Read idoma OBLATŪKÍNE 26 Bible Online

OBLATŪKÍNE 26 - idoma bible

OBLATŪKÍNE 26

¹Umósīsi klla da uwá ka eko nɛ̄ ɛ́ɛ gā ipú ajɛ nɛ̄ Óndú ā, nōo wɛ Ɔwɔicō kú uwā ā, gáā je lɛ uwá ā, anɔ́ɔ ɛ́ɛ má lā anú,

²ka ɔnyɔɔnyɛ kú uwā géē kpó ikpɔ̄dɛ̄hɔ̄ kú aflɛ́yí kú nū nɛ̄ ɔ́ɔ cē ā, tū ipú ómbilí, cɛ́ɛ́ ɛ́ɛ kwú ómbilí ā ú ga ɛga ékpónú nɛ̄ ɛ́ɛ fu kéē gbā Ɔwɔicō ɛ̄gbā āa

³Ó ka ɛ́ɛ ga ɛgiyí ɔ̄cogwɛ́ɛya nōo leyīkwu Áklɔ̄kpīihɔ kú Óndú ā eko ɔ́ɔmā ā, nyɔ̄ í da ɔ́ ka, anúɔ wā í lɛ okónū cɛ̄ ɔ̄ tɛ́ɛcɛ ícíícɛ ɔ́ɔmā lɛ Óndú ā, nōo wɛ Ɔwɔicō kú anúɔ ā, ka anúɔ le bēhé i tá ipú ajɛ nɛ̄ ɔ́ɔ cókónu ō je lɛ aádáádā anúɔ ka anúɔ í je lɛ aá ɛɛ́.

⁴Ó ka ɔ̄cogwɛ́ɛya ā ɔ́ɔ géē mīyɛ ómbilí ā ŋmá abɔ̄ kú uwā, í je ɔ́ háyi iyɔ̄bū ede kú Óndú ā, nōo wɛ Ɔwɔicō kú uwā ā.

⁵Ó ka ɛ́ɛ géē kɛlā nēe bá nyā ipéyī Óndú ā abɔ́ɔ, ka aádáádā aá wɛ ācobɔ́lɔ́ɔ́lɛ́ ajɛ kú Arám, ɛ́ɛ kē lɛ ɔlɛ́ ŋ́. Ɛ́ɛ́ nɛ̄ ɛ́ɛ bī aíkonó kú uwā nyɔ̄ í lā ajɛ kú Íjīpiti á. Áluka kú uwā nōo nyɔ̄ abɔ́ɔ ā le lígíí ā, amáŋ, ɛ́ɛ le nyīla kwú píya éwo nɛ̄hi, klla kwú lɔfú nɛ̄hi.

⁶Ka ācɛ kú Íjīpiti gbɔɔ́ ō yá aá ɔdōbɔ̄bí, klla gbɔɔ́ ō yá aá kú aá yúklɔ́ kú ɔfiyɛ.

⁷Anɔ́ɔ aá le ikwū je klá Óndú ā, nōo wɛ Ɔwɔicō kú ádáádā kóō tá aá abɔ̄ á. Ka ɔ́ɔ le ikwū nɛ̄ aá je ā pó, klla le ōwē nɛ̄ aá bá í má abɔ́ɔ ā má.

⁸Ka oŋmá ɔfú nɛ̄hi mɛ́mla abɔ̄ olɔfú kú nū ā, ɔ́ɔ le aá hɛ́tá ŋmá abɔ̄ kú ācɛ Íjīpiti. Ka ɔ́ɔ klla yā ɔdā ohídáagó mɛ́mla ɔdā ōyéyījii, mɛ́mla ɔdōtūufi nɛ̄hi.

⁹Anɔ́ɔ ɔ́ɔ le aá kpó wā ɛga nɛ̄ aá bá ɔkwɔɔkwu ɔ́ɔmā á. Ka ɔ́ɔ kwú ajɛ nōo lɔhi nɛ̄hi ā ú lɛ aá.

¹⁰Ka ohígbū ɔ́ɔmā nɛ̄ anúɔ bī īgbō aflɛ́yí kú ɔdā kú ajɛ nɛ̄ ɔ́ɔ je lɛ anúɔ ā wā gé lɛ óndú á. Umósīsi da uwá kéē kwú ómbilí ā í háyi ajɛ ipéyī kú Óndú abɔ́ɔ.

¹¹Ó ka ɛ́ɛ yá ucɛ, cɛ́ɛ́ uwá mɛ́mla ācɛ ɔlɛ́ uwā, aúgbɔga ɔlɛ́ uwā, mɛ́mla ayí kú Ulífāyi nēe lā mɛ́mla uwá ā kéē gwéeyē ohígbū ɔdā olɔhi dóódu nɛ̄ Óndú ā, nōo wɛ Ɔwɔicō kú uwā ā, ɔ́ɔ je lɛ uwá ā.

