Read idoma OBLATŪKÍNE 4 Bible Online

OBLATŪKÍNE 4 - idoma bible

OBLATŪKÍNE 4

¹Anɔ́ɔ Umósīsi da ācɛ ā kéē jāhɔ̄ lɛ aíne mɛ́mla aɔ́dā nɛ̄ anúɔ gáā nwū uwā ā. Ka ɔ́dāŋ nɛ̄ ɛ́ɛ lɛyítáajɛ lɛ aíne ā, ó ka ɛ́ɛ géē yéeyī klla í lā ajɛ nɛ̄ Óndú ā, nōo wɛ Ɔwɔicō kú aádáádā uwā ā ɔ́ɔ yɔ̄ ī je lɛ uwá ā.

²Ó da uwá ka ɛ́ɛ híī kpó ɔdā dúúmā tū ɔ́da nɛ̄ anúɔ yɔ̄ ī je lɛ uwá ā ŋ́, ɛ́ɛ́ nɛ̄ ɛ́ɛ kōō í je ŋmá anú ŋ́. Amáŋ ɛ́ɛ lɛyítáajɛ lɛ aíne ā céé ɛ́gɛ́nɛ̄ ɛ́ɛ lɛ ā.

³Ó da uwá ka uwá abɔ̄yī uwā ɛ́ɛ kē má ɛ́gɛ́nɛ̄ Óndú ā, nōo wɛ Ɔwɔicō kú uwā ɔ́ɔ kē ŋmó ācɛ ɔlɛ́ uwā nēe gbā Úbáalu kú Upéyɔ ɛ̄gbā lɛ ā ɛɛ́

⁴Amáŋ uwá nɛ̄ ɛ́ɛ bá ī gbā Óndú ā kpaakpa kpɔ́ eko ɔ́ɔmā béeyī kpɔ́ ɛ́ɛ mā.

⁵Ó da uwá ka anúɔ lɛ aíne nɛ̄ ɛ́ɛ cíkā ó jé ā nwū uwā ɛ́gɛ́nɛ̄ Óndú ā ɔ́ɔ da anúɔ lɛ ā. Ó da uwá ka ɛ́ɛ lɛ aíne ā tū eko nɛ̄ ɛ́ɛ le tá ajɛ nɛ̄ ɛ́ɛ gáā bēhé nyɔ̄ í mīyɛ ā.

⁶Ó da uwá ka ɔ́dāŋ ka ɛ́ɛ lɛyítáajɛ lɛ aíne ā kpaakpa, ka ɛ́ɛ géē mafú lɛ aéwɔhá nēe lā yɛ uwá tá biílí ā ɛ́gɛ́nɛ̄ ɛ́ɛ jéeyī lɛ ā. Ó klla da uwá eko nɛ̄ aéwɔhá ɔ́ɔmā lɛ aíne ā pó, ɛ́ɛ géē ka ka uwá nɛ̄ ɛ́ɛ wɛ ācɛ Ísrɛ̄lu ā wɛ éwo kú ācɛ ojéeyī mɛ́mla ācɛ o jɛ́yí kú ɔdā.

⁷Ó da uwá ka ewo ɔhá dóódu, ɛ́gɛ́dúú nɛ̄ ɛ́ɛ nwuné lɛ, í lɛ ɔwɔ nɛ̄ ɔ́ɔ yɔ̄ kwu ācɛ ā ajaajɛ ɛ́gɛ́nɛ̄ Óndú ā, nōo wɛ Ɔwɔicō kú uwā ā ɔ́ɔ kwu uwá ajaajɛ eko nɛ̄ ɛ́ɛ dɛ̄gba hɔ̄ɔ̄ kú ɔ̄ wā í tá uwā abɔ̄ ā ŋ́.

⁸Ó klla da uwá ka ewo dóódu, ɛ́gɛ́dúú nɛ̄ ɔ́ɔ nwuné lɛ í lɛ aíne nēe le kpaakpa bɛ̄ɛka aɛ́nɛ̄ anúɔ nwū uwā eko ɔ́ɔmā ŋ́.

