Read idoma OBLATŪKÍNE 9 Bible Online

OBLATŪKÍNE 9 - idoma bible

OBLATŪKÍNE 9

¹Umósīsi da uwá nēe wɛ ācɛ Ísrāɛl ā ka ɛ̄cī ɔ́ɔmā, ɛ́ɛ gáā bēhé Ísu kú Ujɔ́dan gáā mīyɛ ajɛ kú aéwɔhá, ācɛ nēe nwuné klla lɔfú fíyɛ́ uwā nɛ̄hi ā ɛɛ́. Ācɛ nɛ̄ aígelī kú uwā ā nwuné nɛ̄hi, é klla lɛ igá kú ɔdɔ nōo licō í kwu ɔkpáncō ā hɛ́ tū uwā.

²Ó klla da uwá ka ācɛ ā abɔ̄yī uwā jɛ̄ klla lɔfú nɛ̄hi. Ó keé wɛ aɔ́báagwu. Ka ɛ́ɛ tɛtɛ lɛ ɔ̄kā kú uwá pó, ka ɔ̄cɛ dúúmā ɔ́ gē fū uwá iyē ŋ́ mɛɛ́.

³Ó da uwá ka amáŋ, ɛ́ɛ géē má ɔ̄ eyī abɔ̄yī uwā ka Óndú ā, nōo wɛ Ɔwɔicō kú uwā ā, ɔ́ɔ géē tá iyɔ̄bū uwā í kpó ɛjɛ̄ɛ̄jī ɔdā dóódu nōo yɔ̄ ɔwɛ kú nū ā yɔlá ɛ́gɛ́nɛ̄ ɔlá kú ácí ugba gē yi ɔdā dóódu tāajɛ ā. Ó ka Óndú ā, ɔ́ɔ géē yá aólɛlā kú uwā lé iyɔbū uwā, abɔ́ɔ é géē bá ī wā igbīhi ā. Ó klla da uwá ka ɛ́ɛ géē nū aólɛlā kú uwā bɛ̄cɛ ŋmá ajɛ kú abɔ̄yī uwā, klla í kpó uwā yíífi fíyaa, ɛ́gɛ́nɛ̄ Óndú ā ɔ́ɔ da uwá ā.

⁴Ó da uwá ka igbīhi nɛ̄ Óndú ā, nōo wɛ Ɔwɔicō kú uwá ā, ɔ́ɔ lɛ aólɛlā kú uwā nū bɛ̄cɛ hīla uwá, é híī da īyī uwā ka, aá ɔ́ɔ mīyɛ ajɛ ā ohígbū ka aá cíkā lɛ ɔ́ɔ nɛɛ ŋ́. Ehée, Óndú ā ɔ́ɔ nū ācɛ ā bɛ̄cɛ, ohígbū kéē wɛ ācobɔ̄bíipú.

⁵Ó wɛ ka ɛ́ɛ lɔhi klla yá ɔdā nōo lɔhi ɛ́ɛ́, nɛ̄ Óndú ā cɛ̄ lɛ uwá mīyɛ ajɛ kú ācɛ ā ŋ́. Ó ka Óndú ā ɔ́ɔ géē nū ācɛ ā bɛ̄cɛ, ohígbū ka ācɛ ā bɔ̄bíipú. Ó ka ɔ́ɔ klla tíne ō lɛ ɛka nōó gbo mla ádáádā uwā, Ébrahām, Áyísīki mɛ́mla Ujékɔ̄pu ā yá jīla.

⁶Ó da uwá ka uwá abɔ̄yī uwā jé péee ka Óndú ā ɔ́ɔ́ je ajɛ olɔhi ā lɛ uwá, ohígbū kéē yá ɔdā olɔhi nɛɛ ŋ́. Ó ka ɛ́ɛ wɛ ācɛ o yá īkpɛ̄yí olɔfú nɛ̄hi.

⁷Umósīsi klla da uwá kéē híī je mlanyī ɛ́gɛ́nɛ̄ é yá Óndú ā, nōo wɛ Ɔwɔicō kú uwā ā, ɔdā iwɔ́tū ipú ígbíli ā ŋ́. Ogbɔɔ́ ŋmá ɛ̄cī nēé bɛ̄cɛ ŋmá ajɛ kú Íjīpiti, jāā gaá kwu ɛ̄cī kú eko ɔ́ɔmā, nēé bá abɔ́ɔ āa. Ó ka ɛ́ɛ yíkpɛ̄yí olɔfú tá Óndú ā.

⁸Ó klla da uwá ka ɛ́ɛ yá Óndú ā ɔdā iwɔ́tū, nōó le cɔ̄nū nɛ̄hi, nōo tine ō je uwá kpó yíífi dúú eko nɛ̄ ɛ́ɛ bá ɛgiyí ɛfu kú Usáyínāyi ā.

