Read idoma OBLATŪKÍNE 16 Bible Online

OBLATŪKÍNE 16 - idoma bible

OBLATŪKÍNE 16

¹Umósīsi da uwá ka ɛ́ɛ lɛ ucɛ kú Onyatá ā yá piíí ipú ɔyā nēé hī ka Abíbu[1] ohígbū ka otú éyi, ipú ɔyā ɔ́ɔmā, nɛ̄ Óndú ā, nōo wɛ Ɔwɔicō kú uwā ā, ɔ́ɔ nya uwá tá ŋmá ipú abɔ̄ kú ācɛ Íjīpiti, iháyí alɛwa nēe wā í yɛ ā á.

²Ó da uwā kéē nyɔ̄ ɛga nɛ̄ Óndú ā géē fu kéē gbā ɔ̄ ɛ̄gbā, cɛ́ɛ́ kéē kwú éyi kú álá ámāŋ ka ɛna kú uwa ú gwɛ́ɛya kú ucɛ kú Onyatá ā lɛ ɔ́ abɔ́ɔ. Ó ka kéē bī ɔwɛ nyā lɛ ojīlīmā ce Óndú ā.

³Ó da uwá ka eko nɛ̄ ɛ́ɛ gáā lé ɛbɛ́ kú ucɛ ā, ó ka ɛ́ɛ híī lé mla igbō nēé lɛ ɔdōnīgbō tū ɔ̄ ŋ́. Ó ka ɛ́ɛ géē lé igbō nēé le ɔdōnīgbō tū ɔ̄ ŋ́ mā, ɛ̄cī ahāapa ɛ́gɛ́nɛ̄ ɛ́ɛ tɛtɛ lé, eko nɛ̄ ɛ́ɛ hápáápa nyɛ̄ɛ̄ ŋmá ajɛ kú Íjīpiti, ɛga nɛ̄ ɛ́ɛ yá uwā ōwē bɛ̄ɛka aɔ́fiyɛ ā. Ó klla da uwá ka ɔdā nōo yá nɛ̄ ɛ́ɛ yēeyī ā, ucɛ ā, nɛ̄ ɛ́ɛ géē yɔ̄ ī lé ā, géē tú uwā ɛlá kwu ɛ̄cī nɛ̄ ɛ́ɛ nyɛ̄ɛ̄ ŋmá ajɛ kú Íjīpiti ā.

⁴Ó da uwá ka ɔ̄cɛ dúúmā kú uwā í gáā lɛ ɔdōnīgbō dúúmā ɔlɛ́ nū ipú ɛ̄cī ahāapa ā ŋ́. Ó klla da uwá ka ɛ́ɛ kwú ɛbɛ́ dóódu nɛ̄ ɛ́ɛ í ŋmó ɔ̄nɔ̄ɔ̄nɛ̄ kú ɛ̄cī aflɛ́yí ā ú lé ŋmá ajɛ, kéē híī cɛ̄ lɛ odúúmā kú nū hile gbó oŋmɔ́ɔ̄cī nū ŋ́.

⁵Ó da uwá ka ɛ́ɛ gáā ŋmó ɛbɛ́ kú ucɛ kú Onyatá ā ɛga dúúmā kú ipú ajɛ nɛ̄ Óndú ā je lɛ uwá ā ŋ́,

⁶ayíka, ɛga nɛ̄ Óndú ā, nōo wɛ Ɔwɔicō kú uwā fu cɛ́ɛ́ kéē gbā ɔ̄ ɛ̄gbā ā. Ó ka abɔ́ɔ nɛ̄ ɛ́ɛ géē gwɛ́ɛya lɛ Óndú ā, ɔ̄nɔ̄ɔ̄nɛ̄ eko nɛ̄ ɛnɔ ɔ́ɔ gaajɛ, eko yíílí nɛ̄ aá nyɛ̄ɛ̄ ŋmá Íjīpiti ā.

⁷Ó ka ɛ́ɛ lɛ ɛbɛ́ ā cɔlá kú ɛ́ɛ lé ɛga nɛ̄ Óndú ā fu kéē gbā ɔ̄ ɛ̄gbā ā. Cɛ́ɛ́ ɛ́ɛ le pɛ́ cīgbihi ga ɔlɛ́ uwā o ŋmɔ́ɔ̄cī nū.

⁸Umósīsi klla da uwá ka ipú ɛ̄cī ɛhīlī, ɛ́ɛ géē lé igbō nōó gē nū ŋ́ mā. Cɛ́ɛ́ ɛ̄cī ɔ́mahāapa ā, ɛ́ɛ le jīla tɔ̄há kéē gbā Óndú ā ɛ̄gbā. Ó ka ɛ́ɛ gáā yúklɔ́ dúúmā ipú ɛ̄cī ɔ́ɔmā ā ŋ́.

⁹Ó da uwá kéē lɛ aláadi ahāapa ka, ŋmá ɛ̄cī ɔ́ɔmā, cɛ́ɛ́ ɛ́ɛ gbɔɔ́ ō cē ɔdɛ̄hɔ̄ kú uwā.

¹⁰Ó ka ɛ́ɛ lɛ ucɛ kú ɔdɛ̄hɔ̄ ō cē ā lé ipú ojīlīmā ō ce Óndú ā, nōo wɛ Ɔwɔicō kú uwā ā, ŋmá lɛ ō je ɔdā ɛ̄gbā kú ɔdɛ̄hɔ̄ kú uwā lɛ Óndú ā ŋmá ɔtū éékpó, ɛ́gɛ́nɛ̄ Óndú ā hɔ́hā ce uwá lɛ ā.