⁹Ó da uwá ka ɛ́ɛ lɛ ɛlá kwu iyī uwā o yá kéē híī je mlanyī aɔ́da nɛ̄ ɛ́ɛ má eyī eko nɛ̄ ɛ́ɛ yēeyī gaá kwu ā ŋ́. Ó klla da uwá kéē lɛ nwū ayááyí uwā

¹⁰eko nɛ̄ ɛ́ɛ háyi iyɔ̄bū Óndú ā, nōo wɛ Ɔwɔicō ā ikpɛ́fu kú Usáyínāyi eko nɛ̄ ɔ́ɔ da anúɔ ka anúɔ lɛ ójīla kú ācɛ Ísrɛ̄lu hīgwú wā ɛgiyí nū ā. Ó da uwá ka Óndú ā ɔ́ɔ ka anúɔ tíne kéē pó ɔdā nɛ̄ anúɔ géē ka ā, cɛ́ɛ́ kéē gē nwū kéē lɛyítáajɛ lɛ anúɔ eko nɛ̄ ɛ́ɛ yēeyī gaá kwu ā. Cɛ́ɛ́ kéē nwū ayípɛ̄ ɔlɛ́ kéē yá ɔdā ékpó ɔ́ɔmā.

¹¹Umósīsi klla da uwá ké ē lɛ ka lɛ ayípɛ̄ ɔlɛ́ uwā ɛ́gɛ́nɛ̄ ɛ́ɛ háyi ikpɛ́fu nɛ̄ ódūdū nɛ̄hi kú ɔlá nōo yɔ̄ ī tá ɔlá blublu ŋmá icō nū ga icīīcō ga ɔkpáncō ā.

¹²Ó da uwá kéē lɛ da ayí uwā ɛ́gɛ́nɛ̄ Óndú ā kɛlā lɛ uwá ŋmá ipú ɔlá lɛ, mɛ́mla ɛ́gɛ́nɛ̄ ɛ́ɛ pó abɔ̄ ɔ́ɔ yɔ̄ ī kɛlā nɛ̄ ɛ́ɛ má ɔ̄ ɔwɛ dúú ŋ́ mā.

¹³Ó ka ɔ́ɔ da uwá ɔdā nɛ̄ ɛ́ɛ í yá piíí kéē lɛ ɛka nɛ̄ Óndú ā ɔ́ɔ gbo mla uwá ā tū ā. Ó ka ɛ́ɛ géē lɛyítáajɛ lɛ aíne igwó nɛ̄ ɛ́ɛ tá tū iseléti ā piíí

¹⁴Ó ka Óndú ā ɔ́ɔ da anúɔ ka anúɔ lɛ odúúdú aíne ā nɛ̄ ɛ́ɛ géē lɛyítáajɛ lɛ uwá ipú ajɛ nɛ̄ ɛ́ɛ gáā mīyɛ kéē lā ā nwū uwā.

¹⁵Umósīsi klla da uwá ka ɛ́ɛ má ofu kú Óndú ā ɔwɛ dóódu eko nɛ̄ ɔ́ɔ kɛlā lɛ uwá ŋmá ipú ɔlá ɛyí ɛfu kú Usáyínāyi ā ŋ́. Ó da uwá ka ohígbū olɔhi kú iyī uwā ā ɛ́ɛ má ka,

¹⁶ɛ́ɛ, híī bīya íne kú Óndú ā o ŋmá lɛ o yá ojibó kú ɔdā dúúmā lɛ iyī uwā fúlufúlu ŋ́. Ó ka ɔ́ɔ kōō wɛ ɛ́gbla kú ɔ̄cɛnyīlɔ ámāŋ ka ɔ̄cɛnyā

¹⁷Ó da uwá kéē híī yá ɛ́gbla kú ɛbɛ́ ámāŋ ka igbáanɔ ŋ́,

¹⁸ó kōō wɛ ɛ́gbla kú ɔdā ō lɛ ipú piyaajɛ ámāŋ ka ɛbényi ŋ́.

