Read idoma OBLATŪKÍNE 24 Bible Online

OBLATŪKÍNE 24 - idoma bible

OBLATŪKÍNE 24

¹Umósīsi klla yɔ̄ ī kɛlā gɔbū kpɔ́ ka ekōhī ɔ̄cɛ lɛ ɔnyā lɛ, nɛ̄ igbīhāajɛ nōó he ɔ́ ɔtū gɛ ŋ́, ohígbū ka ɔ́ɔ lɛ odée má ɛgīyí ɔnyā ā nōó he ɔ́ ɔtū ŋ́. Anɔ́ɔ ɔ́ɔ lɛ ɔkpá ɔnyā-ō-tá je lɛ ɔnyā ā, kwú ɔnyā ā ú nū ŋmá ɔlɛ́ nū

²Anɔ́ɔ ɔ̄cɛ ɔhá ɔ́ɔ le ɔnyā ā lɛ á.

³Anɔ́ɔ ɔ̄cɛ ɔhá ā ɔ́ɔ klla tá ɔnyā ā kpɔ́, le ɔkpá-ɔnyā-ōtá je lɛ ɔnyā ā, lɛ ɔ́ nū ŋmá ɔlɛ́ nū kpɔ́. Ámāŋ, ɔ̄cɛ í jé nɛ̄ ɔbá ɔmpa nɛ̄ ɔ́ lɛ ɔ́ɔmā gekwú á.

⁴Ó ka ɛ́gɛ́dúú nɛ̄ ɔ́ɔ lɛ, ɔbá aflɛ́yí kú nū ā, ɔ́ɔ gáā lɛ ɔ́ igbɔhá glá ɛ́ɛ́ gɛ ŋ́. Ó ka ɔ́ɔ má ɔnyā ā bɛ̄ɛka ɔ̄cɛ nōo kwú tēelihɔ ā. Ó klla ka ɔ́dāŋ ka ɔbá ā ɔ́ɔ lɛ ɔ́ lɛ igbɔhá, ɔ́ɔmā wɛ ɔdōbɔ̄bí nɛ̄hi ɛgiyí Ɔwɔicō. Ó ka ɔ̄cɛ dúúmā ɔ́ cíkā ō yá ɛdɔ kú íne ō bīya ɛ́gɔ́ɔmā ipú ajɛ nɛ̄ Óndú ā, nōo wɛ Ɔwɔicō kú uwā ā ɔ́ɔ yɔ̄ ī je lɛ uwá ā ŋ́.

⁵Ó klla da uwá ka ɔ́dāŋ ka, ɔ̄cɛ lɛ ɔnyā ɛ̄yīpɛ̄ lɛ, ka ɛ́ɛ híī pi ɔ̄cɛ ɔ́ɔmā ga ɔgbɛ́fú ŋ́, ámāŋ ka ɛdɔ úklɔ́ ɛcɛ dúúmā iháyí ɔ́ɔmā ŋ́. Cɛ́ɛ́ kú ɔ̄ klá ɔlɛ́ mɛ́mla ɔnyā nū ká ɔtū ká ɔ̄ he uwá tɔ̄há.

⁶Ó da uwá ka eko nɛ̄ ɛ́ɛ lɛ odée kplá ɔ̄cɛ, ka ɛ́ɛ híī je ɛgɔ̄ ōgbā ɔdá kú nū ká ɔ̄ wɛ ɔdōcabɔ̄ ŋ́. Ó ka ɔ́dāŋ ka ɛ́ɛ kwú ɛgɔ̄ kú nū ú lɛ ā, ayíka ɛga o lé ɔdōlé kú ācɛ ɔlɛ́ nū nɛ̄ ɛ́ɛ gwū tū ɔ̄ á.

⁷Ó ka ɔ̄cɛ dúúmā nɛ̄ ɔ́ lɛ ɔ̄cɛ Ísrɛ̄lu ɔ́mpa nū kwú uwī, kwú ɔ̄ ú yá ɔfiyɛ ámāŋ kwú ɔ̄ ú lá, ka ɛ́ɛ lɛ ɔ̄cɛ nōo yá ɔdā ɛ́gɔ́ɔmā ŋmó. Ó ka ɔwɛ ɛ́gɛ́nyā nɛ̄ ɛ́ɛ í nū ucē obɔ̄bí ɛ́gɛ́nyā ŋmá ajɛ kú ācɛ Ísrɛ̄lu á.

⁸Ó ka ɔ́dāŋ ka ɛ́ɛ lɛ ōcē obɔ̄bí kú ɔkpíyē má iyē kú ɔ̄cɛ kéē lɛ odúúdú ɔdā nɛ̄ ācogwɛ́ɛya kú Ulífāyi í ka lɛ uwá ā yá jīla

⁹Ó ka ɛ́ɛ blakwu ɔdā nɛ̄ Óndú ā, nōo wɛ Ɔwɔicō kú uwā ā yá Umíriyam, eko nɛ̄ ɛ́ɛ bá ī bɛ̄cɛ ŋmá Íjīpiti ā.

¹⁰Ó da uwá ka eko nɛ̄ ɛ́ɛ lɛ ɔdā dúúmā kplá ɔ̄cɛ, ka ɛ́ɛ híī ga inu ɔlɛ́ nū nyɔ̄ gaá kpó īlī nɛ̄ ɔ́ɔ gáā kpó ce uwá abɔ̄ kwɛyí ɛ́kplá ā ŋ́.

¹¹Ó ka ɛ́ɛ gbēyī ɔ̄cɛ ā ɛcɛ, cɛ́ɛ́ ká ɔ̄ bī ɔ̄ wɛ̄ɛcɛ abɔ̄yī nū.