⁹Ó ka anúɔ nyɔ̄ ga ɛyí ɛfu cɛ́ɛ́ kú anúɔ gāá mīyɛ Usiléeti kú ɛcɔ̄ nɛ̄ Óndú ā tá ɛka nōó gbo mla uwá ā tū ɔ̄ ā. Ó ka anúɔ yɔ̄ abɔ́ɔ ɛ̄cī ofɛpa, nɛ̄ anúɔ í lé ámāŋ gwá ɔdā dúúmā ŋ́.

¹⁰Ó ka Óndú ā ɔ́ɔ kwú usiléeti kú ɛcɔ̄ ɛpa, nōó bī abɔ̄ kú nū le ɛlā nōó ka lɛ uwá ŋmá ipú ɔlá, ɛ̄cī nɛ̄ ɛ́ɛ jīla mla anú īkpɛ́fu ā tū ɔ̄ á ú lɛ anúɔ.

¹¹Ó ka igbīhi ɛ̄cī ofɛpa ɔ́ɔmā, Óndú ā kwú usiléeti kú ɛcɔ̄ ɛpa nōó tá ɛka nōó gbo ā tū ɔ̄ ā ú kpó lɛ anúɔ.

¹²Ó ka anɔ́ɔ Óndú ā ɔ́ɔ da anúɔ ka anúɔ wā ajɛ ŋmá ɛyí ɛfu ā fíyaa, ohígbū ka ācɛ nɛ̄ anúɔ kpó bɛ̄cɛ ŋmá Íjīpiti ā, le nyíleyī ɛɛ́, klla le ɔdōbɔ̄bí yá ɛɛ́. Ó ka ɛ́ɛ kwú pīyeyī ŋmá aíne nɛ̄ anúɔ je lɛ uwá ā, gaá lɛ ojibó ma lɛ īyī uwá ɛɛ́.

¹³Ó ka anɔ́ɔ Óndú ā ɔ́ɔ da anúɔ ka anúɔ jé ɛ́gɛ́nɛ̄ ācɛ nēe bá ā lɛ ɔtū lɛ ā.

¹⁴Ó ka anúɔ híī kwú anúɔ tū gɛ ŋ́, cɛ́ɛ́ ká anúɔ lɛ uwá kpó yíífi ŋmá ajɛ, nɛ̄ ɔ̄cɛ dóódu í klla gáā blakwu uwá ɛ́ɛ́ gɛ ŋ́. Cɛ́ɛ́ anúɔ kwú anúɔ ú pīya ádā kú éwo nēe lɛwa klla lɛ ɔfú fíyɛ́ uwā nɛ̄hi.

¹⁵Anɔ́ɔ ó ka anúɔ le pīyeyī gbɔɔ́ ō wā ajɛ ŋmá ɛyí ɛfu ā, bī usiléeti kú ɛcɔ̄ ɛpa nōó tá ɛka ā tū ɔ̄ ā. Ó ka ɔlá yɔ̄ i yi ŋmá ɛfu ā.

¹⁶Ó ka anúɔ má ka ɛ́ɛ tá kóō lɛyítáajɛ lɛ aíne nɛ̄ Óndú ā, nōo wɛ Ɔwɔicō kú uwā ā ɔ́ɔ je lɛ uwá ā. Ó ka ɛ́ɛ le íne kú Óndú ā bīya, ōŋmá lɛ ojibó kú oje nōo lɛbɛ̄ɛka ɛna nēé ma lɛ īyī uwā ā.

¹⁷Umósīsi klla da uwá ka anúɔ le cɔ̄nū kwú usiléeti kú ɛcɔ̄ ā ú tá fīyāajɛ, anɔ́ɔ é kwú kpó ca nyɛŋɛnyɛŋɛ abáábɔ́ɔ á.

¹⁸Anɔ́ɔ ó ka anúɔ lɛ eyī pīya klá ajɛ iyɔ̄bū Ɔwɔicō bɛ̄ɛka eko otɛtɛ ā, ɛ̄cī ofɛpa, anúɔ í lé ɔdōlé ɛ́ɛ́ nɛ̄ anúɔ gē gwá éŋkpɔ̄ ŋ́. Ohígbū odúúdú íne nēé bīya, ōŋmá lɛ ɔdōbɔ̄bí nēé yá ipéyī Óndú ā, nōo cɛ̄ lɛ Óndú ā kwú cɔ̄nū ā.

¹⁹Ó ka ohígbū ka anúɔ yɔ̄ ī gē yúúfi ícɔ̄nū nɛ̄hi kú Óndú ā lɛyíkwu uwá, nōo cɛ̄ lɛ Óndú ā le tūtū kóō kpó uwā yíífi ŋmá ajɛ. Ó ka amáŋ, Óndú ā ɔ́ɔ le ahɔ̄ jē lɛ anúɔ eko ɔ́ɔmā kpɔ́.