¹⁹Ó da uwá kéē lɛ ɛlá kwu ɔ́ɔ kú ɔdā dúúmā ká ɔ̄ já uwā má gaá gbā ámāŋ cɛ̄ ɔdā dúú nɛ̄ ɛ́ɛ má ɔkpáncō ā ɛ̄gbā ŋ́. Ó ka ɔ́ɔ kōō wɛ ɛnɔ, ɔyā, mɛ́mla aínyílɔ́wɔ. Ó ka Óndú ā, nōo wɛ Ɔwɔicō kú uwā ɔ́ɔ lɛ aɔ́dā nēe bá abɔ́ɔ ā kpó lɛ aéwo ohile kú ipú ɛcɛ ā kéē gbā uwā ɛ̄gbā.

²⁰Ó da uwá ka amáŋ, uwá ā nɛ̄ ɔ́ɔ nyatá ŋmá abɔ̄ kú ācɛ Íjīpiti, nōo lɛbɛ̄ɛka útuló o cɔ̄lá nɛ̄hi ɔ́ɔmā, kéē wɛ ācɛ ɔlɛ́ nū ā, ɛ́gɛ́nɛ̄ ɛ́ɛ wɛ ícíícɛ ɔ́ɔmā ā.

²¹Ó da uwá ka ohígbū uwā nɛ̄ Óndú ā ɔ́ɔ cɔ̄nū mla anúɔ klla le okónu tá lɛ anúɔ ka anúɔ í gáā bēhé ísu kú Ujɔ́dan ga ajɛ olɔhi ɔ́ɔmā nɛ̄ ɔ́ɔ yɔ̄ ī je lɛ uwá ā ŋ́ má.

²²Ó ka anúɔ géē kwú ipú ajɛ Umówābu abɔ́ɔ, ka anúɔ í gáā bēhé ísu ā ŋ́. Ó ka amáŋ uwá ā, ɛ́ɛ gáā bēhé gaá mīyɛ ajɛ o yá ɔdɛ̄hɔ̄ lɔɔlɔhi ɔ́ɔmā ɛɛ́.

²³Umósīsi da uwá kéē lɛ ɛlá kwu ɔ́ kéē híī je mlanyī ɛka nɛ̄ Óndú ā, nōo wɛ Ɔwɔicō kú uwā gbo mla uwá ā ŋ́. Ó ka ɛ́ɛ lɛyítáajɛ lɛ ɔ́da nɛ̄ ɔ́ɔ je lɛ uwá kéē híī yá ojibó dúúmā lɛ iyī uwā ŋ́ mā.

²⁴Ó ka ohígbū ka Óndú ā, nōo wɛ Ɔwɔicō kú uwā ā ɔ́ɔ lɛbɛ̄ɛka ɔlá nɛ̄ ɔ́ ī je ɔdā dóódu kpó yi tāajɛ dúúdú ā. Ó ka ɔ́ɔ gē kpópú nɛ̄hi, ka ɔ́ɔ gáā cɛ̄ kéē gbā ɔwɔ ɔhá ɛ̄gbā ŋ́.

²⁵Ó da uwá ka eko nɛ̄ ɛ́ɛ le hīlókplícī ipú ajɛ ā klla lɛ ayí ma, nɛ̄ ayí uwā lɛ ayí ma, nááná ɛ́ɛ híī bīya íne kú Óndú ā, oŋmá lɛ o yá ɛ́dɔ kú ojibó dúúmā lɛ iyī uwā ŋ́.

