Read idoma OBLATŪKÍNE 18 Bible Online

OBLATŪKÍNE 18 - idoma bible

OBLATŪKÍNE 18

¹Umósīsi klla yɔ̄ ī kɛla gɔbū kpɔ́ ka ācogwɛ́ɛya kú ipɔ́ɔma kú Ulífāyi ā ɔ́ɔ gáā lɛ ukpɛ̄ kú ajɛ dúúmā Ísrɛ̄lu ŋ́. Ó ka ikɔkɔ ɔ́ɔmā ɛ́ɛ géē lɛ ɔdōlé kú uwā ŋmá ɔdā ɛhi mɛ́mla ɔdā nɛ̄ ācɛ géē bī wā í lɛ gwɛ́ɛya lɛ Óndú ā.

²Ó ka ɛ́ɛ gáā lɛ ajɛ ɛga dúúmā ŋ́. Ka ukpɛ̄ kú uwā ɔ́ɔ wɛ āhɔ̄ kú úklɔ́ kú ācogwɛ́ɛya lɛ Óndú ā, ɛ́gɛ́nɛ̄ Óndú ā ɔ́ɔ cokónu lɛ ā.

³Ó ka eko dúú nɛ̄ ɛ́ɛ lɛ ɛna ámāŋ álá kpó gwɛ́ɛya lɛ Óndú ā, ɛ́ɛ géē kpó ácábɔ̄, agba mɛ́mla ubu kú nū lɛ ācogwɛ́ɛya ā.

⁴Ó klla ka ɛ́ɛ géē mīyɛ īkpɔ̄dɛ̄hɔ̄, anɔ̄ kú ɔcí nēé hī ólífu ā mɛ́mla ɔnwū álá kú aflɛ́yí ā.

⁵Ó ka Óndú ā ɔ́ɔ fu ipɔ́ɔma kú Ulífayi ŋmá odúúdú aípɔ́ɔma kú Ísrɛ̄lu kéē cɛ̄ ɔ̄ ɛhɔ̄ piyóó á.

⁶Umósīsi klla da uwá ka ɔ̄cɛ Ulífayi dóódu nōo cɛ̄ lɔfú ŋmá ipú igelī nɛ̄ŋcɛ́ dóódu kú Ísrɛ̄lu ga ɛga ékpónú nēe gē gbā Óndú ā ɛ́gbā ā,

⁷gáā yúklɔ́ kú ɔ̄cogwɛ́ɛya lɛ Óndú, nōo wɛ Ɔwɔicō kú nū ā abɔ́ɔ, bɛ̄ɛka ācɛ kú Ulífāyi ohile ā glá.

⁸Ó ka ɔ́ɔ cíka ō mīyɛ ɛ́gɛ́ ɔdōlé ɛdɔ ékpónú nɛ̄ ācogwɛ́ɛya ohile ā gē mīyɛ ā. Ó ka ɔ́ɔ lɔfú bī ɔdā dóódu nɛ̄ ācɛ ɔlɛ́ nū ɛ́ɛ le tɛ̄hɔ̄ fu ɔ́ ā.

⁹Ó klla da uwá ka eko nɛ̄ ɛ́ɛ gā ipú ajɛ nɛ̄ Óndú ā, nōo wɛ Ɔwɔicō kú uwā ā, ɔ́ɔ gáā je lɛ uwá ā, ó ka ɛ́ɛ híī yá ucē ɛbí nɛ̄ ācɛ kú aéwɔhá nēe bá abɔ́ɔ ā gē yá ā ŋ́.

¹⁰Ó da uwá ka ɛ́ɛ híī je ayí uwā gwɛ́ɛya ō yɔlá dúúdú ɛyí ede kú uwā ŋ́. Ó klla da uwá ka ɛ́ɛ híī cɛ̄ lɛ ācɛ ɔlɛ́ uwā dóódu gwɛ́bā bɛ̄ɛka aéwɔhá ā ŋ́.

¹¹Ó da uwá kéē híī yá ɛcí ŋ́ ɛ́ɛ́ nɛ̄ ɛ́ɛ kōō lé ɛcí tīīyē ŋ́, ɛ́ɛ́ nɛ̄ ɛ́ɛ géē yɔ́ɔ́hɛ ámāŋ yá ɛ́dɔ̄ imabɔ̄ dóódu ŋ́.

¹²Ó da uwá ka ucē elihɔ ɛ́gɔ́ɔmā ɔ́ɔ géē wú Óndú ā, nōo wɛ Ɔwɔicō kú uwā ā, ɔtū nɛ̄hi. Ka ɔ́ɔmā yá ɛ́ɛ nɛ̄ ɔ́ɔ yɔ̄ gē nū aéwo nɛ̄ ɛ́ɛ gē yá aúce ɛ́gɔ́ɔmā bɛ̄ɛcɛ hila uwá abɔ̄ ɛ́ɛ bá gē yɛ lɛyíkwu uwá ā.

