Read idoma OBLATŪKÍNE 14 Bible Online

OBLATŪKÍNE 14 - idoma bible

OBLATŪKÍNE 14

¹Umósīsi ka lɛ ācɛ Ísrɛ̄lu ka ɛ́ɛ wɛ ayí kú Óndú ā, nōo wɛ Ɔwɔicō ā nɛ. Ka ɔ́dāŋ ka ɛ́ɛ yɔ̄ ekwu, ɛ́ɛ híī bī ɛ̄wā hɛ́ īyī uwā, klla plla iyɔ̄bū ɛyí kú uwā ŋ́.

²Ó ka ohígbū ka, ɛ́ɛ wɛ ācɛ kú Óndú ā, nōo wɛ Ɔwɔicō nɛ̄ ɛ́ɛ gē gbā ɛ̄gbā ā. Ó ka ɔ́ɔ le uwá fu kéē wɛ ācɛ kú nū ŋmá ipú ācɛ ɔhá dóódu nēe bá ipú ɛcɛ ā.

³Ó da uwá ká ɛ́ɛ híī lé ɔdā dóódu nɛ̄ Óndú ā je ɔ́ ka ɔdēeliihɔ ā ŋ́.

⁴Ó da uwá ka ɛ́ɛ géē lé aɛ́bɛ́ nēe bá ā: ɛna, álá, ɛwū,

⁵ebóo, īkpɛ̄ɛnū, opī, ɔmɔ́ɔ, mɛ́mla ɔblá.

⁶Ó da uwá ka ɛ́ɛ lɔfú lé ɛbɛ́ dóódu nōo lɛ āpīice, nɛ̄ āpīice kú nū le kɔ̄ ɛpa, nēe gē lé ɔdōlé mlɛ, í ce ɔ̄ wā ipú okónu, klla ī lé kpɔ́.

⁷Ó ka ɛbɛ́ dúúmā nɛ̄ āpīice kú nū í kɔ̄ ɛpa ŋ́, nɛ̄ ɔ́ɔ kē ī lé ɔdōlé mlɛ, í ce ɔ̄ wā ipú okónu, klla ī lé kpɔ́ ŋ́, ɛ́ɛ híī lé ŋ́. Ó klla da uwá ka ɛ́ɛ híī lé aínyankwūlūmī, aíyɛ́ɛjī, mɛ́mla ákótō ŋ́. Ó ka ɛ́ɛ gē lé ɔdōlé mlɛ, í ce ɔ̄ wā ipú okónu, klla ī lé kpɔ́, amáŋ, āpīice kú uwā í kɔ̄ ɛpa ŋ́.

⁸Ó ka ɛ́ɛ híī lé ɛbɛ́ ókóme ŋ́. Ó ka ɛ́ɛ je uwá ɛbéelihɔ. Ó ka ɛ́ɛ lɛ āpīice nēe le kɔ̄ ɛpa dúú, amáŋ, ɛ́ɛ gē lé ɔdōlé mlɛ, í ce ɔ̄ wā ipú okónu, klla ī lé kpɔ́ ŋ́. Ó da uwá kéē híī lé ɛ́ɛ́, ɛ̄nɛ̄ ɛ́ɛ gē lɛ abɔ̄ kwu okwū kú uwā ŋ́.

⁹Ó ka ɛ́ɛ lɔfú lé ɛbéenyi dóódu nōo lɛ acá mɛ́mla āpū.

¹⁰Amáŋ, ɛbɛ́ dóódu nōo lā ipú enyi, nōó lɛ acá mɛ́mla āpū ŋ́, ɛ́ɛ gáā lé ŋ́. Ó ka ɛ́ɛ wɛ ɛbéelihɔ kú uwā.

¹¹Ó klla da uwá ka ɛ́ɛ lɔfú lé ɛdɔ aígbáanɔ dóódu nēe le yēŋēē.

¹²Amáŋ, aígbáanɔ nɛ̄ ɛ́ɛ gáā lé ŋ́ mā bá yɔ̄ á: ɔgɔ, ēpū,

¹⁴ɔkláklá

¹⁵Okokoŋkofi, ogwugwu, idangblēnyi mɛ́mla ucē okwáapa

¹⁶okwáajɛklá, ugwēenyi,

¹⁷ēkwō, ɔŋáŋáa,

¹⁸Ɔmlɛgwā, okpé mɛ́mla udɔ́.

¹⁹Ó da uwá ka odúúdú aákpá ōbū efū wɛ ɔdēelihɔ. Óhígbū ɔ́ɔmā, ó ka ɛ́ɛ híī lé ŋ́.

