Read idoma OBLATŪKÍNE 27 Bible Online

OBLATŪKÍNE 27 - idoma bible

OBLATŪKÍNE 27

¹Umósīsi mɛ́mla anyākwɔ́cɛ kú Ísrɛ̄lu ā, da ācɛ ā ka ɛ́ɛ lɛyítáajɛ lɛ odúúdú aíne nɛ̄ aá gaá je lɛ uwá ɛ̄cī ɔ́ɔmā ā.

²Ó da uwá ka ɛ̄cī nɛ̄ ɛ́ɛ géē bēhé ísu kú Ujɔ́dan ā, cɛ́ɛ́ kú ɛ́ɛ lɛ tá ipú ajɛ nɛ̄ Óndú ā, nōo wɛ Ɔwɔicō kú uwā ā, yɔ̄ ī je lɛ uwá ā, ka ɛ́ɛ lɛ aɛ́cɔ̄ nɛ̄hi túbá, cɛ́ɛ́ kéē bī áfū lɛ ɔ́ plla

³Cɛ́ɛ́ ka ɛ́ɛ le odúúdú aíne mɛ́mla ɛlā nōo nwū uwā ā tá tū ɛyí ɛcɔ̄ ā. Ó da uwá ka eko nēe le bēhé ga ipú ajɛ nōo ī yá ɔdɛ̄hɔ̄ nɛ̄hi, nɛ̄ Óndú ā, nōo wɛ Ɔwɔicō kú uwá ā, cokónu nū lɛ aádáádā uwā,

⁴ka uwá nɛ̄ ɛ́ɛ bá ābɔ̄há kú Ujɔ́dan ā, kéē lɛ aɛ́cɔ̄ túbá ɛyí ɛfu kú Ébalu ɛ́gɛ́nɛ̄ anúɔ yɔ̄ ī je ɔ́da lɛ uwá ícíícɛ ɔ́ɔmā ā. Cɛ́ɛ́ ɛ́ɛ klla lɛ ɔ́ plla mla áfū.

⁵Ó da uwá kéē lɛ ede kú ɛcɔ̄ nēé bī oje le yúklɔ́ anú jééjéé ɛ́ɛ́ ŋ́ gwó

⁶Ó da uwá ka ede dúúmā nɛ̄ ɛ́ɛ í gwó lɛ Óndú ā, ka ɛ́ɛ híī bī oje le gbā ɛcɔ̄ dúú nēé gáā le gwó ɔ́ ā ŋ́. Ó klla da uwá ka ɛ́ɛ géē gwɛ́ɛya o yɔlá dúúdú ɛyí nū.

⁷Ó ka ɛ́ɛ géē gwɛ́ɛya kú ɛbɔ́ abɔ́ɔ, cɛ́ɛ́ ɛ́ɛ lé ucɛ kú ɛya o lé tɔ̄há abɔ́ɔ, cɛ́ɛ́ kú ɛ́ɛ gwéeye iyɔ̄bū Óndú ā, nōo wɛ Ɔwɔicō kú uwā ā.

⁸Ó ka ɛ́ɛ lɛ īkpɛ̄lā éyééye kú aíne kú Óndú ā, tá tɛ́ɛcɛ péee tū ɛga kú ɛcɔ̄ ā nɛ̄ ɛ́ɛ bī áfū plla ā.

⁹Anɔ́ɔ Umósīsi mɛ́mla ācɛ ulífāyi ogwɛ́ɛya da odúúdú ācɛ ā ka ɛ́ɛ lɛ ahɔ̄ je lɛ aá, uwá nɛ̄ ɛ́ɛ wɛ ācɛ kú Ísrɛ̄lu, cɛ́ɛ́ kéē pó ɛlā kú aá. Anɔ́ɔ ó klla da uwá ka ɛ̄cī ɔ́ɔmā ɛ́ɛ kwú pīya ācɛ ɔlɛ́ Óndú ā, nōo wɛ Ɔwɔicō kú uwā ā ɛɛ́.

¹⁰Ó ka ohígbū ɔ́ɔmā ɛ́ɛ lɛyítáajɛ lɛ aíne kú nū nɛ̄ anúɔ, nōo wɛ Umósīsi ā ɔ́ɔ yɔ̄ gē je lɛ uwá ɛ̄cī ɔ́ɔmā ā.

¹¹Anɔ́ɔ Umósīsi da ācɛ kú Ísrɛ̄lu ícíícɛ ɔ́ɔmā ka

¹²eko nɛ̄ ɛ́ɛ le bēhé ísu kú Ujɔ́dan, aípɔ́ɔma nɛ̄ ɛ́ɛ bá ā géē háyi ɛyí ɛfu kú Ugɛ́rīsim, eko nɛ̄ ɛ́ɛ géē ka ɔhá ā tɛ́ɛcɛ ā. É wɛ, aípɔ́ɔma kú Usímīyɔn, Ulífāyi, Ujúda, Ísāaka, Ujósɛ̄fu, mɛ́mla Ubɛ́njamīn

¹³Ó ka aípɔ́ɔma nēe bá ā géē háyi ɛyí ɛfu kú Ébalu, eko nɛ̄ ɛ́ɛ géē tá okónu ā á. É wɛ, aípɔ́ɔma kú Urúbɛ̄n, Ugádi, Ássa, Usébūlɔn, Udáni, mɛ́mla Unáfutāli.

