Read idoma OBLATŪKÍNE 25 Bible Online

OBLATŪKÍNE 25 - idoma bible

OBLATŪKÍNE 25

¹Umósīsi klla yɔ̄ ī kɛlā lɛ uwá gɔbū kpɔ́. Ó ka ācɛ lɔfú bī ikpɛ́lā wā inɛ̄pɔ̄, anɔ́ɔ ɔ̄cɛ éyi kú uwā le ɛpɔ̄hi lé, anɔ́ɔ ɔ̄cɛ ɔhá ā le ɛpɔ̄bí lé á.

²Ó ka ɔ́dāŋ ka ɛ́ɛ le ɛpɔ̄ hɛ́ ka ɛ́ɛ lɛ ɔ̄cɛ nōo le ɛpɔ̄bí gɔ́ nɛ, ɔ̄cohɛ́pɔ̄ ā géē da ɔ̄cɛ nōo lɛ́pɔ̄bī ā ɛpɔ̄bí ā ká ɔ̄ gwutá le eyī pīya klá ajɛ. Cɛ́ɛ́ ɛ́ɛ lɛ ɔ́ gɔ̄ igbaáluka nɛ̄ íne kú ɔdā nɛ́ ɔ́ɔ yá ā ka ɔ́ lɛ ā.

³Ó ka ɛ́ɛ lɔfú gɔ́ ɔ̄ igbo ofɛpa glá, amáŋ ó gáā fíyɛ́ ɔ́ɔmā ŋ́. Ohígbū ka o gɔ́ ɔ̄ fíyɛ́ ɔ́ɔmā géē wɛ o tá ɔ̄ wāajɛ ipú eyī ójīla.

⁴Ó ka ɛ́ɛ híī lɛ odée gbō ɛna nōo gē wú īkpɔ̄dɛ̄hɔ̄ lɛ uwá okónu ŋ́.

⁵Ó ka ɔ́dāŋ ka ayínɛ́ ɛpa lā tɔ̄há, nɛ̄ éyi gekwú nōó mɔyí dúúmā ŋ́. Ó ka ɛ́ɛ cɛ̄ kú ɔnyā kú ɔyínɛ́ nōo kwú ā kóō nyɔ̄ í lɛ ɔbá ɔhá ŋmá ɛgɔhá gwū ipɔ́ɔ́nū kú ɔlɛ́ ɔbá nū tá ŋ́. Ó da uwá ka ɔ́ɔ cɛgbá ka ɔyínɛ́ ɔbá nū ká ɔ̄ kwú ɔ̄ ú ɔnyōkwū

⁶Ó ka ɔ́dāŋ kóō le lɛ ā, ɔyí aflɛ́yí nɛ̄ ɔnyā ā géē ma ā, ɛ́ɛ géē je ɔ́ ka ɔyí kú okwūmā ā nɛ. Ó yá kú ɔkwu kú okwūmā ā kóō bí ŋmá Ísrɛ̄lu ŋ́.

⁷Ó klla da uwá ka ɔ́dāŋ ka, ɔyínɛ́ ɔbá nū ā ɔ́ɔ tíne ō je ɔ́ ɔnyōkwū ŋ́, ɔnyā ā kóō le tá ɛgiyí anyākwɔ́cɛ kú igelī ā gaá da uwá ka ɔyínɛ́ ɔbá anúɔ ɔ́ɔ tá ō yúklɔ́ kú nū, o ŋmá ō je anúɔ ɔnyōkwū, cɛ́ɛ́ kú ɔkwu kú ɔyínɛ́ nū kóō híī bí ŋmá Ísrɛ̄lu gɛ ŋ́.

