Read idoma OBLATŪKÍNE 5 Bible Online

OBLATŪKÍNE 5 - idoma bible

OBLATŪKÍNE 5

¹Umósīsi lɛ odúúdú ācɛ kú Ísrɛ̄lu ā kpó hīgwú tɔ̄há anɔ́ɔ ó da uwá ka, aá nēe wɛ ācɛ Ísrɛ̄lu ā, kéē jāhɔ̄ lɛ odúúdú íne kú Óndú ā nɛ̄ anúɔ gáā je tɛ́ɛcɛ lɛ uwá ícíícɛ ɔ́ɔmā ā. Ó da uwá kéē kllɔcɛ́ uwā, kéē lɛ uwá tū dúú. Ó klla da uwá kéē bī íne ā le yúklɔ́.

²Ó klla ka Óndú ā nɛ̄ aá ī gbā ɔ̄ ɛ̄gbā ā gbɛka mla aá ɛyí ɛfu kú Usáyínāyi.

³Ó ka ɔ́ɔ gbɛka ā mla ádáádā aá ōfōōfū uwā ŋ́, amáŋ ɔ́ɔ cokónu ā mla aá nēe béeyī eko ɔ́ɔmā dúú.

⁴Umósīsi ka Óndú ā ɔ́ɔ kɛlā lɛ aá eyī cāāā ŋmá ipú ɔlá ɛyí ɛfu abɔ́ɔ.

⁵Ó ka anúɔ háyi ɔtāhɛ̄ kú uwā mɛ́mla Óndú ā eko ɔ́ɔmā, cɛ́ɛ́ kú anúɔ ka ɔdā nɛ̄ Óndú ā ka ā lɛ uwá. Ohígbū ka ɛ́ɛ bá ī yúúfi kú ɔlá ā, anɔ́ɔ ɛ́ɛ lɔtū ga ɛyí ɛfu ā ŋ́ má.

⁶Anɔ́ɔ Óndú ā ka anúɔ wɛ Óndú ā, Ɔwɔicō kú aá, nōo kpó uwā bɛ̄cɛ ŋmá ajɛ kú Íjīpiti, ɛga nēé wɛ aɔ́fiyɛ ā.

⁷Ó ka ɛ́ɛ híī gbā aɔ́wɔ ɔhá dúú gwū anúɔ tá ŋ́.

⁸Ó ka ɛ́ɛ híī yá ojibó dúúmā lɛ īyī uwā ŋ́. Ó kōō wɛ ɛ́gbla kú ɔdā dúúmā nōo yɔ̄ ɔkpáncō, ámāŋ ka ɛ̄nɛ̄ o yɔ̄ ɛcɛ, ámāŋ ɛ̄nɛ̄ o yɔ̄ ipú éŋkpɔ̄ ŋ́.

⁹Ó ka ɛ́ɛ kōō híī túkpɛɛ́ lɛ uwá dɛ̄ɛ̄ ŋ́, ɛ́ɛ́ nɛ̄ ɛ́ɛ gē gbā ɔ̄ ɛ̄gbā ŋ́. Ohígbū ka anúɔ, Óndú ā, Ɔwɔicō kú uwā ɔ́ɔ gē yɔ́bɔ́nyā nɛ̄hi. Ó ka anúɔ gē je íne o bīya kú aádā ce ayí uwā ɛyí. O ŋmá ayááyí ɔ́mɛɛtá ga ɔ́mɛɛnɛ kú ācɛ nēe gē tū anúɔ eyījii ā.

¹⁰Óndú ā klla ka, amáŋ, anúɔ gē ma ihɔtū kú anúɔ nōó ī mɛ ŋ́ mā fú lɛ ayááyí ɔ́muúlúúlā kú ācɛ nēe yíihɔtū tá anúɔ klla lɛyítáajɛ lɛ íne kú anúɔ ā.

¹¹Ó da uwá kéē híī bī iyē kú anúɔ Óndú, nōo wɛ Ɔwɔicō kú uwā hijā ŋ́. Ohígbū ka anúɔ, Óndú ā ɔ́ɔ gáā mā ɔ̄cɛ dóódu, nōo gē bī iyē kú anúɔ hijā tá icííci ŋ́.

¹²Ó kéē lɛlá kwu ɛ̄cī nɛ̄ anúɔ kéē cíká ō yúklɔ́ ŋ́ mā, cɛ́ɛ́ kéē lɛ ɔ́ tū cíí lɛ anúɔ, ɛ́gɛ́nɛ̄ anúɔ, Óndú ā, nōo wɛ Ɔwɔicō kú uwā je ɔ́da lɛ ā.

