Read idoma OBLATŪKÍNE 33 Bible Online

OBLATŪKÍNE 33 - idoma bible

OBLATŪKÍNE 33

¹Ɛ̄nyā wɛ ɔhā nɛ̄ Umósīsi, ɔ̄cɛ kú Ɔwɔicō ā hɛ́ ce ācɛ kú Ísrɛ̄lu ɛ́ɛ́ nōó kwú á.

²Óndú ā wā ŋmá ɛyí ɛfu kú Usáyínāyi. Ó cāŋjɛ bɛ̄ɛka ɛnɔ nōo tá ce Ɛ́dɔm ā. Ó gē cɛ̄ klla ācɛ ɔlɛ́ nū ŋmá ɛfu kú Upáran. Aálelékwū-ōtɛ̄hɔ̄ ulá ofu ce ɛhɔ̄ (10,000) bá mla anú, ígblɛ́nyī ɔlá kē yɔ̄ abɔ̄lɔ́ná kú nū.

³Óndú ā yíhɔtū tá ācɛ ɔlɛ́ nū, ó gē gbō ācɛ nēe wɛ ákú nū ā. Alɔ gē túkpɛɛɛ́ iyɔ̄bū nū klla ī lɛyítáajɛ lɛ ɔ́.

⁴Alɔ gē lɛyítáajɛ lɛ íne, nɛ̄ Umósīsi je lɛ alɔ ā, Anú wɛ agbénú nɛ̄ alɔ lɛ fíyɛ́ dúú ajɛ kú Ísrɛ̄lu á.

⁵Óndú ā kwú pīya ɔcɛ́ kú ācɛ ɔlɛ́ nū, Ísrɛ̄lu, eko nɛ̄ odúúdú aípɔ́ɔma mɛ́mla aótrɛ̄yí kú uwā le tū bá tɔ̄há.

⁶Umósīsi kɛlā lɛyíkwu ipɔ́ɔma kú Urúbɛ̄n kahíníī, “Ká Urúbɛ̄n kéē yēeyī, nááná nēé lɛ ɛwa ŋ́ mā.”

⁷Ó kɛlā nyā lɛyíkwu ipɔ́ɔma kú Ujúda kahíníī, Óndú, jāhɔ̄ lɛ ikwū kú o tábɔ̄ nɛ̄ ācɛ Ujúda bá ī je ā. Lɛ uwá pīya tɔ̄há mɛ́mla aípɔ́ɔma ohile ā. Nuunu lɛ uwá, Óndú ā, ka aá tá uwā abɔ̄ kéē lɛ aólɛlā kú uwā kpó yálé.”

⁸Ó kɛlā lɛyíkwu ipɔ́ɔma kú Ulífāyi ā kahíníī, “Óndú ā, lɛ ɔdā nōo wɛ ɔtū kú uwɔ ā mafú bū Úrim mɛ́mla Utúmim, ŋmá ɛgiyí ācocɛ̄hɔ̄ kpaakpa kú uwɔ, ayí kú Ulífāyi. A já uwā má Umása. A kē le má kéē wɛ ācɛ ɔkwɛ̄yi, ɛgiyí éŋkpɔ̄ kú Umɛ́rība ā.

⁹É lɛ iyī uwā táajɛ gā uwɔ fíyɛ́ ɛ́gɛ́nɛ̄ é lɛ īyī uwā táajɛ lɛ aɛ́nɛ́ mɛ́mla aádā uwā mɛ́mla ayínɛ́ uwā. É géē lɛyítáajɛ lɛ íne kú uwɔ ā, klla ī lɛ ɛka kú uwɔ ā tū.

¹⁰É géē nwū ācɛ ɔlɛ́ uwɔ ā kéē lɛyítáajɛ lɛ aíne kú uwɔ ā. É kē í lɛ ɔtulalī gwɛ́ɛya gā uwɔ ɛyí ede kú uwɔ.

