Read idoma OBLATŪKÍNE 12 Bible Online

OBLATŪKÍNE 12 - idoma bible

OBLATŪKÍNE 12

¹Umósīsi klla yɔ̄ gē kɛlā gɔbū kpɔ́ ka aíne nɛ̄ ɛ́ɛ géē le tū klla géē bī yúklɔ́ ipú ajɛ nɛ̄ Óndú ā, nōo wɛ Ɔwɔicō kú ádáádā uwā ɔ́ɔ je lɛ uwá kéē lā anú piyóó ipú ɛcɛ ā bá yɔ̄ á.

²Ó da uwá kéē lɛ ɛga dóódu nɛ̄ ācɛ gē gbā aɔ́wɔ ɛ̄gbā ɛyí ɛfu olicō, aɛ́fu nɛ̄ŋcɛ́ mɛ́mla útū ɔcí ōlū jugwu dóódu kpó ca tāajɛ kpɛ́mm.

³Ó da uwá kéē lɛ ede kú uwá kpó ca tāajɛ, cɛ́ɛ́ kéē klla lɛ ɛcɔ̄ ō kwaajɛ kú ɛcí kú uwā gba ŋinii. Ó da uwá kéē kwú ojibó kú Ássɛ̄ra ā ú yɔlá, cɛ́ɛ́ kú ācɛ dúúmā kóō híī gbā ɔ̄ ɛ̄gbā gbóógbóo gɛ ŋ́.

⁴Ó da uwá kéē híī gbā Óndú ā, nōo wɛ Ɔwɔicō kú uwā ā, ɛ̄gbā ɔwɛ nɛ̄ ācɛ ā ɔ́ɔ ī gbā aɔ́wɔ kú uwā ɛ̄gbā ā ŋ́.

⁵Ó da uwá ka Óndú ā ɔ́ɔ géē fu ɛga nɛ̄ ācɛ í gbɔ̄ ɔ̄ ɛ̄gbā ā lɛ uwá ipú odúúdú ajɛ nɛ̄ aípɔ́ɔma kú uwā í lā ā.

⁶Ó ka ɛ́ɛ géē gwɛ́ɛya o yɔlá dúúdú mɛ́mla ɛya ɔhá dóódu lɛ ɔ́, ɛ̄gbā kú éyi ŋmá ipú igwó kú uwā, mɛ́mla ɛ̄gbā kú okónu nɛ̄ ɛ́ɛ gē ce ā mɛ́mla ɛ̄gbā oŋmá ɔtū éékpó mɛ́mla ákú ayí aflɛ́yí kú aɔ́dāajɛ kú uwā lɛ ɔ́.

⁷Ó ka uwá mɛ́mla ācɛ ɔlɛ́ uwā géē lé klla í gwá klla í jɔ́ɔnyɛ kú ɔdā olɔhi nɛ̄ ɛ́ɛ yúklɔ́ nū ā, iyɔ̄bū Óndú ā, nōo wɛ Ɔwɔicō nōo hɛ́ ɔhā ce uwá ā.

⁸Ó klla da uwá ka eko nɛ̄ eko ɔ́ɔmā gā, ɛ́ɛ híī yá ɛ́gɛ́nɛ̄ ɛ́ɛ tɛtɛ gē yá ā ŋ́. Ó ka o gbɔbū lɛ eko ɔ́ɔmā, ɛ́ɛ húmāyī gbā Óndú, nōo wɛ Ɔwɔicō ā, ɛ̄gbā ɔwɛ nōo he uwá ɔtū ā.

⁹Ohígbū ka ɛ́ɛ wā ipú ajɛ nɛ̄ Óndú ā, nōo wɛ Ɔwɔicō kú uwā ā, gáā jē lɛ uwá kéē lā ɛbɔ́ ā ɛ́ɛ́ ŋ́.

¹⁰Ó da uwá eko nɛ̄ ɛ́ɛ le bēhé isu kú Ujɔ́dan ā, Óndú ā, ɔ́ɔ géē je ajɛ ā lɛ uwá kéē lā anú. Koó géē gbō uwā ŋmá ɛgiyí aólɛlā kú uwā nēe bá ɛga dóódú ā, cɛ́ɛ́ ó kwú omlɛ́nyɔ́ ú lɛ uwá, kéē má lā ɛbɔ́.

¹¹Cɛ́ɛ́ ɛ́ɛ lɛ tá ɛga ékpónú nɛ̄ Óndú ā, nōo wɛ Ɔwɔicō kú uwā ā, ɔ́ɔ géē fu kéē gbā ɔ̄ ɛ̄gbā. Ka abɔ́ɔ nɛ̄ ɛ́ɛ géē kpó odúúdú iyó kú ɛya nɛ̄ anúɔ da uwá ā nyɔ̄ á. Ɛya kú uwā nɛ̄ ɛ́ɛ géē kpó yɔlá dúúdú, éyi ŋmá ipú igwó kú uwā mɛ́mla aɔ́dā ɛhi nɛ̄ ɛ́ɛ cokónu kú nū lɛ Óndú ā.

