Read idoma OBLATŪKÍNE 28 Bible Online

OBLATŪKÍNE 28 - idoma bible

OBLATŪKÍNE 28

¹Umósīsi ka ɔ́dāŋ ka ɛ́ɛ lɛyítáajɛ lɛ Óndú ā, nōo wɛ Ɔwɔicō kú uwā ā, klla lɛ íne kú nū nɛ̄ anúɔ gē je lɛ uwá ícíícɛ ɔ́ɔmā ā tū. Ó ka ɔ́ɔ gēe yá kéē lɔfú fíyɛ́ aéwɔhá dóódu kú ipú ɛcɛ ā.

²Ó da uwá ka ɛ́ɛ lɛyítáajɛ lɛ Óndú ā, nōo wɛ Ɔwɔicō kú uwā ā, cɛ́ɛ́ odúúdú aɔ́hā nēe bá ā ɔ́ɔ géē wɛ ákú uwā.

³Ó ka Óndú ā ɔ́ɔ géē hɔ́hā ce ipú aígelī mɛ́mla ɛhɔ̄ kú uwā.

⁴Ó ka Óndú ā ɔ́ɔ géē hɔ́hā ce uwá cɛ́ɛ́ kú ɛ̄ɛ ma ayí alɛwa, kéē klla lɛ ɔdɛ̄hɔ̄ nɛ̄hi, mɛ́mla aɔ́dāajɛ bɛ̄ɛka aɛ́na mɛ́mla aálá alɛwa.

⁵Ó ka Óndú ā ɔ́ɔ géē hɔ́hā ce ɛhɔ̄ kú īkpɔ̄dɛ̄hɔ̄ kú uwā mɛ́mla ɔdōlé nɛ̄ ɛ́ɛ géē yá ŋmá anú ā.

⁶Ó ka Óndú ā ɔ́ɔ géē hɔ́hā ce ɔdā dóódu nɛ̄ ɛ́ɛ géē yá ā.

⁷Ó ka Óndú ā ɔ́ɔ géē yá kéē yá aólɛlā kú uwā nēe gē nuunu tá uwā ā lé. Ó ka ɛ́ɛ géē ŋmá abɔ̄ éyi wā gaá nuunu tá uwā, amáŋ ɛ́ɛ géē kwinya ŋmá iyɔ̄bū uwā ga abɔ̄ dóódu.

⁸Ó da uwá ka Óndú ā, nōo wɛ Ɔwɔicō kú uwā ɔ́ɔ géē hɔ́hā ce úklɔ́ kú uwā. Ó ka ɔ́ɔ géē tū ɔbā kú uwā mu mla īkpɔ̄dɛ̄hɔ̄. Ó ka ɔ́ɔ géē hɔ́hā ce uwá ipú ajɛ nɛ̄ ɔ́ɔ gáā je lɛ uwá ā.

⁹Ó ka ɔ́dāŋ ka ɛ́ɛ lɛyítáajɛ lɛ Óndú ā, Ɔwɔicō kú uwā, nɛ̄ ɛ́ɛ gē yá ɔdā dóódu nɛ̄ ɔ́ɔ ka ā, ka ɔ́ɔ géē yá kéē wɛ ācɛ ɔlɛ́ nū ɛ́gɛ́nɛ̄ ɔ́ɔ cokónu lɛ ā ā.

¹⁰Cɛ́ɛ́ odúúdu ācɛ kú ɛcɛ ā géē má ka, Óndú ā ɔ́ɔ lɛ uwá fu kéē wɛ ācɛ ɔlɛ́ nū, ɛ́ɛ kē í yúúfi uwā.

¹¹Umósīsi klla da uwá kpɔ́ ka Óndú ā géē kpó ayí alɛwa, aɛ́na alɛwa, mɛ́mla ɔdɛ̄hɔ̄ nɛ̄hi lɛ uwá ipú ajɛ nɛ̄ ɔ́ɔ cokónu lɛ aádáádā uwā ka anúɔ géē je lɛ uwá ā.

