Read idoma OBLATŪKÍNE 3 Bible Online

OBLATŪKÍNE 3 - idoma bible

OBLATŪKÍNE 3

¹Umósīsi ka lɛ ācɛ Ísrɛ̄lu ka igbīhi nɛ̄ aá le Usihɔn ɔcɛ́ ŋmó ā, “Alɔ le eyī pīya, kwú ɛyí kwu ɛhícō, lɛyíkwu ajɛ kú Ubássan ā. Anɔ́ɔ Ógu, ɔcɛ́ kú Ubássan mɛ́mla odúúdú ācɛ okpɛ́fú kú ɔlɛ́ nū le pɛ́ wɛ̄ɛcɛ wā í kpɛ́fú tá alɔ ajɛ kú Édrēyi á.

²Amáŋ, Óndú ā da um ka amí ɔ̄ híī yúúfi nū ŋ́. Ka anúɔ géē je ɔcɛ́ ā abɔ̄yī nū mɛ́mla odúúdú ācɛ ɔlɛ́ nū mɛ́mla ajɛ kú ɔlɛ́ nū ā kpó tū alɔ abɔ̄. Ó ka ɔdā ékpónú nɛ̄ alɔ ɔ́ɔ yá Usíhɔn, ɔcɛ́ kú ācɛ Ámɔ̄ri nōo lā Uhɛ́sbɔn ā, nɛ̄ alɔ ɔ́ɔ géē yá Ógu dúú á.”

³Anɔ́ɔ Umósīsi ka, anɔ́ɔ Óndú ā, nōo wɛ Ɔwɔicō kú aá ɔ́ɔ kwú Ógu, ɔcɛ́ kú Ubássan mɛ́mla ācɛ ɔlɛ́ nū ú kpó tū aá abɔ̄ dúú ā, nɛ̄ aá ŋmó uwá jāā gbéeko nɛ̄ ɔ̄cɛ dúúmā í hile ɔlɛ́ uwā gɛ ŋ́ má.

⁴Umósīsi ka aá mīyɛ odúúdú aígelī nɛ̄ŋcɛ́ kú ɔlɛ́ nū eko ɔ́ɔmā. Ó kōō lɛ igelī kú ɔlɛ́ nū dúú nɛ̄ aá í mīyɛ ŋ́ nɛ ŋ́. Ó ka aígelī ofɛtá nēé bá ɛyí ajɛ kú Ágōbu, ajɔ̄ɔ̄cɛ́ kú Ógu, ɔcɛ́ kú Ubássan ā, aá ɔ́ɔ mīyɛ

⁵Ó da uwá ka odúúdú aígelī nēe bá ɔ́ɔmā, é le igá kú ɔdɔ nōo lɛ icō nɛ̄hi hɛ́ tū uwā. Odúúdú uwā lɛ aódōngwɔ̄ɔwɛ kú oje mɛ́mla aógbló kú oje o cíla aódōngwɔ̄ɔwɛ ā kpɛ́mm. Ó lɛ aípɔ́lɛ́ alɛwa ɔhá bá abɔ́ɔ nēé hɛ́ igá tū uwā ŋ́.

⁶Ó ka aá le odúúdú aígelī ā kpó yíífi klla le odúúdú ācɛnyīlɔ, ācɛnyā mɛ́mla ayípɛ̄nɛ̄ŋcɛ́ kpó ŋmó ɛ́gɛ́nɛ̄ aá yá ipú aígelī nēe wɛ ákú Usíhɔn, ɔcɛ́ kú Uhɛ́sbɔn ā.

⁷Ó da uwá ka aá le aɔ́dāajɛ kú uwā kpó klla le aɔ́dā dóódu nēe ca aá ɛgbá kpɛ́mm ā kpó wu ŋmáajɛ.

⁸Ó ka aá mīyɛ ajɛ nēe yɔ̄ ɛnɔ̄ɔ̄cī kú Ísu kú Ujɔ́dan ā, ajɛ nōo gbɔɔ́ ŋmá Ísu kú Ánɔn ga ɛyí ɛfu kú Uhɛ́mɔn eko ɔ́ɔmā.

⁹(Ó ka ācɛ kú Usídɔn hī ɛfu kú Uhɛ́mɔn ā ka Usiriyɔn, ācɛ kú Ámɔ̄ri kē hī ɔ̄ ka Useníyɛ).

¹⁰Ó ka aá mīyɛ odúúdú ajɛ kú Ógu, ɔcɛ́ kú Ubássan, aígelī nɛ̄hi kú ɛyí ɛfu, mɛ́mla ajɛ kú Ugílɛ̄di mɛ́mla ajɛ kú Ubássan, mɛ́mla ajɛ ɛnɔ̄ɔcī nōo yɛ jāā ga aígelī nɛ̄ŋcɛ́ nēé hī ka Usaléka mɛ́mla Édrēyi ā.