⁸Ó ka anyākwɔ́cɛ kú ipú igelī ā í hī ɔmáapu ɔbá nū ā igwú, géē kɛlā lɛ ɔ́. Amáŋ ɔ́dāŋ ka ɔ́ɔ tá ka anúɔ í gáā je ɔ́ onyōkwū ŋ́ kpɔ́,

⁹ka ɔnyā okwūma ā ɔ́ɔ géē nyɔ̄ iyɔ̄bū ɔyínɛ́ ɔbá nū ā ipéyī anyākwɔ́cɛ ā, cɛ́ɛ́ ɔ̄ kwú ikpó áblákpá kú nū éyi ú plá, lɛ ahɛ mī ɔ̄ eyī, cɛ́ɛ́ ó klla da ɔ́ ka ɔ́ɔmā ɔ́ɔ wɛ ɔdā nɛ̄ ɔ́ɔ gē yá ɔ̄cɛ nōó tá ō ma ɔyí lɛ okwūmā ɔyínɛ́ nū ā á.

¹⁰Umósīsi ka ācɛ í jē ipɔ́ɔ́nū kú ɔlɛ́ ɔ̄cɛ ɛ́gɔ́ɔmā ka ipɔ́ɔ́nū kú ɔnyīlɔ nēe plá ikpó eyí kú áblákpá kú nū ā.

¹¹Ó klla da uwá ka ɔ́dāŋ ka ācɛ ɛpa bá gē nuunu, anɔ́ɔ ɔnyā kú ɔ̄cɛ éyi kú uwā tíne ō tá ɔbá nū abɔ̄ o ŋmá lɛ o gaá bī apī kú ɔ̄cɛ nōo yɔ̄ gē nuunu mlá ɔbá nū ā.

¹²Ó Kéē híī méyīnyinyi ɔnyā ɔ́ɔmā ŋ́, amáŋ́ kéē lɛ ɔ́ abɔ̄ ɔ́ɔmā gwó tónū bōōbū.

¹³Ó da uwá ka ɛ́ɛ híī bī okoolo ɛpa, ɛnɛ̄hi mɛ́mla ɛnɛ̄ŋcɛ́ ipú ɛkpa kú uwā ŋ́.

¹⁴Ɛ́ɛ́ nɛ̄ ɛ́ɛ gē hɛ́ ɔ̄cɛ lé ipú ɔdā nɛ̄ ɛ́ɛ gē miya ā ŋ́.

¹⁵Ó da uwá ka ɛ́ɛ bī ɔdōmiya ɔdā okpaakpa ā le mīya ɔdā, cɛ́ɛ́ kéē yēeyī līgbó ipú ajɛ nɛ̄ Óndú ā, nōo wɛ Ɔwɔicō kú uwá ā, gáā je lɛ uwá ā.

¹⁶Ó da uwá ka Óndú ā ɔ́ɔ gē wɔ́tū ācɛ nɛ̄ ɛ́ɛ gē pī ācɛ tū ā.

¹⁷Umósīsi da uwá kéē blakwu ɔdā nɛ̄ ācɛ kú Ámālɛ̄ki ɔ́ɔ yá uwā, eko nɛ̄ ɛ́ɛ bá yɔ̄ ī bɛ̄cɛ ŋmá Íjīpiti ā.

¹⁸Ó ka ɛ́ɛ yúúfi Ɔwɔicō ŋ́, anɔ́ɔ ɛ́ɛ kpɛ́fú tá uwá ŋmá igbīhi, eko nɛ̄ ɛ̄jɛ̄ le jɛ̄ uwā ā. Anɔ́ɔ é le odúúdú ācɛ ɔlɛ́ aá nēe bá ī mlɛ́nyɔ́ igbīhi ā kpó ŋmó á.

¹⁹Ó ka eko nɛ̄ Óndú ā, nōo wɛ Ɔwɔicō kú uwā ā lɛ ajɛ ā je lɛ uwá, nɛ̄ ɛ́ɛ má lā ipú nū ɛbɔ́, nɛ̄ unwalu ɔ́ ŋmá ɛgiyí aólɛlā kú uwá dúúmā wā ɛgiyí uwā gɛ ŋ́, ka ɛ́ɛ lɛ ɛlá kwu ɔ́ kéē lɛ odúúdú ācɛ kú Ámālɛ̄ki ā kpó ŋmó, nɛ̄ ɔ̄cɛ dóódu í klla gáā blakwu uwā ipú ɛcɛ gbóógbóō ɛ́ɛ́ gɛ ŋ́.”