Read idoma OBLATŪKÍNE 21 Bible Online

OBLATŪKÍNE 21 - idoma bible

OBLATŪKÍNE 21

¹Umósīsi klla yɔ̄ ī kɛlā gɔbū kpɔ́ ka ɔ́dāŋ ka ɔ̄cɛ í jé ŋ́, ɔ̄cɛ éyi lɔfú lɛ okwū kú ɔ̄cɛ nēé ŋmó tá ɛga nɛ̄ ācɛ í lā ŋ́ ipú ajɛ nɛ̄ Óndú ā, nōo wɛ Ɔwɔicō kú uwā ā, gáā je lɛ uwā ā, nēé kē jé ɔ̄cɛ ɔ̄cɛ nōo ŋmó ɔ̄ ā ŋ́ glá.

²Ó ka aótrɛ̄yí mɛ́mla ācohɛ́pɔ̄ kú uwā, ɛ́ɛ géē ga ɛcɛ, ɛga nɛ̄ okwū ā tá ā, cɛ́ɛ́ ɛ́ɛ géē miya ajɛ ŋmá ɛgiyí okwū ā, jāā ga aígelī nōo kwu ɔ́ ajaajɛ ā.

³Ó ka anyākwɔ́cɛ kú ipú igelī nɛ̄ ɔ́ɔ kwu ɛga nɛ̄ okwū ā tá ā ajaajɛ ā, géē bī ɛdrɔ́ kú ɔbá ɛna nēé lɛ̄ ɔ́ hɛ́hɔ̄ jéjée ɛ́ɛ́ ŋ́.

⁴Ó ka ɛ́ɛ géē bī ɛna ā jāā ga ɔpɛ́ kú ɔkpá nɛ̄ éŋkpɔ̄ kú nū í ŋmó ŋ́, nɛ̄ ācɛ í kē hɛ́hɔ̄ ipú ajɛ ā jéjée ɛ́ɛ́ ŋ́. Cɛ́ɛ́ é lɛ ɛna ā ɔkɔ cē abɔ́ɔ.

⁵Ó ka ayí Ulífāyi, ācogwɛ́ɛya ā, géē nyɔ̄ abɔ́ɔ dúú, ohígbū ka uwá gē hɛ́pɔ̄ kú ɔ̄cɛ ō ŋmó dóódu á. Ó da uwá ka Óndú ā, nōo wɛ Ɔwɔicō kú uwā ā, ɔ́ɔ lɛ uwá fu kéē yúklɔ́ lɛ Óndú ā, kéē bī iyē kú nū le hɔ́hā ce ācɛ.

⁶Ó ka cɛ́ɛ́ odúúdú anyākwɔ́cɛ kú ipú igelī nɛ̄ŋcɛ́ nōo kwu ɛga nɛ̄ okwū ā tá ā ajaajɛ ā, géē kpó abɔ̄ kú uwā klá ɛna ā ɛyí.

⁷Cɛ́ɛ́ ɛ́ɛ í ka ka aá í ŋmó ɔ̄cɛ ā ŋ́, ɛ́ɛ́ nɛ̄ aá í jé ɔ̄cɛ nōo ŋmó ɔ̄ ā ŋ́.

⁸É í da Óndú ā kóō kwú ɔdā nɛ̄ ācɛ ɔlɛ́ nū Ísrɛ̄lu, nōó kpó bɛ̄cɛ ŋmá Íjīpiti ā, yá ā í yá uwā ɛhi. Kóō kwú yá aá ɛhi, kóō híī bī ikwū kú ācɛ nēé ŋmó icííci ā bá uwā ŋ́.

⁹Ó da uwá ka oŋmá lɛ o yá ɔdā nɛ̄ Óndú ā ɔ́ɔ dɔɔ̄kā ā, ɔ́ gáā bī ikwū kú ɔ̄cɛ ā bá uwā ɛyí ka uwá ɔ́ɔ ŋmó ɔ̄cɛ ā ŋ́.

¹⁰“Ó da uwá ka eko nɛ̄ Óndú ā, nōo wɛ Ɔwɔicō kú uwá ā cɛ̄ lɛ uwá le aólɛlā kú uwā yálé ɔgbɛ́fú, ɛ́ɛ lɔfú lɛ ācɛ ā kpó kwú wā ɔlɛ́.

¹¹Ó ka ɔ̄cɛ éyi lɔfú má ɔ̄cɛnyā ōhéyīfuú nōo he ɔ́ ɔtū nɛ̄ ɔ́ɔ tínē ō lɛ.

