Read idoma OBLATŪKÍNE 23 Bible Online

OBLATŪKÍNE 23 - idoma bible

OBLATŪKÍNE 23

¹Umósīsi klla yɔ̄ gē kɛlā lɛ ācɛ Ísrɛ̄lu gɔbū kpɔ́ ka ɔ̄cɛ dóódu nɛ̄ ɛ́ɛ lɛ ɔ́ búdá í gáā wɛ éyi kú ācɛ ɔlɛ́ Óndú ā ŋ́, ɛ́ɛ́ nōó kōō ī ga ɛga ojīlā kú ācɛ ɔlɛ́ Óndú ā ŋ́.

²Ó da uwá ka ɔyí ōbībá dúúmā ámāŋ ka ɔ̄cɛ dúú nōo ŋmá ayááyí ɔ́migwó kú ɔ̄cɛ ɛ́gɔ́ɔmā í gaá wɛ éyi kú ācɛ ɔlɛ́ Óndú ā ŋ́.

³Ó da uwá ka ācɛ kú Ámɔ̄ri, ámāŋ ācɛ kú Umówābu, kwu ayááyí ɔ́migwó kú uwá nááná í gáā wɛ ācɛ ɔlɛ́ Óndú ā ŋ́.

⁴Ó ka ɛ́ɛ tá kéē je ɔdōlé mɛ́mla éŋkpɔ̄ lɛ uwá, nēe wɛ ācɛ Ísrɛ̄lu ā, eko nɛ̄ ɛ́ɛ bá ī wā ŋmá Íjīpiti ā. Ó ka ɛ́ɛ klla le Ubálam, ɔyí kú Ubéyɔ nēe ŋmá Upétɔ, ipú Umɛsopotémīya ā plá, kóō lɛ okónu tá lɛ uwá.

⁵Ó da uwá ka amáŋ, Óndú ā, Ɔwɔicō kú uwā ɔ́ɔ́ jāhɔ̄ lɛ Ubálam ŋ́. Ikɔkɔ nōó géē tá okónu lɛ uwá ā, ɔ́ɔ gbɔɔ́ ō hɔ́hā ce uwá, ohígbū ka ɛ́ɛ he Óndú ɔtū

⁶Ó da uwá ka ɛ́gɛ́ dúú, nɛ̄ éwo kú uwā ɔ́ɔ í yēeyī gáā kwu lɛ ā, ka ɛ́ɛ híī yá ɔdā dúúmā nōo géē tá aéwo ɔ́ɔmā abɔ̄, kóō lɔhi lɛ uwá gbóógbóō ŋ́.

⁷Ó da uwá kéē híī lɛ eyī gwō ācɛ kú Ɛ́dɔm bónū ŋ́, ohígbū ka ɛ́ɛ wɛ ɔmáapu uwā nɛ̄. Ó klla da uwá ka ɛ́ɛ híī lɛ eyī gwō ācɛ kú Íjīpiti bónū ŋ́, ohígbū ka ɛ́ɛ tɛtɛ lā abɔ́ɔ.

⁸Ó da uwá ka ayááyí ɔ́mɛtá kú ācɛ aéwo ɔ́ɔmā, nyɔ̄ ɔbū ā, ka ɛ́ɛ géē gbɔɔ́ ō cɛ̄ lɛ uwá wɛ ipú ācɛ ɔlɛ́ Óndú ā.

⁹Umósīsi da uwá ka ɛ́ɛ híī yá ɔdōbɔ̄bí dúú nɛ̄ ɔ́ɔ í je uwá tēelihɔ eko nɛ̄ ɛ́ɛ bá aáklɔ̄kpɛ kú ɛfú ā ŋ́.

¹⁰Ó ka ɔ́dāŋ ka ɔ̄cɛ dúúmā kwú iyī nū ú tēelihɔ ohígbū koó nā ɔ̄na abɔ̄ ó yɔ̄ ī gwutá mla ɔnyā, ka ɔ̄cɛ ɛ́gɔɔ́ɔmā ɔ́ɔ í klá eyīyɛ̄ɛcɛ kú ɛga nɛ̄ aáklɔ̄kpɛ ā bá ā.

¹¹Ó ka ɔ̄cɛ ɛ́gɔ́ɔmā lɔfú gwīiyē ɔ̄nɔ̄ɔ̄nɛ̄ glá, cɛ́ɛ́ ó lɛ cīgbīhi ga ipú aáklɔ̄kpɛ ā.

¹²Ó da uwá ka ɛ́ɛ cíkā ō lɛ ɛga éyi iyɛ̄ɛcɛ kú aáklɔ̄kpɛ nɛ̄ ɛ́ɛ géē ga ɔwɛ̄ɛcɛ.

¹³Ó klla da uwá ka eko dúú nɛ̄ ɛ́ɛ gē nyɔ̄ ipácí, ɛ́ɛ bī ɔcí nɛ̄ ɛ́ɛ géē bī lɛ bu ɔ̄gɔ̄ ō ga ipácí tū ɔ̄, cɛ́ɛ́ kú ɔ̄ɔ lɛ ajɛ gwu klá anú.

