Read idoma OBLATŪKÍNE 30 Bible Online

OBLATŪKÍNE 30 - idoma bible

OBLATŪKÍNE 30

¹Umósīsi ka anúɔ le ɔhā mɛ́mla okónu ō tá kpó tá lɛ uwá kéē jila je éyi ŋmá anú. Ó ka eko nɛ̄ aɔ́dā dóódu nēe bá ā lɛ yá uwā ajɛ kú aéwɔhá nɛ̄ Óndú ā ɔ́ɔ gáā kpó uwā nyɔ̄ ā. Ó ka ɛ́ɛ í blakwu aɔ́dā ɛpa nɛ̄ anúɔ kpó lɛ uwá kéē je éyi ŋmá ā.

²Ó da uwá ka eko nɛ̄ uwá mɛ́mla ayááyí uwā lɛ cīgbīhi wā ɛgiyí Óndú ā, anɔ́ɔ ɛ́ɛ bī odúúdú ɔtū kú uwā lɛyítáajɛ lɛ aíne nɛ̄ anúɔ yɔ̄ gē je lɛ uwá ícíícɛ ɔ́ɔmā ā,

³ka eko ɔ́ɔmā, Óndú ā, nōo wɛ Ɔwɔicō kú uwā ā ɔ́ɔ í méyīnyinyi uwā. Ó ka ɔ́ɔ géē kpó uwā cīgbīhi ŋmá ipú aéwo nɛ̄ ɔ́ɔ kpó uwā nyɔ̄ ā. Ó ka Óndú ā ɔ́ɔ í cē agbénú klá uwá kpɔ́ ɛ́ɛ́.

⁴Ó klla da uwá ka ɔ́dāŋ ka ɛ́ɛ kōō le uwá pahīla ga ɛga oligbó fíyɛ́ dúú kú ɛcɛ ā nááná, Óndú ā, nōo wɛ Ɔwɔicō kú uwā ā géē tū uwā bá klla géē kpó uwā ŋmá abɔ́ɔ wā ɔlɛ́.

⁵Ó ka Óndú ā, nōo wɛ Ɔwɔicō kú uwā ā, ɔ́ɔ géē kpó uwā wā ipú ajɛ kú ádā uwā, cɛ́ɛ́ ka ɔ́ɔ kwú pīya Ɔwɔicō kú uwā. Ó ka ɔ́ɔ géē yá kú ɛ́ɛ gbagbébnú nɛ̄hi, klla í cɛ̄ lɛ uwá je lɛwa nɛ̄hi fíyɛ́ aádáádā uwā.

⁶Ó ka Óndú ā, nōo wɛ Ɔwɔicō kú uwā ā, géē yá kú uwá mɛ́mla ayááyí kú uwā kéē lɛyítáajɛ lɛ ɔ́, cɛ́ɛ́ kú uwá kéē géē bī odúúdú ɔtū kú uwā lɛ yíhɔtū tá ɔ̄. Ó da uwá ka ɛ́ɛ géē yɔ̄ ī lā ipú ajɛ ɔ́ɔmā.

⁷Ó klla da uwá ka Óndú ā ɔ́ɔ géē je odúúudú okónu nɛ̄ ɔ̄ tá ā cīgbīhi gé lɛ aólɛlā kú uwā nēe gē yá uwā ōwē ā.

⁸Ó da uwá ka ɛ́ɛ í lɛyítáajɛ lɛ ɔ́ klla í lɛyítáajɛ lɛ odúúdú aíne kú nū nɛ̄ anúɔ yɔ̄ gē je lɛ uwā ícíícɛ ɔ́ɔmā ā.

⁹Umósīsi klla da uwá ka Óndú ā, nōo wɛ Ɔwɔicō kú uwā ā, ɔ́ɔ í yá uwá kéē jɛ̄ gɔbū nɛ̄hi ipú ɔdā dóódu nēe gē yá ā, mɛ́mla ipú úklɔ́ kú uwā dóódu dúú. Ó ka ɛ́ɛ géē ma ayí alɛwa. Aɛ́na kú uwā géē nyīla nɛ̄hi. Ó ka ɛ́ɛ klla í lɛ ɔdɛ̄hɔ̄ nɛ̄hi. Ɔtū géē he Óndú ā nɛ̄hi ka ɔ́ɔ̄ yá kú uwá kóō jɛ̄ gɔbū nɛ̄hi bɛ̄ɛka, ɛ́gɛ́nɛ̄ ɔtū he ɔ́, nɛ̄ ɔ́ɔ yá kú aádáádā uwā kéē jɛ̄ gɔbū eko kú uwā ā.

¹⁰Ó ka amáŋ, kéē lɛyítáajɛ lɛ Óndú ā piíí, klla í lɛ odúúdú aíne kú nū nɛ̄ ɛ́ɛ tá tū ipú ɔkpá kú íne ā tū. Ó da uwá ka ɛ́ɛ cíkā ō cīgbīhi ga ɛgiyí Óndú ā mla odúúdú ɔtū kú uwā.