¹²Ó klla da uwā ka ɔ́ɔ géē yá ka ɔwɔ kóō yā tū ɛhɔ̄ kú uwā ŋmá ɔkpáncō, klla géē hɔ́hā ce úklɔ́ kú uwā, nɛ̄ uwá géē lɛ ɔdā klla í le kplá aéwɔhá, amáŋ ɛ́ɛ gáā kplá ɔdā dúúmā ŋmá ɛgiyí aéwo dúúmā ŋ́.

¹³Ó da uwá ka Óndú ā, nōo wɛ Ɔwɔicō kú uwā ā géē lɛ uwá pīya ācɛ nēe gbɔbū lɛ aéwo alɛwa, amáŋ ɛ́ɛ gáā wɛ ācɛ nēe tá igbīhi ācɛ ɔhá ŋ́. Ó ka ɛ́ɛ géē bá ī jɛ̄ piyóó, nɛ̄ ɛ́ɛ gáā túwāajɛ gbóógbóō ŋ́, ɔ́dāŋ ka ɛ́ɛ lɛyítáajɛ lɛ odúúdú íne nɛ̄ anúɔ gē je lɛ uwá ícíícɛ ɔ́ɔmā ā.

¹⁴Ó ka ɛ́ɛ híī tá ō lɛyítáajɛ lɛ odúúmā kú aíne ā ŋ́. Ɛ́ɛ̄ kē híī gbā aɔ́wɔ ɔhá dúúmā ɛ̄gbā ŋ́.

¹⁵Umósīsi klla yɔ̄ ī kɛlā gɔbū kpɔ́ ka amáŋ, ɔ́dāŋ nɛ̄ ɛ́ɛ tá ō lɛyítáajɛ lɛ Óndú ā, nōo wɛ Ɔwɔicō kú uwā, nɛ̄ ɛ́ɛ klla tá ō lɛ aíne kú nū nɛ̄ anúɔ yɔ̄ ī je lɛ uwá ícíícɛ ɔ́ɔmā ā, ka odúúdú ɔdōbɔ̄bí nɛ̄ ɛ́ɛ bá nyā géē yá uwā.

¹⁶Ó ka Óndú ā géē tókónu lɛ aígelī mɛ́mla ajɛ ɛhɔ̄ kú uwā.

¹⁷Ó ka Óndú ā géē tókónu lɛ īkpɔ̄dɛ̄hɔ̄ kú uwā mɛ́mla ɔdōlé nɛ̄ ɛ́ɛ géē yá ŋmá anú ā.

¹⁸Ó ka Óndú ā ɔ́ɔ gáā kpá ayí alɛwa lɛ uwá ŋ́, ɛ́ɛ́ nɛ̄ aɛ́na ámāŋ aálá kú uwā ī nyīla ŋ́. Ó ka ɔdɛ̄hɔ̄ kú uwā ɔ́ɔ gáā yá lɔhi ŋ́.

¹⁹Ó ka Óndú ā géē tókónu lɛ ɔdā dóódu nɛ̄ ɛ́ɛ géē yá ā.

²⁰Ó da uwá ka ɔ́dāŋ ka ɛ́ɛ gbɔɔ́ ō yá ɔdōbɔ̄bí, nɛ̄ ɛ́ɛ kwú Óndú ā ú tá tónū, ka ɔ́ɔ géē bī ōwē, mɛ́mla unwalu mɛ́mla ákanya wā ipú ɔdā dóódu nɛ̄ ɛ́ɛ géē yá ā, gbéeko nɛ̄ ɛ́ɛ kwú gblífi ŋmá ajɛ dúúdú.

²¹Ó ka Óndú ā ɔ́ɔ géē tū ōcē klá uwá nɛ̄ ɔ̄cɛ dúúmā kú uwā ɔ́ gáā hile ipú ajɛ nɛ̄ ɛ́ɛ gáā nyɔ̄ ā ŋ́.