¹¹Óndú ā, tá ipɔ́ɔma kú Ulífāyi abɔ̄ kéē le jɛ̄ lɔfú. Ká ɔdā nɛ̄ uwá géē yá ā kóō he uwɔ ɔtū Óndú. Lɛ aólɛlā kú uwā catāajɛ, kéē klla cāŋjɛ igbɔhá glá gɛ ŋ́.”

¹²Ó kɛlā lɛyíkwu ipɔ́ɔma kú Ubɛ́njamīn ā kahíníī, “Ɛ̄nyā wɛ ipɔ́ɔma nōo he Óndú ā ɔtū, nōó klla gē gbō uwā. Ó gē gbō uwā ɛ̄cī dóódu. Ó kē lā ipú uwā.”

¹³Ó kɛlā lɛyíkwu ipɔ́ɔma kú Ujósɛ̄fu ā kahíníī, Óndú ā kóō hɔ́hā ce ajɛ kú uwā, kóō yá cɛ́ɛ́ kú éŋkpɔ̄ kóō bū ŋmá ajɛ lɛ uwá.

¹⁴Ká ajɛ kú uwā kóō gwá aíkpɔ̄cí nɛ̄hi nɛ̄ ɛnɔ ī je uwá pīya ā, mɛ́mla aíkpɔ̄cí nōo lɔhi fíyɛ́ dúú eko kú uwā.

¹⁵Ká ɛyí ɛfu nɛ̄ncɛ kú uwā ā kóō gwá aíkpɔ̄cí nɛ̄hi.

¹⁶Ká ajɛ kú uwā ā kóō le mu mla ɔdā olɔhi dóódu, ká Óndú ā kóō lɛ ɔhā hɛ́ ce ɔ́. Anú, nōo kɛlā ŋmá ipú ɔlá ɛyí ɛfu kú Uhɔ́rɛ̄bu ā. Kóō hɔ́hā nyā ce Ujósɛ̄fu, ohígbū ka, anú wɛ otrɛ̄yí kú ayínɛ́ nū á.

¹⁷Ujósɛ̄fu lɛ ɛgahi bɛ̄ɛka ɔyí aflɛ́yí kú ɔbá ɛna ā. Ó lɛ ajī olɔfú ɛpa bɛ̄ɛka ɛyī kú ipácí ā. Ɔfú kú nū wɛ ācɛ úlúúlā kú Umanásɛ, mɛ́mla úlúlúúlā kú Ɛ́frém ā. Ɛ́gɛ́nɛ̄ ɛyī gē bī ajī kú nū lɛ gwū aólɛlā kú nū ā, nɛ̄ Ɛ́frem mɛ́mla Umanásɛ gáā gwū aólɛlā kú uwā lɛ, í kwu uwá ga oŋmɛ́yí kú ɛcɛ á.”

¹⁸Ó kɛlā lɛyíkwu ipɔ́ɔma kú Usébūlɔn mɛ́mla Ísāka ā kahíníī, “Ka ɔ́hí nɛ̄ Usébūlɔn gē tá ŋmá ísu ā kóō ga ɔ́ lɛ ɔ́. Cɛ́ɛ́ kú agbénú kú Ísáaka kóō nyīla ipú ɔlɛ́ ā.

¹⁹É gē pla aéwɔhá wā ɛyí ɛfu kú ɔlɛ́ uwā, é gē gwɛ́ɛya okpaakpa ā abɔ́ɔ. É gē lɛ agbénú kú uwā ŋmá ísu mɛ́mla ɔjɛ kú okónu ísu.”

²⁰Ó kɛlā lɛyíkwu Ugádi kahíníī, “Áa cɛ̄tra Ɔwɔicō nōo je ajɛ nɛ̄hi lɛ uwá ā. Ugádi, gē gbēyī bɛ̄ɛka ágábá nɛ̄ ɛmiyɛ gē ŋmó ɔ̄ ā, nōo gē gbēyī kóō je ikpɛ̄yí mɛ́mla abɔ̄ fa lé ā.

