Read idoma OBLATŪKÍNE 22 Bible Online

OBLATŪKÍNE 22 - idoma bible

OBLATŪKÍNE 22

¹“Umósīsi klla yɔ̄ ī kɛla gɔbū kpɔ́. Ó ka ɔ́dāŋ ka ɛ́ɛ̄ le ɛna ámāŋ, álá kú ɔ̄cɛ Ísrɛlu, ɔmáapú uwā, má le hábɔ̄ yɔ̄ gē kwu, kéē híī lɛ eyī gwū ɔ̄ tá ŋ́, amáŋ ɛ́ɛ̄ lɛ ɔ́ kwú gé lɛ óndú nū

²Ó ka ɔ́dāŋ ka, óndú nū ɔ́ɔ lá ɛga oligbó, ámāŋ ka ɛ́ɛ̄ jé ɔ̄cɛ nōo lɛ ā ŋ́, ka ɔ́ɔ lɛ ā, ɛ́ɛ̄ kwú ɔ̄ ú ga ɔlɛ́ uwā. Ka ɔ́dāŋ ka óndú nū gā, ɛ́ɛ̄ kwú ɔ̄ ú lɛ ɔ́.

³Ó ka ɛ́ɛ géē yá ɔdā ékpónú ɔ́ɔmā, eko nɛ̄ ɛ́ɛ lɛ ijakī, īlī, ámāŋ ɔdā dóódu kú ɔ́mpa uwā, nōo gebí pīyɛ̄.

⁴Ó ka ɔ́dāŋ ka ɛna, álá, ámāŋ ijakī kú ɔ́mpa uwā má gwōnū, ka ɛ́ɛ lɛ eyī kwū ɔ̄ tá ŋ́, amáŋ ɛ́ɛ tá ɔ̄ abɔ̄ kéē kwú ɔ̄ ú háyi icō kpɔ́.

⁵Ó da uwá ka ācɛnyā ɔ́ɔ cíkā ō lɛ ɔdōwīyē kú ācɛnyīlɔ wiyē ŋ́. Ācɛnyīlɔ ɔ́ cíkā ō lɛ ɔdōwiyē kú ācɛnyā wiyē ŋ́ dúú. Ó ka Ɔwɔicō ɔ́ɔ gē wɔ́tū ɛdɔ kú ācɛ nēe ī yá aɔ́dēelihɔ ɛ́gɔ́ɔmā ā.

⁶Ó ka eko nɛ̄ ɛ́ɛ lɛ ɔlɛ́ kú ígbáanɔ má, nɛ̄ ígbáanɔ ā ɔ́ɔ lɛ ɔtū klá ayí kú nū, ámāŋ ó lɛ ayí hɛ́ tū ɔɔ̄, lɛ ɔtū klá anú, ó ka ɛ́ɛ híī kwú ɛ́nɛ́ ígbáanɔ ɔ́ɔmā ŋ́.

⁷Ó ka ɛ́ɛ lɔfú kpó ayí kú ígbáanɔ ā glá, ámāŋ, ɛ́ɛ habɔ̄ ɛ́nɛ́ uwā tá kóō nyɔ̄, cɛ́ɛ́ ká uwā ā kéē yēeyī likpō ipú ɛcɛ ā.

⁸Ó da uwá ka eko nɛ̄ ɛ́ɛ lɛ inu ɛ̄pɛ̄pɛ̄ gwó, ka ɛ́ɛ bī odée lɛ igá hɛ́ tū okónōgwu kú ɛyí nū biílí, ohígbū nɛ̄ ɔ̄cɛ géē míya ŋmá anú nú í gāá gekwú, nɛ̄ ɛ́ɛ géē lé ɛpɔ̄bí kú ɔ̄cɛ ō ŋmó.

⁹Ó klla da uwá kéē nyi ɔdɛ̄hɔ̄ ɔhá tū ipú ɛhɔ̄ kú Ufáyin kú uwā ŋ́. Ka eko dúú nɛ̄ ɛ́ɛ lɛ ɔdɛ̄hɔ̄ ɔhá ā nyi tū ɔ̄, ka ɛ́ɛ gáā lé ɔdā nēé nyi tū ɔ̄ ɛ́ɛ́ nɛ̄ ɛ́ɛ gē lé īkpɔ́cí kú ufáyín ā gɛ ŋ́, amáŋ odúúdú nū kwú pīya ákú Óndú ā ɛɛ́

¹⁰Ó ka ɛ́ɛ híī gbō ɛna mɛ́mla ijakī bɔ́há kéē hɛ́hɔ̄ lɛ uwá ŋ́.

¹¹Ó klla da uwá ka ɛ́ɛ híī bī īlī nɛ̄ ɛ́ɛ bī ɛdɔ owú ɛpa le tá ɔ̄ wiiyē ŋ́.