²⁶Umósīsi klla da uwá ka anúɔ hī ɔkpáncō mɛ́mla ajɛ igwú kéē wā cījáalí ka ɔ́dāŋ nɛ̄ ɛ́ɛ lɛyítáajɛ ŋ́, anɔ́ɔ ɛ́ɛ lɛ íne ā bīya. Ka ɛ́ɛ gáā lā gbojī ipú ajɛ nōo yɔ̄ ogbeé ɔhá kú Ujɔ́dan nɛ̄ ɛ́ɛ bēhé nyɔ̄ gáā mīyɛ kéē lā ā ŋ́. Ó ka ɛ́ɛ géē kpó uwā yíífi dúúdú ŋmá ajɛ ā.

²⁷Ó da uwá ka Ɔwɔicō ɔ́ɔ géē kpó uwā fíyákátā gaá lā ipú aéwɔhá. Ó da uwá ka ācɛ nɛ̄ ɛ́ɛ gáā hile ŋmá ipú uwā ɔ́ɔ gáā lɛwa ŋ́.

²⁸Ó da uwá ka abɔ́ɔ ā, ɛ́ɛ géē gbā aɔ́wɔ nɛ̄ ɛ́ɛ ī mɛ́ɛbɛ ámāŋ páhɔ̄ ámāŋ lé ɔdōlé ámāŋ hípī glá ŋ́ mā ɛ̄gbā. Ó ka ɛ́ɛ wɛ aɔ́wɔ nɛ̄ ācɛ bī abɔ̄ kú uwā yá ŋmá ɔcí ámāŋ ka ɛcɔ̄.

²⁹Ó klla da uwá ka ɛ́ɛ géē dɔ̄ɔka Óndú ā, nōo wɛ Ɔwɔicō kú uwā ŋmá abɔ́ɔ. Ó ka ɔ́dāŋ ka ɛ́ɛ dɔ̄ɔka nū lɔfú-lɔfú ŋmá ɔtū éékpó kú uwā ɛ́ɛ géē pīyɛ̄ ɔ̄

³⁰Ó da uwá ka eko nɛ̄ ɛ́ɛ yɔ̄ ipú unwulu anɔ́ɔ odúúdú aɔ́dā nēe bá ā lɛ yá uwā, cɛ́ɛ́ ɛ́ɛ í cīgbīhi wā ɛgiyí Óndú ā í lɛyítáajɛ lɛ ɔ́.

³¹Ó da uwá ka abɔ̄ ɔ́ɔ le pīya Óndú ā, nōo wɛ Ɔwɔicō kú uwā ā, ka ɔ́ɔ gáā habɔ̄ uwā tá ámāŋ kpó uwā yíífi ŋ́. Ó klla ka ɔ́ɔ gáā mlanyī ɛka kú nū mla aádáádā uwā ŋ́.

³²Umósīsi yɔ̄ ī kɛlā lɛ ācɛ Ísrɛ̄lu gɔbū kpɔ́ ka ɛ́ɛ gbɛlá kwu ɔdā nōo yá íkííkée ŋmífí nɛ̄ Ɔwɔicō yá ācɛ wā ipú ɛcɛ ā. Ó ka ɛ́ɛ jila ɛjɛ̄ɛ̄jī odúúdú ɛcɛ. Ó da uwá ka ɔdā nɛ̄hi ɛ́gɛ́ɛnyā yá jéjéē ɛɛ́ ɛ̄ɛ̄? Ó ka ɔ̄cɛ dúúmā pó ka ɔdā ɛ́gɛ́ɛnyā yá jéjéē ɛɛ́ ɛ̄ɛ̄?

³³Ó ka ācɛ ɔhá dúúmā ɛ́ɛ má ɔwɔ kú uwā kɛlā lɛ uwá ŋmá ipú ɔlá ɛ́gɛ́nɛ̄ ɛ́ɛ pó ā, kéē klla yēeyī jéjéē ɛɛ́ ɛ̄ɛ̄?

