Read idoma OBLATŪKÍNE 7 Bible Online

OBLATŪKÍNE 7 - idoma bible

OBLATŪKÍNE 7

¹Umósīsi da ācɛ Ísrɛ̄lu ka Óndú ā, nōo wɛ Ɔwɔicō kú uwá ā géē kpó uwā ga ipú ajɛ nēé gáā mīyɛ kéē lā anú ā. Ó ka ɔ́ɔ géē nū aéwo alɛwa ŋmá ajɛ ā. Ó ka abɔ̄ é bá gē wā ā, Óndú ā ɔ́ɔ géē nū aéwo ahāapa nēe lɛwa klla lɔfú fíyɛ́ uwā ā, bɛ̄cɛ hīla uwá. Aéwo ā bá yɔ̄ á: ācɛ Uhɛ́ti, Ugígāssi, Uhám, Ámɔ̄ri, Ukénan, Upɛ́risi, Ujɛ́būsi.

²Ó da uwá ka eko nɛ̄ Óndú ā, Ɔwɔicō kú uwā ɔ́ɔ kwú ācɛ nēe bá ā ú tá uwā abɔ̄, nēé le uwá yálé, kéē lɛ uwá kpó ŋmó dúúdú. Ó da uwá kéē híī cokónu dúúmā mla uwá ɛ́ɛ́, nēé gē ményīnyi uwā ŋ́.

³Ó da uwá kéē híī lɛ ayí uwā dóódu ɔnyā ɛ́ɛ́ nēé gē cɛ̄ lɛ ācɛ ɔ́ɔmā lɛ ayí uwā ŋ́.

⁴Ó ka ohígbū nēé géē je ɔtū kú ayí uwā pīya ŋmá ɛgiyí Óndú ā, gāá gbā aɔ́wɔ ɔhá kú uwā ɛ̄gbā. Ó ka ɔ́dāŋ ka ɛ̄nyā ɔ́ɔ le yá lɛ ā, Óndú ā ɔ́ɔ í cɔ̄nū mla uwá klla í kpó uwā yíífi bōōbū.

⁵Umósīsi ka abɔ̄ ɔ́ɔ le lɛ ā, ɛ́ɛ lɛ ede mɛ́mla ɛga nēé gē gbɔ̄ɔkɔ lɛ aɔ́wɔ ɔhá ā kpó wúlatāajɛ, kéē klla lɛ ojibó (Ássɛ̄ra) mɛ́mla aójibó ɔhá kú ācɛ ā kpó ca nyɛŋɛnyɛŋɛ, cɛ́ɛ́ kéē lɛ uwá kpó yɔlá.

⁶Ó da uwá kéē yá lɛ ā ohígbū keé wɛ ācɛ otīīhɔ lɛ Óndú ā, nōo wɛ Ɔwɔicō kú uwā ā. Ó klla da uwá ka Óndú ā, nōo wɛ Ɔwɔicō kú uwā ɔ́ɔ lɛ uwā fu ŋmá ipú odúúdú ācɛ nēe bá ipú ɛcɛ ā, cɛ́ɛ́ kú ɛ́ɛ wɛ ācɛ kú nū.

⁷Ó da uwá ka Óndú ā ɔ́ɔ́ yíhɔtū tá uwā klla fu uwá ohígbū kéē lɛwa fíyɛ́ aéwɔhá kú ipú ɛcɛ ā ŋ́. Ó da uwá kéē wɛ ācɛ nēe nyɛ́ fíyɛ́ dúú ipú ɛcɛ á.

⁸Ó ka amáŋ, abɔ̄ Óndú ā yíhɔtū tá uwā nōó klla dɔɔ̄kā kóō lɛ ɛka nōó gbo mla ádáádā uwā tū ā, yá ɛ́ɛ́ nɛ̄ ɔ́ɔ bī ɔfú nɛ̄hi kú nū nya uwá tá ŋmá ɔfiyɛ ipú abɔ̄ kú Uféro, ɔcɛ́ kú Íjīpiti á.