¹²Ó ka ɛ́ɛ géē lɛ owútígbíngbili playi okónogwu ɛnɛ kú úwé kú uwā.

¹³Ó ka ekōhī ɔ̄cɛ ɔ́ɔ lɔfú lɛ ɔnyā lɛ, le gwutá mla anú, nɛ̄ ɔ́ɔ je cā ɔ̄ eyī glá.

¹⁴Cɛ́ɛ́ ɔ́ɔ lɛ ɛ̄kɛ̄mgbɛ̄ ká bá ɔnyā ā ka, eko nɛ̄ anúɔ lɛ ɔ́ ā, anúɔ má ka ɔ́ɔ lɛ ɔ̄cɛnyīlɔ jé gbɔbū ɛ́ɛ́ nɛ̄ ɔ́ɔ wā ɔlɛ́ anúɔ á.

¹⁵Ó ka eko nɛ̄ ɛlā ɛ́gɛ́nyā ɔ́ɔ le yá, ɛ́nɛ́ mɛ́mla ádā kú ɔ̄cɛnyā ā kéē kwú īlī nɛ̄ oyī hɛ́ kwú ɔ̄ ɛ̄cī aflɛ́yí nɛ̄ ɔyí uwā gwutá mla ɔbá nū ā ú, mafú ɔgbɔ́ kú ɛpɔ̄ lɛ ācohɛ́pɔ̄ ā. Cɛ́ɛ́ kéē jé ka, ɔyínɔ̄nyā ā ɔ́ɔ jé ɔ̄cɛnyīlɔ ɛ́ɛ́ nɛ̄ ɔ́ɔ ga ɔlɛ́ ɔbá ā ŋ́.

¹⁶Ó ka ádā ɔnyā ā ɔ́ɔ géē ka ka anúɔ je ɔyí anúɔ ā lɛ ɔbá ā á, amáŋ abālɔbányā, ɔ́ɔ dɔɔ̄kā ka ɔyí anúɔ ā kóō wɛ ɔnyā nū ɛ́ɛ́ gɛ ŋ́.

¹⁷Ka ɔ́ɔ le ije cē bá ɔyí anúɔ ā ka ɔ́ɔ lɛ ɔ̄cɛnyīnlɔ jé ɛ́ɛ́, nɛ̄ ɔ̄ wā ɔlɛ́ anúɔ á. Amáŋ ɛ́ɛ má īlī agōdō nɛ̄ oyī ɔ́ɔ hɛ́ kwú ɔ̄, ɛ̄cī nɛ̄ anú mla ɔbá nū gwutá kú aflɛ́yí ā. Ɛ̄nyā ɔ́ɔ géē mafú lɛ uwá ka ɔyí anúɔ í jé ɔ̄cɛnyīlɔ dúúmā ɛ́ɛ́ nōó ga ɔlɛ́ nū ā ŋ́.

¹⁸Cɛ́ɛ́ anyākwɔ́cɛ kú igelī nɛ̄ŋcɛ́ ā, géē lɛ ɔbá ɔyí nū ā kwú lɛ ɔɔ́ gɔ́.

¹⁹Ó ka ɛ́ɛ klla géē hɛ́ ɔbá kú ɔnyā olóofī kú ije nɛ̄hɛ́ ofɛhɔ̄, nōó géē gbā lɛ ádā kú ɔnyā ā, ohígbū ka ó lɛ uwēyī kpó tū ɔyínɔ̄nyā kú Ísrɛ̄lu éyi ɛyí. Ó ka ɔyí ā ɔ́ɔ í wɛ ɔnyā nū kpɔ́. Ó ka ɔ́ɔ klla gáā tá ɔ̄ɔ gbóógbóō igbɔhá ɛ́ɛ́ gɛ ŋ́, eko nɛ̄ ɔ́ɔ géē yēeyī gáā kwu ā.

²⁰Ó ka amáŋ ɔ́dāŋ ka ɛlā ā wɛ ɔkwɛ̄yi, nɛ̄ ɔdōōcābɔ̄ dóódu í yɔ̄ ka ɔyí ā í jé ɔ̄cɛnyīlɔ, ɛ́ɛ́ nōó ga ɔlɛ́ ɔbá ā ŋ́,

²¹ka ɛ́ɛ lɛ ɔyínɔ̄nyā ā bī ga eyīyɛ̄ɛcɛ kú ɔlɛ́ ádā nū, cɛ́ɛ́ kú ācɛnyīlɔ kú igelī ā kéē lɛ ɛcɔ̄ tá klá ɔ́, kéē lɛ ɔ́ ŋmó. Ohígbū ká ɔ́ɔ lɛ ɔdōbɔ̄bí yá ɔtāhɛ̄ ācɛ ɔlɛ́ uwā, oŋmá lɛ ajā nɛ̄ ɔ́ɔ gbo ɔlɛ́ ádā nū, ɛ́ɛ́ ká ɔ̄ ga ɔlɛ́ ɔbá nū ā. Ó da uwā ka ɛ́gɔ́ɔmā ɔ́ɔ géē nū ɔdōbɔ̄bí ɛ́gɔ́ɔmā ŋmá ɔlɛ́ uwā.