²⁰Umósīsi klla ka kpɔ́ ka Óndú ā ɔ́ɔ le cɔ̄nū mla Árɔ̄ni tíne kóō je ɔ́ ŋmó. Anɔ́ɔ anúɔ le ɔkɔ gbā lɛ Óndú ā, ohígbū nū eko ɔ́ɔmā dúú á.

²¹Ó ka anúɔ kwú ojibó kú ɛna nɛ̄ ɛ́ɛ ma ā ú ca nyɛŋɛnyɛŋɛ, klla kwú ɔ̄ ú kpó tɔ̄lá, kóō kwú yi tāajɛ. Ó ka anúɔ le ɔ́ gbā jāā gbéeko nōó kwú pīya ewo, anɔ́ɔ anúɔ kwú ewo kú nū ā ú pīya tū áyɔ́kpá, nōo gē pɛ́ ŋmá ikpó kú ɛfu ā á.

²²Ó klla da uwá ka ɛ́ɛ yá Óndú ā, nōo wɛ Ɔwɔicō kú uwā ā, ɔdā íwɔ́tū ajɛ kú Utábēra mɛ́mla Umása mɛ́mla Ukibrɔtu Uhatáfa.

²³Ó da uwá ka eko nɛ̄ Óndú ā ɔ́ɔ tū uwā ɛhɔ̄ ŋmá Ukadiss Ubanéya kéē nyɔ̄ gāá mīyɛ ajɛ nɛ̄ anúɔ je lɛ uwá ā, ó ka amáŋ ɛ́ɛ yá īkpɛ̄yí olɔfú tá ɔ́da ɔ́ɔmā nɛ̄ Óndú ā, nōo wɛ Ɔwɔicō kú uwā, ɔ́ɔ je lɛ uwá ā. Ó ka ɛ́ɛ kpɔ́tūce ɔ́ ɛ́ɛ́ nɛ̄ ɛ́ɛ gē tɛ̄yíwāajɛ lɛ ɛlā kú nū ŋ́.

²⁴Ó klla da uwá ka oŋmá ɛ̄cī nɛ̄ anúɔ jé uwá ā, ɛ́ɛ húmáyī yíkpɛ̄yí olɔfú tá Óndú ā.

²⁵Ó ka anúɔ gwutá ajɛ lɛ eyī pīya klá ajɛ iyɔ̄bū Óndú ā yɔ̄ gē gbɔ̄ɔkɔ lɛ ɔ́ ohígbū ɔdā nɛ̄ ɛ́ɛ yá ā, ɛ̄cī ofɛpa, ohígbū ka Óndú ā ɔ́ɔ le abɔ̄ kwu ɔtū ka anúɔ géē je uwá kpó yíífi.

²⁶Ó ka anúɔ gbɔ̄ɔkɔ lɛ Óndú ā kóō híī kpó ācɛ ɔlɛ́ nū yíífi ŋ́. Ācɛ ɔlɛ́ nū nōó hɛ́tá ŋmá ajɛ kú Íjīpiti mla ɔfú nɛ̄hi kú nū ā.

²⁷Ó ka anúɔ da ɔ́ kóō blakwu ācocɛ̄hɔ̄ kú nū, Ébrahām, Áyísīki mɛ́mla Ujékɔ̄pu, kóō lɛ ɛlá wu ɔtū olɔfú, ɔtū obɔ̄bí mɛ́mla ɔtū ɔ́bíipú kú ācɛ ā ŋ́.

²⁸Ó ka anúɔ da ɔ́ ka ɔ́dāŋ koó i lɛ ā, ācɛ kú Íjīpiti géē ka ka ɔ́ɔ lɔfú kpó ācɛ ɔlɛ́ nū ga ipú ajɛ nɛ̄ ɔ́ɔ cokónu lɛ uwá ā glá ŋ́. É géē ka ɔ́ɔ kpó ācɛ ɔlɛ́ nū ā wā ipú ígbíli cɛ́ɛ́ kóō lɛ uwá kpó ŋmó, ohígbū kéē he ɔ́ ɔtū ŋ́.

²⁹Ó ka anúɔ da ɔ́ ka ɔ́ɔ mɔ́ɔ̄ ɛ́ɛ́, ācɛ ā wɛ ācɛ ɔlɛ́ nū nōó fu cɛ́ɛ́ kéē wɛ ákú nū. É wɛ ācɛ nōó kpó bɛ̄cɛ ŋmá ajɛ kú Íjīpiti mla ɔfú nɛ̄hi kú nū ā nɛ.