¹⁴Ó ka ācogwɛ́ɛya, nēe wɛ ayí kú Ulífāyi ā ɛ́ɛ géē kɛlá nēe bá ā tɛ́ɛcɛ gbōmgbōm lɛ ācɛ kú Ísrɛ̄lu.

¹⁵“Ohóōō yɔ̄ lɛ ɔ̄cɛ dúúmā nɛ̄ ɔ́ɔ lɛ ojibó kú ɛcɔ̄ ámāŋ, ákú oje ma, yɔ̄ ī gbā ɔ̄ ɛ̄gbā tayínū. Ɛcí ō pā ī wɔ́ Óndú ā ɔtū nɛ̄hi.” Cɛ́ɛ́ odúúdú ācɛ ā tóohi ká ɔ́ɔ le yá lɛ ā. (Aamí)

¹⁶“Ohóōō lɛ ɔ̄cɛ nōó lɛ ojīlīmā ce ɛ́nɛ́ nū mɛ́mla ádā nú ŋ́.” Cɛ́ɛ́ odúúdú ācɛ ā tóohi ká ɔ́ɔ le yá lɛ ā (Aamí)

¹⁷“Ohóōō lɛ ɔ̄cɛ̄ nōo lɛ ɔdā ō kwu ɛjī ajɛ kú anú mɛ́mla ákú ɔ́mpa nū fu tónū ā.” Cɛ́ɛ́ odúúdú ācɛ ā tóohi ká ɔ̄ le yá lɛ ā (Aamí)

¹⁸“Ohóōō lɛ ɔ̄cɛ nōo gē bī opeyī bī cɛ́ɛ́ kóō híī jé ɔwɛ ŋ́ mā.” Cɛ́ɛ́ odúúdú ācɛ ā tóohi ká ɔ̄ le yá lɛ ā (Aamí)

¹⁹“Ohóōō lɛ ɔ̄cɛ nōo gē pīya, anyōkwū, ayókwū mɛ́mla aúgbɔga tū, í cɛ̄ lɛ uwá mīyɛ ɔdā nōo cíkā ō wɛ ákú uwā ŋ́ mā.” Cɛ́ɛ́ odúúdú ācɛ ā tóohi ka ɔ́ɔ le yá lɛ ā (Aamí)

²⁰“Ohóōō lɛ ɔ̄cɛ nōo gē je uwēyī lɛ ádā nū oŋmá lɛ ō gwutá mɛ́mla ɔnyā ádā nū dúúmā.” Cɛ́ɛ́ odúúdú ācɛ ā tóohi ka ɔ́ɔ̄ le yá lɛ ā (Aamí)

²¹“Ohóōō lɛ ɔ̄cɛ dúúmā nōo gwutá mla ɛbɛ́ ámāŋ, ɔnyā nōo cɛ̄ lɛ ɛbɛ́ lɛ ikpó nū ce.” Cɛ́ɛ́ odúúdú ācɛ ā tóohi ka ɔ́ɔ̄ le yá lɛ ā (Aamí)

²²“Ohóōō lɛ ɔ̄cɛ nōo gwutá mɛ́mla ɔyínɛ̄ nū nɔ̄nyā, ámāŋ ɔyí ádā nū nɔ̄nyā.” Cɛ́ɛ́ odúúdú ācɛ ā tóohi ka ɔ́ɔ̄ le yá lɛ ā (Aamí)

²³“Ohóōō lɛ ɔ̄cɛ nōo gwutá mɛ́mla ɛ́nɛ́ kú ɔnyā nū.” Cɛ́ɛ́ odúúdú ācɛ ā tóohi ka ɔ́ɔ̄ le yá lɛ ā (Aamí)

²⁴“Ohóōō lɛ ɔ̄cɛ nōo lɛ ɔ̄cɛ ŋmó tayínū.” Cɛ́ɛ́ odúúdú ācɛ ā tóohi ka ɔ́ɔ̄ le yá lɛ ā (Aamí).

²⁵“Ohóōō lɛ ɔ̄cɛ nōo mīyɛ ije lé kóō lɛ ɔ̄cɛ nōó yá ɔdōōbɔ̄bī dúúmā ŋ́ ŋmó.” Cɛ́ɛ́ odúúdú ācɛ ā tóohi ka ɔ́ɔ̄ le yá lɛ ā (Aamí).

²⁶“Ohóōō lɛ ɔ̄cɛ dúúmā nōó lɛyítáajɛ lɛ odúúdú íne mɛ́mla ɛlā kú Ɔwɔicō nōo nwū ā ŋ́.” Cɛ́ɛ́ odúúdú ācɛ ā tóohi ka ɔ́ɔ̄ le yá lɛ ā (Aamí)