²⁰Ó da uwá ka ɛ́ɛ lɔfú lé aákpá ōbū efū o yēŋēē dóódu glá.

²¹Umósīsi da uwá ka ɔdā dóódu nōo gekwú abɔ̄yī nū, ɛ́ɛ híī lé ŋ́. Ó da uwá kéē kwú lɛ aéwɔhá nēe lā ɔlɛ́ uwā ā kéē lé, ámāŋ ɛ́ɛ kwú lá lɛ uwá, ohígbū ka uwá nēe wɛ ācɛ Ísrɛ̄lu ā wɛ ācɛ otīīhɔ lɛ Óndú ā. Ó da uwá ka ɛwū ámāŋ álá dúú nɛ̄ ɔ́ɔ gē gwá amɛ̄ kú ɛ́nɛ́ nū, ɛ́ɛ híī he odúúmā kú uwā ipú enyāmɛ̄ kú ɛ́nɛ́ nū ŋ́.

²²Ó klla da uwá kéē lɛ ukpɛ̄ kú éyi ŋmá ipú igwó kú odúúdú aɔ́dɛ̄hɔ̄ kú uwā kpó bá ɛgéégéyi iháyí dóódu

²³Ó da uwá ka ɛ́ɛ ga ɛga nɛ̄ Óndú fu kéē gbā ɔ̄ ɛ̄gbā ā, cɛ́ɛ́ ipéyī Óndú ā abɔ́ɔ ā, kéē lé ukpɛ̄ kú éyi ŋmá ipú igwó kú ikpɔ̄dɛ̄hɔ̄, ejé, anɔ̄, mɛ́mla ayí aflɛ́yí kú ɛna mɛ́mla álá kú uwā. Ó da uwá kéē yá ɛ́gɔ́ɔmā, cɛ́ɛ́ ká ɛ́ɛ nwū ojīlīmā ō ce Óndú ā, nōo wɛ Ɔwɔicō kú uwā ā, eko dóódu.

²⁴Umósīsi klla da uwá ka ɔ́dāŋ ka, ɛga ogbā ɛ̄gbā ā le ligbɔ́ ŋmá ɔlɛ́ uwā nɛ̄, á kpó éyi ŋmá ipú igwó kú uwā nyɔ̄ glá ŋ́ nɛɛ, ɔdā nɛ̄ ɛ́ɛ géē yá ā yɔ̄ á.

²⁵Ó ka ɛ́ɛ kwú ɔdā ɛ̄gbā ā ú kpó lá ká ɛ́ɛ kwú ije kú nū ú ga ɛga ogbā Óndú ā ɛ̄gbā ā.

²⁶Cɛ́ɛ́ kéē kwú ije ā ŋmó tū ɔdā dóódu nōo he uwá ɔtū abɔ́ɔ, ó kōō wɛ ɛbɛ́ ɛna, ɔyí álá, ejé mɛ́mla uburukutu. Cɛ́ɛ́ uwá mɛ́mla ācɛ ipɔ́ɔnū kú uwā kéē lé klla yá abahi lɛ iyī uwā kú ɔtū kóō he uwá ipéyī Óndú ā, nōo wɛ Ɔwɔicō kú uwā ā.

²⁷Ó klla da uwá kéē je mlanyī ayí kú Ulífāyi nēe bá mɛ́mla uwá ā ŋ́. Ohígbū ka uwá í lɛ ukpɛ̄ kú ajɛ dúúmā ipú uwā ŋ́.

²⁸Ó da uwá kéē lɛ ɔdā ɛ̄gbā kú éyi ŋmá ipú igwó kú uwā túbá ipú ɔlɛ́ uwā. iháyí ɛtɛ́ɛ́tá dóódu.

²⁹Ó ka ɔ́ɔmā géē wɛ ukpɛ̄ kú ayí kú Ulífāyi mɛ́mla ayókwū, anyōkwū, mɛ́mla aéwɔhá nēe lā ipú ɔlɛ́ uwā ā, ɛ́gɛ́nɛ̄ ɛ́ɛ lɛ agbénú dóódu ipú uwā ŋ́ mā. Ó ka ɔdā dóódu, nōo ce uwá ɛgbá ā, ɛ́ɛ géē wā í je ŋmá anú. Ó da ācɛ Ísrɛ̄lu kéē yá lɛ ā, cɛ́ɛ́ kú Óndú ā, nōo wɛ Ɔwɔicō kú uwā ā, kóō géē hɔ́hā ce uwá ipú ɔdā dóódu nɛ̄ ɛ́ɛ géē yá ā.