Read idoma OBLATŪKÍNE 8 Bible Online

OBLATŪKÍNE 8 - idoma bible

OBLATŪKÍNE 8

¹Umósīsi klla yɔ̄ ī kɛlā gɔ̄bū kpɔ́ ka ācɛ Ísrɛ̄lu kéē má kéē bī aíne nɛ̄ anúɔ yɔ̄ ī je lɛ uwá ɛ̄cī ɔ́ɔmā ā lɛ yúklɔ́, cɛ́ɛ́ kéē yēeyī kéē ma nyīla īkpō ācɛ. Cɛ́ɛ́ kéē mīyɛ ajɛ nɛ̄ Óndú ā cokónu nū lɛ ádáádā uwā ā.

²Ó da uwá kéē blakwu ɛ́gɛ́nɛ̄ Óndú ā, nōo wɛ Ɔwɔicō kú uwā ɔ́ɔ bī uwā jɔɔ́ɔwɛ ipú iyawu oligbō bū ipú ígbíli, iháyí ofɛpa nēe yɛ ā. Ó ka ɔ́ɔ bī ōwē le já uwā má, cɛ́ɛ́ kóō jé ɔdā nɛ̄ uwá gbɛlá ō yá ā. Ka ɔ́dāŋ nɛ̄ uwá géē lɛyítáajɛ lɛ aíne kú nū.

³Ó ka ɔ́ɔ cɛ̄ lɛ ɛmiyɛ ŋmó uwā, anɔ́ɔ ó je ‘Umaná’ lɛ uwá kéē lé. Ɔdōlé nɛ̄ uwá mɛ́mla ádáádā uwā í lé jéjéē ɛ́ɛ́ ŋ́. Ó ka ɔ́ɔ yá ɛ̄nyā cɛ́ɛ́ kóō nwū uwā ka ɔ́ɔ wɛ ɔdōlé ōfōōfūnū nɛ̄ alɛɛcɛ í lé kéē yēeyī ā ŋ́, amáŋ ɔlɛɛcɛ cɛgbá ɛjɛ̄ɛ̄jī ɔdā dóódu nɛ̄ Óndú ā ka ā.

⁴Ó da uwá ka ipú iháyí ofɛpa ā, īlī kú uwā ɔ́ɔ je gbo ɛnɛ̄ncɛ̄ je híla ŋ́, ɛ́ɛ́ nɛ̄ ikpó kú uwá ɔ́ɔ mi ŋ́.

⁵Ó klla da uwá kéē bla ka Óndú ā, nōo wɛ Ɔwɔicō kú uwā ā ɔ́ɔ gē yá uwā italā ígbɛ́gɛ́nɛ̄ ádā kú ipú ɛcɛ ɔ́ɔ gē yá ayípɛ̄ ɔlɛ́ nū italā ā.

⁶Ó da uwá ka, ohígbū ɔ́ɔmā, ɛ́ɛ géē lɛ íne kú Óndú ā, nōo wɛ Ɔwɔicō kú aá ā tū, oŋmá lɛ ō yá ɔdā nēé ka ipú aíne ā mɛ́mla ufi Óndú ā ō yá.

⁷Umósīsi ka Óndú ā, nōo wɛ Ɔwɔicō kú uwā ɔ́ɔ yɔ̄ gē bī uwā ga ipú ajɛ olɔhi, ajɛ nɛ̄ ɔkpá mɛ́mla njɔɔlɔ bá anú, mɛ́mla ajɛ éŋkpɔ̄ nɛ̄ éŋkpɔ̄ ɔ́ɔ gē pɛ́ ŋmá ɛháajɛ wɛ̄ɛcɛ ga ipú aɔ́pɛ́ mɛ́mla aɛ́fu nɛ̄ŋcɛ́.

⁸Ó ka ɔ́ɔ wɛ ajɛ kú īkpɔ̄dɛ̄hɔ̄, ɔcí ō gwá ufáyin mɛ́mla ɔcí nēé hī Ufígi mɛ́mla ɔcí ɔhá nēé hī ka upɔmegrɛ́nēeti, mɛ́mla ɔcí nēé hī ka ólīifu mɛ́mla ɛnwú.

⁹Ó ka ɔ́ɔ wɛ ajɛ nɛ̄ ɔdōlé ɔ́ɔ gáā ŋá uwá ŋ́, ɛ́ɛ́ nɛ̄ ɔdā dóódu ɔ́ɔ ī kpla uwá ɛhá ŋ́. Ó ka ɛcɔ̄ oje ɔ́ɔ bá ipú ajɛ ā, kéē lɔfú bu oje udɔ ŋmá aɛ́fu kú ipú ajɛ ā glá.

