Read idoma OBLATŪKÍNE 20 Bible Online

OBLATŪKÍNE 20 - idoma bible

OBLATŪKÍNE 20

¹Umósīsi klla yɔ̄ ī kɛlā gɔbū lɛ ācɛ Ísrɛ̄lu kpɔ́ ka eko nɛ̄ ɛ́ɛ gáā nyɔ̄ í kpɛ́fú tú aólɛlā kú uwá, nɛ̄ ɛ́ɛ lɛ aɔ́nya o kpɛ́fú mɛ́mla aúgbɔ́ɔnya o kpɛ́fú mɛ́mla aícɔ́ɔja nēe lɛwā fíyɛ́ uwā má, ó da uwá kéē híī yúúfi uwā ŋ́. Ohígbū ka Óndú ā, nōo wɛ Ɔwɔicō kú uwā, nɛ̄ ɔ́ɔ kpó uwā ŋmá Íjīpiti ā, ɔ́ɔ géē yɔ̄ pī uwā.

²Ó da ka gbɔbū ɛ́ɛ́ kéē ga ɔgbɛ́fú ā, ācogwɛ́ɛya éyi ɔ́ɔ í wā ɛcɛ kóō da aícɔ́ɔja ā kahíníī,

³“Ācɛ Ísrɛ̄lu, aá jāhɔ̄. Ícɛ nyā, aá gáā ga ɔgbɛ́fú ɛɛ́. Aá híī yúúfi aólɛlā kú aá ā ŋ́, ɛ́ɛ nɛ̄ ɔtū gē wuklícō klla ī gbenyi lɛ aá ŋ́.

⁴Ohígbū ka Óndú ā, nōo wɛ Ɔwɔicō kú aá, géē nyɔ̄ mla aá. Ó kē géē cɛ̄ lɛ aá í yá aólɛlā kú aá lé.”

⁵Ó ka aótrɛ̄yí ā, ɛ́ɛ géē kɛlā lɛ ācɛ ā ka ɔ̄cɛ dúúmā ɔ́ɔ yɔ̄ abɔ́ɔ nōo gwó inu ɛ̄yīpɛ̄ nɛ̄ ɔ́ kē je ɔ́ tū Óndú ā abɔ̄ ɛ́ɛ́ ŋ́ ka ɔ́ɔ ga ɔlɛ́. Ka ɔ́dāŋ nōó nyɔ̄ ŋ́ nɛ̄ ɔ̄cɛ í jé ŋ́ nēé lɛ ɔ́ ŋmó ɔgbɛ́fú bɛ́ɛ, ka ɔ̄cɛ ɔhá ɔ́ɔ gáā lā ipú ɔlɛ́ nū á.

⁶Ó ka ɛ́ɛ klla í ka kpɔ́ ka ɔ̄cɛ dúúmā ɔ́ɔ yɔ̄ abɔ́ɔ nɛ̄ ɔ́ hɛ́hɔ̄ kú ufáyīn, amáŋ nɛ̄ ɔ́ɔ hɛ́ īkpō nū ɛ́ɛ́ ŋ́ kóō le cīgbīhi ga ɔlɛ́, ohígbū nɛ̄ ɛfú ɔ́ɔ géē lé ɔ̄, nɛ̄ ɔ̄cɛ ɔhá ɔ́ɔ géē yá ejé ŋmá ɛhɔ̄ ɔlɛ́ nū.

⁷Ó ka ɛ́ɛ géē ka ka ɔ̄cɛ dúúmā nɛ̄ ɔ́ɔ yɔ̄ abɔ́ɔ nōo le ɔ̄kā ɔnyā da gáā lɛ ɛɛ́ ká ɔ̄ le cīgbīhi ga ɔlɛ́, ohígbū nɛ̄ ɔ̄cɛ í jé ŋ́ nēé géē je ŋmó ɔgbɛ́fú, nɛ̄ ɔ̄cɛ ɔhá í je ɔnyā ā lɛ.

⁸Ó ka aótrɛ̄yí ā ɛ́ɛ géē da ācɛnyīlɔ ā ka ɔ́dāŋ ka ɔtū ɔ́ɔ ī bɛ́ɛpa lɛ ɔ̄cɛ dúúmā abɔ́ɔ nɛ̄ ɔ́ɔ gē yúúfi ā, ɔ̄cɛ ɛ́gɔ́ɔmā ká ɔ̄ lɛ cīgbīhi ga ɔlɛ́, cɛ́ɛ́ kóō híī kpó ufi tū ācɛ ohile ā iyē ŋ́.

⁹Ó ka eko nɛ̄ aótrɛ̄yí ā lɛ ɛlā ka lɛ aícɔ́ɔja ā kwɛyí, ɛ́ɛ géē fu aógbēnjūwā nēe géē leyīkwu ācɛ ā ígwíígwu.