²²Ó klla da uwá ka ɔ́dāŋ ka ɛ́ɛ le ɔ̄cɛ dúúmā kwú yɔ̄ gē gwutá mla ɔnyā kú ɔ́mpā nū, ka ɛ́ɛ lɛ ɔ̄cɛnyīlɔ ɔ́ɔmā mɛ́mla ɔnyā, nɛ̄ ɔ́ɔ yɔ̄ gē gwutá mla anú ā kpó ŋmó. Ka ɔwɛ ɛ́gɔ́ɔmā nɛ̄ ɔdōbɔ̄bí ɛ́gɔ́ɔmā ɔ́ɔ géē mɛ ŋmá ɔlɛ́ uwā glá á.

²³Ó klla da uwá ka ɔ́dāŋ ka ɛ́ɛ lɛ ɔ̄cɛ dúúmā kwú igelī ɔlɛ́ uwā, yɔ̄ ī gwutá mla ɔyípɔ̄ncɛ́nyā nɛ̄ ɔ̄cɛ ɔhá lɛ ɛhi nū yá kóō lɛ ɛɛ́,

²⁴ka ɛ́ɛ lɛ uwá ɛpɛlɛ́ɛpa kpó wɛ̄ɛcɛ, cɛ́ɛ́ kéē lɛ ɛcɔ̄ tá klá uwá kéē lɛ uwá kpó ŋmó. Ɔnyā ā cíkā ō kwú ohígbū ka eko nōó yɔ̄ gē gwutá mla anú igelī ā, ó dɛ̄gba ká ācɛ kéē wā í tá ɔ̄ abɔ̄ ŋ́. Ɔ̄cɛnyīlɔ ā cíkā ō kwú ohígbū koó yɔ̄ gē gwutá mla ɔ́ncɛ́nyā nēé lɛ ɔ̄kā nū da ɛɛ́ ā.

²⁵Umósīsi klla da uwá ka ɔ́dāŋ ka ɔ̄cɛ dúúmā lɛ ɔyípɔ̄ncɛ́nyā ɛ́gɔ́ɔ́mā hɛ́ bá ajɛ eyīyɛ̄ɛcɛ ipú igelī ā, ɔ̄cɛnyīlɔ ā ōfōōfūnū, nɛ̄ ɛ́ɛ géē ŋmó á.

²⁶Ó ka ɛ́ɛ gáā yá ɔ́yncɛ́nyā ā ɔdā dúúmā ŋ́, ohígbū ka ɔ́ bīyíne dúúmā nōo cíkā kéē ŋmó ɔ̄ ŋ́. Íne ā wɛ éékpónú mla íne kú eko nɛ̄ ɔ̄cɛ lɛ unu nu tá ɔ̄cɛ ɔhá lɛ ɔ́ ŋmó ā.

²⁷Ohígbū ka ɔ̄cɛ ā te ɔ̄yípɔ̄ncɛ́nyā ā hɛ́ bá ajɛ ipácí, nááná nɛ̄ ɔnyā ā dɛ̄gba kú otábɔ̄, amáŋ ɔ̄cɛ dúúmā í wā í tá ɔ̄ abɔ̄ ŋ́.

²⁸Ó da uwá ka ɔ́dāŋ ka ɛ́ɛ lɛ ɔ̄cɛ dúúmā kwú yɔ̄ gē hɛ́ ɔ̄yípɔ̄ncɛnyā nōo tá ɔlɛ́ ádā nū bá ajɛ,

²⁹ka ɔnyīlɔ nōo hɛ́ ɔ̄ báajɛ ā géē cílá ádā kú nyā ije nɛ̄hɛ́ ofɛpa cigwó, cɛ́ɛ́ ɔ́ncɛ́nyā ā kwú pīya ɔnyā nū, ohígbū koó lɛ ɔ́ hɛ́ báajɛ le gwutá mla anú abɔ̄fú. Ó ka ɔ́ klla gáā tá ɔnyā ā gbóógbóō ipú oyēeyī kú nū ɛ́ɛ́ gɛ ŋ́.

³⁰Ó da uwá ka ɔ̄cɛ dúúmā ká ɔ́ɔ híī je uwēyī lɛ ádā nū, ŋmá lɛ ō gwutá mlá anyā ádā nū ŋ́.