udátān mɛ́mla Abíram, ayí kú Ɛlíyābu kú ipɔ́ɔma kú Urúbɛ̄n ā. Ó ka ipéyī odúúdú uwā, ajɛ ɔ́ɔ le okónu nwūla kwú uwā mɛ́mla aíkonó, aɔ́fiyɛ, aɛ́bɛ́, aáklɔ̄kpɛ mɛ́mla agbénú kú uwā ú kpó mlɛ

⁷Ó ka ɛ́ɛ má ɔdā nɛ̄hi nɛ̄ Óndú ā yá ā.

⁸Ó da uwá kéē lɛyítáajɛ lɛ odúúdú aínɛ nɛ̄ anúɔ je lɛ uwá ícíícɛ ɔ́ɔmā ā. Cɛ́ɛ́ kéē géē lɔfú bēhé ísu ā, gāá mīyɛ ajɛ nēé gáā bēhé ga ɔɔ́ ā.

⁹Cɛ́ɛ́ kú ɛ́ɛ yēeyī ligbó ipú ajɛ olɔhi nɛ̄ Óndú ā cokónu kóō je lɛ ádáádā uwā mɛ́mla ayí uwā ā.

¹⁰Ó da uwá ka ajɛ nɛ̄ ɛ́ɛ gáā ga ipú nú ā, ɔ́ lɛ̄bɛ̄ɛka ajɛ kú Íjīpiti ɛga nɛ̄ ɛ́ɛ ŋmá ā ŋ́. Ó ka Íjīpiti ɔ́ɔ wɛ ɛga nɛ̄ ɛ́ɛ le ɔdɛ̄hɔ̄ nyi nɛ̄ ɛ́ɛ klla gē nyɔ̄ ī móōwē kpó éŋkpɔ̄ tū ɔ̄.

¹¹Ó ka amáŋ ajɛ nɛ̄ ɛ́ɛ gáā ga ɔ́ ā wɛ ajɛ kú aɛ́fu mɛ́mla ɔpɛ́. Ajɛ nɛ̄ ɔwɔ gē yā anú eko dóódu ā.

¹²Ó ka Óndú ā, nōo wɛ Ɔwɔicō kú uwā ā, ɔ́ɔ gē leyīkwu ajɛ ā, klla í gbō ɔ̄ abɔ̄yī nū oŋmá iháyí ga iháyí á.

¹³Ohígbū, ɔ́ɔ́mā ó da uwá kéē lɛyítáajɛ lɛ aíne nɛ̄ anúɔ je lɛ uwá ɛ̄cī ɔ́ɔmā ā. Ó klla da uwá kéē yíhɔtū tá Óndú ā, nɛ̄ ɔ́ɔ wɛ Ɔwɔicō kú uwā ā. Ka ɛ́ɛ gbā ɔ̄ ɛ̄gbā mɛ́mla odúúdú ɔtū kú uwā.

¹⁴Ó da uwá ka ɔ́dāŋ ka ɛ́ɛ le yá lɛ ā, Óndú ā ɔ́ɔ géē tū ɔwɔ kóō yā tū ɔdɛ̄hɔ̄ kú uwā eko nōo cɛgbá āa. Ɔwɔ aflɛ́yí mɛ́mla ɔwɔ kú igbīhāajɛ ā. Cɛ́ɛ́ ká ɛ́ɛ géē lɛ īkpɔ̄dɛ̄hɔ̄, ejé mɛ́mla anɔ̄ kú ɔcí nēé hī ka ólīifu ā.

¹⁵Ó ka ácí nɛ̄ aɔ́dāajɛ kú uwā ɛ́ɛ í lé ā ɔ́ɔ í kpɔ nɛ̄hi. Ó da uwá ka ɛ́ɛ í lɛ ɔdōlé dóódu nɛ̄ ɛ́ɛ dɔɔ̄kā ā.

¹⁶Ó ka ɛ́ɛ híī nyíleyī ŋmá ɛgiyí Óndú ā, oŋmá lɛ ɛ̄gbā ō gbā aɔ́wɔ ɔhá ŋ́.

¹⁷Ó ka ɔ́dāŋ ka ɛ́ɛ le yá lɛ ā, Óndú ā ɔ́ɔ géē cɔ̄nū mla uwá nɛ̄hi. Cɛ́ɛ́ ɔ́ɔ gáā cɛ̄ lɛ ɔwɔ yá ŋ́, cɛ́ɛ́ ajɛ kwú ŋmó nɛ̄ ɔdɛ̄hɔ̄ kú uwā í gáā yá gla gɛ ŋ́. Ó ka ɛ́ɛ géē pɛ́ kwú fíyaa, ipú ajɛ olɔhi nōó jē lɛ uwá ā.

¹⁸Ó da uwá kéē blakwu aíne ā ipú ɔtū kú uwā. Ó ka ɛ́ɛ lɛ aíne ā gbō bá ácábɔ̄ kú uwā mɛ́mla údɔ̄bū kú uwā, cɛ́ɛ́ kóō yɔ̄ ī blatū uwá eko dóódu.

¹⁹Ó ka ɛ́ɛ nwū ayí uwā aíne ā ā. Ó ka ɛ́ɛ kɛlā nū eko dóódu nɛ̄ ɛ́ɛ cīce ɔlɛ́ uwā, ámāŋ ka eko nɛ̄ ɛ́ɛ bá ī yāwu ɔwɛ, mɛ́mla eko nɛ̄ ɛ́ɛ gwutá yɔ̄ ī mlɛ́nyɔ́ ámāŋ ka eko nɛ̄ ɛ́ɛ yɔ̄ ī yúklɔ́.

