Read idoma OBLATŪKÍNE 13 Bible Online

OBLATŪKÍNE 13 - idoma bible

OBLATŪKÍNE 13

¹Umósīsi da uwá kpɔ́ ka ɔ̄cɛ í jé ŋ́ ɔ̄comɛ́ɛbɛ ámāŋ ka ɔ̄cɛ o cɔ̄ɔwɔ kú ɔ̄na nōo ka anúɔ lɛ ijáalí kú ɔdā ōhídáagó éyi nōo gáā yá, ɔ́ɔ lɔfú hɛ́bɛ̄ɛcɛ ipú uwā.

²Ó ka ɛbɛ ámāŋ ɔ̄na kú nū ā ɔ́ɔ lɔfú cɛ̄. Amáŋ ɔ́ɔ kē lɔfú da uwá kéē wā í gbā aɔ́wɔ ɔhá nɛ̄ ɛ́ɛ gbā ɛ̄gbā jéjée ɛ́ɛ́ ŋ́.

³Ó da uwá ka ɛ́ɛ híī jahɔ̄ lɛ ɔ̄comɛ́ɛbɛ ámāŋ ɔ̄cɛ onɔ̄ɔ̄na ɔ́ɔmā ŋ́. Ohígbū ka Óndú ā, nōo wɛ Ɔwɔicō kú uwá ɔ́ɔ yɔ̄ gē bī ɔ̄cɛ ɛ́gɔ́ɔmā le jé uwā má cɛ́ɛ́ kóō má, ɔ́dāŋ ka ɛ́ɛ piyɔtū anúɔ nōo wɛ Óndú ā, nōo wɛ Ɔwɔicō kú uwā ŋmá ipú odúúdú ɔtū kú uwā.

⁴Ó da uwá kéē yɛce Óndú ā, nōo wɛ Ɔwɔicō kú uwā ā. Ó ka ɛ́ɛ lɛ ojīlīmā ce ɔ́, ká ɛ̄ɛ klla lɛ aíne kú nū tū. Ó ka ɛ́ɛ gbā ɔ̄ ɛ̄gbā, kú ɛ́ɛ klla cɛ̄ɛla nū.

⁵Umósīsi da uwá kpɔ́ ka ɔ̄comɛ́ɛbɛ, ámāŋ ɔ̄cɛ o nɔ̄ɔ̄na dúúmā nōo gē da uwá kéē yá ikpɛ̄yí olɔfú tá Óndú ā, nɛ̄ ɔ́ɔ kpó uwā bɛ̄cɛ ŋmá Íjīpiti nēé wɛ aɔ́fiyɛ ā, wɛ̄ɛcɛ ā, ka ɛ́ɛ lɛ ɔ̄cɛ ā ŋmó. Ó ka ɔ̄cɛ ɔ́ɔmā ɔ́ɔ wɛ ɔ̄cɛ obɔ̄bí nɛ̄ ɔ gē tíne ō kpó uwā nyíleyī ŋmá oyēeyī nɛ̄ Óndú ā da uwá kéē lā ā. Ó klla ka ɛ́ɛ lɛ ɔ̄cɛ ɔ́ɔmā ŋmó, cɛ́ɛ́ ká ɛ́ɛ lɛ ɔdōbɔ̄bí nū bɛ̄cɛ ŋmá ipú uwā.

⁶Ó ka ɔ́dāŋ ka ɔ́ɔ kōō wɛ ɔyínɛ́ uwā nɔ̄nyilɔ, ámāŋ ka ɔyí uwā nɔ̄nyā, ámāŋ ɔnyā uwā nōo he uwá ɔtū, ámāŋ oklóbīya nōo kwu uwá ajaajɛ, wā í tá uwá ɛkwūbá le da uwá ka ɛ́ɛ wā ká aá gbā aɔ́wɔ ɔhá ɛ̄gbā, aɔ́wɔ nɛ̄ ádáádā uwā í gbā uwā jéjée ɛ́ɛ́ ŋ́ mā,

⁷ó kōo wɛ aɔ́wɔ kú ācɛ nēe lā kwu uwá ajaajɛ ámāŋ ka aɔ́wɔ kú ācɛ nēe lā ɛga oligbó ā.

⁸Ó da uwá ka ɛ́ɛ híī jāhɔ̄ lɛ uwá ɛ́ɛ́, nɛ̄ ɛ́ɛ kōō ī pó ɛlā kú uwā ŋ́. Ó ka ɛ́ɛ híī méyīnyinyi kú ɔ̄cɛ ɔ́ɔmā ŋ́, ɛ́ɛ́ nɛ̄ ɛ́ɛ gē je ɔ́ tayínū ŋ́.

