Read idoma OBLATŪKÍNE 31 Bible Online

OBLATŪKÍNE 31 - idoma bible

OBLATŪKÍNE 31

¹Umósīsi yɔ̄ ī kɛlā lɛ ācɛ kú Ísrɛ̄lu ā gɔbū kpɔ̄.

²Ó da uwá ka anúɔ lɛ iháyí ofu ɛhīlī lé ícíícɛ ɔ́ɔmā ɛɛ́. Ka anúɔ í lɔfú leyīkwu uwá glá ɛ́ɛ́ gɛ ŋ́. Ó ka Óndú ā ɔ́ɔ kē le da anúɔ ka, anúɔ í gáā bēhé ísu kú Ujɔ́dan ā gɛ ŋ́.

³Ó ka Óndú ā, nōo wɛ Ɔwɔicō kú uwā ɔ́ɔ géē leyīkwu uwá, klla í kpó odúúdú aéwo nēe bá ipú ajɛ ā yíífi ŋmá ajɛ. Cɛ́ɛ́ ká uwá kéē géē mīyɛ ajɛ kú uwā. Ó da uwá ka Ujóssuwa ɔ́ɔ gáā wɛ ɔ̄cɛ oleyīkwu uwá mɛ́ɛ̄ á, ɛ́gɛ́nɛ̄ Óndú ā ɔ́ɔ ka lɛ ā.

⁴Ó ka Óndú ā géē kpó ācɛ ā yíífi ɛ́gɛ́nɛ̄ ɔ́ yá Usíhɔn mɛ́mla Ógu, aɔ́cɛ́ kú ācɛ Ámɔ̄ri ā, nɛ̄ ɔ́ɔ klla je ajɛ kú uwā yíífi ā.

⁵Ó ka Óndú ā ɔ́ɔ géē cɛ̄ lɛ uwá yá ācɛ kú ajɛ Ukénan lé. Ó ka ɛ́ɛ yá uwā ɛ́gɛ́nɛ̄ nɛ̄ anúɔ da uwá ā.

⁶Ó da uwá ka ɛ́ɛ lɔfú tīyē cɛ́ɛ́ ká ɛ́ɛ lɔtūlé, cɛ́ɛ́ kéē yúúfi uwá ŋ́. Ohígbū ka Óndú ā, nōo wɛ Ɔwɔicō kú uwā ā, ɔ́ɔ géē nyɔ̄ mla uwá. Ó ka ɔ́ɔ gáā plla uwá ɛ́ɛ́, nɛ̄ ɔ́ɔ gē já uwā kwu ɔwɛ ŋ́.

⁷Anɔ́ɔ Umósīsi lɛ Ujóssuwa hīgwú, anɔ́ɔ ó da ɔ́ ipēyī odúúdú ācɛ kú Ísrɛ̄lu ā ka ɔ́ɔ lɔfú tīyé, ka ɔ́ɔ klla lɔtūlé, ka anú ɔ́ɔ wɛ ɔ̄cɛ nōo gáā kpó ācɛ nēe bá ɔ́ɔmā kéē mīyɛ ajɛ nɛ̄ Óndú ā ɔ́ɔ cokónu ō je lɛ aádáádā uwā á.

⁸Ó da ɔ́ ka Óndú ā abɔ̄yī nū géē yɔ̄ mla anú. Ó da ɔ́ɔ ka Óndú ā ɔ́ɔ gáā já ɔ̄ kwu ɔwɛ ŋ́. Ó ka ohígbū ɔ́ɔmā ā, ɔtū kú nū ka ɔ́ɔ̄ gbenyi ɛ́ɛ́ nɛ̄ ɔ́ɔ gē yúúfi ŋ́.

⁹Anɔ́ɔ Umósīsi le íne ā tá tāajɛ anɔ́ɔ ó kwú ɔ̄ ú lɛ ācogwɛ́ɛya, ayí kú Ulífāyi ā, nēe gē bī Ikpati kú Ɛka kú Óndú ā, mɛ́mla anyākwɔ́cɛ kú ācɛ Ísrɛ̄lu ā.

¹⁰Anɔ́ɔ Umósīsi le ɔ́da je lɛ uwá ka oŋmɛ́yí kú iháyí aháapa dóódu, eko nɛ̄ iháyí nēé kpó ulé nɛ̄ ācɛ bī ā yá uwā ɛhi ā le yá, kéē lɛ íne ā jé tɛ́ɛcɛ gbōmgbōm ɛpléeko kú ucɛ kú aáklɔ́kpɛ ā.

¹¹Ó ka ɛ́ɛ lɛ íne ā jé tɛ́ɛcɛ lɛ ācɛ kú Ísrɛ̄lu, eko nɛ̄ ɛ́ɛ gaá le jīla ɛga éékpó nɛ̄ ɛ́ɛ gē gbā Óndú ā, nōo wɛ Ɔwɔicō kú uwā ā ɛ̄gbā ā.