¹³Ó ka ɛ́ɛ lɛ ɛ̄cī ɛhīlī nēé géē lɛ yá odúúdú úklɔ́ kú uwā.

¹⁴Amáŋ, ó ka ɛ̄cī ɔ́mahāapa ā wɛ ɛ̄cī nēé cíká ō yúklɔ́ ŋ́ nēé í le tū lɛ Óndú ā, nōo wɛ Ɔwɔicō kú uwā ā. Ó keé gáā yúklɔ́ dúúmā ɛ̄cī ɔ́ɔmā ŋ́. Ó da uwá ka uwá, ámāŋ ayí uwā nɔ̄nyīlɔ, ámāŋ ayí uwā nɔ̄nyā, ɔfiyɛ kú uwā nɔ̄nyīlɔ, ámāŋ ɔfiyɛ nɔ̄nyā kú ɔlɛ́ uwā, ámāŋ aɛ́na kú uwā, ámāŋ aúgbɔga dóódu nōo lā ɔlɛ́ uwā.

¹⁵Ó da uwá kéē bla keé tɛtɛ wɛ aɔ́fiyɛ ipú ajɛ kú Íjīpiti, ɛ́ɛ́ nɛ̄ Óndú ā, nōo wɛ Ɔwɔicō kú uwā nā abɔ̄ olɔfú kú nū daa, le uwá kpó wɛ̄ɛcɛ á. Ó klla da uwá ka ohígbū ɔ́ɔmā nɛ̄ Óndú ā, nōo wɛ Ɔwɔicō kú uwā je íne lɛ uwá, cɛ́ɛ́ kéē lɛ ɛ̄cī nēé cíká ō yúklɔ́ ŋ́ mā tū lɛ anúɔ á.

¹⁶Ó ka ɛ́ɛ lɛ ojīlīma ce ádā uwā mɛ́mla ɛ́nɛ́ uwā, ɛ́gɛ́nɛ̄ anúɔ nōo wɛ Óndú ā ɔ́ɔ je ɔ́da lɛ uwá lɛ ā, cɛ́ɛ́ kú ɔdā dóódu nēé í yá kóō le lɔhi lɛ uwá. Cɛ́ɛ́ kú oyēeyī kú uwā kóō lɛ likpó ipú ajɛ nɛ̄ anúɔ yɔ̄ ī je lɛ uwá ā.

¹⁷Ó kéē híī ŋmó ɔ̄cɛ ŋ́.

¹⁸Ó klla da uwá kéē híī gbaājā ŋ́.

¹⁹Ó kéē híī wūūwī ŋ́.

²⁰Ó kéē híī cījáalí ɛ̄kɛ̄mgbɛ̄ tū ɔ́mpā uwā ŋ́.

²¹Ó kéē híī yúnwū ɔdā kú ɔ́mpa uwā ŋ́. Ó kōō wɛ anyā uwa, ámāŋ ɔlɛ́ uwā, ajɛ kú uwā, aɔ́fiyɛ nɔ̄nyīlɔ, ámāŋ aɔ́fiyɛ nɔ̄nyā kú uwā, ámāŋ aɛ́na mɛ́mla aíjakī kú uwā ŋ́. Ó klla da uwá kéē héyīfuúfuú kú ɔdā dóódu nōo wɛ ákú ɔ́mpā kú uwā ŋ́.

²²Ó ka aíne nɛ̄ Óndú ā ɔ́ɔ je lɛ odúúdú uwā eko nɛ̄ aá jīla tɔ̄há ikpɛ́fu ā bá abɔ́ɔ á. Ó klla da uwá ka eko nɛ̄ Óndú ā ɔ́ɔ kɛlā gbōmgbōm nɛ̄hi ŋmá ipú ɔlá mɛ́mla ojuja nɛ̄hi ā, ó ka ɔ́ɔ je aíne ā mɛ́mla íne ɔhá lɛ uwá āa. Ó ka Óndú ā ɔ́ɔ lɛ ɔ́ tá tū isiléeti kú ɛcɔ̄ ɛpa anɔ́ɔ ó kwú uwā ú kpó lɛ anúɔ á.