¹³Umósīsi klla da uwá kéē lɛyítáajɛ lɛ Óndú ā, nōo wɛ Ɔwɔicō kú uwā ā dúúdú, cɛ́ɛ́ ka ɛ́ɛ híī lɛ ɛnyá dúúmā iyɔ̄bū nū ŋ́.

¹⁴Umósīsi klla da uwá ka ācɛ kú aéwo nɛ̄ ɛ́ɛ gáā mīyɛ ajɛ kú uwā ā, pó ɛlā kú ācogwɛ́ɛ́bā mɛ́mla ācomɛ́ɛbɛ ɛ̄kɛ̄mgbɛ̄. Ó da uwá ka amáŋ, Ɔwɔicō kú uwā ɔ́ɔ cɛ̄ lɛ uwá yá aɔ́dā ɛ́gɔ́ɔmā ŋ́.

¹⁵Ó da uwá ka Óndú ā, ɔ́ɔ géē fu ɔ̄comɛ́ɛbɛ éyi bɛ̄ɛka anúɔ ā, ŋmá ipú uwā. Ó ka ɔyínɛ́ uwā ɔ́ɔmā nɛ̄ ɛ́ɛ géē jāhɔ̄ lɛ ɔ́ á.

¹⁶Ó ka eko nɛ̄ ɛ́ɛ jila mla anú ɛyí ɛfu kú Uhórɛ̄bu ā, ɛ́ɛ le ɔkɔ gbā lɛ ɔ́ kú ɔ̄ híī cɛ̄ lɛ uwá pó ɔkɛ̄lá kú nū ɛ́ɛ́ gɛ ŋ́, ɛ́ɛ́ nɛ̄ ɔ́ɔ kōō ī cɛ̄ lɛ aá má eyī ō cɔ̄lá kú nū ā ŋ́, ohígbū nɛ̄ aá géē pɛ́ kwú.

¹⁷Ó ka Óndú ā, ɔ́ɔ ka ɛlɔ̄kwɛ̄yi nɛ̄ ɛ́ɛ ka á.

¹⁸Umósīsi ka anɔ́ɔ Óndú ā, ɔ́ɔ ka anúɔ géē fu ɔ̄comɛ́ɛbɛ bɛ̄ɛka anúɔ ā ŋmá ipú ācɛ ɔlɛ́ uwā gé lɛ uwá á. Ó ka anúɔ géē da ɔ́ ɔdā nɛ̄ ɔ́ɔ í ka lɛ uwá ā, cɛ́ɛ́ ɔ́ɔ géē da uwá odúúdú ɛlā nɛ̄ anúɔ da ɔ́ ā.

¹⁹Ó ka Óndú ā, ɔ́ɔ géē bī iyē kú anúɔ kɛlā lɛ uwá. Ka ɔ̄cɛ dóódu nɛ̄ ɔ́ɔ tá kóō bī ɛlā nɛ̄ ɔ́ɔ ka ā yúklɔ́ anúɔ géē yá ɔ̄cɛ ɛ́gɔ́ɔmā italā

²⁰Ó klla ka ka Óndú ā, ɔ́ɔ klla ka ɔ́dāŋ ka ɔ̄comɛ́ɛbɛ dúúmā bɔ́tū lɛ olɛhɔ̄ dúú nɛ̄ anúɔ í tū ɔ̄ ŋ́ mā ka tɛ́ɛcɛ, ɔ́ɔ géē kwú piíí. Ó ka ɔ́ɔ klla ka ka ɛ́gɔ́ɔmā nɛ̄ ɔ́ɔ géē lɛ lɛ ɔ̄comɛ́ɛbɛ dúú nɛ̄ ɔ́ɔ bī iyē kú aɔ́wɔ ɔhá lɛ ɛlā ka tɛ́ɛcɛ á.

²¹Umósīsi da uwá ka ɛ́ɛ géē lɔfú yɔ̄ ī dɔɔ̄ka ipú ɔtū kú uwā ka, ɔwɛ nyá nɛ̄ ɔ̄cɛ ɔ́ɔ lɔfú ka ɛlā ɔ́ɔ ŋmá ɛgiyí Óndú ā ámāŋ ka ɔ́ɔ ŋmá ɛgiyí nū ŋ́ mā ā.

²²Ó klla da uwá ka ɔ́dāŋ ka ɔ̄comɛ́ɛbɛ bī iyē kú Óndú ā lɛ ɛlā ka anɔ́ɔ ɛlā nɛ̄ ɔ́ɔ ka ā í yá ŋ́, ɛ́mba ɛlā abɔ̄yī nū nɛ̄ ɔ̄comɛ́ɛbɛ ɔ́ɔmā ɔ́ɔ bī íkwu kú iyīnū ka tɛ́ɛcɛ á. Ó ka ɛ́ɛ cíka ō yúúfi ɔ̄cɛ ɛ́gɔ́ɔmā ŋ́.