Read idoma OBLATŪKÍNE 32 Bible Online

OBLATŪKÍNE 32 - idoma bible

OBLATŪKÍNE 32

¹Ɔkpáncō mɛ́mla ajɛ, aá pó ɛlā nɛ̄ n gáā ka ā.

²Ka ɛlā nɛ̄ n gē nwū ā kóō wāajɛ bɛ̄ɛka ɔ́kpa kú ɔwɔ ā. Ɛlā kú um kóō kwú pīya bɛ̄ɛka ébú ā ajɛ. Ɛlā kú um géē yā bɛ̄ɛka ɔwɔ nōo ī yā klá ɔdɛ̄hɔ̄ nōo bū ŋmá ajɛ ɛ̄yīpɛ̄ ā. Bɛ̄ɛka ɔwɔ nōo gē mí kɛ́tɛ́kɛ́tɛ́ klá ácí ɛ̄mɛ̄ɛ̄mɛ̄ ā.

³N géē cɛ̄tra iyē kú Óndú ā, ācɛ ɔlɛ́ nū kē géē ka ɛ́gɛ́nɛ̄ ó lɔfú lɛ ā tɛ́ɛcɛ.

⁴Óndú ā gē gbo ɔ̄cɛ bɛ̄ɛka ápátɛ́cɔ̄ ā, úklɔ́ kú nū í lɛ ɛnyá ŋ́. Ɔwɔicō kú aá gē yá ɔdā nōó cokónu ka anúɔ géē yá ā. Ɔwɔicō ī yá ɔdā nōo lɛ kpaakpa mɛ́mla ɛ̄nɛ̄ o wɛ ɔkwɛ̄yi.

⁵Amáŋ aá le íne kú Óndú ā bīya, anɔ́ɔ ohígbū ɛpɔ̄bí kú aá ā aá wɛ ayípɛ̄ ɔlɛ́ nū gɛ ŋ́. Aá wɛ ācokɛ̄mgbɛ̄ mɛ́mla ācokɛ̄kɛ̄gbɛ̄.

⁶Aólíla mɛ́mla ācɛ ɔdāahá nēé lɛ ohílīpú ŋ́, ɔwɛ nɛ̄ aá cíkā ō yá Óndú kú aá ā yɔ̄ áā? Anú wɛ ádā aá, nōo yá aá ā á. Anú yá aá ɛ́ɛ́ nɛ̄ aá je pīya éwo ícɛ á.

⁷Aá gbɛlá kwu íkée mɛ́mla eko otɛtɛ. Aá da aádā aá ɔ̄kā kéē da aá ɔdā nōo yá ā. Aá da anyākwɔ́cɛ ɔ̄kā kéē kā aá ɔ̄kā ɔdā nōo yá eko nōo yɛ ā.

⁸Anú nōo fíyɛ́ dúú ā, gē je ajɛ lɛ aéwo dóódu á, Anú gē ka ɛga nɛ̄ ācɛ cíkā ō lā á. Ó lɛ ɔwɔ o gbā ɔ̄ ɛ̄gbā je lɛ éwo dóódu

⁹Amáŋ ó kwú ayí kú Ujékɔ̄pu ú, kéē wɛ ukpɛ̄ kú iyí nū

¹⁰Ó le uwá pīyɛ abɔ̄ nēé yɔ̄ ī yɛ ipú ígbíli, nɛ̄ ɔ̄cɛ dúú í lā ŋ́, ɛga nɛ̄ owu yɔ̄ ī kpó úmúlá kpɛmm ā. Ó gbō uwā ɛyí klla lɛ ɛlá kwu uwá, ɛ́gɛ́nɛ̄ ó gē gbō iyīnū ā.

¹¹Ɛ́gɛ́nɛ̄ okpé gē nwū ayí nū kéē wu ā, ó gē nā acá kú nū áŋda gē kwú ayí nū ce ɔ́ eko nēé gbɔɔ́ ō míya. Ɛ́gɔ́ɔmā nɛ̄ Óndú ā gē gbō ācɛ Ísrɛ̄lu cɛ́ɛ́ kéē híī gwōnū ŋ́ má.

¹²Óndú ā ōfōōfūnū kpó ācɛ ɔlɛ́ nū trɛ̄yí á. Otabɔ̄ dúúmā í ŋmá ɛgiyí aɔ́wɔ ɔhá wā ŋ́.