¹²Ó ka ɔ́dāŋ ka ɔ̄cɛ ɔ́ɔmā wɛ ogbɛhá, ka ɛ́ɛ híī bī īlī ōcabɔ̄ ā otū gbɔ́ɔcī ŋ́.

¹³Ka ɛ́ɛ bēē kpó īlī ā gē lɛ ɔ́ ɔ̄nɔ̄ɔ̄nɛ̄ dóódu, cɛ́ɛ́ ká ɔ̄ le klá iyē gbiyɔ̄lā gbɔ́ɔ̄cī. Ó ka ɛ́ɛ lɛ yá lɛ ā, ɔtū ɔ́ɔ géē he ɔ̄cɛ ā. Cɛ́ɛ́ ɔtū uwā ɔ́ɔ géē he Óndú ā, nōo wɛ Ɔwɔicō kú uwā ā.

¹⁴Ó ka ɛ́ɛ híī pī ɔ̄cotɛ̄hɔ̄ ogbɛhá nɛ̄ ɛgbá í ije í ce ɔ́ ámāŋ ɔ́ɔ kōō wɛ ācɛ Ísrɛ̄lu ɔ́mpa uwā ámāŋ aílɔwá nēe lā ipú igelī nɛ̄ŋcɛ́ kú uwā nēe lɛ úklɔ́ yá lɛ uwá tū ŋ́.

¹⁵Ó da uwá kéē lɛ ije kú uwā gbā lɛ uwá ɛcī dóódu gbɔbū ɛ́ɛ́ ka otú kóō bī. Ohígbū ka ɔ̄coyúklɔ́ ā ɔ́ɔ cɛgbá ije ā, kē kwú eyī í kpó ce ɔ́ ɛ́ɛ́. Ó ka ɔ́dāŋ ka ɛ́ɛ gbā ije ā lɛ uwá ŋ́, ɛ́ɛ géē jikwū klá Óndú ā, ohígbū ɔdā nɛ̄ uwá yá ā cɛ́ɛ́ ɛ́ɛ géē lɛ́pɔ̄bí kú íne kú Óndú ā ō bīya.

¹⁶Ó ka ɛ́ɛ gāá ŋmó aɛ́nɛ́ ámāŋ aádā ācɛ dúúmā kwɛyí ɔdōbɔ̄bí nɛ̄ ayí uwā yá ŋ́, ɛ́ɛ́ nɛ̄ ɛ́ɛ gē ŋmó ayí kwɛyí ɔdōbɔ̄bí nɛ̄ aɛ́nɛ́ ámāŋ aádā uwā yá ŋ́. Ó ka ɛ́ɛ lɔfú ŋmó ɔ̄cɛ ohígbū ɔdōbɔ̄bí nɛ̄ anú abɔ̄yī nū yá ā glá.

¹⁷Ó klla da uwá kéē híī pīya ayókwū mɛ́mla aúgbɔga tū ŋ́. Ó da uwá kéē mīyɛ īlī kú anyōkwū kwɛyí ɛ́kplá nɛ̄ ɛ́ɛ je lɛ uwá ā ŋ́.

¹⁸Umósīsi da uwá kéē bla ka, ɛ́ɛ tɛtɛ wɛ aɔ́fiyɛ ajɛ kú Íjīpiti, ɛ́ɛ́ nɛ̄ Óndú ā, nōo wɛ Ɔwɔicō kú uwā ā, ɔ́ɔ hɛ́ uwá tá á. Ohígbū ɔ́ɔmā yá nɛ̄ anúɔ je ɔdā lɛ uwá yɔ̄ á.

¹⁹Ó da uwá ka eko nɛ̄ ɛ́ɛ le ɔdɛ̄hɔ̄ kú uwā cē, nɛ̄ ɛ́ɛ kwú mlanyī ō kpó aóhī ŋmá ɛhɔ̄, ó ka ɛ́ɛ klla kwúcē nyɔ̄ í kpó uwā ɛ́ɛ́ gɛ ŋ́. Ó ka ɛ́ɛ habɔ̄ aɛ́nɛ̄ e hile ā tá lɛ ayókwū, anyōkwū, mɛ́mla aéwɔhá, cɛ́ɛ́ ka Óndú ā, nōo wɛ Ɔwɔicō kú uwá ā, ká ɔ̄ hɔ́hā ce uwá ipú ɔdā dóódu nɛ̄ ɛ́ɛ géē yá ā.

²⁰Ó klla da uwá ka eko nɛ̄ ɛ́ɛ lɛ īkpō kú ɔcí nēé hī ka ólíifu ā kpó wū ŋmá ico, ka ɛ́ɛ nyɔ̄ gaá wū aɛ́nɛ̄ e hile ā ŋ́. Ó ka ɛ́ɛ habɔ̄ ɔ̄ tá lɛ ayókwū, anyōkwū mɛ́mla aéwɔhá.

²¹Ó da uwá kpɔ́ ka eko nɛ̄ ɛ́ɛ le īkpō kú ufáyin kú uwá kpó hɛ́ ŋmá anū, ka ɛ́ɛ kwúcē igbɔ́mpa gaá hɛ́ kpɔ́ gɛ ŋ́. Ó ka ɛ́ɛ̄ habɔ̄ īkpō ufáyin nēe hile kwu ɔcí ā tá lɛ ayókwū, anyōkwū mɛ́mla aéwɔhá.

²²Ó da uwá ka ɛ́ɛ híī je mlamyī ka uwá tɛtɛ wɛ aɔ́fiyɛ ajɛ kú Íjīpiti ŋ́. Ó ka ɔdā nɛ̄ ɔ́ɔ yá ɛ́ɛ́ nɛ̄ anúɔ gē je ɔ́da ā lɛ uwá ā yɔ̄ abɔ́ɔ á.