Read idoma OBLATŪKÍNE 17 Bible Online

OBLATŪKÍNE 17 - idoma bible

OBLATŪKÍNE 17

¹Umósīsi klla kɛlā lɛ ācɛ Ísrɛ̄lu kpɔ́ kéé híī je ɛbɛ́ onyɔ́nyí dúú gwɛ́ɛya lɛ Óndú ā, Ɔwɔicō kú uwā ŋ́. Ó ka ɔ́ɔmā ɔ́ɔ wɛ ɔdēelihɔ ɛgiyí Óndú ā.

²Ó da uwá ka ɔ̄cɛ í jé ŋ́ ɛ́ɛ lɔfú pó ka ɔ̄cɛnyīlɔ ámāŋ ka ɔ̄cɛnyā ōhī le íne kú Óndú ā bīya,

³oŋmá lɛ o gbā aɔ́wɔ ɔhá ámāŋ ka ɛnɔ, ámāŋ ka aínyílɔ́wɔ ɛ̄gbā klla ī cɛ̄ uwā ɛhɔ̄, nōo wɛ ɔdā nɛ̄ íne kú Óndú ā lɛ ɔ́ ŋmɛ́pɔ̄bí

⁴Ó da uwá ka ɔ́dāŋ ɛ́ɛ lɛ ɔdā ɛ́gɔ́ɔmā pó, ɛ́ɛ lɛ ɔkwu nū bu lɔɔlɔhi. Cɛ́ɛ́ ɔ́dāŋ ka ɔdōbɔ̄bí ɛ́gɔ́ɔmā yá ipú ajɛ kú Ísrɛ̄lu ɔkwɛ̄yi,

⁵ka ɛ́ɛ kwú ɔ̄cɛ ɔ́ɔmā ú gɛɛcɛ ŋmá ipú igelī nɛ̄ŋcɛ́ ā cɛ́ɛ́ ɛ́ɛ lɛ ɛcɔ̄ tá klá anú, lɛ ɔ́ ŋmó.

⁶Ó da uwá ka ɛ́ɛ lɔfú ŋmó ɔ̄cɛ ɛ́gɔ́ɔmā glá ɔ́dāŋ ka ācɛ ɛpa lɛ ijáalí cɛ̄ tū ɔ̄ nɛɛ n. Ó ka ijáalí kú ɔ̄cɛ ékpónú ɔ́ɔ́ jɛ̄ nēé gē le ŋmó ɔ̄cɛ dúúmā ŋ́.

⁷Ó da uwá ka ɔ̄cɛ nōo cījáalí ā ɔ́ɔ géē wɛ ɔ̄cɛ aflɛ́yí nɛ̄ ɔ́ɔ géē tá ɛcɔ̄ aflɛ́yí fīyɛ̄ ɔ̄cɛ aá, ɛ́ɛ́ kú ācɛ ohile kéē gbɔɔ́ ō tá ɛcɔ̄ fīyɛ̄ ɔ̄cɛ ā á. Ó ka ɔwɛ nyā nɛ̄ ɛ́ɛ gáā bī le nū ɔdōbɔ̄bí ɔ́ɔmā á.

⁸Umósīsi da uwá ka ekōhī, aɛ́pɔ̄ ōhī ɔ́ɔ lɔfú le lɔfú tū ācohɛ́pɔ̄ kú ipɔ́lɛ́ ā kéē hɛ́ glá. Ó ka ɔdā lɛbɛ̄ɛka aɛ́pɔ̄ kú agbénú kú ɔlɛ́ mɛ́mla ajɛ ō lɛ, ámāŋ ka ágbe ō yá ɔ̄cɛ ámāŋ o ō ɛyɛ́ɛ́yí kú ɔ̄cɛ nōó jégēdē ŋmó ɔ̄cɛ mɛ́mla ɔ̄cɛ nōo jégēdē ŋmó ɔ̄cɛ. Ó ka ɔ́dāŋ ka ɔdā ɛ́gɔ́ɔmā ɔ́ɔ le yá, ɛ́ɛ nyɔ̄ ɛga éyi nɛ̄ Óndú ā, nōo wɛ Ɔwɔicō kú uwā ā, ɔ́ɔ fu kéē gbā ɔ̄ ɛ̄gbā ā.

⁹Kéē kwú ɛpɔ̄ kú uwā ɔ́ɔmā ú bī gé lɛ ācogwɛ́ɛya kú Ulífāyi mɛ́mla ɔ̄cohɛ́pɔ̄ nɛ̄ ɔ́ɔ yɔ̄ eko ɔ́ɔmā ā, cɛ́ɛ́ kéē lɛ ɛpɔ̄ ā hɛ́.

¹⁰Ó ka ɛ́ɛ géē da uwá ɛpɔ̄ nēe hɛ́ ā, cɛ́ɛ́ uwá ɛ́ɛ géē yá ɔdā dóódu nɛ̄ ācohɛ́pɔ̄ ā í da uwá ŋmá ɛga nɛ̄ Óndú ā fu kéē gbɔ̄ ɔ̄ ɛ̄gbā ā.