¹³Ó lɛ̄ uwá fu cɔcɛ́ ɛyí ɛfu ā. É gē lé ɔdōlé nōo bū ajɛ ā, é ī gwá ɛnwú ŋmá ápátɛ́cɔ̄, ɔdɛ̄hɔ̄ kú uwā ī jɛ̄ ɛyí ajɛ ɛcɔ̄.

¹⁴Amɛ̄ kú aɛ́na mɛ́mla aɛ́wū kú uwā gē lɛ enyāmɛ̄ nɛ̄hi. Aálá mɛ́mla aɛ́na nēe lɔhi fíyɛ́ dúú ā wɛ ákú uwā. Īkpɔ̄dɛ̄hɔ̄ mɛ́mla ejé nōo lɔhi fíyɛ́ dúú ā wɛ ákú uwā.

¹⁵Ācɛ ɔlɛ́ Óndú ā le gbagbénú, amáŋ é klla yíkpɛ̄yí olɔfú kpɔ́, é lé ɔdōlé klla kwú jɔ̄kwū mlɔ́mlɔ́ ā. É nyɛ̄ɛ̄ hɛ̄ Ɔwɔicō nōo yá uwá ā tá. É klla tá Ɔwɔicō, ōlɔfú nɛ̄hi nōo nya uwá tá ā.

¹⁶Ɛcí nēé gē pā ā gē cɛ̄ lɛ Óndú ā kóō yɔ́bɔ́nyā. Ɔdōōbɔ̄bí nēé gē yá ā, gē yá Óndú ā cɔ̄nū.

¹⁷É gē gwɛ́ɛya lɛ aɔ́wɔ, nēé wɛ ɔkwɛ̄yi ŋ́ mā, aɔ́wɔ ɛ̄yīpɛ̄ nɛ̄ aádáádā uwā í jé ŋ́ mā, aɔ́wɔ nɛ̄ ācɛ Ísrɛ̄lu í lɛyítáajɛ lɛ uwá jéjéē ɛ́ɛ́ ŋ́ ma

¹⁸É kwú mlanyī Ɔwɔicō, ōlɔfú nɛ̄hi nōo nya uwá tá ā, anú nōo je oyēeyī lɛ uwá ā.

¹⁹Eko nɛ̄ Óndú ā le ɛ̄nyā má ā, ó le cɔ̄nū, anɔ́ɔ ó tá ayí nū nɔ̄nyā mɛ́mla ayí nū nɔ̄nyīlɔ á.

²⁰Anɔ́ɔ ó kahíníī, “Ń gáā tá uwā abɔ̄ gbóógbóō ɛ́ɛ́ gɛ ŋ́, cɛ́ɛ́ ká n̄ má ɔdā nōo géē yá ācɛ nōo gē yá ikpɛ́yí olɔfú, nōó klla í yɛce um kpaakpa ŋ́ mā.

²¹Icɛ̄bɔ̄ nēé gē yá ā, le um yá cɔ̄nū ɛɛ́. É le um yá ɔ̄cɛ o yɔ́bɔ́nyā ohígbū aɔ́wɔ kú uwā, aɔ́wɔ neé wɛ ɔkwɛ̄yi ŋ́ mā. Ohígbū ɔ́ɔmā ā, n géē bī éwo nōó lɔfú ŋ́ mā le yá uwā cɔ̄nū. N géē bī éwo kú aólíla le yá kéē má ímálānyī uwā.

²²N géē cɔ̄nū nɛ̄hi, ícɔ̄nū kú um géē lɛbɛ̄ɛka ɔlá ō cɛ̄ nɛ̄hi ā, ɛ̄nɛ̄ o í kpó ɛjɛ̄ɛ̄jī ɔdā dóódu yitāajɛ ā. Ó géē yi jāā ga ɛháajɛ kú ipú ɛcɛ, gaá kwú ɛgba kú ɛfu dóódu í yi tāajɛ.

²³N géē tū ɔdōbɔ̄bí nōó lɛ oŋmɛ́yí ŋ́ klá uwá klla í tá ɛjɛ̄ɛ̄jī ɔyī kú um lɛyíkwu uwá.

²⁴Ɔkpɛtā mɛ́mla áganá géē kpó uwā ŋmó. Ōcē obɔ̄bí nɛ̄hi géē kpó uwā ŋmó. N géē tū aɛ́bɛ́ ipácí obɔ̄bí kéē kwú uwā. Ɛgwā ō lɛ ɛ́fa obɔ̄bí géē kwú uwā dúú.