¹²Ó da uwá kéē gwéeyē abɔ́ɔ mɛ́mla ayí uwā mɛ́mla ācotɛ̄hɔ̄ kú uwā, mɛ́mla ayí kú Ulífāyi nēe lā mɛ́mla uwá ā. Ó ka ɛ́ɛ bla ka ayí kú Ulífāyi í gáā lɛ ukpɛ̄ kú ajɛ dúúmā ipú uwā ŋ́.

¹³Ó da uwá ka ɛ́ɛ híī gwɛ́ɛya kú uwā, ɛga dóódu nōo he uwá ɔtū ā ŋ́.

¹⁴Umósīsi klla da uwá ka ɛga ékpónú nɛ̄ Óndú ā, nōo wɛ Ɔwɔicō kú uwā ā, ɔ́ɔ fu ipú ajɛ kú ipɔ́ɔmā éyi ā ōfōōfūnū nɛ̄ ɛ́ɛ géē kpó aɔ́dā kú ɛya ā gwɛ́ɛya klla í yá aɔ́dā ɔhá nɛ̄ anúɔ da uwá ā.

¹⁵Ó da uwá ka amáŋ, ɛ́ɛ lɔfú ŋmó ɛbɛ́ kú uwā, kéē lé ɛga dóódu nōo he uwá ɔtū glá. Ó ka ɛ́ɛ lɔfú lé áluka kú aɔ́dāajɛ nɛ̄ Óndú ā je lɛ uwá ā. Kwu ācɛ otelihɔ mɛ́mla ācɛ nēé tēlihɔ ŋ́, ɛ́gɛ́nɛ̄ ɛ́ɛ lɔfú lé ɛbɛ́ kú ɛbɛ́ īkpɛ̄ɛnū ámāŋ ka ulúu ā.

¹⁶Ó ka ɛ́ɛ híī lé oyī kú aɛ́bɛ́ ā ŋ́, amáŋ ka ɛ́ɛ lɛ oyī ā pīya bónū ɛ́gɛ́nɛ̄ é gē pīya éŋkpɔ̄ bónū klá ajɛ ā.

¹⁷Ó klla da uwá ka ɛ́ɛ híī lé ɔdā dóódu nɛ̄ ɛ́ɛ le gwɛ́ɛya lɛ Óndú ā ɛga nɛ̄ ɛ́ɛ lā ŋ́. Ó ka ɔ́ɔ kōō wɛ ɛ̄gbā kú éyi ŋmá ipú igwó, ákú ikpɔ̄dɛ̄hɔ̄, ejé, anɔ̄ kú ɔcí nēé hī ka ólīifu ā, ayí aflɛ́yí kú ɛna ámāŋ álá, kwu ɛ̄gbā ɔhá dóódu nɛ̄ ɛ́ɛ cokónu nū lɛ Ɔwɔicō ā, ɛ́ɛ híī lé ɛga nēé lā ā ŋ́.

¹⁸Umósīsi klla da uwá kpɔ́ ka uwá mɛ́mla ayí uwā mɛ́mla ācotɛ̄hɔ̄ kú uwā, mɛ́mla ayí kú Ulífāyi nēe lā mɛ́mla uwá ā, géē lé aɔ́dā ā ɛga ékpónú nɛ̄ Óndú ā, nōo wɛ Ɔwɔicō kú uwā ā, fu ā. Ó ka ɛ́ɛ cíkā ō gwéeyē ohígbū odúúdú ɔdā nɛ̄ ɛ́ɛ yá klla lé abɔ́ɔ ā.

¹⁹Ó da uwá kéē leyī kwɛɛcɛ cɛ́ɛ́ kéē je mlanyī ācɛ Ulífāyi nēe lā ajɛ kú uwā ā ŋ́.

²⁰Ó ka eko nɛ̄ Óndú ā ɔ́ɔ lɛ ajɛ cē tū ajɛ kú uwā lɛ uwá ɛ́gɛ́nɛ̄ ó cokónu lɛ ā, ó ka ɛ́ɛ lɔfú lé ɛbɛ́ eko dúú nōo he uwá ɔtū.

²¹Ó klla da uwá ka ɔ́dāŋ ka ɛga nēé gbā Óndú ā ɛ̄gbā ā lɛ igbó nɛɛ, eko dúú nɛ̄ ɔ́ɔ he uwá ɔtū ā, ɛ́ɛ lɛ álá ámāŋ ka ɛna nɛ̄ Óndú ā ɔ́ɔ kpó lɛ uwá ā ŋmó, cɛ́ɛ́ ka ɛ́ɛ lé, ɛ́gɛ́nɛ̄ anúɔ da uwá ā.