³⁴Ó da uwá ɔkā ka ɔwɔ dúúmā ɔ́ɔ lɔtū nyɔ̄ gaá kpó éwo éyi ŋmá ipú éwo ɔhá ka ɔ́ɔ lɛ uwá pīya ācɛ ɔlɛ́ nū ɛ́gɛ́nɛ̄ Óndú ā, nōo wɛ Ɔwɔicō kú uwā ā ɔ́ɔ yá lɛ uwá ajɛ kú Íjīpīti ā jéjéē ɛɛ́ ɛ̄ɛ̄? Ó ka ipéyī uwā cāā, ɔ́ɔ bī ɔfú nɛ̄hi mɛ́mla ɔfú iyē kú nū le yá ācɛ Íjīpiti ōwē nɛ̄hi. Ó ka ɔ́ɔ yá ɔdā ō hídáagó mɛ́mla ɔdōtūufi nɛ̄hi nēe yá ka ācɛ kú Íjīpiti kéē yúúfi nɛ̄hi.

³⁵Ó da uwá ka Óndú ā ɔ́ɔ ma aɔ́dā nēe bá ā fú lɛ uwá kéē le jé kpɔ́cíí ka Óndú ā, ōfōōfūnū ɔ́ɔ wɛ Ɔwɔicō ɔkwɔ̄ɔkwɛ̄yi á.

³⁶Umósīsi da uwá ka Óndú ā ɔ́ɔ cɛ̄ lɛ uwá pó ɔkɔ kú nū ŋmá ɔkpáncō, anɔ́ɔ ipú ɛcɛ ā ɔ́ɔ cɛ̄ lɛ uwá le ɔlá ōtīhɔ kú nū má, anɔ́ɔ ɔ́ɔ kɛlā lɛ uwá ŋmá ipú nū á.

³⁷Ó klla fu uwá ohígbū ka ɔ́ɔ yíhɔtū aádáádā uwā. Ó ka ɔ́ɔ bī ɔfú nɛ̄hi ā lɛ uwá kpó wɛ̄ɛcɛ abɔ̄yi nū ŋmá Íjīpiti.

³⁸Ó da uwá ka Óndú ā ɔ́ɔ lɛ ācɛ nɛ̄ ɛ́ɛ lɔfú fíyɛ́ uwā, nēe wɛ ācɛ Ísrɛ̄lu ā, nū ŋmá ajɛ kú Ukénan hī lɛ uwá abɔ̄ uwá nēe wɛ ācɛ Ísrɛ̄lu bá gē wā ipú ajɛ ā. Ó da uwá ka ɔ́ɔ klla kwú ajɛ kú aéwɔhá ɔ́ɔmā í lɛ ācɛ Ísrɛ̄lu jāā kwu ícɛ nyā.

³⁹Ó da uwá kéē blakwu ɛ̄cī ɔ́ɔmā, cɛ́ɛ́ kéē híī mlanyī ŋ́. Ka Óndú ā wɛ Ɔwɔicō, ɔkpáncō mɛ́mla ipú ɛcɛ á. Ó ka ɔwɔ ɔhá dúú ɔ́ɔ yɔ̄ gwu ɔ̄ tá ŋ́.

⁴⁰Umósīsi klla da uwá ka ohígbū ɔ́ɔmā ɛ́ɛ lɛyítáajɛ lɛ aíne mɛ́mla ɔ́da kú Óndú ā eko ɔ́ɔmā, cɛ́ɛ́ kú odúúdú ɔdā nɛ̄ ɛ́ɛ í yá ā ka ɔ́ɔ le lɔhi lɛ uwá mɛ́mla ayááyí kú uwā. Ó ka ɛ́ɛ géē yɔ̄ ī lā ipú ajɛ nɛ̄ Óndú ā, nōo wɛ Ɔwɔicō kú uwā ɔ́ɔ yɔ̄ ī je lɛ uwá ká ɔ́ɔ le pīya ákú uwā piyóó ipú ɛcɛ ā.

⁴¹Anɔ́ɔ Umósīsi le aígelī ɛtá fu ipú ajɛ ɛnɔ̄ɔ̄cī kú Ísu kú Ujɔ́dan á.