²²Ó ka Óndú ā géē tū ōcē obɔ̄bí alɛwa wā í klá uwá, oce kú iyē ōmi mɛ́mla áganá. Ó ka ɔ́ɔ klla géē je ɔdɛ̄hɔ̄ kú uwā yíífi mla ɔwɔ o hɛ́ɛnɔ mɛ́mla owu o kwɔ́lá ō tá klá uwá. Ó ka ɔdōbɔ̄bí nēe bá ā géē yɔ̄ í yá uwā jāā gbéeko nɛ̄ ɛ́ɛ le pɛ́ gekwú.

²³Ó ka ɔwɔ ɔ́ gáā yā lɛ uwá ŋ́. Cɛ́ɛ́ ajɛ kú uwā ɔ́ɔ kwú ŋmó gɔ́ɔ́yí bɛ̄ɛka oje ā.

²⁴Ó da uwá ka ikɔkɔ nɛ̄ ɔwɔ ɔ́ɔ í yā, Óndú ā ɔ́ɔ géē tū owu nɛ̄hi áncā mɛ́mla oflútu klá uwá jāā gbéeko nɛ̄ ɛ́ɛ kwú kpó yíífi ŋmáajɛ.

²⁵Ó da uwá ka Óndú ā géē cɛ̄ lɛ aólɛlā kú uwā yá uwā lé. Ó ka ɛ́ɛ géē bá í nuunu tá aólɛlā kú uwá ŋmá ɛga éyi, amáŋ, ɛ́ɛ géē kwinya ŋmá iyɔ̄bū aólɛlā ā ga ābɔ̄ dóódu ahāapa. Ó ka odúúdú ācɛ kú ipú ɛcɛ ā ɛ́ɛ í yúúfi nɛ̄hi, eko nɛ̄ ɛ́ɛ lɛ ɔdā nɛ̄ ɔ́ yɔ̄ ī yá uwā ā má ā.

²⁶Umósīsi klla da uwá ka eko nɛ̄ ɛ́ɛ le pɛ́ gekwú, aígbáanɔ mɛ́mla aɛ́bɛ́ kú ipácí gáā je ɛbɛ́ kú uwā lé á. Ó ka ɔ̄cɛ dúúmā ɔ́ɔ gáā hile ipú uwā ɛ́ɛ́ nōó gē nū aɛ́bɛ́ mɛ́mla aígbáanɔ hɛ̄ okwū kú uwā tá ŋ́.

²⁷Ó ka Óndú ā géē tū ínálēgbé klá uwá, ɛ́gɛ́nɛ̄ ɔ́ɔ tū klá ācɛ kú Íjīpiti ā. Ó klla ka odúúdú iyē kú uwā géē je pīya ipíípí. Ó ka ikplɔ́fú géē cē klá uwá iyē nɛ̄hi, ɔ́ɔ klla í cɛ̄ lɛ iyē í wá uwā nɛ̄hi. Ó ka ɔ́ɔ gáā lɛ ɛcí ō yá ɔ̄ ŋ́.

²⁸Ó ka Óndú ā géē je uwá pīya aólíla, klla í pu uwá eyī, í bī ígbájí wā oyēeyī kú uwā.

²⁹Cɛ́ɛ́ ɛ́ɛ géē bá ī lɛ abɔ̄ mu ajɛ ɔlɛ́ɛnɔ bɛ̄ɛka aópeyī ā. Ó ka ɛ́ɛ gáā jé ɔwɛ kú uwā glá ŋ́. Ó ka ɛ́ɛ gáā jɛ̄ gɔbū ipú ɔdā dóódu nɛ̄ ɛ́ɛ gē yá ā ŋ́. Ó klla da uwá ka ɛ́ɛ géē bá ī pīya uwá tū klla ī wī uwā uwī, ɔ̄cɛ dóódu í gáā yɔ̄ nōo géē tú uwā abɔ̄ ŋ́.

³⁰Ó ka ɛ́ɛ géē yá ɛhi ɔnyā kú ɛ́ɛ lɛ, amáŋ ɔ̄cɛ ɔhá ɔ́ɔ gáā gwutá mla ɔnyā ɔ́ɔmā á. Ó ka ɛ́ɛ géē gwó inu, amáŋ, ɛ́ɛ gáā lā anú ŋ́. Ó ka ɛ́ɛ géē hɛ́hɔ̄ kú ufáyin, amáŋ ɔ̄cɛ ɔhá ɔ́ɔ gáā lé īkpō kú nū á.

