Read idoma OBLATŪKÍNE 2 Bible Online

OBLATŪKÍNE 2 - idoma bible

OBLATŪKÍNE 2

¹Umósīsi kɛlā gɔbū kpɔ́ ka aá le eyī pīya, anɔ́ɔ aá gbo iyāwu kú aá ga ipú ígbíli lɛyíkwu okónū ísu igwɛ̄bɛ́ ā ɛ́gɛ́nɛ̄ Óndú ā ɔ́ɔ ka lɛ anúɔ ā. Ó ka aá bá gē ga amu ga anú ajɛ aɛ́fu kú Ɛ́dɔm ā ɛ̄cī alɛwa

²Ó ka Óndú ā ɔ́ɔ kɛlā lɛ anúɔ ka,

³o ga amu ga anú kú aá ajɛ aɛ́fu ɔ́ɔmā ɔ́ɔ jɛ̄ ɛɛ́, ka aá kóō kwú eyī ú pīya kú aá yɛ lɛyíkwu ɛhíícō.

⁴Ó ka Óndú ā, ɔ́ɔ da anúɔ ka anúɔ da ācɛ ā kéē yɛ bū ogwoogwu kú ajɛ kú ayínɛ́ uwā, ayááyí kú Ísɔ́, nēe lā Uséyɛ ā. Ó ka ācɛ Ɛ́dɔm gēe yúúfi uwā, ohígbū ɔ́ɔmā ā, ɛ́ɛ lɛ ɛlá kwu ɔ́

⁵Ó ka Óndú ā ɔ́ɔ da anúɔ ka anúɔ da uwá kéē híī kpɛ́fú tá uwā ŋ́. Ohígbū ka anúɔ ɔ́ɔ gáā je āyā kú ajɛ kú uwā dúúmā lɛ ācɛ Ísrɛ̄lu ŋ́, ó kōō wɛ īkpō éyi kú nū. Ohígbū ka anúɔ kwú ajɛ ā ú lɛ ipɔ́ɔma kú Ísɔ, kóō wɛ ákú uwā ɛɛ́.

⁶Keé lɔfú bī ije le lá ɔdōlé mɛ́mla éŋkpɔ̄ ō gwá ŋmá abɔ̄ uwā glá.

⁷Ó klla ka Óndú ā ɔ́ɔ le ɔ̄hā hɛ́ ce aá ipú úklɔ́ abɔ̄ kú aá dóódu ɛ́ɛ́. Ka ɔ́ɔ leyīkwu uwá ipú iyāwu kú uwā o yɛ ga amu ga anú kú ipú ígbíli nɛ̄hi ā. Ó da uwá ka Óndú ā ɔ́ɔ húmáyī yɔ̄ mla uwá ŋmífī iháyí ofɛpa nēe gaá yɛ ā. Ó klla da uwá ka ɛ́ɛ le odúúdú aɔ́dā nōo ce uwá ɛgbá kpɛ́mm ā lɛ.

⁸Ó ka aá le yɛ gɔbú, anɔ́ɔ aá ɔ́ɔ le fō ŋmá ɔwɛ kú Árába mɛ́mla Esiyɔngéba, nyɛ̄ɛ̄ ŋmá ɛgiyí aɔ́máapú aá, ayááyí kú Ísɔ nēe lā Uséyɛ ā á. Anɔ́ɔ aá ɔ́ɔ kwú bū ɔwɛ kú ígbíli kú Umówābu ā á.

⁹Ó ka Óndú ā, ɔ́ɔ da anúɔ ka ɛ́ɛ híī je unwalu ámāŋ kpɛ́fu tá ācɛ kú Umówābu nēe wɛ ayááyí kú Ulɔ́tu ā ŋ́. Óndú ā ka anúɔ kwú ajɛ kú Ári ā ú lɛ uwá ɛɛ́, ka anúɔ í kōō gáā je āyā dúúma kú aje ā lɛ aá ŋ́.