¹¹Umósīsi da uwá ka íne nɛ̄ anúɔ yɔ̄ gē je lɛ uwá ícíícɛ ɔ́ɔmā ɔ́ɔ lɛ ɔnɔ nēe í jɛ́yí nū kéē lɛ uwá tū glá ŋ́ nɛɛ ŋ́.

¹²Ó da uwá ka íne ā í yɔ̄ ɔkpancō ŋ́. Ka uwá ɔ́ɔ́ cíkā ō dɔɔ̄ka ka ɔnyɛ í gicō abɔ́ɔ gaá bī ɔ̄ wāajɛ gé lɛ aá, cɛ́ɛ́ kú aá pó ahɔ̄ cɛ́ɛ́ kú aá lɛ ɔ́ tū ŋ́.

¹³Ó ka íne ā ɔ́ɔ́ yɔ̄ ogbēē ɔhá kú itekwú ŋ́. Ka uwá ɔ́ɔ́ cíkā ō dɔɔ̄ka ka ɔnyɛ í hɛ́ itekwú ā igbó ka ɔ́ɔ̄ gaá lɛ íne ā bī gé lɛ aá cɛ́ɛ́ kú aá le pó ahɔ̄ ká aá lɔfú lɛyítáajɛ lɛ ɔ́ ŋ́.

¹⁴Ó ka ó lɛ ā ŋ́, amáŋ íne ā ɔ́ɔ yɔ̄ mla uwá abɔ́ɔ pī uwā. Ó da uwá ka ɛ́ɛ jé íne ā, ɛ́ɛ ka ɔ́ tɛ́ɛcɛ abɔ̄yī uwā glá. Ohígbū ɔ́ɔmā, ka ɛ́ɛ lɛyítáajɛ lɛ ɔ́.

¹⁵Umósisi da uwá ícíícɛ ɔ́ɔmā ka anúɔ yɔ̄ ī kpó ɔdōlɔhi mɛ́mla ɔdōbɔ̄bí, ikwū mɛ́mla oyēeyī bá lɛ uwá kéē je éyi ŋmá ipú uwā.

¹⁶Ó ka ɔ́dáŋ ka uwá lɛyítáajɛ lɛ íne kú Óndú ā, nōo wɛ Ɔwɔicō kú uwā ā, nɛ̄ anúɔ yɔ̄ gē je lɛ uwá ícíícɛ ɔ́ɔmā ā. Ka ɔ́dáŋ ka ɛ́ɛ yíhɔtū tá Óndú ā, lɛyítáajɛ lɛ odúúdú aíne kú nū, cɛ́ɛ́ ɛ́ɛ géē je gbagbénú nɛ̄hi, cɛ́ɛ́ ɛ́ɛ kwú pīya éwo kú ācɛ nēe lɛwa nɛ̄hi. Ó ka Óndú ā, nōo wɛ Ɔwɔicō kú uwā ā, géē hɔ̄hā ce uwá ipú ajɛ nɛ̄ uwá gáā nyɔ̄ í míyɛ ā.

¹⁷Ó ka amáŋ ɔ́dáŋ ka ɛ́ɛ tá ō jāhɔ̄, nɛ̄ ɛ́ɛ lɛyítáajɛ gɛ ŋ́, nɛ̄ ɛ́ɛ nyɛ̄ɛ̄ gaá gbɔɔ́ ō gbā aɔ́wɔ ɔhá ɛ̄gbā,

¹⁸Ka ɛ́ɛ géē kpó uwā yíífi. Umósīsi ka anúɔ ī pi uwá ahɔ̄ abɔ́ɔ eko ɔ́ɔmā, Ka ɛ́ɛ gáā lɛ́cɛ ipú ajɛ nɛ̄ ɔ́ɔ yɔ̄ ogbeé ɔhá kú Ujɔ́dan nɛ̄ uwá nyɔ̄ gáā mīyɛ ā ŋ́.

¹⁹Umósīsi ka anúɔ yɔ̄ gē da uwá kéē kwú ikwū ámāŋ ka oyēeyī ú. Kéē kwú ɔhā kú Ɔwɔicō ú ámāŋ okónu ō tá kú nū ú. Ó ka anúɔ hī ɔkpáncō mɛ́mla ajɛ ijáalí kú ɔdā nɛ̄ ɛ́ɛ géē je ā. Ó da uwá ka ɛ́ɛ kwú oyēeyī ú.

²⁰Ó da uwá kéē yíhɔtū tá Óndú ā, nōo wɛ Ɔwɔicō kú uwā ā, ka ɛ́ɛ lɛyítáajɛ lɛ ɔ, cɛ́ɛ́ kéē klla cɛ̄ɛ̄lā kú nū, cɛ́ɛ́ uwá mɛ́mla ayááyí uwā í lɛ́ɛcɛ ipú ajɛ nɛ̄ Óndú ā cokónu ō je lɛ aádáádā uwā, Ábrahām, Áyísīki mɛ́mla Ujékɔ̄pu ā.