Read idoma OBLATŪKÍNE 19 Bible Online

OBLATŪKÍNE 19 - idoma bible

OBLATŪKÍNE 19

¹Úmósīsi da ācɛ Ísrɛ̄lu ka eko nɛ̄ Óndú ā, nōo wɛ Ɔwɔicō kú uwā ɔ́ɔ kwú ācɛ nɛ̄ ɔ́ɔ yɔ̄ ī je ajɛ kú uwā lɛ uwá í kpó yíífi. Igbīhi nɛ̄ ɛ́ɛ gáā mīyɛ aígelī mɛ́mla aínu ɔlɛ́ uwá, nɛ̄ ɛ́ɛ má lā anú abɔ́ɔ,

²kéē lɛ ajɛ ā kɔ̄ ɛga ɛtá nɛ̄ éyééye kú uwā géē lɛ aígelē nɛ̄hi ɛtɛ́ɛ́tá nēé gáā ligbó lɛ iyī uwā ŋ́.

³Cɛ́ɛ́ ɔ̄cɛ dóódu nōo lɛ ɔ̄cɛ ŋmó lɔfú kwu ga odóódu kú uwā fíyaa glá, cɛ́ɛ́ kóō lɛ īyī nū ɛyí nyatá glá.

⁴Ó ka ɔ́dāŋ ka ɔ̄cɛ í jégédē ŋ́, lɛ ɔ̄cɛ ɔ́mpā nū nōó wɛ olɛɛlā kú nū ŋ́ ŋmó, ɔ́ɔ lɔfú kwinya ɔ́ci nyɔ̄ ga odóódu kú aígelī nɛ̄hi ɔ́ɔmā glá, cɛ́ɛ́ kú ɔ̄ le nyatá.

⁵Ó da uwá ka ɔ́dāŋ ka ācɛ ɛpa le pɛ́ ga ipú ūpū gáā cē ɛfú, anɔ́ɔ ɔ̄cɛ éyi yɔ̄ ī hɛ́ ɛfú, anɔ́ɔ āgā kú nū le wú gaá lɛ ɔ̄cɛ ɔ́mpa nū ā ŋmó. Ó da uwá ka ɔ̄cɛ nɛ̄ āgā kú nū wú nyɔ̄ í ŋmó ɔ̄cɛ ā, géē kwu inya ɔ́ci ga éyi kú aígelī nɛ̄hi ɔ́ɔmā cɛ́ɛ́ kú ɔ̄ lɛ iyī nū nyatá.

⁶Umósīsi da uwá ka ɔ́dāŋ ka igelī nɛ̄hi ō kwinya ɔ́ci nyɔ̄ ā lɛ ligbó nɛ̄hi, aɔ́máapu kú ɔ̄cɛ nōó jégēdē ŋ́ ŋmó ā lɔfú gwɔɔ̄ci kú ɔmápú uwá nēé ŋmó ā glá. Cɛ́ɛ́ é lɛ ɔ̄cɛ nɛ̄ ɔ́ yá ɔdōbɔ̄bí dúú ŋ́ ŋmó icííci. Ohígbu ka ɔ̄cɛ ā ɔ́ɔ kē jégēdē ŋmó ɔ́mpānū nɛ̄ ɔ́ɔ wɛ olɛlā kú nū ŋ́ mā ŋ́.

⁷Ó da uwá ka ɔdā nɛ̄ ɔ́ɔ yá nɛ̄ anúɔ ka aígelī nɛ̄hi ā kéē wɛ ɛtá ā yɔ̄ abɔ́ɔ á.

⁸Ó da uwá ka ɔ́dāŋ ka Óndú ā, nōo wɛ Ɔwɔicō kú uwā ɔ́ɔ lɛ ajɛ kú uwā nyīlɔwá tōōtū ɔ̄, ɛ́gɛ́nɛ̄ nōó cokónu lɛ ádáádā uwā lɛ ā.

⁹ka ɔ́dāŋ nɛ̄ ɛ́ɛ lɛ íne kú nū tū klla ī yíhɔtū tá Óndú ā, nōo wɛ Ɔwɔicō kú uwā ā, kē yɔ̄ ɛ́gɛ́nɛ̄ íne kú nū nɛ̄ anúɔ yɔ̄ ī je lɛ uwá ɛcī ɔ́ɔmā ā ɔ́ɔ ka ā, ayíkā ɛ́ɛ lɛ aígelī nɛ̄hi ɛtá ɔhá fu kpɔ́.

¹⁰Ó ka ɛ́ɛ lɛ ɔdā nɛ̄ anúɔ ka ā yá, cɛ́ɛ́ kéē híī ŋmó ācɛ nēé jégēdē ŋmó ācɛ ŋ́ mā, cɛ́ɛ́ kéē híī klla lɛ́pɔ̄bí kú ācɛ nēé ŋmó ipú ajɛ nɛ̄ Óndú ā yɔ̄ gē je lɛ uwá ā ŋ́.