¹²Ó da uwá ka ipú iháyí ɛtɛ́ɛ́tá dóódu, ɛ́ɛ géē je ɛhi kú éyi ŋmá ipú igwó kú ɔdɛ̄hɔ̄ kú uwā dóódu lɛ ācogwɛ́ɛya, ayókwū, anyōkwū, mɛ́mla aéwɔhá, cɛ́ɛ́ kéē lɛ ɔdōlé nōo ce uwá ɛgbá ō lé ā ipú igelī dóódu nɛ̄ ɛ́ɛ bá ā.

¹³Ó ka ɛ́ɛ ka lɛ Óndú ā ka éyi ŋmá ipú igwó nōo wɛ ukpɛ̄ kú nū ā, dúúmā ɔ́ɔ yɔ̄ ɔlɛ́ aá gɛ ŋ́, ka aá kwú kpó lɛ ācogwɛ́ɛya, aéwɔhá, ayókwū mɛ́mla anyōkwū, ɛ́gɛ́nɛ̄ ɔ́ɔ je íne lɛ aá ɛɛ́. Ka aá lɛyítáajɛ lɛ odúúdú aíne nɛ̄ ɔ́ɔ je lɛ aá ā. Ka aá í je mlanyī íne dúúmā lɛyíkwu ɛ̄gbā kú éyi ŋmá ipú igwó ā ŋ́.

¹⁴Ka aá í je odúúmā lé ŋmá anú eko nɛ̄ aá yēkwu ā ŋ́. Ka aá í je odóodu kú nū bɛ̄cɛ ŋmá ɔlɛ́ aá eko nɛ̄ aá le tēelihɔ ā ŋ́. Ka aá í je odóodu kú nū yá ɛhi kú okwū dúúmā ŋ́. Ka aá lɛyítáajɛ lɛ anú nōo wɛ Óndú ā, ipú ɔdā dóódu nɛ̄ ɔ́ɔ ka lɛyíkwu ɛhi kú éyi ŋmá ipú igwó ā.

¹⁵Ka Óndú ā ká ɔ̄ɔ pīyeyī má ajɛ ŋmá ɔkpáncō, ɛga otīīhɔ kú nú ā, cɛ́ɛ́ kóō lɛ ɔhā hɛ́ ce ācɛ ɔlɛ́ anú, Ísrɛ̄lu, kóō klla lɛ ɔhā hɛ́ ce ajɛ olɔhi nɛ̄ ɔ́ɔ je lɛ aá ā ā dúú, ɛ́gɛ́nɛ̄ ɔ́ɔ cokónu lɛ aádáádā aá ā.

¹⁶Umósīsi klla da uwá ɛ̄cī ɔ́ɔmā, ka Óndú ā, nōo wɛ Ɔwɔicō kú uwā ā, ɔ́ɔ gē da uwá kéē lɛyítáajɛ lɛ odúúdú uíne kú nú. Ó da uwá ka ɛ́ɛ lɛyítáajɛ lɛ aíne ā mɛ́mla odúúdú ɔtú, mɛ́mla odo kú uwā.

¹⁷Ó da uwá ka ɛcī ɔ́ɔmā, ɛ́ɛ cɛ̄ ka Óndú ā ɔɔ́ wɛ Ɔwɔicō kú aá ɛɛ́. Ó ka ɛ́ɛ lɛ okónu ce ka aá géē lɛyítáajɛ lɛ odúúdú aíne kú nū, klla í lɛ uwá tū.

¹⁸Ó da uwá ka Óndú ā ɔ́ɔ mīyɛ uwá ka ācɛ ɔlɛ́ nū ícíícɛ ɔ́ɔmā ɛɛ́, ɛ́gɛ́nɛ̄ ɔ́ɔ cokónu lɛ uwá ā, anɔ́ɔ ó da uwá ká ɛ́ɛ lɛ odúúdú aíne kú nū tū

¹⁹Ó da uwá ka Óndú ā ɔ́ɔ géē je uwá pīya ācɛ olɔfú nɛ̄hi fíyɛ́ ódúúdú aéwo kú ɛcɛ nōó yá ā. Ka ɔ́ɔ í cɛ̄ lɛ uwá lɛ ojīlīmā, ocɛ̄tra, mɛ́mla ɛgahi. Ka uwá ɔ́ɔ géē wɛ ācɛ ɔlɛ́ Óndú ā, nōo wɛ Ɔwɔicō kú aá ā abɔ̄yī nū, ɛ́gɛ́nɛ̄ ó ka lɛ ā.