¹²Ó ka ɛ́ɛ lɛ odúúdú uwā kpó hīgwú tɔ̄há, kwu ācɛnyīlɔ, ācɛnyā, ayípɛ̄ mɛ́mla aúgbɔga dóódu nēe lā ɔlɛ́ uwā. Cɛ́ɛ́ kú odúúdú uwā kéē pó íne ā abɔ̄ é yɔ̄ ī jé ɔ̄ tɛ́ɛcɛ ā. Cɛ́ɛ́ kéē kllɔcɛ́ ojīlīmā ō ce Óndú ā, nōo wɛ Ɔwɔicō kú uwā ā, kéē lɛyítáajɛ lɛ ɔdā nɛ̄ ɔ́ɔ gē nwú ā kpaakpa.

¹³Ó da uwá ka ɔwɛ ɛ́gɔ́ɔmā, ɔ́ɔ í yá kú ayááyí uwā nēé pó íne ā jéjéē ɛ́ɛ́ ŋ́ mā, kéē le pó. Ka ɛ́ɛ kē í kllɔcɛ́ ō lɛyítáajɛ lɛ íne ā eko nɛ̄ ɛ́ɛ í yēeyī gaá kwu ipú ajɛ nōo yɔ̄ ogbeé ɔhá kú Ujɔ́dan nɛ̄ ɛ́ɛ gáā mīyɛ ā.

¹⁴Óndú ā da Umósīsi ka ɛ̄cī nɛ̄ ɔ́ɔ gáā kwú ā ɔ́ɔ má kwajaajɛ ɛ́ɛ́. Ó da ɔ́ ka ɔ́ɔ̄ lɛ Ujóssuwa hīīgwú, kóō le ɔ́ bī wā ipú Áklɔ̄kpīihɔ ka anúɔ le ukɔ́ tū ɔ̄.

¹⁵Anɔ́ɔ Óndú ā gā ipú Áklɔ̄kpīihɔ ā bɛ̄ɛka ojuja nɛ̄hi nōo háyi pī okómpīinu kú Áklɔ̄kpīihɔ ā.

¹⁶Óndú ā da Umósīsi ka ɔ́ɔ gáā kwú ɛɛ́, igbīhi nɛ̄ ɔ́ɔ gekwú, ka ācɛ ā ɛ́ɛ gáā yɛce anúɔ kpaakpa gɛ ŋ́. Ó klla ka ɛ́ɛ géē je ɛka nɛ̄ anúɔ mla uwá gbo ā bīya, géē je mlanyī anúɔ, klla í gbā aɔ́wɔ kú ācɛ o pɛ̄ɛcí nɛ̄ ɛ́ɛ gáā mīya ajɛ kú uwā ā ɛ̄gbā.

¹⁷Ó ka anúɔ í cɔ̄nū mla uwá ɔ́dāŋ ka ɛ́ɛ le yá lɛ ā. Ó ka anúɔ géē cīgbīhi kwu uwá, cɛ́ɛ́ ɛ́ɛ lɛ uwá kpó yíífi. Ó klla ka ɔdōbɔ̄bí alɛwa géē yá uwā. Ó ka eko nɛ̄ ɔdōbɔ̄bí ā gbɔɔ́ ō yá uwā, cɛ́ɛ́ ɛ́ɛ géē jé ka anúɔ wɛ Ɔwɔicō kú uwā ā, ɔ́ɔ yɔ̄ mla uwá ɛ́ɛ́ gɛ ŋ́.

¹⁸Ó ka anúɔ í klla gáā tá uwā abɔ̄ gɛ ŋ́. Ohígbū ka ɛ́ɛ lɛ ɔdōbɔ̄bí yá, abɔ̄ ɛ́ɛ pɛ́ nyɔ̄ í gbā aɔ́wɔ kú aéwɔhá ɛ̄gbā ā.

¹⁹Ó da Umósīsi eko ɔ́ɔmā, ka ɔ́ɔ̄ lɛ ijē éyi tá tāajɛ. Ka ɔ́ɔ̄ lɛ ɔ́ nwū uwā, cɛ́ɛ́ ka ɔ́ɔ̄ géē wɛ ijáalí kú anúɔ mɛ́mla uwá.

²⁰Óndú ā ka anúɔ géē kpó uwā ga ipú ajɛ olɔhi ā, ɛ́gɛ́nɛ̄ anúɔ cokónu lɛ aádáádā uwā lɛ ā. Ó ka ɛ́ɛ í má ɛdɔ ɔdōlé dóódu nɛ̄ ɛ́ɛ dɔɔ̄kā í lé. Ó ka ɛ́ɛ géē lā gbiyēnɛɛ. Ó ka amáŋ ɛ́ɛ í nyɛ̄ɛ̄ gaá gbā aɔ́wɔ ɔhá ɛ̄gbā. Ó ka ɛ́ɛ géē tá anúɔ klla í bīya ɛka kú anúɔ mla uwá ā.

