Read idoma OBLATŪKÍNE 15 Bible Online

OBLATŪKÍNE 15 - idoma bible

OBLATŪKÍNE 15

¹Umósīsi yɔ̄ ī kɛlā gɔbū kpɔ́ ka uwá nēe wɛ ācɛ Ísrɛ̄lu ā kéē kwú ulé dúú nɛ̄ ācɛ ɔ́ɔ bī uwā ā í yá uwā ɛhi ipú iháyí ɔ́mahāapā ā.

²Ó da uwá ɔwɛ nɛ̄ ɛ́ɛ í yá ɔ̄ ā wɛ ka, ɛ́ɛ lɛ ulé nɛ̄ odúúdú ācɛ Ísrɛ̄lu ɔ́mpa uwā bī uwā ā ŋmónyí. Ó ka ɛ́ɛ híī nyɔ̄ í mīyɛ ije ā gɛ ŋ́, ohígbū ka Óndú ā abɔ̄yī nū le ulé ā ŋmónyí.

³Ó da uwá ka ɛ́ɛ lɔfú mīyɛ ulé nɛ̄ ācɛ éwɔhá ɔ́ɔ bī ūwā ā. Ó ka amáŋ ɛ́ɛ híī mīyɛ ulé ŋmá abɔ̄ kú ācɛ ɔlɛ́ uwā nōo bī uwā ulé ā gɛ ŋ́.

⁴Ó da uwá ka Óndú ā, nōo wɛ Ɔwɔicō kú uwā ā ɔ́ɔ í hɔ̄hā ce uwā ipú ajɛ. Ó ka ɔ̄cɛ dúú kú uwā ɔ́ɔ gáā gbɛhá ŋ́,

⁵ɔ́dāŋ ka ɛ́ɛ lɛyítáajɛ lɛ Óndú ā, nɛ̄ ɛ́ɛ klla leyī kwɛcɛ gɛɛ lɛ ɛjɛ̄ɛ̄jī ɔdā nɛ̄ anúɔ ka lɛ uwá ɛ̄cī ɔ́ɔmā ā yá.

⁶Ó klla da uwá ka Óndú ā ɔ́ɔ géē hɔ́hā cē uwá ɛ́gɛ́nɛ̄ ɔ́ɔ cokónu lɛ uwá ā. Ó da uwá ka ɛ́ɛ géē kplá aéwo alɛwa ije, amáŋ, ɛ́ɛ gáā kplá ije ŋmá ɛgiyí ɔ̄cɛ dúúmā kú uwā ŋ́. Ó klla da uwá ka ɛ́ɛ géē lɛ íkwu īkpɛ̄yí kú aéwo alɛwa, amáŋ, éwo dúúmā ɔ́ɔ gáā lɛ íkwu īkpɛ̄yí kú uwā ŋ́.

⁷Ó da uwá ka ɛ́ɛ tá ɔ̄cɛ Ísrɛ̄lu dúúmā nɛ̄ ɛgbá ɔ́ɔ ce ɔ́ abɔ̄ ipú ajɛ nɛ̄ Óndú ā, nōo wɛ Ɔwɔicō kú uwā ā, ɔ́ɔ gáā je lɛ uwá ā.

⁸Ó ka ikɔkɔ nɛ̄ ɛ́ɛ í nyí ɔ̄ ije ā, ɛ́ɛ lɛ abɔ̄ nwūla lɛ ɔ́, cɛ́ɛ́ kéē lɛ ije ā kplá anú ɛjīla nōó dɔɔ̄kā ā.

⁹Ó da uwá ka ɛ́ɛ kplá ɔ̄cɛ ɛ́gɔ́ɔmā ije kpɔ́ nááná nɛ̄ iháyí ɔ́mahāapa nēé gē ŋmó ulé nyí kōō le bá ā. Ó da uwá ka ɛ́ɛ híī cɛ̄ lɛ ɛlá obɔ̄bí ɛ́gɔ́ɔmā wā ipú kú uwā ŋ́. Ó ka ɔ́dāŋ ka ɛ́ɛ tá kóō kplá ɔyínɛ́ uwā nōo gbɛhá ā ijē, ɔ́ɔ géē jikwū tɛ́ɛcɛ klá Óndú ā lɛyíkwu uwá, Óndú ā kē í ŋmó uwā ɛpɔ̄bí.

¹⁰Ó da uwá kéē je ije ā lɛ ɔ́ ŋmá ɔtū ékpónú, Óndú ā ɔ́ɔ kē í hɔ́hā ce uwá ipú ɔdā dóódu nɛ̄ ɛ́ɛ gē yá ā.

¹¹Umósīsi klla kɛlā lɛ uwá gɔbū kpɔ́ ka ācɛ o gbɛ́há ɔ́ɔ géē yɔ̄ ipú uwā piyóó. Ó ka ohígbū ɔ́ɔmā anúɔ je ɔ́da lɛ uwá kéē jɛ́lā lɛ uwá.

