Read idoma OBLATŪKÍNE 29 Bible Online

OBLATŪKÍNE 29 - idoma bible

OBLATŪKÍNE 29

¹Ɛ̄nyā wɛ ɛlā kú ɛka, nɛ̄ Óndú ā da Umósīsi ka ɔ́ɔ le gbo mɛ́mla ācɛ kú Ísrɛ̄lu, ipú ajɛ kú Umówābu ā. Odúúdú nū tɔ̄há mɛ́mla ɛka ɔhá nɛ̄ Óndú ā tɛtɛ gbo mla uwá ɛyí ɛfu kú Usáyínāyi ā.

²Umósīsi lɛ odúúdú ācɛ ā hīīgwú, anɔ́ɔ ó da uwá ka ɛ́ɛ má abɔ̄yī uwā, ɔdā nɛ̄ Óndú ā yá ɔcɛ́ kú Íjīpiti, aígabɔ̄ mɛ́mla odúúdú ācɛ ajɛ kú ɔlɛ́ nū ā.

³Ó da uwá ka ɛ́ɛ má ōcē obɔ̄bí nɛ̄hi nɛ̄ ɔ́ɔ tū klá uwá, mɛ́mla ɔdā ohídáagó nɛ̄hi nɛ̄ Óndú ā yá ā.

⁴Ó ka amáŋ jāā kwu ícíícɛ ɔ́ɔmā, Óndú ā ɔ́ɔ́ cɛ̄ lɛ uwá jɛ́yí kú ɔdā nɛ̄ eyī kú uwā má ámāŋ ɛ̄nɛ̄ ahɔ̄ kú uwā pó ā ŋ́.

⁵Umósīsi da uwá ka iháyí ofɛpa, nɛ̄ Óndú ā kpó aá bū ipú ígbíli ā. Īlī kú uwā ɔ́ gbɛnɛ̄ncɛ̄ ɛ́ɛ́ nɛ̄ áblákpá kú uwā ɔ́ɔ ī lé ŋ́.

⁶Ó ka uwá í má ɔdōlé ō lé ŋ́. Ɛ́ɛ klla má ejé ɔlamu ámāŋ ejé olɔfú gwá ŋ́. Ó ka amáŋ nááná ā Óndú ā lɛ ɛgbá kú uwā dóódu yá lɛ uwá. Cɛ́ɛ́ ka ɔ́ɔ nwū uwā ka anúɔ ɔ́ɔ wɛ Ɔwɔicō kú uwā á.

⁷Ó da uwá ka eko nɛ̄ aá gā ɛga nɛ̄ ɛɛ́ bá, Usíhɔn, ɔcɛ́ kú Uhɛ́sbɔn mɛ́mla Ógu, ɔcɛ́ kú Ubássan, le pɛ́ wɛ̄ɛcɛ gáā le unu nu tá aá. Ó ka amáŋ aá lɛ uwá kpó yálé

⁸Ó ka aá mīyɛ ajɛ kú uwā, le ɔ́ kɔ̄ lɛ aípɔ́ɔma kú Urúbɛ̄n, Ugádi, mɛ́mla āyā éyi kú ipɔ́ɔma kú Umanásɛ

⁹Ó da uwá kéē lɛyítáajɛ lɛ odúúdú ɛlā ɔdā nɛ̄ ɛ́ɛ ka ipú ɛka nɛ̄ Óndú gbo ā ɔwɛ dóódu, cɛ́ɛ́ ɛ́ɛ géē jɛ̄ gɔbū ipú ɔdā dóódu nɛ̄ uwá gē yá ā.

¹⁰Ó klla da uwá ícíícɛ ɔ́ɔmā ka odúúdú uwā mɛ́mla ācɛ nēe gē gbō uwā ā mɛ́mla anyākwɔ́cɛ kú uwā,

¹¹anyā uwā, ayí uwā mɛ́mla aúgbɔga dóódu nēe lā ɔlɛ́ uwā ā, mɛ́mla ācɛ nēe gē yíla ɛfú lɛ uwá, mɛ́mla aɛ́nɛ̄ e gē hɛ́ éŋkpɔ̄ lɛ uwá kpɛ́mm ā, kéē háyi iyɔ̄bū kú Óndú ā, nōo wɛ Ɔwɔicō kú uwā ā.