¹⁰Ó da uwá ka eko dúú nɛ̄ ɛ́ɛ gāá kpɛ́fú tá igelī nɛ̄hi dúúmā, ɛ́ɛ lɛ ɛga je lɛ uwá aflɛ́yí kéē cɔ̄nyā.

¹¹Ó ka ɔ́dāŋ ka ɛ́ɛ cɔ̄nyā lɛ odūngwɔ̄wɛ kú igá kú ipú igelī nɛ̄hi ā nwūla, ɛ́ɛ kwú uwā ú pīya aɔ́fiyɛ kú uwā, cɛ́ɛ́ kéē yá úklɔ́ abɔ̄fú lɛ uwá.

¹²Ó da uwá ka ɔ́dāŋ ka ācɛ kú igelī nɛ̄hi ɔ́ɔmā tá kéē cɔ̄ɔnyā, amáŋ ka ɛ́ɛ ka ka aá ɔ́ɔ géē nuuunu nɛɛ, ó ka aícɔ́ɔja kú uwā kéē lɛ íbɔm cē tū ɔ̄.

¹³Umósīsi klla da uwá ka eko nɛ̄ Óndú ā, nōo wɛ Ɔwɔicō kú uwā ā, ɔ́ɔ cɛ̄ lɛ uwá mīyɛ igelī nɛ̄hi dúúmā, ka ɛ́ɛ lɛ odúúdú ācɛnyīlɔ kú uwā kpó ŋmó.

¹⁴Ó da uwá ka ɛ́ɛ lɔfú kpó anyā ɔlɛ́ uwā, ayípɛ̄ ɔlɛ́ uwā, aɔ́dāajɛ mɛ́mla ɛjɛ̄ɛ̄jī aɔ́dā dóódu nēe bá ipú igelī nɛ̄hi ɔ́ɔmā glá. Ó klla da uwá ka ɛ́ɛ lɔfú yá ɔdā dóódu nōo he uwá ɔtū mla aɔ́dā nēe wɛ ákú aólɛlā kú uwā glá ohígbū ka Óndú ā le uwá kpó lɛ uwá ɛɛ́.

¹⁵Ó da uwá ka ɔwɛ nɛ̄ ɛ́ɛ gáā yá aígelī nɛ̄hi nēe lɛ ligbó lɛ ajɛ nɛ̄ ɛ́ɛ gáā lā anú ā yɔ̄ abɔ́ɔ ā.

¹⁶Ó ka amáŋ, eko nɛ̄ ɛ́ɛ mīyɛ igelī nɛ̄hi dóódu nōo yɔ̄ ipú ajɛ nɛ̄ Óndú ā, nōo wɛ Ɔwɔicō kú uwá ā, ɔ́ɔ yɔ̄ gē je lɛ uwá ā, ɛ́ɛ̄ lɛ odúúdú ācɛ nēe lā igelī nɛ̄hi ɔ́ɔmā ā kpó ŋmó.

¹⁷Umósīsi da uwá kéē lɛ odúúdú ācɛ nēe bá nyā kpó yíífi dúúdú: ācɛ Uhɛ́ti, ācɛ Ámɔ̄ri, Ukénan, Upɛ́risi, Uhám, mɛ́mla ācɛ Ujɛ́būsi, ɛ́gɛ́nɛ̄ Óndú ā ɔ́ɔ je ɔ́da lɛ uwá lɛ ā.

¹⁸Ó da uwá kéē lɛ uwá kpó ŋmó, cɛ́ɛ́ kéē cɛ̄ lɛ uwá bīya íne kú Óndú ā, oŋmá o lɛ nwū uwā ɔdēelihɔ nɛ̄ ācɛ ā gē yá eko nɛ̄ ɛ́ɛ gē gbā aɔ́wɔ kú uwā ɛ̄gbā ā ŋ́.

¹⁹Ó da uwá kéē híī kpó aɔ́cí nōo gē gwá īkpō kú igelī nɛ̄hi nēé yɔ̄ ī tíne ō mīyɛ ā hɛ́ ɔ́dāŋ ka íbɔm ā le gbojī nááná ŋ́. Ó da uwá kéē lé īkpō kú aɔ́cí ā, amáŋ ɛ́ɛ híī kpó aɔ́cí ā yíífi ŋ́, ohígbū ka aɔ́cí ā ɛ́ɛ́ wɛ aólɛlā kú uwā ŋ́.

²⁰Ó da uwá ka ɛ́ɛ lɔfú hɛ́ aɔ́cí ohile glá lɛ gwó ɔdā ō bī lɛ cé íbɔm, jāā gbéeko nɛ̄ ɛ́ɛ mīyɛ igelī nɛ̄hi ā.