⁹Ó da uwá kéē lɛ ɔ́ ŋmó. Ka ɛ́ɛ wɛ ācɛ aflɛ́yí nēe géē tá ɛcō aflɛ́yí fiyɛ̄ ɔ̄, ɛ́ɛ́ nɛ̄ ācɛ ohile géē tá ɛcɔ̄ klá anú dúú á.

¹⁰Ó ka ɛ́ɛ lɛ ɛcɔ̄ tá fīyɛ̄ ɔ̄ ká ɛ́ɛ lɛ ɔ́ ŋmó. Ohígbū ka ɛ́ɛ dɔɔ̄kā ō lɛ uwá bī nyíleyī ŋmá ɛgiyí Óndú ā, nōo wɛ Ɔwɔicō kú uwā ā, nɛ̄ ɔ́ɔ kpó uwā bɛ̄cɛ ŋmá Íjīpiti, ajɛ nēé wɛ aɔ́fiyɛ ā.

¹¹Cɛ́ɛ́ kú odúúdú ācɛ kú Ísrɛ̄lu ā kéē lɛ ɔdā nɛ̄ ɔ́ɔ yá ā pó. Ó ka ɛ́ɛ géē yúúfi, nɛ̄ ɔ̄cɛ ɔhá kú uwā í gáā yá ɔdōbɔ̄bí ɛ́gɔ́ɔmā gbóógbóō ɛ́ɛ́ gɛ ŋ́.

¹²Umósīsi da uwá ka eko nɛ̄ ɛ́ɛ gáā lá ipú aígeli nɛ̄hi nɛ̄ Óndú ā, nōo wɛ Ɔwɔicō kú uwā ɔ́ɔ je lɛ uwá ā, ɛ́ɛ lɔfú pó

¹³ka ɔ̄cɛ obɔ̄bí éyi ŋmá ipú uwā, gbɔɔ́ ō ka ka ɛ́ɛ nyɔ̄ gaá gbā aɔ́wɔ ɔhá, nɛ̄ uwá í jé ŋ́ mā ɛ̄gbā.

¹⁴Ó da uwá ka ɔ́dāŋ ka ɛ́ɛ lɛ ɔ̄kā ɛ́gɔ́ɔmā pó, ká ɛ́ɛ lɛ ɔkwu nū bū lɔɔlɔhi, ka ɔ́dāŋ ka ɔ́ɔ wɛ ɔkwɛ̄yi ka ɔdōbɔ̄bí ā yá,

¹⁵ɔkwɛ̄yi ɛ́mba ɛ́ɛ lɛ odúúdú ācɛ nēe lā ipú igelī ɔ́ɔmā ā mɛ́mla odúúdú aɔ́dāajɛ kú uwā kpó ŋmó.

¹⁶Umósīsi klla da uwá ka ɛ́ɛ lɛ odúúdú iyó mɛ́mla ɔdā nɛ̄ ācɛ ɔ́ɔmā lɛ ā tīkwū bá ɛyɔ́ɔ́pu. Cɛ́ɛ́ kú ɛ́ɛ lɛ odúúdú nū kpó yɔlá, kóō wɛ ɛya nɛ̄ ɛ́ɛ gwó lɛ Óndú ā, nōo wɛ Ɔwɔicō kú uwā ā. Ó ka ɛ́ɛ gáā tú igelī nɛ̄ŋcɛ́ ɔ́ɔmā gwó igbɔhá ɛ́ɛ́ gɛ ŋ́.

¹⁷Ó da uwá ka ɔdā dúú nɛ̄ ɛ́ɛ kwú ɔ̄ ú pīya ɔdā kú ífi ɛɛ́, ka ɛ́ɛ híī lɛ ɔ́ tū lɛ īyī uwā ŋ́. Cɛ́ɛ́ ɔtū kú Óndú ā gāajɛ ŋmá ɔ́nū nɛ̄ ó cɛ̄ ā uwá nyīla ɛ́gɛ́nɛ̄ ó cokónu lɛ ádáádā uwā lɛ ā,

¹⁸ɔ́dāŋ ka ɛ́ɛ lɛyítáajɛ lɛ odúúdú aíne kú nū, nɛ̄ anúɔ je lɛ uwá ɛ̄cī ɔ́ɔmā ā, nɛ̄ ɛ́ɛ yɔ̄ ī yá ɔdā nɛ̄ ɔ́ɔ dɔɔ̄kā ā.