⁹Ó kéē bla ka Óndú ā, nōo wɛ Ɔwɔicō kú uwā ōfōōfūnū ɔ́ɔ wɛ Ɔwɔicō nōo le kpaakpa á. Kóō gē lɛ ɛka nōó gbo ā tū. Ó ka ɔ́ɔ klla í yihɔtū opiyóó tū ayááyí ɔ́muúlúúlā kú ācɛ nēe yíhɔtū tá ɔ̄ klla lɛ aíne kú nū tū ā.

¹⁰Ó ka amáŋ, ɔ́ gáā kpó eko bónū kóō yá ācɛ nēe gē tū ɔ̄ eyījii ā italā ŋ́.

¹¹Ohígbū ɔ́ɔmā, ó da uwá kéē lɛyítáajɛ lɛ ɔdā nɛ̄ Óndú ā nwū uwā ā. Kéē klla lɛyítáajɛ lɛ odúúdú aíne nɛ̄ anúɔ je lɛ uwá ɛ̄cī ɔ́ɔmā ā.

¹²Umósīsi klla yɔ̄ ī kɛlā gɔbū kpɔ́ ka ɔ́dāŋ kéē cɛ̄ aíne, lɛ uwá tū klla bī ɔ̄ le yúklɔ́, cɛ́ɛ́ Óndú ā, nōo wɛ Ɔwɔicō kú uwā ɔ́ɔ í lɛ okónu nɛ̄ ɔ́ɔ ce mla uwá ā tū, klla í ma ihɔtū kú nū nōó ī mɛ ŋ́ mā fú lɛ uwá ɛ́gɛ́nɛ̄ ó cokónu lɛ ádáádā uwā ā.

¹³Ó ka ɔ́ɔ géē yíhɔtū tū uwā klla í hɔ́hā ce uwá, cɛ́ɛ́ kéē nyīla nɛ̄hi klla géē lɛ ayí alɛwa. Ó klla ka ɔ́ɔ géē hɔ́hā ce ajɛ ɛhɔ̄ kú uwā, cɛ́ɛ́ kéē lɛ igwu, ejé, mɛ́mla anɔ̄ kú ɔcí nēé hī ka ólífu ā. Ó ka Óndú ā, ɔ́ɔ í hɔ́hā kú aɔ́dāajɛ ce uwá. Cɛ́ɛ́ kéē lɛ aɛ́na mɛ́mla aálá. Ó ka ɔ́ɔ géē hɛ́ ɛdɔ kú ɔhā nɛ̄ ɔ́ɔ cokónu kú nū lɛ ádáádā aá ā ce aá.

¹⁴Ó da uwá ka ācɛ ɔhá dúúmā í gáā yɔ̄ ipú ɛcɛ nōo géē lɛ ɔhā bɛ̄ɛka uwá ɛ́ɛ́ gɛ ŋ́. Odóódu kú uwā ɔ́ gáā wɛ ɔdɔma ŋ́, kwu ɛna kú uwā í gáā wɛ ɔdɔma ŋ́ dúú.

¹⁵Ó ka Óndú ā ɔ́ɔ í je ōcē obɔ̄bí dóódu nōo gē tū ā ŋ́má ɛgiyí uwā,

¹⁶Ó klla da uwá kéē kwú odúúdú ācɛ nɛ̄ Óndú ā, nōo wɛ Ɔwɔicō kú uwá í cɛ̄ lɛ uwá yálé ā, kpó yíífi dúúdú. Ó kéē híī méyīnyinyi uwā ŋ́. Ó da uwá kéē híī gbā aɔ́wɔ kú ācɛ ɔ́ɔmā ɛ̄gbā ŋ́, ohígbū ka ɔ́ɔmā í wɛ ikwū lɛ uwá.

¹⁷Ó kéē híī ka ipú ɔtū kú uwā ka ācɛ ā lɛ lɛwa fíyɛ́ aá nēé gáā nū uwā ŋmá ajɛ ā glá ŋ́ nɛ̄ ŋ́.