¹⁰(Ó ka ācɛ kú Emím ɔ́ɔ tɛtɛ lā abɔ́ɔ á. Ó ka ɛ́ɛ klla lɛwa, lɔfú nɛ̄hi klla jɛ̄ bɛ̄ɛka ayí kú Ánāki ā.

¹¹Ó klla ka ɛ́ɛ gē hī uwā ka ācɛ Urefém bɛ̄ɛka ācɛ Ánāki ā dúú. Amáŋ ka ācɛ Umówābu ɔ́ɔ gē hī uwā ka Émim.

¹²Ó ka ācɛ kú Uhóri tɛtɛ lā Uséyɛ tɛtɛ dúú, ɛ́ɛ́ nɛ̄ ayááyí kú Ísɔ nū uwā ŋmá abɔ́ɔ, le éwo ā kpó yíífi, anɔ́ɔ uwá abɔ̄yī ūwā gaá lā abɔ́ɔ á. Ó ka ɔwɛ ékpónú ɔ́ɔmā nɛ̄ ācɛ Ísrɛ̄lu ɛ́ɛ gáā nū aólɛlā kú uwā ŋmá ajɛ nɛ̄ Óndú ā ɔ́ɔ yɔ̄ gē je lɛ uwá ā.)

¹³Ó ka aá ɔ́ɔ le bēhé Ísu kú Usérēdi ɛ́gɛ́nɛ̄ Óndú ā ɔ́ɔ da aá ka aá yá ā.

¹⁴Ó ka eko ɔ́ɔmā wɛ iháyí ɔ́mofu ce igwɛ́ɛta ce ahātā igbīhi nɛ̄ aá nyɛ̄ɛ̄, ŋmá Ukadiss-Ubanéya á. Ó ka odúúdú ɛ́gɔ́ kú ācɛ nēe kpɛ́fú eko ɔ́ɔmā ā, ɛ́ɛ le pɛ́kwú kpɛ́mm ɛ́gɛ́nɛ̄ Óndú ā tɛtɛ cokónu ka ɛ́ɛ géē pɛ́kwú ā.

¹⁵Ó ka Óndú ā ɔ́ɔ bɛ́yíkwu uwá jāā gbéeko nɛ̄ ɔ́ɔ le ɛjɛ̄ɛ̄jī uwā kpó yíífi.

¹⁶Ó klla ka eko nɛ̄ ɛjɛ̄ɛ̄jī ācɛ nēe jé ɔ̄ kpɛ́fú kpɛ́mm ā le pɛ́ gekwú ŋmá ipú ācɛ ā,

¹⁷anɔ́ɔ Óndú ā, ɔ́ɔ kɛlā lɛ anúɔ ka,

¹⁸ícíícɛ ɔ́ɔmā, anúɔ mɛ́mla ācɛ ā ɔ́ɔ yɛ bū ajɛ kú ācɛ Umówābū bū ɔwɛ kú Ári.

¹⁹Cɛ́ɛ́ aá má kwu ajɛ kú ācɛ Ámɔ̄ri, ayááyi kú Ulɔ́tu ajaajɛ. Ó tū uwā ukɔ́ kéē híī junwalu ámāŋi ka o nuunu tá uwá ŋ́, ohígbū ka anúɔ í gáā je ajɛ dóódu nɛ̄ anúɔ je lɛ uwā ā lɛ ācɛ Ísrɛ̄lu ŋ́.

²⁰Ó kéē tɛtɛ hī abɔ́ɔ ka ajɛ kú ācɛ Urefém, iyē kú ācɛ nēe tɛtɛ lā abɔ́ɔ ā, amáŋ ācɛ Ámɔni gē hī ɔ̄ ka Usamsumím.