⁴²Ó ka aígelī nēe bá ɔ́ɔmā nɛ̄ ɔ̄cɛ lɔfú kwu nyɔ̄ ɔ́dāŋ nōó jégēdē ŋ́ lɛ ɔ̄cɛ nōó wɛ olɛlā kú nū ŋ́ ŋmó. Ó ka ɔ̄cɛ ɛ́gɔ́ɔmā lɔfú kwu nyɔ̄ éyi kú aígelī ā glá, cɛ́ɛ́ ɛ́ɛ ŋmó gɛ ŋ́.

⁴³Ó ka igelī nēé hī ka Ubɛ́sa nōo cɛyí ɛfu éyi ipú ígbíli ā, wɛ ɛga o kwinya ɔ́ci nyɔ̄ kú ipɔ́ɔma kú Urúbɛ̄n. Ó ka igelī nēé hī ka Urámɔ̄tu, nɛ̄ ɔ́ɔ yɔ̄ ipú ajɛ kú Ugílɛ̄di ā wɛ ɛga o kwinya ɔ́ci nyɔ̄ kú ipɔ́ɔma kú Ugádi á. Ó ka Ugólan, nɛ̄ ɔ́ɔ yɔ̄ ipú ajɛ kú Ubássan ā wɛ ɛga o kwinya ɔ́ci nyɔ̄ kú ipɔ́ɔma kú Umanásɛ á.

⁴⁴Umósīsi kwú aíne mɛ́mla ɔdā nɛ̄ Óndú ā ī nwū ā ú lɛ ācɛ Ísrɛ̄lu.

⁴⁵Aíne, ɔ́da, ukɔ́ mɛ́mla ɔdōnwū nēe bá ā, nɛ̄ ɔ́ɔ ka lɛ ācɛ Ísrɛ̄lu eko nɛ̄ ɛ́ɛ bɛ̄cɛ ŋmá Íjīpiti ā.

⁴⁶Ó ka aíne ā tɛ́ɛcɛ ipú ajɛ nōo yɔ̄ ɛnɔ̄ɔ̄cī kú abɔ̄ ɔhá kú Ísu kú Ujɔ́dan, ipú ɔpɛ́ nɛ̄ ɔ́ɔ pīyeyī kwu Ubɛ́t-péyɔ, ipú ajɛ kú Usíhɔn, nɛ̄ ɔ́ɔ wɛ ɔcɛ́ kú ācɛ Ámɔ̄ri, nēe lā Uhɛ́sbɔn, nɛ̄ Umósīsi mɛ́mla ācɛ kú Ísrɛ̄lu yálé eko nɛ̄ ɛ́ɛ bɛ̄cɛ ŋmá Íjīpit ā.

⁴⁷Ó ka ɛ́ɛ mīya ajɛ kú nū mɛ́mla ajɛ kú Ógu, ɔcɛ́ kú Ubásan, nōo wɛ ɔcɛ́ ɔhá kú ācɛ Ámɔ̄ri nɛ̄ ɔ́ɔ lā ɛnɔ̄ɔ̄cī kú Ujɔ́dan ā.

⁴⁸Ó da uwá ka ajɛ ā ɔ́ɔ nyīla ŋmá igelī kú Arówɛ, nɛ̄ ɔ́ɔ yɔ̄ pī okónōgwu kú Ánɔn, gaá yɛ ga ɛhícō kú ɛfu kú Usíhɔn, anú wɛ ɛfú kú Uhɛ́mɔn á.

⁴⁹Ó ka ajɛ ā ɔ́ɔ tá nyɔ̄ lɛyíkwu ajɛ nɛ̄ ɔ́ɔ yɔ̄ ɛnɔ̄ɔ̄cī kú Ísu kú Ujɔ́dan ā. Ó klla yɛ jāā ga ɛga o ligbó kú ɛháajɛ ga Ísu kú ɔmā mɛ́mla o yɛ ga ɛnɔ̄ɔ̄cī ga ikpɛ́fu kú Upísga.