²¹É kwú ajɛ olɔhi fíyɛ́ dúú ā ú lɛ iyī uwā, é kwú ukpɛ̄ kú aótrɛ̄yí ā ú lɛ uwá. É lɛyítáajɛ lɛ aíne kú Óndú ā, eko nɛ̄ aótrɛ̄yí kú ācɛ Ísrɛ̄lu le jīla tɔ̄há ā.”

²²Ó kɛlā lɛyíkwu ipɔ́ɔma kú Udáni ā kahíníī, Udáni hɛ́wɛ̄ɛcɛ ŋmá Ubássan bɛ̄ɛka ɔyí kú ágábá ā.”

²³Ó kɛlā lɛyíkwu Unáfutāli kahíníī, “Óndú ā le ɔhā nɛ̄hi hɛ́ ce Unáfutáli, oŋmá lɛ o téeyīyolɔhi kú Óndú ā. Ajɛ kú uwā yɛ ga ɛháajɛ, ŋmá ísu kú Ugálílii ā.”

²⁴Ó kɛlā lɛyíkwu ipɔ́ɔma kú Ása ā kahíníī, “Ása nēé hɔ́hā ce ɔ́ fíyɛ́ aípɔ́ɔma ohile kpɛ́mm ā á. Kóō le pīya ɔyí ō cɛ̄ kú ayínɛ́ nū. Ajɛ kú nū kóō lɛ mu mla agbénú kú īkpɔ̄cí ō bī lɛ yá anɔ̄.

²⁵Kéē bī oje le yá odūngwɔ̄wɛ kú aígelī kú nū. Nɛ̄ ɔ̄cɛ dóódu í gáā bēhé wā anú gla ŋ́, ɛ́ɛ́ nōó gē lɛ abɔ̄ kwu uwá glá ŋ́.”

²⁶Ācɛ kú Ísrɛ̄lu, ɔwɔ ɔhá dúú í lɛ bɛ̄ɛka Ɔwɔicō kú aá ā gɛ ŋ́. Anú, nōó yɔ̄ ī yɛ ipú ɛgahi kú nū ɔkpáncō, nōó yɔ̄ ī bū ipú ojuja wā í tá aá abɔ̄ ā.

²⁷Ɔwɔicō húmáyī wɛ ɛga nɛ̄ aá gē tayínū á. Abɔ̄ kú anú nōó gē kwú ŋ́ mā kóō bī aá háyi piyóó. Ó géē nū aólɛlā kú aá tɛ́ɛcɛ hīla aá, abɔ̄ aá géē yɔ̄ ī wā ā. Ó klla ī da aá kahíníī, “Aá lɛ uwá kpó yíífi dúúdú.”

²⁸Ohígbū ɔ́ɔmā ā, ayí kú Ujékɔ̄pu géē lā ɛbɔ́. É géē lā ɛbɔ́ ipú ajɛ nōo le mu mla īkpɔ̄dɛ̄hɔ̄ mɛ́mla ejé ā, mɛ́mla ɛga nɛ̄ ébú gē cē klá ajɛ ŋmá ɔkpáncō ā.

²⁹Ísrɛ̄lu, ɔtū he aá dúú á ā? Ācɛ dúúmā í lɛbɛ̄ɛka aá ā ŋ́, aá wɛ éwo nɛ̄ Óndú ā le hɛ́tá ā. Óndú ā abɔ̄yī nū gē tá aá abɔ̄ í gbō aá bɛ̄ɛka ɔkplɛ́fú nɛ̄ ɔ̄cɛ ī le tá īyī nū abɔ̄ ā á. Anú kē ī kpɛ́fú í yálé lɛ aá, bɛ̄ɛka ɔkpacaŋ́gelī nɛ̄ ɔ̄cɛ ī bī le kpɛ́fú ā á. Ó géē nuunu lɛ aá klla í cɛ̄ lɛ aá yálé. Aólɛlā kú aá géē wā í gbɔ̄ɔkɔ lɛ aá ká aá méyīnyinyi uwā. Amáŋ aá géē lɛ ikpó da uwá ɛyí tū ajɛ.