²⁵Ɛfú nēé í kpó ā í cɛ̄ lɛ okwū í bá ipú aúláyi. Ɔdūufi géē yá ipú ɔlɛ́ uwā ɛga dóódu. Ayípōklóbīya mɛ́mla ayípɔ̄nɔ̄nyā géē pɛ́ kwú. Ikwū ā í gáā tɔ́ɔ́cí ayí olugwulugwu mɛ́mla aókplícī ŋ́.

²⁶N géē yá kéē lɛ uwá kpó yíífi dúúdú nɛ̄ ɔ̄cɛ dúúmā í gáā blakwu uwá ɛ́ɛ́ gɛ ŋ́.

²⁷Amáŋ, ń gáā yá ka aólɛlā kú uwā kéē bī ɔ́ɔmā le gwō ka aá ɔɔ́ lɛ ācɛ ɔlɛ́ um yálé ɛɛ́ ŋ́, abɔ̄ ó wɛ ami abɔ̄yī um ca uwá tāajɛ ā.

²⁸Ācɛ Ísrɛ̄lu wɛ éwo kú ācɛ nēé lɛ ohílīpú ŋ́, é í lɛ íjééyī dúúmā ŋ́.

²⁹É má ɔdā nōo yá ɛ́ɛ́ nɛ̄ aólɛlā kú uwā yá uwā lé ā ŋ́, é jɛ́yí kú ɔdā nōo yá ā glá ŋ́.

³⁰Ɔdíyá nɛ̄ ícɔ́ɔja ékpónú kú aólɛlā kú uwā yá ācɛ úlā ɛpa ce ofigwó lé āa? Nɛ̄ ācɛ igwó kú aólɛlā kú uwā yá ācɛ úlā ofɛɛpa ce igwó kú ācɛ Ísrɛ̄lu lé āa? Ɛ̄nyā yá lɛ ā ohígbū ka Óndú, nōo wɛ Ɔwɔicō kú uwā, nōo ī gbō uwā bɛ̄ɛka ápátɛ̄cɔ̄ ā, habɔ̄ uwā tá lɛ aólɛlā kú uwā. Anɔ́ɔ ó cɛ̄ lɛ aólɛlā kú uwā le uwá yálé á.

³¹Aólɛlā kú uwā jé ka aɔ́wɔ kú aá ɔ́ɔ kwáahi, í lɔfú nɛ̄hi bɛ̄ɛka Ɔwɔicō kú ācɛ Ísrɛ̄lu ā ŋ́.

³²Aólɛlā kú uwā bɔ̄bíipú bɛ̄ɛka ācɛ Usɔ́dɔm mɛ́mla ācɛ Ugomóra ā, é lɛbɛ̄ɛka ufáyin nōó gē gwá īkpō ohɔ́ɔnɔ nōo lɔfú ŋmó ɔ̄cɛ glá ā.

³³É lɛbɛ̄ɛka ejé nēe yá ŋmá ɛ́fa kú ɛgwā obɔ̄bí ā.

³⁴Óndú ā blakwu ɔdā nɛ̄ aólɛlā kú uwā yá ā. Ó gē gbēyī eko nōó géē yá uwā italā ā.

³⁵Óndú ā géē gwū uwā ɔ́ci klla í yá uwā italā Eko géē wā nēé géē je kpó yíífi ɛ̄cī kú ífi mɛ́mla ákanya kú uwā le kwu ajaajɛ ɛɛ́.

³⁶Óndú ā géē hɛ́ ācɛ ɔlɛ́ nū tá, eko nōó má ka ɔfú kú uwā mɛ. Ó géē ményīnyi kú ācɛ nēe gē gbā ɔ̄ ɛ̄gbā ā, eko nōó le má kéē lɛ ɔ̄cɛ nōo í tá uwā abɔ̄ gɛ ŋ́ mā ā.

³⁷Óndú ā géē da ācɛ ɔlɛ́ nū ɔ̄kā ka, “Aɔ́wɔ olɔfú nɛ̄hi nɛ̄ aá lɔtū ce ā bá iní gɛ?”

³⁸Aá gē je ijē kú ɛbɛ́ lɛ uwá eko nɛ̄ aá gē gwɛ́ɛya kú aá, aá klla ī je ejé lɛ uwá kéē gwá. Kéē wā í tá aá abɔ̄ mɛ́ɛnɛ, kéē kwinya wā í hɛ́ aá tá.

³⁹Ami, ōfōōfū um wɛ Ɔwɔicō á, ɔwɔ ɔhá dúú í wɛ ɔkwɛ̄yi ŋ́. N gē ŋmó ɔ̄cɛ, n kē í je oyēeyī lɛ ɔ̄cɛ. N gē yá ɔ̄cɛ ágbe, n klla ī tá ɔ̄cɛ ágbe. Ɔ̄cɛ dóódu í kē bɛyíkwu um ohígbū ɔdā nɛ̄ n yá ā glá ŋ́.