¹²Umósīsi klla da uwá ka ɛ́ɛ háyi ícíícɛ ɔ́ɔmā cɛ́ɛ́ kéē cokónu ka aá cɛ̄ aɔ́dā nēe tá táajɛ ipú ɛka nɛ̄ aá gbo mla Óndú ā, nōo wɛ Ɔwɔicō kú aá ā.

¹³Cɛ́ɛ́ ka Óndú ā kóō mīyɛ uwá bɛ̄ɛka ācɛ ɔlɛ́ nū ā, kóō kwú pīya Ɔwɔicō kú uwā ɛ́gɛ́nɛ̄ ó cokónu lɛ uwá mɛ́mla ádáádā uwā, Ébrahām, Áyísīki mɛ́mla Ujékɔ̄pu ā.

¹⁴Ó da uwá ka ɔ́ɔ wɛ uwā ofōōfū uwā nɛ̄ Óndú ā yɔ̄ gē gbɛka ā mla uwá ā ŋ́,

¹⁵amáŋ ka ɔ́ɔ gē gbɛka ā mla odúúdú aá nēe háyí abɔ́ɔ ícíícɛ ɔ́ɔmā, mɛ́mla ayááyí kú aá nēé ma ɛ́ɛ́ ŋ́ mā.

¹⁶Ó da uwá kéē blakwu ɛ́gɛ́nɛ̄ oyēeyī kú aá ɔ́ɔ tɛtɛ lɛ ajɛ kú Íjīpiti mɛ́mla ɛ́gɛ́nɛ̄ aá bū ipú aéwɔhá wā ɛga nɛ̄ aá bá ā lɛ ā.

¹⁷Ó da uwá ka ɛ́ɛ má ojibó otīihilɛ kú aéwɔhá nēe bī ɔcí, ɛcɔ̄, oje nɛ̄hɛ̄, mɛ́mla ugóolu (oje udɔ) le yá uwā ā

¹⁸Ó klla da uwá ka ɛ́ɛ má ka ɔ̄cɛ dúúmā kú uwā nɛ̄ ɔ́ɔ háyi abɔ́ɔ ā, kwu ɔ̄cɛnyīlɔ kwu ɔ̄cɛnyā ámāŋ odúúmā kú uwā, ka ɔ́ɔ̄ híī cīgbīhi kwu Óndú ā, nōo wɛ Ɔwɔicō kú aá nyɔ̄ í gbā ɛcí kú aéwo ā ɛ̄gbā ŋ́. Ó da uwá ka ɔ́ɔ í lɛbɛ̄ɛka ɛgba ɔcí nōo le jɛ̄, kwú pīya ɔcí ohɔ́ɔnɔ klla ī ŋmó ɔ̄cɛ ā.

¹⁹Umósīsi klla da uwá ka ɔ́dāŋ ka ɔ̄cɛ dúúmā nɛ̄ ɔ́ɔ̄ yɔ̄ abɔ́ɔ ɛ̄cī ɔ́ɔmā, nōo lɛ ɛlā kú okónu ō ce ā pó, nɛ̄ ɔ́ɔ ī ka lɛ iyī nū ipú ɔtū kú nú ka ɔ́dāŋ ka anúɔ í kōō lɛyítáajɛ lɛ ɛlā kú ɛka ā ŋ́ nááná, ɔ́ɔ géē lɔhi lɛ anúɔ, ɛ́ɛ klla í hɔ́hā ce anúɔ. Ó ka ɔ́dāŋ ka ɔ́ɔ lɛ ikpɛ̄yí olɔfú yá le tá ɛga nōo he ɔ́ ɔtū. Ó da uwá ka uce nɛ̄ ɔ́ɔ yá ɔ́ɔmā í cɛ̄ lɛ ɛjɛ̄ɛ̄jī ūwā í kpó yíifi, kwu ācobɔ̄bí mɛ́mla ācɛ olɔhi.