¹¹Umósīsi yɔ̄ gē da uwá ka ɔ̄cɛ ɔ́ɔ lɔfú jégédē lɛ olɛ̄lā kú nū éyi ŋmó, le inya ɔ̄ci kwu nyɔ̄ ga ipú éyi kú ipú aígelī nɛ̄hi o kwinya ɔ́ci nyɔ̄ ā.

¹²Ó da uwá ka ɔ́dāŋ ka ɔ́ɔ le lɛ ā, anyākwɔ́cɛ kú ɔlɛ́ ɔ̄cɛ nōo ŋmó ɔ̄cɛ ā kóō lɛ ɛhɔ̄ tū gaá kwú ɔ̄ ú, kwú ɔ̄ ú lɛ ācɛ nēe cíka ō gwō ɔ́ci kú ɔ̄cɛ nōó ŋmó ā, cɛ́ɛ́ kéē lɛ ɔ́ ŋmó.

¹³Ó da uwá kéē híī méyīnyinyi nū ŋ́. Cɛ́ɛ́ kéē lɛ ɔ̄coŋmɔ́cɛ ɔ́ɔmā yíífi ŋmá ajɛ kú Ísrɛlu, o yá ɛ́ɛ́ kú ɔdā dóódu kóō nyɔ̄ gɔbū lɔhi lɛ uwá.

¹⁴Ó da uwá kéē híī fu ɛjī ajɛ nɛ̄ncɛ̄ kú uwā mɛ́mla olajógbe kú uwā nɛ̄ ɛ́ɛ le kwu ajɛ gbojī ipú ajɛ nɛ̄ Óndú ā, nōo wɛ Ɔwɔicō ā, ɔ́ɔ yɔ̄ ī je lɛ uwá ā ŋ́.

¹⁵Ó da uwá ka ijáalí kú ɔ̄cɛ ékpónú ɔ́ɔ jɛ̄ nɛ̄ ɛ́ɛ gē bī le ŋmó ɔ̄cɛ o yá ɔdōbɔ̄bí ɛpɔ̄bí ŋ́. Ó da uwá ka ijáalí kú ācɛ ɛpa ɔ́ɔ cɛgbá kóō mafú ka ɔ̄cɛ ā ɔ́ɔ lɛ ɛpɔ̄bí lé á.

¹⁶Ó klla da uwá ka ɔ́dāŋ ka ɔ̄cɛ éyi tíne ō lɛ odée yá ɔ́mpānū icííci ŋmá lɛ ō kpó ɛlā ɛ̄kɛ̄mgbɛ̄ ce ɔ́,

¹⁷ka uwá ɛpɛlɛ́ɛpa ɛ́ɛ géē ga ɛga nēé gē gbā Óndú ā ɛ̄gbā ā, cɛ́ɛ́ ācogwɛ́ɛya mɛ́mla ācohɛ́pɔ̄ nēe ce eko ɔ́ɔmā ā, kéē lɛ ɛpɔ̄ ā ka.

¹⁸Ó ka ācohɛ́pɔ̄ ā ɛ́ɛ géē bɔkwu ɛlā ā lɔɔlɔhi, cɛ́ɛ́ é lɛ ɔ̄cɛ nōo cē ije bá ɔ̄cɛ Ísrɛ̄lu, ɔ́mpa nū ā,

¹⁹yá italā nɛ̄ ɛ́ɛ cíkā ō yá ɔ̄cɛ nōó kpɛ́lā ce ɔ́ɔ ā. Ó ka ɔwɛ ɛ́gɔ́ɔmā nēé gē cī ɔdōbɔ̄bí ɔ́ɔmā á.

²⁰Ó ka ɛ̄nyā ɔ́ɔ géē yá kú ācɛ nēe pó ɔdā nɛ̄ ɔ́ɔ yá kéē yúúfi, cɛ́ɛ́ ɛ́ɛ gáā cé yá ucē ɔ́bíipú ɛ́gɔ́ɔmā ŋ́.

²¹Umósīsi da uwá kéē híī méyīnyinyi ɔ̄cɛ dúúmā ipú ɛdɔ ɛlā ɛ́gɔ́ɔmā ŋ́. Ó ka italā kú nū ɔ́ɔ géē wɛ oyēeyī kóō kwɛyí oyēeyī, eyī kóō kwɛyí eyī, ayīnu éyi kóō kwɛyí ayīnu éyi, abɔ̄ éyi kóō kwɛyí abɔ̄ éyi, cɛ́ɛ́ kú ikpó éyi kóō kwɛyí ikpó éyi.