¹⁰Ó klla kéē géē lé ɔdōlé klla í nū ipú ajɛ ɔ́ɔmā, nōo í yá kéē tá Óndú ā, nōo wɛ Ɔwɔicō kú uwā ā, ahínyá, ohígbū ajɛ o yá ɔdɛ̄ɛ̄hɔ̄ nōó je lɛ uwá ā.

¹¹Umósīsi da uwá kéē lɛ ɛlá kwu ɔ́, cɛ́ɛ́ kú ɛ́ɛ híī je mlanyī Óndú ā, nōo wɛ Ɔwɔicō kú uwā ā ŋ́. Ó klla da uwá kéē má kéē lɛyítáajɛ lɛ aíne nɛ̄ anúɔ yɔ̄ gē je lɛ uwá ɛ̄cī ɔ́ɔmā ā.

¹²Ó da uwá ka eko nɛ̄ ɛ́ɛ lɛ odúúdú ɔdā nēé dɔɔ̄kā ō lé ā lɛ, anɔ́ɔ é klla le aínu olɔhi gwó kéē lā anú

¹³nɛ̄ aɛ́na mɛ́mla aálá kú uwā le kpó nyīla, ugóolu (oje ɔdɔ) mɛ́mla oje nɛ̄hɛ́ mɛ́mla ɔdā dóódu nēé lɛ ā le nyīla klla kwú nwuné,

¹⁴ó kéē má kéē híī gbɔɔ́ ō yɔ́bɔ́cɛ je mlanyī Óndú ā, nōo wɛ Ɔwɔicō kú uwā, nōo kpó uwā bɛ̄cɛ ŋmá ajɛ kú Íjīpiti, nōo wɛ ajɛ kú ɔfiyɛ ā ā ŋ́.

¹⁵Ó ka Óndú ā ɔ́ɔ kpó uwā bū ígbíli obɔ̄bí nɛ̄hi ā nɛ̄ aɛ́gwā obɔ̄bí mɛ́mla aɛ́na o cɛ̄ ɔ̄cɛ bá ā. Ó ka Óndú ā, ɔ́ɔ yá kú éŋkpɔ̄ kóō lɛ tū bɛ̄cɛ ŋmá ipú ápátɛ́cɔ̄ lɛ uwá.

¹⁶Ó klla ka ɔ́ɔ je ɔdōlé nēé hī umaná, nɛ̄ ádā uwā í lé jéjéē ɛ́ɛ́ ŋ́ má, lɛ uwá ipú ígbíli ā. Ó ka ɔ́ɔ cɛ̄ lɛ uwá móōwē nɛ̄hi, cɛ́ɛ́ kóō já uwā má, cɛ́ɛ́ igbhāajɛ ɛɛ́, ó lɛ ɔhā kú aɔ́dā olɔhi hɛ́ ce uwá.

¹⁷Umósīsi klla da uwá ka ɛ́ɛ híī gbɛlá ka ogblábɔ̄ mɛ́mla ɔfú kú abɔ̄yī uwā nɛ̄ ɛ́ɛ bī le lɛ agbénú ā ŋ́.

¹⁸Ó kéē bla ka Óndú ā, nōo wɛ Ɔwɔicō kú uwā ɔ́ɔ gē je ɔfú lɛ uwá kéē je gbagbénú á. Ó ka ɔ́ɔ yá lɛ ā, ohígbū koó lɛ abɔ̄ bī ɛka nōó gbo mla ádáádā uwā ā kwu eko ɔ́ɔmā kpɔ́ ɛ́ɛ́.

¹⁹Ó da uwá ka ɔ́dāŋ kéē kwú mlanyī Óndú ā, nōo wɛ Ɔwɔicō kú uwā ā, nyɔ̄ gaá gbɔɔ́ ō gbā aɔ́wɔ ɔhá ɛ̄gbā. Ó ka anúɔ lɛ uwá ahɔ̄ pi ɛ̄cī ɔ́ɔmā kéē géē kpó uwā yíífi piíí.

²⁰Ó klla da uwá ka ɔ́dāŋ keé lɛyítáajɛ lɛ Óndú ā ŋ́, ɔ́ɔ géē kpó uwā yíífi ɛ́gɛ́nɛ̄ ó gáā kpó aéwo nɛ̄ bá iyɔ̄bū uwā yíífi abɔ̄ é géē yɔ̄ ī yɛ gɔbū ā ā.