¹¹(Ó ka Ógu, ɔcɛ́ kú Ubássan, wɛ ámōōmɛ kú ācɛ nēe ŋmá ipɔ́ɔmā kú aɔ́báagwu ā á). Umósīsi ka ɛcɔ̄ nēé bī lɛ gbā ikpati ōkwū kú nū á, oliīkpō kú ikpati ā wɛ umíta ɛnɛ. Olɔwá kú nū wɛ umíta ɛpa ɛ́gɛ́nɛ̄ é gē mīya odée kú uwā lɛ ā. Ó klla da uwá ka ɔ̄cɛ ɔ́ɔ lɔfú má ikpati ā ipú igelī kú ācɛ Ámɔ̄ri nēé hī ka Urába ā glá ɛ́ɛ́.

¹²Ó ka eko nɛ̄ aá mīyɛ ajɛ ā, anúɔ kwú ɛhíícō kú igelī kú Arówɛ, nōo kwū Ísu kú Ánɔn ajaajɛ ā ú lɛ ipɔ́ɔma kú Urúbɛ̄n mɛ́mla ipɔ́ɔma kú Ugádi. Ó ka anúɔ kwú āyā ōhī kú ajɛ kú ɛyí ɛfu kú Ugílɛ̄di ā ú lɛ uwá dúú.

¹³Ó ka anúɔ kwú ajɛ ohile kú ācɛ Ugílɛ̄di ā, mɛ́mla odúúdú Ubássan, ɛga nɛ̄ Ógu wɛ ɔcɛ́ ā, mɛ́mla odúúdú ajɛ kú Ágōbu ā ú lɛ ipɔ́ɔma kú Umanásɛ. (É hī odúúdú ajɛ kú Ubássan ka Urefém, nēe wɛ aɔ́báagwu ā).

¹⁴Ó ka Ujɛ́ɛ nēe ŋmá ipɔ́ɔma kú Umanásɛ ā, kwu odúúdú ɛyí ajɛ kú Ágobu, (nōo wɛ Ubássan) ā ú. Ajɛ ā yɛ jāā kwu ɛjī kú ɛyí ajɛ kú Ācɛ Ugɛ́ssɔ mɛ́mla Umáaka. Ó kwú iyē kú anú abɔ̄yī nū ú ce aípɔ́lɛ́ ā. É hī aípɔ́lɛ́ nēe bá abɔ́ɔ ā ka aípɔ́lɛ kú Ujɛ́ɛ.

¹⁵Ó ka anúɔ kwú Ugílɛ̄di ú lɛ inu kú Umácīyɛ, nōo ŋmá ipɔ́ɔma kú Umanásɛ ā.

¹⁶Ó ka anúɔ kwú ajɛ nōo gbɔɔ́ ŋmá Ugílɛ̄di ga Ísu kú Ánɔn ā ú lɛ inu kú Urúbɛ̄n mɛ́mla inu kú Ugádi. Ó ka ɛjī kú uwā ɔ́ɔ kwu ɛháajɛ kú ɔtāhɛ̄ kú ísu ā. Ísu kú Ujábɔ̄ku ā wɛ ɛjī kú uwá ɛhíícō á, ɛga ōhī kú ísu ā wɛ ɛjī kú uwá mɛ́mla ācɛ kú Ámɔ̄ri á.

¹⁷Ó ka ajɛ kú uwá ɔ́ɔ yɛ ga Ísu kú Ujɔ́dan ɛnɔ̄ɔ̄nɛ̄ á. Ó ka ɔ́ɔ gbɔɔ́ ŋmá Ísu kú Ugálílii ɛhíícō kú Ísu ɔmā nōo yɔ̄ ɛháajɛ ā jāā gaá kwu ikpó ɛfu kú Upísga nōo yɔ̄ ɛnɔ̄ɔ̄cī ā.

¹⁸Umósīsi ka eko ɔ́ɔmā, anúɔ le ukɔ́ nōo bá ā tū uwā ka, Óndú ā, nōo wɛ Ɔwɔicō kú uwá ɔ́ɔ kwú ajɛ kú ɛnɔ̄ɔ̄cī kú Ujɔ́dan ā ú lɛ uwá kéē lā anú. Ó ka anúɔ da uwá kéē lɛ iyɔ́fú kpó lɛ ācɛ o kpɛ́fú kú uwā, cɛ́ɛ́ kéē lɛ uwá tɛ̄hɔ̄ gɔbū kéē lɛ bēhé Ujɔ́dan gbɔbū lɛ aípɔ́ɔma ohile kú ācɛ Ísrɛ̄lu, cɛ́ɛ́ kéē tá uwā abɔ̄ kéē mīyɛ ajɛ ā.