¹²Ó da uwá kéē lɛ ɔnyā ā bī nyɔ̄ ɔlɛ́ nū cɛ́ɛ́ kéē lɛ ɔ́ ɛyí plá klla lɛ ūkwū abɔ̄ kú nū kpó cē,

¹³cɛ́ɛ́ ɔ́ɔ kwú úwé ɔhá í kpó wiyē. Ó ka ɔnyā ā cíkā ō klá ɔlɛ́ nū cɛ́ɛ́ kóō yīinīkwū kú ádā mɛ́mla ɛ́nɛ́ nū ɔyā éyi. Ó ka ɔ́ɔ lɔfú lɛ ɔ́ igbīhi ɔ́ɔmā glá.

¹⁴Ó da uwá ka ɔ́dāŋ ka ɔnyā ā í he ɔtū gɛ ŋ́, ka ɔ́ɔ lɔfú wú ɔ̄ tá kóō nyɔ̄ áncā.

¹⁵Umósīsi da uwá ka ɔ́dāŋ, ka ɔ̄cɛ lɛ anyā ɛpa, nɛ̄ uwá ɛpɛlɛ́ɛpa ma ayí ɔ̄cɛnyīlɔ lɛ ɔ́. Amáŋ ɔ́kplá kú nū ā í wɛ ɔyí kú ɔnyā ōcɛ̄ kú nū ā ŋ́.

¹⁶Ó ka eko nɛ̄ ɔ̄cɛ ā ɔ́ɔ le miya ka anúɔ gáā kɔ̄ agbénú kú nū lɛ ayí nū ā, ka ɔ́ gáā je ɔyí kú ɔnyā ōcɛ̄ ā fíyɛ́ ɔ́kplá ā, o ŋmá lɛ ō je ukpɛ̄ nōo wɛ ákú nū ā lɛ ɔyí ɔnyā ōcɛ̄ kú nū ā ŋ́.

¹⁷Ó ka ɔ́kplá kú nū ā ɔ́ɔ géē lɛ āyā ɛpa kú agbénú kú nū, abɔ̄ ɛ́nɛ́ nū í wɛ ɔnyā ōcɛ̄ kú ádā nū ŋ́ nááná ā. Ó ka ɔ̄cɛ ā ɔ́ɔ géē je ukpɛ̄ kú ɔ́kplá ā lɛ ɔ́kplá kú nū piíí.

¹⁸Ó ka ɔ́dāŋ ka ɔ̄cɛ lɛ ɔyí nōo lɛ īkpɛ̄yí olɔfú, nōó páhɔ̄ kú ɛ́nɛ́ nū mɛ́mla ádā nū ŋ́.

¹⁹Ó ka ɛ́nɛ́ nū mɛ́mla ádā nū géē bī ɔ̄ nyɔ̄ gé lɛ anyākwɔ́cɛ kú igelī nēé lā ā, cɛ́ɛ́ kéē lɛ̄ ɛpɔ̄ ka tū ɔ̄.

²⁰Ó ka ɛ́nɛ́ nū mɛ́mla ádā nū géē da uwá ka ɔyí aá ā ɔ́ɔ gē yíkpɛ̄yí olɔfú tá aá. Ka ɔ́ɔ tá ō lɛyítáajɛ lɛ aá, ɔ́ɔ klla gē ŋmó ije bónū klla í gwá ejé nɛ̄hi.

²¹Ó ka ācɛ kú igelī nɛ̄hi ā géē tá ɛcɔ̄ klá anú kéē lɛ ɔ́ ŋmó. Cɛ́ɛ́ kú ɔdōbɔ̄bí ɛ́gɔ́ɔmā kóō mɛ ŋmá ipú aá. Ó ka ācɛ kú Ísrɛ̄lu dóódu ɛ́ɛ géē pó ɔdā nōo yá ā, cɛ́ɛ́ kē í yúúfi.

²²Ó ka ɔ́dāŋ ka ɛ́ɛ lɛ ɔ̄cɛ dóódu tū olī, ohígbū ɔdōbɔ̄bí nɛ̄ ɔ́ɔ yá ā,

²³okwū kú nū ɔ́ɔ gáā plicō ɔcí ɔ́ɔmā gbɔ́ɔ̄cī ŋ́. Ó ka ɛ́ɛ géē je ɔɔ́ nyi ícíícɛ ɔ́ɔmā, ohígbū ka, okwū nɛ̄ ɔ́ɔ playicō ɔcí gbó ɔ̄cī géē cɛ̄ lɛ Ɔwɔicō í tókónu lɛ uwá. Ó ka ɛ́ɛ kwú okwū ā nyi cɛ́ɛ́ kóō híī je ajɛ nɛ̄ ɛ Ɔwɔicō ɔ́ɔ́ yɔ̄ ī je lɛ uwá ā tēelihɔ ŋ́.