¹⁸Ó kéē híī yá ɛdɔ ufi ɛ́gɔ́ɔmā ŋ́. Ó kéē blakwu ɔdā nɛ̄ Óndú ā, nōo wɛ Ɔwɔicō kú uwā yá Uféro mɛ́mla odúúdú ācɛ kú Íjīpiti ā.

¹⁹Umósīsi kéē blakwu ɛbɛ ō céyi nēé bī eyī kú uwā má, mɛ́mla ɔdā ōhídáagó mɛ́mla úklɔ́ ōhídáagó mɛ́mla abɔ̄ olɔfú mɛ́mla ɔfú nɛ̄hi nɛ̄ Óndú ā, ɔ́ɔ bī lɛ hɛ́ uwā tá ā. Ó ka ɔwɛ ékpónú nɛ̄ Óndú ā, bī le kpó ācɛ Íjīpiti yíífi ā nōó gáā bī le yá ācɛ nɛ̄ ɛ́ɛ bá gē yúúfi uwā eko ɔ́ɔmā lé á.

²⁰Ó kéē géē lɔfú cēyītīkwú kéē pɛ́kwu í tayínū ŋmá ɛgiyí aá, amáŋ Óndú ā géē cē ufi tū uwā iyē, cɛ́ɛ́ ó lɛ uwá kpó ŋmó.

²¹Ó da uwā kéē híī yúúfi uwā ŋ́, ohígbū ka Ɔwɔicō kú uwā ɔ́ɔ yɔ̄ mla uwá. Ka Ɔwɔicō ɔ́ɔ lɔfú nɛ̄hi, ɔ́ɔ kē wɛ Ɔwɔicō nɛ̄ ācɛ í yúúfi nū dúú.

²²Ó ka Óndú ā, nōo wɛ Ɔwɔicō kú uwā ɔ́ɔ géē nū aéwo ā ŋmá iyɔ̄bū ūwā abɔ̄ é gē bá gē wā ɛmɛɛma ā. Ó keé gáā kpó uwā yíífi igbeékpónú ŋ́, ohígbū ka ɔ́dāŋ keé le yá lɛ ā, aɛ́bɛ́ ipácí ɛ́ɛ géē nyīla abɔ́ɔ nēe í je unwalu lɛ uwá.

²³Umósīsi klla da uwá ka, Óndú ā, nōo wɛ Ɔwɔicō kú uwā ā, ɔ́ɔ géē kpó aólɛla kú uwā wā í wu uwá abɔ̄, cɛ́ɛ́ ó lɛ ufi cē tū uwā iyē jāā gbéeko nɛ̄ ɛ́ɛ le aólɛlā ā kpó ŋmó dúúdú.

²⁴Ó ka Óndú ā ɔ́ɔ géē cɛ̄ lɛ uwá yá aɔ́cɛ́ kú aólɛla kú uwā lé. Ó kéē géē kpó uwā ŋmó, jāā gbéeko nēé kwú yíífi ŋmá ajɛ.

²⁵Ó da uwá kéē kwú aójibó kú uwā í kpó yɔlá ŋmáajɛ dúúdú. Ó klla da uwá kéē híī héyīfuúfuú kú ije nɛ̄hɛ́ ámāŋ ugóolu (ije ɔdɔ) kú uwā ŋ́, ɛ́ɛ́ nɛ̄ ɛ́ɛ gē je ɔdā dúú kú uwā ŋ́, ohígbū nōó géē pīya ukpa lɛ uwá. Ohígbū koó wɛ ɔdēelihɔ lɛ Óndú ā.

²⁶Ó klla da uwá kéē híī bī ojibó dúúmā nōo wɛ ɔdēelihɔ ā wā ipú inu kú ɔlɛ́ uwā ŋ́, ohígbū nɛ̄ Óndú ā í tá ɛdɔ ókónu nōó tá lɛ ojibó ā lɛ uwá. Ó ka ɛ́ɛ í lɛ eyī gwū uwā bónū piíí, ohígbū kéē wɛ aɔ́dā nɛ̄ Óndú ā lɛ okónu tá lɛ uwá.