³¹Ó ka ācɛ ɔhá géē bá ī ŋmó aɛ́na kú uwā ipéyī uwā piíí ā, amáŋ ɛ́ɛ gáā má ɛbɛ́ kú nū dúúmā lé ŋ́. Ó klla da uwá ka ācɛ ɔhá géē bá ī pí aíjakī kú uwā nyɔ̄ ipéyī uwā, ɛ́ɛ kē gáā mīyɛ uwá cīgbīhi glá ŋ́. Ó ka ɛ́ɛ géē kpó aálá kú uwá lɛ aólɛlā kú uwā, ɔ̄cɛ dúúmā í yɔ̄ nōo géē tú uwā abɔ̄ kóō mīyɛ uwá bá ajɛ ŋ́.

³²Umósīsi klla da uwá ka ɛ́ɛ géē kpó ayí uwā aɔ́fiyɛ lɛ aéwɔhá ipéyī uwā ɛ̄cī dóódu. Ó ka ɛ́ɛ géē bá ī leyīkwu ɔwɛ áncā ká ayí uwā ká ɛ́ɛ géē wā ɔlɛ́.

³³Ó ka ɔdɛ̄hɔ̄ nɛ̄hi nɛ̄ ɛ́ɛ móōwē nɛ̄hi tū ɔ̄ hí ā, aéwɔhá géē je kpó. Ó ka ɛ́ɛ gáā lɛ ɔdā dúúmā gwū opíyatū mɛ́mla ōwē ō má eko dóódu tá ŋ́.

³⁴Ó da uwá ka ōwē nɛ̄ ɛ́ɛ géē má ā géē je uwá pīya aójɛɛ́lɛ́.

³⁵Ó ka Óndú ā géē cɛ̄ lɛ ámata nōó gáā jé gbóógbóō ŋ́ mā ce uwá ikpó. Ó klla da uwá ka inálēgbé ɔ́ɔ géē ce uwá oŋmá icō wāajɛ kú ɔkpíyē kú uwā.

³⁶Ó ka Óndú ā géē cɛ̄ lɛ aéwɔhá kpó uwā mɛ́mla ɔcɛ́ kú uwā ga ajɛ kú aéwɔhá, ɛga nɛ̄ uwá, ámāŋ ka aádáádā uwā í lā jéjée ɛ́ɛ́ ŋ́ mā. Ó ka ɛ́ɛ géē pā ɛcí nɛ̄ ɛ́ɛ gbā mla ɔcí mɛ́mla ɛcɔ̄ abɔ́ɔ.

³⁷Ó da uwá ka ācɛ kú aéwɔhá nɛ̄ Óndú ā géē pa uwá hīla nyɔ̄ ā, géē hídáagó kú ɔdā nɛ̄ ɔ́ɔ yá uwā ā. Ó ka ɛ́ɛ géē bá í yá uwā okónu, klla í yá uwā ɛbɛ́.

³⁸Ó ka ɛ́ɛ géē nyi īkpɔ̄dɛ̄hɔ̄ nɛ̄hi, amáŋ ɛ́ɛ gáā má cē nwuné ŋ́, ohígbū ka efūma géē je ɔdā nɛ̄ ɛ́ɛ nyí ā kpó lé ŋmáajɛ.

³⁹Ó ka ɛ́ɛ géē hɛ́hɔ̄ kú ufáyin, klla í lɛ ɛlá kwu ɔ́ lɔɔlɔhi, amáŋ ɛ́ɛ gáā lɛ̄ īkpō kú nū ɛ́ɛ́, nɛ̄ ɛ́ɛ gē yá ejé ŋmá anú ŋ́. Ohígbū ka ɛkɔ̄ géē je ɔ́ lé ŋmáajɛ.