²⁰Ó da uwá ka Óndú ā ɔ́ɔ gáā je yá ɛdɔ ɔ̄cɛ ɛ́gɔ́ɔmā ɛhi ŋ́. Ikɔkɔ ɔ́ɔmā, ɔ́ɔ í cɔ̄nū da ɔ́ nɛ̄ɛ̄nɛ̄hi, cɛ́ɛ́ ɔdōbɔ̄bí dóódu nɛ̄ ɛ́ɛ tá tū ɔkpá ā géē wā í klá anú jāā gbéeko nɛ̄ Óndú ā kwú ɔ̄ ú yíífi ŋmá ajɛ.

²¹Ó ka Óndú ā ɔ́ɔ géē jē ɔ́ yá ɔdā ō bī lɛ cābɔ̄ lɛ ācɛ kú Ísrɛ̄lu ohile ā. Ó ka Óndú ā klla í bī okónu ō tá nōo yɔ̄ ipú ɛka nēé tá tū ipú ɔkpá kú íne ā lɛ yá ɔ̄ ɛlā.

²²Ó da uwá ka ayááyí uwā kú ɛ̄cɔ̄bū, ayípɛ̄ ɔlɛ́ uwā nēe í wā igbīhi uwā ā mɛ́mla aéwɔhá nēe ŋmá ɛga oligbó ā, géē má ka Óndú ā le ɛ́kɛma mɛ́mla ōwē bī wā í klá ajɛ kú uwā.

²³Ó ka ajɛ o hɛ́hɔ̄ kú uwā ɔ́ɔ gáā yá ɔdɛ̄hɔ̄ dúúmā ŋ́. Ka ɔ́ɔ géē je pīya ɔmā nɛ̄ ɔdā dóódu ɔ́ gáā jɛ̄ anú glá ŋ́. Ó ka ajɛ kú uwā ɔ́ɔ géē lɛbɛ̄ɛka ajɛ kú Usɔ́dɔm mɛ́mla Ugomóra, Ádima mɛ́mla Usēboyíím nɛ̄ Óndú ā je kpó yíífi eko nōó cɔ̄nū nɛ̄hi ā.

²⁴Cɛ́ɛ́ odúúdú ɛcɛ géē dɔɔ̄kā ka ɔdíyá nɛ̄ Óndú ā yá ajɛ kú nū lɛ ā yɔ̄ ā? Ɔdí wɛ ɛyí kú ɔnū nɛ̄hi kú nū āa?

²⁵Ohi kú nū wɛ ohígbū ka ācɛ ɔlɛ́ Óndú ā lɛ okónu nɛ̄ ɔ́ɔ ce mla uwá, mɛ́mla ádáádā uwā eko nɛ̄ ɔ́ɔ kpó uwā bɛ̄cɛ ŋmá ajɛ kú Íjīpiti ā nyílá.

²⁶Ó ka ɛ́ɛ gē cɛ̄ aɔ́wɔ ɔhá nēé tɛtɛ gbo uwā ɛ̄gbā jéjéé ɛ́ɛ́ ŋ́ mā ɛ̄hɔ̄. Aɔ́wɔ nɛ̄ Óndú ā da uwá ka ɛ́ɛ híī gbo uwā ɛ̄gbā gbóógbóō ŋ́ mā.

²⁷Ka anɔ́ɔ Óndú ā kwú cɔ̄nū mla ācɛ ā. Anɔ́ɔ ɔ́ɔ bī ɔdōbɔ̄bí dóódu néē tá tū ɔkpá ā wā í klá ajɛ kú ɔlɛ́ uwā á.

²⁸Ó ka Óndú ā le cɔ̄nū da uwá nɛ̄hi, anɔ́ɔ ɔ́ɔ lɛ uwā fu ŋmá ajɛ kú ɔlɛ́ uwá, lɛ uwá tɛ́ɛ́cɔ̄ ga ajɛ kú aéwɔhá nɛ̄ uwá bá eko ɔ́ɔmā á.

²⁹Umósīsi ka ɔ́ɔ lɛ aɔ́dā nɛ̄ Óndú ā, nōo wɛ Ɔwɔicō kú uwā ā, le tayínū, amáŋ ɔ́ɔ le íne kú nū mafú, cɛ́ɛ́ kú aá mɛ́mla ayááyí kú aá í bī íne ā yúklɔ́ piyóó.