¹²Ó da uwá ka ɔ́dāŋ ka ɔ̄cɛ Ísrɛ̄lu kwú iyīnū ú lá lɛ uwá ká ɔ́ɔ kwú pīya ɔfiyɛ cɛ́ɛ́ kóō cɛ̄ uwā ɛhɔ̄, ka ɛ́ɛ cíkā ō lɛ ɔ́ hɛ́tá ká ɔ̄ nyɔ̄ icííci eko nɛ̄ iháyí ɔ́mahāapa ā le yá

¹³Ó ka eko dúúmā nɛ̄ ɛ́ɛ lɛ ɔ́ hɛ́tá, ɛ́ɛ híī cɛ̄ lɛ ɔ́ nyɔ̄ abɔ̄ áncā ŋ́.

¹⁴Ó ka ɛ́ɛ lɛ aɔ́dā alɛwa kpó lɛ uwá ŋmá ipú aɔ́dā nɛ̄ Ɔwɔicō ɔ́ɔ bī lɛ hɔ́hā ce uwá ā. Ó kōō wɛ álá, īkpɔ̄dɛ̄hɔ̄ mɛ́mla ejé.

¹⁵Ó ka ɛ́ɛ bla ka, ɛ́ɛ tɛtɛ wɛ aɔ́fiyɛ ajɛ kú Íjīpiti gbɔbū, ɛ́ɛ́ nɛ̄ Óndú ā, nōo wɛ Ɔwɔicō ā hɛ́ uwá tá icííci á. Ó ka ɔdā nōo yá ɛ́ɛ́ nɛ̄ anúɔ gē je íne ā lɛ uwá yɔ̄ abɔ́ɔ á.

¹⁶Umósīsi da uwá ka ɔfiyɛ kú uwā lɔfú í dɔɔ̄kā kóō nyɛ̄ɛ̄ ŋ́, ohígbū ka uwá mɛ́mla ācɛ kú ipɔ́ɔ́nū kú uwā le he ɔ́ ɔtū,anɔ́ɔ ó kē tíne kóō klá á.

¹⁷Ó da uwá kéē lɛ ɔ́ bī ga ɛgiyí okómpīinu kú inu ɔlɛ́ uwā, cɛ́ɛ́ ká ɛ́ɛ, bī oje lɛ ɔ́ ahɔ̄ bū, cɛ́ɛ́ ó kwú pīya ɔfiyɛ kú ɔlɛ́ uwā piyóó ipú oyēeyī kú nú. Ó ka ɛ́gɔ́ɔmā nɛ̄ ɛ́ɛ géē yá ɔfiyɛ nɔ̄nyā kú uwā lɛ dúú á.

¹⁸Ó da uwá ka ɛ́ɛ híī cɔ̄nū eko nɛ̄ ɛ́ɛ gē hɛ́ ɔfiyɛ kú ɔlɛ́ uwā tá ŋ́. Ohígbū koó kē le úklɔ́ yá lɛ uwá iháyí ɛhīlī, nɛ̄ ulé kú nū ā gbabɔ̄ nɛhí ɛɛ́. Ó ka ɛ́ɛ yá ɛ́gɔ́ɔmā, cɛ́ɛ́ kú Óndú ā, nōo wɛ Ɔwɔicō kú uwā ā kóō géē hɛ́ ɔhá ce uwá.

¹⁹Ó ka ɛ́ɛ kwú ayí aflɛ́yí kú ɛna mɛ́mla álá kú uwā nēe wɛ ɔbá ā ú kpó báajɛ lɛ Óndú ā. Ó ka ɛ́ɛ híī bī ɛna ɔ́ɔmā yúklɔ́ ɛ́ɛ́, nɛ̄ ɛ́ɛ gē wā álá ā ɔnwū ŋ́.

²⁰Ó da uwá ka iháyí dóódu, uwá mɛ́mla ācɛ ɔlɛ́ uwā géē lé ɛbɛ́ kú aɔ́dāajɛ ā ɛga nēé gē gbā Óndú ā ɛ̄gbā ā ipéyī nū.

²¹Ó da uwá ka amáŋ ɔ́dāŋ ka ɔdāajɛ ā le nyɔ́nyí ɛga dúúmā, eyī ōpu, ikpó ō cē, ámāŋ ɛdɔ kú ɔ́nyí ɔhá dúúmā, ó ka ɛ́ɛ gáā je ɔ́ gwɛ́ɛya lɛ Óndú ā, nōo wɛ Ɔwɔicō kú uwā ā ŋ́.

²²Ó ka ɛ́ɛ géē je ɛbɛ́ kú nū lé ɔlɛ́ uwā, ɛ́gɛ́nɛ̄ ɛ́ɛ gē lé ɛbɛ́ ipácí ɔhá lɛ́bɛ̄ɛka īkpɛ̄nū ámáŋ ka ɔ́wa ā.

²³Ó ka amáŋ, ɛ́ɛ híī lé oyī kú nū ŋ́, ka ɛ́ɛ lɛ oyī kú nū fu klá ajɛ ɛ́gɛ́nɛ̄ é gē cē éŋkpɔ̄ klá ajɛ ā.