⁴⁰Ɔcí nēé hí ka ólíifu kú uwā géē yɔ̄ ī jɛ̄ ɛga dóódu ipú ajɛ ā, amáŋ ɛ́ɛ gáā yá anɔ̄ ŋmá anú glá ŋ́, ohígbū ka īkpō kú nū géē je kpó wū bónū.

⁴¹Ó ka ɛ́ɛ géē ma ayínɔ̄nyā mɛ́mla ayí nɔ̄nyīlɔ, amáŋ, odóódu kú uwā í gáā wɛ ákú uwā ŋ́, ohígbū ka aólɛlā kú uwā géē kpó uwā alagbá kú ɛfú ŋmá ɔlɛ́ uwā.

⁴²Ó ka aákpá géē je ɔcí mɛ́mla īkpɔ̄dɛ̄hɔ̄ kú uwā kpó lé ŋmáajɛ.

⁴³Umósīsi yɔ̄ gē kɛlā lɛ uwá kpɔ́ ka aúgbɔga nēe lá ajɛ kú uwā ā, géē bá ī lɔfú tōotū ɔ̄, amáŋ ɔfú géē yɔ̄ í hɛ́ uwā ā abɔ̄.

⁴⁴Ó da uwá ka aúgbɔga ā géē bá ī lɛ ije nɛ̄ ɛ́ɛ géē le kplá uwá, amáŋ uwá ā í gáā lɛ ije nɛ̄ ɛ́ɛ í lɛ kplá aúgbɔga ā ŋ́. Ó ka igbīhāajɛ ā, aúgbɔga ā géē je pīya ācɛ nēe í gbō uwā.

⁴⁵Ó ka aɔ́dōōbɔ̄bí dóódu nēe bá ā géē wā í yá uwā, klla géē bá mɛ́mla uwá jāā gbéeko nɛ̄ ɛ́ɛ kwú yíífi ŋmáajɛ, ohígbū ka ɛ́ɛ lɛyítáajɛ lɛ Óndú ā, nōo wɛ Ɔwɔicō kú uwā ā, ɛ́ɛ́ nɛ̄ ɛ́ɛ gē lɛ odúúdú íne kú nū ā tū ŋ́.

⁴⁶Ó da uwá ka aɔ́dā nyā géē wɛ ijáalí kú ɛpɔ̄ nɛ̄ Ɔwɔicō géē ka tū uwā mɛ́mla ayí uwā piyóó á.

⁴⁷Ó da uwá ka Óndú ā hɔ́hā ce uwá ɔwɛ dóódu. Amáŋ ɛ́ɛ gbā ɔ̄ ɛ̄gbā, ɛ́ɛ́ nɛ̄ ɛ́ɛ gē cɛ̄ ɔ̄ ɛhɔ̄ mla ɔtū nɛ̄hɛ́ mɛ́mla éeyē ŋ́.

⁴⁸Ó da uwá ka ohígbū ɔ́ɔmā ā, ɛ́ɛ géē cɛ̄ aólɛlā kú uwā nɛ̄ Óndú ā géē tū lɛyíkwu uwá ā ɛhɔ̄. Ó ka ɛmiyɛ mɛ́mla ijēēnyi géē ŋmó uwā. Ɛgbá kú ɔdā dóódu géē ce uwá. Ó ka Óndú ā géē yá uwā ōwē ā jāā gbéeko nɛ̄ ɛ́ɛ kwú kpó yíífi ŋmáajɛ.

⁴⁹Ó klla da uwá ka Óndú ā géē bī aéwɔhá wā í nuunu tá uwā ŋmá ɛga dóódu kú ɛcɛ. Aéwo nɛ̄ ɛ́ɛ pó ucē kú uwā jééjē ɛ́ɛ́ ŋ́ mā. Ó ka ɛ́ɛ géē wā fúuu bɛ̄ɛka ucē ō je ugwū ā gáā kpó uwā.

⁵⁰Ó ka ācɛ nēe í wā ā ɔ́ɔ bɔ̄bíipú nɛ̄hi, ka ɛ́ɛ gáā ményīnyi ɔ̄cɛ dúúmā kú uwā ŋ́, kwu ayípɛ̄ kwu anyākwɔ́cɛ.