¹¹Ó da uwá mɛ́mla ayípɛ̄ ɔlɛ́ uwā, ācotɛ̄hɔ̄, ayókwū, ācɛ ulífayi, aéwɔhá, mɛ́mla anyōkwū nēe lā pī uwá ā, cɛ́ɛ́ ka ɛ́ɛ gwéeyē ipéyī kú Óndú ā. Ó ka eko nɛ̄ ɛ́ɛ gā ɛga nēe ī gbā Ɔwɔicō ɛ̄gbā ā mla ɔdā kú ɛ̄gbā kú uwā, kéē gwéeyē iyɔ̄bū kú Óndú ā, nōo wɛ Ɔwɔicō kú uwā ā. Ó ka ɛ́ɛ yá ɔdānyā ɛga ékpónú nɛ̄ Óndú ā fú kéē gbā ɔ̄ ɛ̄gbā ā.

¹²Ó da uwá ka ɛ́ɛ má ka ɛ́ɛ bī odúúdú aíne ā yúklɔ́. Ó ka ɛ́ɛ híī mlanyī ka aá wɛ aɔ́fiyɛ Íjīpiti eko éyi dúú ɛɛ́ ŋ́.

¹³Ó ka eko nɛ̄ ɛ́ɛ lɛ ɔdɛ̄hɔ̄ kú uwā cē kwɛyí, kéē bī ɛ̄cī ahāapa le lé ucɛ kú aáklɔ́kpɛ ipú ojīlīmā ō ce Óndú ā.

¹⁴Ó da uwá ká ɛ́ɛ lé ucɛ ā mɛ́mla ayí uwā, ācotɛ̄hɔ̄ kú uwā mɛ́mla ayí kú Ulífāyi, aéwɔhá ayókwū mɛ́mla anyōkwū nēe lā ipú aígelī nɛ̄ŋcɛ́ kú uwā ā.

¹⁵Ó kéē lɛ ojīlīmā ce Óndú ā, nōo wɛ Ɔwɔicō kú uwá ā, oŋmá lɛ ō lé ucɛ ā ɛ̄cī ahāapa, ɛga éyi nɛ̄ ɛ́ɛ ī gbā Óndú ā ɛ̄gbā ā. Ó klla da uwá kéē gwéeyē ohígbū ka Óndú ā le ɔhā hɛ́ ce uwá, ɔdɛ̄hɔ̄ kú uwā mɛ́mla úklɔ́ kú uwá.

¹⁶Umósīsi klla da uwá ka ācɛnyīlɔ kú ɔlɛ́ uwā géē nyɔ̄ í gbā Óndú ā ɛ̄gbā igbɛɛtá ipú iháyí ɛga nɛ̄ ɛ́ɛ ī gbā Óndú ā ɛ̄gbā ā, eko kú Ucɛ kú Onyatá, ucɛ kú ɔdɛ̄hɔ̄ ō cē mɛ́mla eko kú ucɛ kú Aáklɔ́kpɛ. Ó ka ɔnyɔɔnyɛ nōo í wā ā, ká ɔ́ɔ géē bī ɔdā ɛ̄gbā wā dúú,

¹⁷ɛ́gɛ́nɛ̄ ɔdā nɛ̄ Óndú ā, nōo wɛ Ɔwɔicō ā yá lɛ ɔ́ lɛ ā.

¹⁸Ó da uwá kéē lɛ ācohɛ́pɔ̄ mɛ́mla aígabɔ̄ ɔhá kpó fu ipú ɛjɛ̄ɛ̄jī aígelī nɛ̄ŋcɛ́ nɛ̄ Óndú ā, nōo wɛ Ɔwɔicō kú uwā ā je lɛ uwá ā. Ó klla ka ka ācɛ ā ɛ́ɛ cíka ō hɛ́pɔ̄ kpaakpa.

¹⁹Ó ka ɛ́ɛ híī má eyīgoo kú ɔ̄cɛ dúúmā ŋ́, ɛ́ɛ́ nēé ī mīyɛ omíci lé gbɔbū kéē hɛ́pɔ̄ ŋ́. Ohígbū ka, omíci omīyɛ lé, gē pu ācɛ ojéeyī eyī, cɛ́ɛ́ kéē hɛ́pɔ̄ obɔ̄bí

²⁰Ó da uwá kéē hɛ́pɔ̄ okpaakpa, cɛ́ɛ́ kéē géē yēeyī līgbō ipú ajɛ nɛ̄ Óndú ā, nōo wɛ Ɔwɔicō kú uwá ā jē lɛ uwá ā.

²¹Ó ka eko nɛ̄ ɛ́ɛ lɛ ede ma lɛ Óndú ā, nōo wɛ Ɔwɔicō kú uwá ā, ka ɛ́ɛ híī je ojibó kú ɛcí kú Ássɛ̄ra háyi pī ɔ̄ ŋ́.

²²Ó klla da uwá ká ɛ́ɛ híī je ɛcɔ̄ kú ɛcí ō pá dúú ma kwu ajɛ ŋ́, ohígbū ka Óndú ā gē tū ucē ɛ́gɔ́ɔmā eyījii.