²²Ó ka ɔ̄cɛ dóódu nɛ̄ ɔ́ɔ le tēelihɔ nááná mɛ́mla ɔ̄cɛ nɛ̄ ɔ́ɔ kē le yēŋēē, ɔ́ɔ lɔfú lé ɛbɛ́ ā, ɛ́gɛ́nɛ̄ ɛ́ɛ gē lé ɛbɛ́ īkpɛ̄ɛnū ámāŋ ulúu ā.

²³Ó tū uwā ukɔ́ ka ɛ́ɛ híī lé ɛbɛ́ ā tooyī tooyī ŋ́, ohígbū ka oyēeyī kú ɔdā dóódu yɔ̄ ipú oyī ā. Ó da uwá ka ɛ́ɛ híīī lé oyēeyī kú ɛbɛ́ mɛ́mla ɛbɛ́ ā ŋ́.

²⁴Ó da uwá ka ɛ́ɛ híī lɛ oyī ā he ɔdōlé ŋ́. Ikɔkɔ ɔ́ɔmā ɛ́ɛ lɛ ɔ́ pīya klá ajɛ ɛ́gɛ́nɛ̄ ɛ́ɛ gē cē éŋkpɔ̄ bónū klá ajɛ ā.

²⁵Ó da uwá ka ɔ́dāŋ ka ɛ́ɛ lɛyítáajɛ lɛ ɛlā ā, ɔdā dóódu ɔ́ɔ géē yɛ lɔhi ipú ajɛ ā lɛ uwá mɛ́mla ayí uwā.

²⁶Ó klla da uwá ka ɛga ékpónú nɛ̄ ɛ́ɛ fu kú ɛ̄gbā ō gbā Óndú ā, nɛ̄ ɛ́ɛ géē bī ɔdā kú ɛ̄gbā mɛ́mla iyó kú ɛya ká uwā dóódu nyɔ̄ á.

²⁷Ó ka odúúdú ɛya o yɔlá dúúdú ā, ɛ́ɛ gwó abɔ́ɔ. Ó ka ɛ́ɛ gwɛ́ɛ́ya nɛ̄ ɛ́ɛ géē lé ɛbɛ́ kú nū klla géē pīya oyī kú nū bá ɛyí ede ā.

²⁸Ó da uwá kéē bī ɛjɛ̄ɛ̄jī aɔ́dā nɛ̄ anúɔ ka lɛ uwá ā yúklɔ́, cɛ́ɛ́ kú odúúdú aɔ́dā dóódu nɛ̄ ɛ́ɛ í yá ā kóō le lɔhi lɛ uwá mɛ́mla ayááyí uwā opiyóó ipú ɛcɛ ā. Ohígbū ka ɛ́ɛ yɔ̄ ī yá ɔdā nɛ̄ ɔ́ɔ lɛ kpaakpa mɛ́mla ɔdā nōo he Ɔwɔicō kú uwā ɔtū ā.

²⁹Ó da uwá ka Óndú ā, nōo wɛ Ɔwɔicō kú uwā ɔ́ɔ géē kpó aéwo ā yíífi, abɔ̄ ɛ́ɛ géē nyɔ̄ í kpɛ́fú tú uwá ā, cɛ́ɛ́ kú ɛ́ɛ mīyɛ ajɛ kú uwā kú ɛ́ɛ má lā anú.

³⁰Umósīsi da uwá ka eko nɛ̄ Óndú ā lɛ aéwo ā kpó yíífi, ka ɛ́ɛ híī yɛce ɛcí nɛ̄ ɛ́ɛ gē pā ā ŋ́. Ohígbū ka ɔ́ɔmā ɔ́ɔ géē wɛ ikwū lɛ uwá. Ó ka ɛ́ɛ híī dɔɔ̄kā ɔwɛ nɛ̄ ācɛ ɔ́ɔmā ɛ́ɛ gē gbā aɔ́wɔ kú uwā ɛ̄gbā ā, cɛ́ɛ́ kú ɛ́ɛ gbla uwá yá ŋ́.

³¹Ó da uwá kéē híī gbā Óndú ā, nōo wɛ Ɔwɔicō kú uwā ā, ɛ̄gbā, ɔwɛ kú ācɛ ɔ́ɔmā ŋ́. Ohígbū ka ɛ́ɛ gē yá aɔ́dā ɛbí alɛwa nōó he Óndú ā ɔtū ŋ́. Ó ka ɛ́ɛ kōō ī kpó ayípɛ̄ ɔlɛ́ uwā gwɛ́ɛya o yɔlá dúúdú ipú ɔlá lɛ aɔ́wɔ kú uwā.

³²Umósīsi da uwá kéē bī odúúdú aɔ́dā nɛ̄ anúɔ ka lɛ uwá ā le yúklɔ́. Ó ka ɛ́ɛ híī je ɔdā dóódu kú abɔ̄yī uwā tá ɔ̄ ŋ́. Ɛ́ɛ kē híī je ɔdā dúúmā ŋmá anú.