⁵¹Ó ka ācɛ ā géē kpó aɛ́na mɛ́mla aɔ́dɛ̄hɔ̄ kú uwā lé, í cɛ̄ lɛ ɔkpɛtā í ŋmó uwā ga ɔlékwū. Ó da uwá ka ɛ́ɛ gáā mā ɔdōlé kú uwá dúúmā tá lɛ uwá ŋ́. Ó klla ka ɛmiyɛ ɔ́ɔ géē ŋmó uwā ga ɔlékwū.

⁵²Umósīsi klla da uwá ka aólɛlā kú uwā géē kpɛ́fú tá aígelī dóódu nɛ̄ Óndú ā, nōo wɛ Ɔwɔicō kú uwā ā, je lɛ uwá ā. Ó da uwá igá olicō nɛ̄hi kú aígelī kú uwā nɛ̄ ɛ́ɛ lɔtūce ā, géē je wúlatāajɛ.

⁵³Ó da uwá ka eko nɛ̄ aólɛlā kú uwá géē cé íbɔm tū aígelī kú uwā ā, ka ɔkpɛtá ɔ́ɔ í ŋmó uwā nɛ̄ɛ̄nɛ̄hi nōo í yá kéē gbɔɔ́ ō kpó ayí nɛ̄ Óndú ā, nōo wɛ Ɔwɔicō kú uwā ā, je lɛ uwá ā ŋmó lé.

⁵⁴Ó da uwá ka ɔ́ɔ kōō wɛ ɔ̄cɛ nɛ̄ ɔ́ɔ wɛ ɛ́nɛ́nɛ̄ ɔ̄cɛ fíyɛ́ dúú ipú uwā ā, abɔ̄ ɔ́ɔ gáā lɔ́tū ɛmiyɛ eko kú íbɔm ō cē tū igelī ā glá ŋ́ mā, ɔ́ɔ í ŋmó ayípɛ̄ ɔlɛ́ nū ōhī lé.

⁵⁵Ó ka ɔ́ɔ kōō gáā je ɛbɛ́ nū lɛ ɔyí nū dóódu ŋ́, ɛ́ɛ nɛ̄ ɔ́ɔ kōō í je lɛ ɔnyā nū nōo he ɔ́ ɔtū ā, ámāŋ je odóódu kú nū lɛ ayí nū nēe hile ā ŋ́.

⁵⁶Ó klla da uwá ka ɔ́ɔ kōō wɛ ɛ́nɛ́nɛ̄ ɔnyā nōo ŋmá ɔlɛ́ nōo le agbénú ā, nōó gē yāwu kú ɔdā dúúmā ga ɛga dóódu ŋ́ mā, géē yá ucē ékpónú ɔ́ɔmā dúú.

⁵⁷Ó ka eko nɛ̄ aólɛlā lɛ íbɔm cē tū igelī kú nū, ó ka ɔ́ɔ í hígbū ɛmiyɛ í je ɔyí obene nɛ̄ ɔ́ɔ ma ɛ̄yīpɛ̄ ā ŋmó lé mɛ́mla abí kú nū dúú. Ó ka ɔ́ɔ kōō gáā kɔ̄ ɛbɛ́ ā mɛ́mla ɔbá nū nɛ̄ ɔ́ɔ he ɔ́ ɔtū ā, ámāŋ ka odóódu kú ayí nū nóō hile ā ŋ́.

⁵⁸Umósīsi klla da uwá ka ɔ́dāŋ ka ɛ́ɛ́ lɛyítáajɛ lɛ odúúdú ɛla nɛ̄ ɛ́ɛ nwū ipú ɔkpá ā ŋ́, néē klla lɛ ojilima ce iyē ohídáagó mɛ́mla iyē ōtūufi kú Óndú ā, nōo wɛ Ɔwɔicō kú uwā ā ŋ́,

⁵⁹ka ɔ́ɔ géē tū ōcē obɔ̄bí mɛ́mla ōcē kú olɔkwukwɔkwu nɛ̄ ɔ́ɔ gáā lɛ ɛcí ŋ́ mā klá uwá mɛ́mla ayí uwā.