⁴⁰Ɛ́gɛ́nɛ̄ ami wɛ Ɔwɔicō, nōo yéeyī ɔkwɛ̄yi ā, n je abɔ̄ kú um gicō le ɛka gbo,

⁴¹ka n géē tū ɔkpacaŋ́gelī kú um ulé, n géē je ɔkpacaŋ́gelī, cɛ́ɛ́ ká n má kéē lɛ ɛpɔ̄ okpaakpa ka. N géē gwō aólɛlā kú um ɔ́ci, klla í yá ācɛ nēe gē tū um eyījii ā italā.

⁴²Oyī kú uwā géē yɔ̄ ī pɛ́ ŋmá ɔkɔ́ kú ɔyī kú um wāajɛ. N géē bī ɔkpacaŋ́gelī kú um le ŋmó odúúdú ācɛ, nēe gē bɛyíkwu um ā. Ń gáā mā ɔ̄cɛ dóódu nōo ī bɛyíkwu um tá ŋ́. Kwu ācɛ nēé yá ágbe mɛ́mla aálagbá kú ɛfú ā géē pɛ́ kwú dúú.

⁴³Aéwɔhá, aá cɛ̄tra ācɛ ɔlɛ́ Óndú ā, ó gēe ŋmó ācɛ dóódu nēe ŋmó ācɛ ɔlɛ́ nū ā. Ó gēe gwō aólɛlā kú nū ɔ́ci, ó gē je íne nɛ̄ ācɛ ɔlɛ́ nū bīya ā yá uwā ɛhi.

⁴⁴Umósīsi mɛ́mla Ujósuwa, ɔyí kú Unɔ́n le ijē ā jé tɛ́ɛcɛ, cɛ́ɛ́ ká odúúdú ācɛ kú Ísrɛ̄lu ā kéē le pó.

⁴⁵Eko nɛ̄ Umósīsi le odúúdú ɛlā kú íne kú Ɔwɔicō ā nwū ācɛ kú Ísrɛ̄lu kwɛyí ā,

⁴⁶ó da uwá kahíníī, “Ɛlā nɛ̄ n ka lɛ aá ícɛ nyā ā, aá kwú ɔ̄ ú tá ipú ɔtū kú aá. Cɛ́ɛ́ kú aá nwū ayí aá, cɛ́ɛ́ ká uwá kéē kllɔcɛ́ ō lɛyítáajɛ lɛ íne kú Ɔwɔicō.

⁴⁷Íne nyā í wɛ ɛlā áncā ŋ́, é wɛ oyēeyī kú aá á. Aá lɛyítáajɛ lɛ íne ā, cɛ́ɛ́ kú aá lɛ oyēeyī ōlíkpō ipú ajɛ kú ogbeé kú Ujɔ́dan nɛ̄ aá gáā nyɔ̄ ā.”

⁴⁸Ícíícɛ ɔ́ɔmā ā, Óndú ā da Umósīsi ka,

⁴⁹“Lɛ icō aɛ́fu kú Abarím, nēe bá ipú ajɛ kú Umówābu, nōo pīyeyī kwu Ujérīko ā tū. Le tá icō ɛfu kú Unébo ā, ká ā lɛ ajɛ kú Ukénan nɛ̄ n gáā je lɛ ācɛ kú Ísrɛ̄lu ā má.

⁵⁰A géē kwú ɛyí ɛfu ɔ́ɔmā, ɛ́gɛ́nɛ̄ ɔyínɛ̄ uwɔ Árɔ̄ni kwú ɛyí ɛfu kú Uhɔ́ɔ ā.

⁵¹Ohígbū ka aá tá ō lɛyítáajɛ gā um ipéyī ācɛ kú Ísrɛ̄lu. Eko nɛ̄ aá yɔ̄ pī éŋkpɔ̄ kú Umɛ́rība, nōo kwu Ukádiss, ipú ígbíli kú Usín ajaajɛ ā. Aá tá ō lɛ ojīlīma ce um, ipéyī ācɛ kú Ísrɛ̄lu.

⁵²A géē má ajɛ ā ŋmá ɛga oligbó, amáŋ á gáā bēhé ga ipú ajɛ, nɛ̄ n gáā je lɛ ācɛ kú Ísrɛ̄lu ā ŋ́.”