²¹Ó ka ācɛ ā wɛ aágwu. Ɛ́ɛ klla lɛwa, bɛ̄ɛka ācɛ kú Ánāki ā, amáŋ Óndú ā ɔ́ɔ le uwá yíífi, gbɔbū ɛ́ɛ́ nɛ̄ ācɛ kú Ámɔni nyɔ̄ í mīyɛ ajɛ abɔ́ɔ, klla má lā anú á.

²²Ó ka ɔdā ékpónú ɔ́ɔmā nɛ̄ Óndú ā, ɔ́ɔ yá ācɛ kú Ɛ́dɔm nēe wɛ ayááyí kú Ísɔ, nēe lā ɔlɛ́ ɛfu kú Ɛ́dɔm ā. Ó ka Óndú ā, ɔ́ɔ le ācɛ kú Uhóri kpó yíífi, cɛ́ɛ́ kú ācɛ kú Ɛ́dɔm kéē mīyɛ ajɛ kú uwā tɔ̄ɔkwu, cɛ́ɛ́ kéē má lā anú. É lā abɔ́ɔ kpɔ́ ɛ́ɛ́.

²³Ó da uwá ka ācɛ kú Ukaftorím nēe ŋmá Ukaftɔ́ ā, le ācɛ kú Áffim nēe tɛtɛ lā aípɔ́lɛ́ jāā ga Ugása ā kpó yíífi. Anɔ́ɔ ɛ́ɛ gaá lā ajɛ nōo yɔ̄ okónu Ísu kú Umeditaréníya ā, jāā ga Ugása á.

²⁴Umósīsi da uwá ka Óndú ā ɔ́ɔ da aá eko ɔ́ɔmā ka aá cāŋjɛ kú aá gbo īyāwu kú aá, ká aá le bēhé ísu kú Ánɔn ā. Ka anúɔ kwú Usíhɔ́n, ɔ̄cɛ Ámɔ̄ri, ɔcɛ́ kú Uhɛ́sbɔn, mɛ́mla ajɛ kú ɔlɛ́ nū ā ú kpó tū aá abɔ̄ ɛɛ́. Ka aá kóō kpɛ́fú tū ɔɔ̄ ka aá mīyɛ ajɛ ā ákú aá.

²⁵Ó ka Óndú ā ɔ́ɔ kahíníī, “Ícɛ nyā, n lɛ ufi kpó tū aéwo kú ɛcɛ nyā ipú ohígbū aá. É géē pó ɔ̄kā lɛyíkwu aá, é kē í gbɔɔ́ ō fīyégbúlú ohígbū ufi aá.”

²⁶Umósīsi kahíníī, “N lɛ ācɛ tɛ̄hɔ̄ ŋmá ígbíli kú Ukɛdɛmɔ́tū gaá fu ɔcɛ́ kú Uhɛ́sbɔn ipú ɛbɔ́ kahíníī,

²⁷‘Aá cɛ̄ ká ālɔ̄ le bū ipú ajɛ kú aá. Alɔ géē yɛ ɔwɛ nɛ̄hi ā gbóóló. Alɔ í gáā nyā ga abɔ̄lɔ́ná ɛ́ɛ́ nɛ̄ alɔ gē nyā ga abɔ̄lúfīyē ŋ́.

²⁸Alɔ géē lá ɔdōlé mɛ́mla éŋkpɔ̄ nɛ̄ alɔ géē lé klla í gwá ā. Ɔdā nɛ̄ alɔ tíne ō yá ā wɛ o lɛ yɛ bū ajɛ kú ɔlɛ́ aá,

²⁹jāā gbéeko nɛ̄ alɔ le bēhé Ísu kú Ujɔ́dan ga ipú ajɛ nɛ̄ Óndú ā, nōo wɛ Ɔwɔicō kú alɔ je lɛ alɔ ā. Ayááyí kú Ísɔ, nēe lá Ɛ́dɔm ā mɛ́mla ācɛ kú Umówābu, nēe lā ipú Ári ā cɛ̄ lɛ alɔ le bū ipú ajɛ kú uwā.’