¹⁴Ó da uwá kéē lɛ ɛga nɛ̄ ɛ́ɛ bá ipú aáklɔ̄kpɛ ā tū yēŋēē ohígbū ka Ɔwɔicō kú uwā ɔ́ɔ yɔ̄ abɔ́ɔ kóō gbō uwā, cɛ́ɛ́ kú ɔ̄ klla cɛ̄ lɛ uwā yá aólɛlā kú uwā lé. Ó ka ɛ́ɛ híī yá ɔdā dúúmā nɛ̄ ɔ̄ í cɛ̄ lɛ Óndú ā cīgbīhi kwu uwá ŋ́.

¹⁵Ó da uwá ka ɔ́dāŋ ka, ɔfiyɛ le kwu ŋmá ɛgiyí óndú nū, wā ɛgiyí uwā gaá tayínū, ó ka ɛ́ɛ híī je ɔ́ nū cīgbīhi ga ɛgiyí óndú nū ā ŋ́.

¹⁶Ó ka ɛ́ɛ lɔfú lā ipú igelī nɛ̄ŋcɛ́ kú uwā dóódu nōo he ɔ́ ɔtū ā, ka ɛ́ɛ yá ɔ̄ ɔdōbɔ̄bí ŋ́.

¹⁷Umósīsi klla da uwá ka ɔ̄cɛ Ísrɛ̄lu dúúmā, kwu ɔ̄cɛnyīlɔ mɛ́mla ɔ̄cɛnyā, kóō híī wɛ akwuna kú agbla kú ɛcí dúúma ŋ́.

¹⁸Ó klla da uwá dúú ka ɛ́ɛ híī bī ije dúúmā nɛ̄ ɔ̄cɛ ɔ́ɔ lɛ ŋmá akwuna ō yá kú agbla kú ɛcí ā wā ipú Áklɔ̄kpīihɔ kú Óndú ā, nōo wɛ Ɔwɔicō kú uwā ā, í yá okónu nɛ̄ ɛ́ɛ ce ā jīla ŋ́. Ó ka Óndú ā ɔ́ɔ gē wɔ́tū akwuna kú agbla kú ɛcí ā.

¹⁹Ó klla da uwá ka eko dúú nɛ̄ ɛ́ɛ lɛ ije ámāŋ ɔdōlé kplá ɔ̄cɛ kú Ísrɛ̄lu dúúmā, ó ka ɛ́ɛ híī lɛ ije tá ɔ̄ ɔkwu lɛ uwá ŋ́.

²⁰Ó ka ɛ́ɛ lɔfú lɛ ije tá ije ɔkwu lɛ éwɔhá nɛ̄ ɛ́ɛ lɛ ije kplá anú ā, ámāŋ, kéē híī lɛ ije tá ije nɛ̄ ɛ́ɛ le kplá ācɛ Ísrɛ̄lu ā ɔkwu ŋ́. Ó da uwá kéē lɛ íne ā tū cɛ́ɛ́ Ɔwɔicō ɔ́ɔ géē hɔ́hā ce uwá ipú ajɛ nɛ̄ ɛ́ɛ gáā mīyɛ kéē lā ā.

²¹Umósīsi klla da uwá ka ɔ́dāŋ ka ɛ́ɛ lɛ okónu ce lɛ Óndú ā, nōo wɛ Ɔwɔicō kú uwā ā, ka ɛ́ɛ lɛ ɔdā nɛ̄ ɛ́ɛ cokónu nū lɛ Óndú ā, yá jīla lɛ ɔ́. Ohígbū ka ɔ́ɔ wɛ íne ōbīya kú ɔ̄cɛ ká ɔ̄ híī yá okónu nɛ̄ ɔ́ɔ ce ā ŋ́.

²²Ó ka ɔ́dāŋ nɛ̄ ɔ̄cɛ ɔ́ɔ cē Óndú ā oji ŋ́ nááná, ɔ́ɔmā ɔ́ɔ wɛ íne ōbīya ŋ́.

²³Ka amáŋ ɔ́dāŋ ka ɔ̄cɛ ɔ́ɔ lɛ abɔ̄ tū iyī nū ɔtū le oji cē, ka ɛ́ɛ má ka ɛ́ɛ lɛ oji ā yá lɛ ɔ́.

²⁴Ó klla da uwá ka ɔ́dāŋ ka ɛ́ɛ yɔ̄ gē yɛ ipú ɛhɔ̄ kú ufáyin kú ɔ̄cɛ dúúmā, ka ɛ́ɛ lɔfú lé īkpō kú ufáyin kú nū ā glá, amáŋ ɛ́ɛ gáā hɛ́ tū ɛkpa ga ɔlɛ́ ŋ́.

²⁵Ó ka ɔ́dāŋ nɛ̄ ɛ́ɛ yɔ̄ gē yɛ ipú ɛhɔ̄ īkpɔ̄dɛ̄hɔ̄ kú ɔ̄cɛ dúúmā, áluka ɛ̄nɛ̄ ɛ́ɛ lé glá ā, nɛ̄ ɛ́ɛ géē cē á, amáŋ ká ɛ̄ɛ híī bī ɛ̄wā le hɛ́ odúúmā ŋmá ajɛ ŋ́.