²¹Ó ka ɔdōbɔ̄bí mɛ́mla ákanya mɛ́mla unwalu alɛwa géē wā í klá uwá. Ó ka amáŋ, ɛ́ɛ géē gwíijē ā kpɔ̄. Cɛ́ɛ́ ka ɔ́ɔ̄ géē cījáalí tū uwā. Ó ka ɔ́ɔ kōō wɛ eko ɔ́ɔmā gbɔbū ɛ́ɛ́ ká anúɔ kpó uwā ga ipú ajɛ nɛ̄ anúɔ ɔ́ɔ cokónu ō je lɛ uwá ā, anúɔ jé ɔdā nɛ̄ ɛ́ɛ yɔ̄ gē gbɛlá ā.

²²Ícíícɛ ɔ́ɔmā, Umósīsi le ijē ā tá tāajɛ, le ɔ́ nwū ācɛ kú Ísrɛ̄lu.

²³Anɔ́ɔ Óndú ā kwú abɔ̄ ú ce Ujóssuwa, ɔyí kú Unún, ɛyí. Anɔ́ɔ ó da ɔ́ ká ɔ̄ lɔtūlé, ka ɔ́ɔ̄ lɔfú tīyē, ká ɔtū kú nū ká ɔ̄ le fúlá ká, ohígbū ka anú ɔ́ɔ gáā kpó ayí kú Ísrɛ̄lu ga ipú ajɛ nɛ̄ anúɔ cokónu ō je lɛ uwá ā á. Ó ka anúɔ géē yɔ̄ mla anú.

²⁴Umósīsi le íne ā tá tāajɛ kwɛyí, ó klla le má ka anúɔ í je ɔdā dúú táajɛ ŋmá anú ŋ́.

²⁵Ó le ɛlā ka lɛ ācogwɛ́ɛya, ayí kú Ulífāyi, nēe gē leyīkwu Ikpati kú Ɛka kú Óndú ā eko nōó le yá kwɛyí ā.

²⁶Ó da uwá kéē mīyɛ ɔkpá kú íne kú Ɔwɔicō ā, kéē kwú ɔ̄ ú tá ipú Ikpati kú Ɛka kú Óndú ā, cɛ́ɛ́ ka ɔ́ɔ̄ cījáalí tū uwā.

²⁷Umósīsi da uwá ka anúɔ jé ɛ́gɛ́nɛ̄ ɔtū kú uwā ɔ́ɔ lɔfú nɛ̄ ɛ́ɛ klla gē yīkpɛ̄yí olɔfú lɛ ā. Ó ka ɛ́ɛ yíkpɛ̄yí olɔfú tá Óndú ā eko nɛ̄ anúɔ kōō yēeyī nááná ā. Ó da uwá ka ɛ́ɛ í yá fíyɛ́ eko nɛ̄ anúɔ gekwú.

²⁸Umósīsi da uwá kéē lɛ odúúdú anyākwɔ́cɛ kú aípɔ́ɔma kú uwā kpó hīīgwú gé lɛ anúɔ, cɛ́ɛ́ ká anúɔ lɛ ɛlā ā ka kéē pó, cɛ́ɛ́ ká ɔkpáncō mɛ́mla ajɛ kéē wɛ ijáalí ce uwá ɛyí.

²⁹Ó ka anúɔ géē kwú eko kpiíí ā, anúɔ kē jé ka ɛ̄cɔ̄bū ɛ́ɛ̄ gáā lɛlá wu ɔdā nɛ̄ ɔ́ɔ le kpaakpa mɛ́mla aɛ́nɛ̄ é le kpaakpa ŋ́ mā gɛ ŋ́. Ó ka ɛ́ɛ géē tá ɛlā kú Ɔwɔicō géē nyɔ̄ í lā ɛdɔ oyēeyī ɛdɔ ɛyɛ́ɛ́yí gwū ɛ̄nɛ̄ anúɔ da uwá ká ɛ̄ɛ lā ā tá. Ó da uwá ka Óndú ā géē cɔ̄nū cɛ́ɛ́ ɔdōbɔ̄bí nɛ̄hi ɔ́ɔ le yá uwā.

³⁰Anɔ́ɔ Umósīsi le odúúdú ɛlā kú ijē ā kpó jé tɛ́ɛcɛ lɛ odúúdú ācɛ kú Ísrɛ̄lu abɔ̄ ɛ́ɛ bá yɔ̄ ī jāhɔ̄ lɛ ɔ́ ā.