²⁰Ó da uwá kéē lɛ uwá tá bá ɔcókónpinu kú ɔlɛ́ uwā.

²¹Cɛ́ɛ́ kú uwá mɛ́mla ayí uwā kéē yēeyī līgbō ipú ajɛ nɛ̄ Óndú ā, nōo wɛ Ɔwɔicō kú uwā ā, ɔ́ɔ cokónu ka anúɔ ī je lɛ ádáádā uwā ā. Ó ka ɛ́ɛ géē lā abɔ́ɔ piyóó, eko dúú nɛ̄ ɛcɛ í yɔ̄ í kwu lɛ ā.

²²Umósīsi da uwá kéē lɛyítáajɛ lɛ odúúdú aíne nɛ̄ anúɔ jē lɛ uwá nyā ā. Ó da uwá kéē yíihɔtū tá Óndú ā, nōo wɛ Ɔwɔicō kú uwā. Ó klla da uwá kéē yá ɔdā dóódu nɛ̄ ɛ́ɛ jé ká ɔ́ɔ lɔhi ā.

²³Cɛ́ɛ́, Óndú ɔ́ɔ géē nū aéwo dóódu nēe bá iyɔ̄bū uwā ā ŋmá iyɔ̄bū uwā, abɔ̄ ɛ́ɛ bá ī wā ā. Cɛ́ɛ́ ká ɛ́ɛ mīyɛ ajɛ kú aéwo nōo nwuné klla lɔfú nɛ̄hi fíyɛ́ uwā nɛ̄hi.

²⁴Ó klla da uwá ka ajɛ ɛga dóódu nɛ̄ ɛ́ɛ lɛ ikpó da ɔ́ ā, géē je pīya ákú uwā. Ó ka ajɛ kú uwā ɔ́ɔ géē gbɔɔ́ ŋmá ígbíli ɛháajɛ ā jāā ga ɛfu kú Ulɛ́bānɔn ɛhíícō ā, mɛ́mla oŋmá Ísú kú Uyúfrētīisi ɛnɔ̄ɔ̄cī ā, ga ísu kū Umedítāráníya ɛnɔ̄ɔ̄nɛ̄ ā.

²⁵Ó da uwá ka ɛga dúúmā nɛ̄ ɛ́ɛ í nyɔ̄ ipú ajɛ ɔ́ɔmā, Óndú ā ɔ́ɔ géē yá kú ācɛ ā kéē yúúfi uwā, ɛ́gɛ́nɛ̄ ó cokónu lɛ ā. Ɔ̄cɛ dóódu í gáā fū uwā iyē glá ŋ́.

²⁶Umósīsi ka ícíícɛ ɔ́ɔmā, ka anúɔ kwú ɔhā mɛ́mla okónu oōtá ú tá íyɔ̄bū uwā ɛɛ́.

²⁷Ó ka ɛ́ɛ í hɔ́hā ce uwá ɔ́dāŋ ka ɛ́ɛ lɛyítáajɛ lɛ aíne kú Óndú ā, nōo wɛ Ɔwɔicō kú uwā ā, nɛ̄ anúɔ yɔ̄ gē je lɛ uwá ícíícɛ ɔ́ɔmā ā.

²⁸Ó da uwá ka ɛ́ɛ géē tókónu lɛ uwá ɔ́dāŋ ka ɛ́ɛ kwú eyī pīya ŋmá aíne kú Óndú ā nɛ̄ ɛ́ɛ gbɔɔ́ ō gbā aɔ́wɔ ɔhá nɛ̄ ɛ́ɛ jé jééjéē ŋ́ ɛ̄gbā.

²⁹Ó ka eko nɛ̄ Óndú ā, ɔ́ɔ lɛ uwá kpó wā ipú ajɛ nɛ̄ ɛ́ɛ gáā mīyɛ ā. Ó ka ɛ́ɛ géē ka tɛ́ɛcɛ ɛ́gɛ́nɛ̄ Óndú ā ɔ́ɔ géē hɔ́hā ce uwá lɛ ŋmá ɛyí ɛfu kú Ugɛ́rīsim, mɛ́mla ɛ́gɛ́nɛ̄ ɔ́ɔ géē yá uwā italā lɛ ŋmá ɛyí ɛfu kú Éba ā.

³⁰Ɛfu ɛpa nēe bá ɔ́ɔmā, bá ɛnɔ̄ɔ̄nɛ̄ kú Ísu kú Ujɔ́dan ipú ajɛ kú ācɛ Ukénan, nēe lā ɔpɛ́ kú Ujɔ́dan ā. É bá ɛnɔ̄ɔ̄nɛ̄, klá ligbó ŋmá aɔ́cí nēé hī ka óoku kú Umɔ́re nōo kwu Ugílgal ajaajɛ ā.

³¹Ó da uwá ka ɛ́ɛ gáā bēhé isu kú Ujɔ́dan ga ipú ajɛ nɛ̄ Óndú ā, nōo wɛ Ɔwɔicō kú uwā ɔ́ɔ yɔ̄ ī je lɛ uwá ā ɛɛ́. Ó ka eko nɛ̄ ɛ́ɛ mīyɛ ajɛ ā, má lā anú,

³²ɛ́ɛ má ka ɛ́ɛ lɛlá kwu ɔ́ kéē lɛ odúúdu aíne, nɛ̄ amíy ɔ yɔ̄ gē je lɛ uwá ā tū.