¹¹Ó ka ɛ́ɛ mīyɛ ɛpɔ̄ nɛ̄ ɛ́ɛ géē hɛ́ lɛ uwá ŋmá abɔ́ɔ ā, cɛ́ɛ́ kéē bī ɔ̄ lɛ yúklɔ́ lɔɔlɔhi.

¹²Umósīsi klla da uwá ka ɔ̄cɛ dúúmā nɛ̄ ɔ́ mīyɛ ɛpɔ̄ nɛ̄ ācohɛ́pɔ̄ ā hɛ́ ā ŋ́, kéē lɛ ɔ̄cɛ ɔ́ɔmā ŋmó, cɛ́ɛ́ ɛ́ɛ bī ɔwɛ ɔ́ɔmā lɛ ɔdōbɔ̄bí ɛ́gɔ́ɔmā nū ŋmá ipú uwā.

¹³Cɛ́ɛ́ ɔ̄cɛ dóódu nɛ̄ ɔ́ɔ le pó géē yúúfi, ká ɔ̄cɛ ɔhá dúúmā kóō lɔtū yá ɔdā ɛ́gɔ́ɔmā ipú uwā ɛ́ɛ́ gɛ ŋ́.

¹⁴Umósīsi da uwá ka eko nɛ̄ ɛ́ɛ mīyɛ ajɛ nɛ̄ Óndú ā, nōo wɛ Ɔwɔicō kú uwā ɔ́ɔ yɔ̄ ī je lɛ uwá kéē lā ā, nɛ̄ ɛ́ɛ má lā ipú nū. Ó ka ɛ́ɛ géē cɛgbá ɔcɛ́ nōo géē gbō uwā ɛ́gɛ́nɛ̄ odúúdú aéwo nēe yɛ uwá jīlatá ā lɛ dúú ā.

¹⁵Ó da uwá kéē má ka, ɔ̄cɛ nɛ̄ ɛ́ɛ géē fu kóō wɛ ɔcɛ́ kú uwā ā, géē wɛ ɔ̄cɛ nɛ̄ Óndú ā géē fu lɛ uwá. Ó ka ɔ́ɔ géē wɛ ɔyí ajɛ kú ɔlɛ́ uwā. Ó ka ɛ́ɛ híī je éwɔhá lé ɔcɛ́ kú uwā ŋ́.

¹⁶Ó ka ɔ̄cɛ nōo í wɛ ɔcɛ́ ā í gáā lɛ ɔnya o bī kpɛ́fú alɛwa lɛ aícɔ́ɔja kú nū ŋ́, ɛ́ɛ́ nōo gē tū ācɛ ɛhɔ̄ ga Íjīpiti gáā lá ɔnya ŋ́. Ohígbū ka Óndú ā í tíne kéē kwúcē ga Íjīpiti igbɔhá gɛ ŋ́.

¹⁷Ó ka ɔcɛ́ ā ɔ́ gáā lɛ anyā alɛwa ŋ́, ohígbū nɛ̄ ɛ́ɛ géē je ɔtū kú nū pīyabɔ̄ ŋmá ɛgīyí Óndú ā. Ó ka ɔ́ɔ kē gáā kpó aɔ́dā agbénú kú oje nɛ̄hɛ́ mɛ́mla ugóolu (oje ɔdɔ) lɛ iyī nū ŋ́.

¹⁸Ó ka eko nɛ̄ ɔ́ɔ le ɔcɛ́ lé ɛɛ́, ɔ́ɔ géē lɛ ɔkpá kú íne kú Ɔwɔicō mɛ́mla ɔdā nēé bī nwū ācɛ nēé tá ŋmá íne ā abɔ̄yī nū nɛ̄ ayí Ulífāyi ācogwɛ́ɛya leyīkwu ɔ́ ā.

¹⁹Ó ka ɔ́ɔ géē lɛ ɔkpá kú íne ā tá pī iyī nū ajaajɛ. Ɔ́ɔ kē í yɔ̄ i jé ɔ̄ eko dóódu cɛ́ɛ́ kóō bī yɔ̄ yúklɔ́.

²⁰Umósīsi ka ɛ́gɔ́ɔmā ɔ́ɔ í yá ká ɔ̄ gbɛlá ka anúɔ fíyɛ́ ācɛ Ísrɛ̄lu aɔ́mpa nū ŋ́. Cɛ́ɛ́ ká ɔ̄ híī yíkpɛ́yí olɔfú tá aíne kú Óndú ā ɔwɛ dúúmā ŋ́. Cɛ́ɛ́ ɔ́ɔ géē cɔcɛ́ iháyí alɛwa. Ayípɛ̄ ɔlɛ́ nū klla í cɔcɛ́ Ísrɛ̄lu ŋmá ayááyí eyi ga ayááyí ɔhá, iháyí alɛwa nēe gē wā a.