⁶⁰Ó klla da uwá ka ɔ́ɔ géē bī ɛdɔ ōcē nɛ̄ ɔ́ɔ tū klá ācɛ Íjīpiti ā klá uwá. Ó ka ɛ́ɛ gáā wi ŋmá anú glá ŋ́.

⁶¹Ó da uwá ka ɔ́ɔ géē tū ɛdɔ ōcē obɔ̄bí ɔhá néē tá tū ɔkpá kú íne ā ŋ́ mā klá uwá, cɛ́ɛ́ ɛ́ɛ kwú kpó yíífi ŋmá ajɛ.

⁶²Ó da uwá ka ɛ́ɛ kōō le nyīla bɛ̄ɛka ayínyílɔ́wɔ kú ɔkpáncō ā, nááná ācɛ nɛ̄ ɛ́ɛ gáā hile ā, í gáā jɛ̄ ɔdā dúúmā ŋ́. Ohígbū ka ɛ́ɛ tá ō lɛyítáajɛ lɛ Óndú ā, nōo wɛ Ɔwɔicō kú uwā ā.

⁶³Umósīsi klla da uwá ka ɛ́gɛ́nɛ̄ ɔ́ɔ he Óndú ā ɔtū kóō yá kéē nyīla īkpācɛ kéē klla le gbagbénú lɛ ā, ɛ́gɔ́ɔmā nɛ̄ ɔ́ɔ géē he ɔ́ ɔtū ká ɔ́ɔ̄ kpó uwā yíífi lɛ á. Ó ka ɔ́ɔ géē fú uwá tɛgba tɛgba ŋmá ajɛ nɛ̄ ɔ́ɔ gáā je lɛ uwá kéē lā ā.

⁶⁴Ó da uwá ka Óndú ā ɔ́ɔ géē pa uwá hīla tū ipú aéwo dóódu kú ipú ɛcɛ ā. Ó ka ɛ́ɛ géē pɛ̄cí nɛ̄ ɛ́ɛ gbā ŋmá ɔcí ámāŋ ka ɛcɔ̄ abɔ́ɔ. Ɛcí nɛ̄ aádáádā uwā í pā jéjéē ɛ́ɛ́ ŋ́ mā.

⁶⁵Ó ka ɛ́ɛ gáā lɛ ɛbɔ́ ɛga dúúmā ŋ́. Ɛ́ɛ́ kē gáā lɛ ɛga dúúmā nɛ̄ uwá ɔ́ɔ géē hī ka ɔlɛ́ uwā ŋ́. Ó ka Óndú ā, ɔ́ɔ géē kpó uwā bá ipú unwalu, ákanya, ɔtū ō gbenyi, mɛ́mla á leyīce ɔdā dúúmā ŋ́.

⁶⁶Ó ka ɛ́ɛ géē yɔ̄ ipú ufuufi ipú oyēeyī kú uwā piyóó, otú mɛ́mla ɔlɛ́ɛnɔ.

⁶⁷Ó ka ɔtū ɔ́ɔ géē hɛ́ uwā ko ipú ufi kú ɔdā dóódu néē géē má ā. Ó ka ɛ́ɛ géē bá gē gbɔ̄ɔkɔ ɔ̄cɔ̄ɔ̄cī dóódu kú ɔ̄nɛ̄ kóō gbo. Ɔ̄nɔ̄ɔ̄nɛ̄ dóódu, ɛ́ɛ kē bá ī gbɔ̄kɔ kú eyī kóō le nyā.

⁶⁸Ó ka Óndú ā ɔ́ɔ géē kpó uwā tū aúgbéenyi ga Íjīpiti, nááná nōó tíne kéē ga abɔ́ɔ gɛ ŋ́ mā. Ó ka ɛ́ɛ géē kpó iyī uwā lá aɔ́fiyɛ lɛ aólɛlā kú uwā. Ó ka amáŋ ɔ̄cɛ dúúmā ɔ́ɔ gáā dɔɔ̄kā ō lá uwā ɔ́fiyɛ ŋ́.