²³Umósīsi yɔ̄ ī kɛlā gɔbū kpɔ́ ka eko nɛ̄ uwá ɔ́ɔ pó ɔkɔ ŋmá ipú obū eko nɛ̄ ɔlá yɔ̄ ī yi odúúdú ɛfu ā, mɛ́mla obū ɛyí ɛfu ā, eko nɛ̄ ɛfu ā yɔ̄ ī yɔlá ā, aɔ́cɛ́ kú uwā mɛ́mla aótrɛ̄yí kú aípɔ́ɔmā kú uwā ɛ́ɛ le pɛ́ wā ɛgiyí anúɔ

²⁴gaá ka ka Óndú ā, Ɔwɔicō kú aá ɔ́ɔ le ɛ́gɛ́nɛ̄ ɛgahi mɛ́mla ɔfú kú nū nwuné lɛ ā mafú lɛ aá eko nɛ̄ ɔ́ɔ kɛlā lɛ aá ŋmá ipú ɔlá ā. Ó ka ɛ́ɛ ka ka aá le má ka Ɔwɔicō gē kɛlā lɛ ɔlɛɛcɛ nɛ̄ ɔ̄cɛ ɔ́ɔmā lɔfú yēeyī glá kpɔ́.

²⁵Ka aá í dɔ̄ɔkā ō jíkwú má ɛ́ɛ́ gɛ ŋ́. Ohígbū ka ɔlá ā ɔ́ɔ lɔfú kpó aá ŋmó glá ɔ́dāŋ ka aá lɛ ɔkɔ kú Ɔwɔicō pó igbɔhá kpɔ́.

²⁶É ka ɔlɛɛcɛ dóódu ɔ́ yɔ̄ nɛ̄ ɔ́ɔ lɛ ɔkɔ kú Ɔwɔicō nɛ̄ oyēeyī ā pó ŋmá ipú ɔlá, ɛ́gɛ́nɛ̄ aá pó ā ɛ̄cī ɔ́ɔmā, cɛ́ɛ́ kóō klla yēeyī kpɔ́ glá āa?

²⁷É da Umósīsi kóō túblá Ɔwɔicō ajaajɛ, cɛ́ɛ́ ɔdā dóódu nɛ̄ Óndú ā, nōo wɛ Ɔwɔicō kú aá ɔ́ɔ géē ka lɛ ɔ́ ā kóō ka lɛ aá. É ka aá í pó klla í bī ɛlā ā yúklɔ́.

²⁸Umósīsi ka eko nɛ̄ Óndú ā ɔ́ɔ le ɛlā kú uwā nɛ̄ ɛ́ɛ bá ī ka lɛ anúɔ ā pó. Ó ka ɛlā nɛ̄ ɛ́ɛ ka ā wɛ ɔkwɛ̄yi.

²⁹Óndú ā ka ɔ́dāŋ ka ɛ́ɛ géē yɔ̄ ī lɛ ɛdɔ ɔtū ɛ́gɛ́nyā eko dóódu nɛ̄ ɛ́ɛ géē bá ī lɛ ojīlīma ce anúɔ klla lɛyítáajɛ lɛ íne kú anúɔ, ó ka ɔdā dóódu ɔ́ɔ í yɔ̄ ī nyɔ̄ gɔbū lɔhi lɛ uwá mɛ́mla aípɔ́ɔma kú uwá piyóó ipú ɛcɛ nyā.

³⁰Ó ka ɔ́ɔ da anúɔ ka anúɔ nyɔ̄ í da uwá kéē é kwúcē ga ipú áklɔ̄kpɛ kú uwā mɛ́ɛ́nɛ.

³¹Amáŋ ó ka ɔ́ɔ da anúɔ, Umósīsi ā, anúɔ̄ yɔ̄ abɔ́ɔ mla anú. Ó ka anúɔ í kpó odúúdú aíne ā mɛ́mla ɔ́da kú anúɔ ā lɛ anúɔ, nōo wɛ Óndú ā lɛ anúɔ, Umósīsi. Ó ka anúɔ lɛ nwū ācɛ ā. Cɛ́ɛ́ kéē lɛ uwá tū, ipú ajɛ nɛ̄ anúɔ gáā je lɛ uwá ā.

³²Umósīsi da ācɛ Ísrɛ̄lu, kéē má kéē lɛ ɔdā dóódu nɛ̄ Óndú ā, nōo wɛ Ɔwɔicō ɔ́ɔ je íne kú nū lɛ uwá ā, yá gaajɛ. Ó klla da uwá kéē híī tá ō bī íne kú Óndú ā yúklɔ́ ŋ́.

³³Ó da uwá kéē bī odúúdú aíne ā le yúklɔ́. Cɛ́ɛ́ kú ɔdā dóódu kóō yɔ̄ ī gɔbū lɛ uwá lɔhi lɔhi. Ó kéē kē í yēeyī likpō ipú ajɛ nɛ̄ ɛ́ɛ gáā lā anú ā.