³⁰Ó klla da ācɛ ā ka amáŋ Usíhɔn, ɔcɛ́ kú Uhɛ́sbɔn ɔ́ɔ cɛ̄ lɛ aá bū ajɛ kú nū ŋ́, ohígbū ka Óndú ā lɛ ɔtū kú nū kwúfúlá ká. O yá ɛ́ɛ́ kú aá lɛ ɔ́ yálé, cɛ́ɛ́ ka aá mīyɛ ajɛ kú nū, nɛ̄ aá ɔ́ɔ bá anú kwu eko ɔ́ɔmā ā.

³¹Ó ka Óndú ā, ɔ́ɔ da anúɔ ka anúɔ ɔ́ɔ géē tá anúɔ abɔ̄ yá Usíhɔn mɛ́mla ācɛ ɔlɛ́ nū lé. Ka aá gbɔɔ́ ō mīya ajɛ kú nū cɛ́ɛ́ kú aá má lā anú.

³²Umósīsi ka anɔ́ɔ Usíhɔn mɛ́mla ɛjɛ̄ɛ̄jī ācɛ ɔlɛ́ nū le pɛ́ wɛ̄ɛcɛ ŋmá igelī nɛ̄hi nēé hi ka Uhɛ́sbɔn ā gaá nuunu tá aá igelí nɛ̄ŋcɛ́ kú Ujáhāsi ā.

³³Umósīsi klla ka Óndú ā, nōo wɛ Ɔwɔicō kú aá ɔ́ɔ cɛ̄ le aá le anú, ayí nū mɛ́mla ɛjɛ̄ɛ̄jī ācɛ ɔlɛ́ nū yálé, le uwá kpó ŋmó.

³⁴Ó ka aá mīyɛ ɛjɛ̄ɛ̄jī aígelī nɛ̄ŋcɛ́ kú uwā le ɔ́ kpó catāajɛ. Ó ka aá klla le odúúdú ācɛ, kwu ācɛnyīlɔ, kwu ācɛnyā mɛ́mla ayípɛ̄nɛ́ncɛ́ kú uwā kpó ŋmó ŋmáajɛ dúúdú. Ka aá cɛ̄ lɛ ɔ̄cɛ dúúmā yēeyī ŋ́.

³⁵Ó ka aá le odúúdú aɛ́bɛ́ ɔlɛ́ mɛ́mla aɔ́dā dóódu nēe ca aá ɛgbá kpɛ́mm kú ipú aígelī nɛ̄ŋcɛ́ nɛ̄ aá mīyɛ ā kpó wu ŋmáajɛ.

³⁶Ó ka Óndú ā, ɔ́ɔ cɛ̄ lɛ aá mīyɛ odúúdú aígelī nɛ̄ŋcɛ́ kú uwā, ŋmá Arówɛ nōo yɔ̄ kwu okónu ísu kú Ánɔn ā, mɛ́mla aígelī nēe bá ɔtāhɛ̄ kú ɔpɛ́ ā, jāā í kwu Ugílɛ̄di ā. Ka ɔ̄cɛ dúúmā í yɔ̄ nōo gē bī ɔlɛ́ ā háyi glá ŋ́. Óndú ā, nōo wɛ Ɔwɔicō kú aá ɔ́ɔ cɛ̄ lɛ aá mīyɛ uwá kpɛ́mm.

³⁷Ó ka aá túblá ajɛ kú ayí kú Ámɔ̄ri, ámāŋ yɛ lɛyíkwu ajɛ nōo tá lɛyíkwu Ísu kú Ujábɔ̄ku, ámāŋ ka aígelī nɛ̄ŋcɛ̄ kú ɔlɛ́ kú ɛfu mɛ́mla o yɛ ga ɛga ohile nɛ̄ Óndú ā, ɔ́ɔ tū aá ukɔ́ ka aá kóō híī lɛ abɔ̄ kwu uwá ŋ́ mā ŋ́.