¹⁹Ó ka anúɔ da uwá ka anyā ɔlɛ́ uwā, ayí uwā mɛ́mla aɔ́dāajɛ kú uwā ōfōōfū uwā géē bá ajɛ, nɛ̄ anúɔ kɔ̄ lɛ uwá ā á.

²⁰Ó ka anúɔ da uwá kéē tá ācɛ Ísrɛ̄lu ɔ́mpa uwā abɔ̄ jāā gbéeko nɛ̄ ɛ́ɛ mīyɛ ajɛ nɛ̄ Óndú ā yɔ̄ ī je lɛ uwá, ɛnɔ̄ɔ̄nɛ̄ kú Ísu kú Ujɔ́dan ā, jāā gbéeko nɛ̄ Óndú ā cɛ̄ lɛ uwá le lā anú ɛbɔ́, ɛ́gɛ́nɛ̄ ó tɛtɛ yá abɔ́ɔ lɛ uwá ā. Cɛ́ɛ́ ɛ́ɛ lɔfú cigbīhi ga ipú ajɛ nɛ̄ anúɔ je lɛ uwá ā.

²¹Ó ka anúɔ da Ujóssuwa kóō lɛ odúúdú ɔdā nɛ̄ Óndú ā, nōo wɛ Ɔwɔicō kú nū yá aɔ́cɛ́ ɛpa, Usíhɔn mɛ́mla Ɔ́gu ā má ɛɛ́. Ka Óndú ā géē yá ācɛ ohile nēe bá ipú ajɛ nɛ̄ ɛ́ɛ gáā mīyɛ ā ɔdā ékpónú ɔ́ɔmā dúú.

²²Umósīsi ka anúɔ da Ujóssuwa kóō híī yúúfi uwá ŋ́. Ohígbū ka Óndú ā, Ɔwɔicō kú uwā ɔ́ɔ gáā nuunu ā lɛ uwá.

²³Umósīsi ka eko ɔ́ɔmā, anúɔ le ɔkɔ gbā lɛ Ɔwɔicō lɔfú lɔfú kahíníī,

²⁴“Woó, Óndú, Ɔwɔicō kú um, n jé ka ɔdā nɛ̄ a máfú gā um ā wɛ ohútu kllɔ́dɔ́ɔ́ kú ɔdā nɛ̄hi mɛ́mla ɔdā ohídáagó nɛ̄ a gáā yá. Ɔwɔ ɔhá dúúmā í yɔ̄ ɔkpáncō ámāŋ ɛcɛ, nōo lɔfú yá ɔdā ōhídáagó mɛ́mla ɔdā nɛ̄hi nɛ̄ a gē yá ā glá ŋ́.

²⁵Óndú cɛ̄ ká n̄ le bēhé Ísu kú Ujɔ́dan ā, cɛ́ɛ́ ká n̄ lɛ ajɛ olɔhi kú ogbeé ā má. Ajɛ olɔhi kú ɛyí ɛfu ɔ́ɔmā, mɛ́mla ɛfu kú Ulɛ́bānɔn ā.”

²⁶Umósīsi ka amáŋ, ohígbū uwā ā, Óndú ā ɔ́ɔ le cɔ̄nū mla anúɔ, ɔ́ɔ tá kóō jāhɔ̄ lɛ ɔkɔ nɛ̄ anúɔ gbā a. Ikɔkɔ ɔ́ɔmā ā, ɔ́ɔ koó jɛ̄ ɛɛ́, ka anúɔ kɛlā lɛyíkwu ɛlā ɔ́ɔmā lɛ anúɔ gɛ ŋ́.

²⁷Ó ka anɔ́ɔ Óndú ā da anúɔ ka anúɔ lɛ tá ágēnégēne kú ɛfu kú Upísga ā ká anúɔ gaá má ajɛ ā ga ɛhíícō mɛ́mla ɛháajɛ, ɛnɔ̄ɔ̄cī ga ɛnɔ̄ɔ̄nɛ̄. Ó ka ɔ́ɔ ka anúɔ má ɔdā nɛ̄ anúɔ gē má ā lɔɔlɔhi, ohígbū ka anúɔ í gāá bēhé ísu kú Ujɔ́dan ā ga ipú ajɛ ā ŋ́.

²⁸Umósīsi ka Óndú ā, ɔ́ɔ ka anúɔ nōo wɛ Umósīsi ɔ́ɔ le ɔ́da je lɛ Ujóssuwa, kú anúɔ klla lɛ ɔfú tū ɔ̄ iyē, ohígbū ka anú ɔ́ɔ gáā wɛ otrɛ̄yí nōo gáā kpó ācɛ ā ga ipú ajɛ nɛ̄ anúɔ má ā á.

²⁹Ó ka aá bá ɔpɛ́ kú ɔlɛ́ nōo lɛ eyī pīya kwu ɔlɛ́ nēé hī ka Ubɛ́tipéwɔ ā á.